Bigg Boss 17: ಹಿಂದಿ ಬಿಗ್‌ಬಾಸ್‌ ಈ ಭಾನುವಾರ ಆರಂಭ; ಸಲ್ಮಾನ್ ಖಾನ್ ರಿಯಾಲ್ಟಿ ಶೋನ ಸಂಭಾವ್ಯ ಸ್ಪರ್ಧಿಗಳ ಪಟ್ಟಿ ಇಲ್ಲಿದೆ ನೋಡಿ
Bigg Boss 17 contestants list: ಇದೇ ಭಾನುವಾರ ಅಕ್ಟೋಬರ್‌ 15ರಂದು ಬಿಗ್‌ಬಾಸ್‌ 17 ಹಿಂದಿ ರಿಯಾಲ್ಟಿ ಶೋ ಆರಂಭವಾಗಲಿದೆ. ಸಲ್ಮಾನ್ ಖಾನ್ ನಡೆಸಿಕೊಡುವ ಈ ರಿಯಾಲ್ಟಿ ಶೋದಲ್ಲಿ ಭಾಗವಹಿಸುವ ಸಂಭಾವ್ಯ ಅಭ್ಯರ್ಥಿಗಳ ಪಟ್ಟಿ ಇಲ್ಲಿದೆ.
ಬೆಂಗಳೂರು: ಕನ್ನಡ ಬಿಗ್‌ಬಾಸ್‌ ಶೋ ಆರಂಭವಾಗಿ ಒಂದು ವಾರವಾಗುತ್ತ ಬಂದಿದ್ದು, ಹಿಂದಿ ಬಿಗ್‌ಬಾಸ್‌ 17 ಪ್ರೀಮಿಯರ್‌ ಈ ಭಾನುವಾರ (ಅಕ್ಟೋಬರ್‌ 15) ಆರಂಭವಾಗಲಿದೆ. ನಟಿ ಅಂಕಿತಾ ಲೋಖಂಡೆ, ಅವರ ಪತಿ ವಿಕ್ಕಿ ಜೈನ್ ಮತ್ತು ಬರಹಗಾರ-ಸ್ಟ್ಯಾಂಡ್‌ಅಪ್ ಕಾಮಿಡಿಯನ್ ಮುನಾವರ್ ಫರುಕಿ ಸೇರಿದಂತೆ ಹಲವು ಸ್ಪರ್ಧಿಗಳು ಈ ಶೋನಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಗ್ರ್ಯಾಂಡ್‌ ಪ್ರೀಮಿಯರ್‌ಗೆ ಮೂರು ದಿನವಷ್ಟೇ ಉಳಿದಿದ್ದು, ಬಿಗ್‌ಬಾಸ್‌ ಮನೆಯೊಳಗೆ ಪ್ರವೇಶಿಸುವ ಸಂಭಾವ್ಯ ಅಭ್ಯರ್ಥಿಗಳ ಪಟ್ಟಿ ಇಲ್ಲಿದೆ.
ಮುನಾವರ್ ಫಾರುಕಿ (Munawar Faruqui)
ಕಳೆದ ವರ್ಷ ಕಂಗನಾ ರಣಾವತ್ ಅವರ ರಿಯಾಲಿಟಿ ಶೋ ಲಾಕ್ ಅಪ್ ಗೆದ್ದ ಬಳಿಕ ಮುನಾವರ್ ಅವರನ್ನು ಬಿಗ್‌ಬಾಸ್‌ಗೆ ಆಹ್ವಾನಿಸಲಾಗಿತ್ತು. ಆದರೆ, ಅವರಿಗೆ ಬರಲು ಸಾಧ್ಯವಾಗಿರಲಿಲ್ಲ. ಈ ವರ್ಷ ಮತ್ತೆ ಇವರ ಹೆಸರು ಚಾಲ್ತಿಯಲ್ಲಿದೆ. ಇವರು ಈ ಬಾರಿಯ ಬಿಗ್‌ಬಾಸ್‌ನಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಅಂಕಿತಾ ಲೋಖಂಡೆ-ವಿಕ್ಕಿ ಜೈನ್ (Ankita Lokhande-Vicky Jain)
ಅಂಕಿತಾ ಲೋಖಂಡೆ ಹಿಂದಿ ಕಿರುತೆರೆ ಪ್ರೇಕ್ಷಕರ ಅಚ್ಚುಮೆಚ್ಚಿನ ಸೆಲೆಬ್ರಿಟಿ. ಪವಿತ್ರಾ ರಿಷ್ಟಾದಲ್ಲಿ ಇವರ ಅಭಿನಯ ಅಮೋಘವಾಗಿತ್ತು. ಮಣಿಕರ್ಣಿಕಾದಂತಹ ಸಿನಿಮಾಗಳಲ್ಲಿಯೂ ನಟಿಸಿದ್ದಾರೆ. ಇವರ ನಟನೆಗೆ ಪ್ರೇಕ್ಷಕರು ಉಘೇ ಉಘೇ ಎಂದಿದ್ದಾರೆ. ಬಿಗ್‌ಬಾಸ್‌ 17ನಲ್ಲಿ ಭಾಗವಹಿಸುವ ಸಂಭಾವ್ಯ ಅಭ್ಯರ್ಥಿಗಳಲ್ಲಿ ಇವರ ಹೆಸರೂ ಕೇಳಿಬರುತ್ತಿದೆ. ಆದರೆ, ಬಿಗ್‌ಬಾಸ್‌ನಲ್ಲಿ ಪಾಲ್ಗೊಳ್ಳಲು ನೀಡುವ ಸಂಭಾವನೆ ಕುರಿತು ಇನ್ನೂ ಇವರು ಅಂತಿಮ ನಿರ್ಧಾರಕ್ಕೆ ಬಂದಿಲ್ಲ ಎನ್ನಲಾಗುತ್ತಿದೆ.
ಜಿಗ್ನಾ ವೋರಾ (Jigna Vora)
ಪತ್ರಕರ್ತ ಜಿಗ್ನಾ ವೋರಾ ಹಲವು ಕಾರಣಗಳಿಂದ ಸುದ್ದಿಯಲ್ಲಿದ್ದವರು. ಹಿರಿಯ ಪತ್ರಕರ್ತರ ಹತ್ಯೆಗೆ ಸಂಚು ರೂಪಿಸಿದ ಆರೋಪದಲ್ಲಿ ಜೈಲು ಪಾಲಾಗಿದ್ದರು. ಇತ್ತೀಚೆಗೆ ಹನ್ಸಲ್ ಮೆಹ್ತಾ ಅವರ ಸ್ಕೂಪ್ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಿದ್ದು, ಮತ್ತೆ ಈ ಪ್ರಕರಣದ ಕುರಿತು ಚರ್ಚೆಗಳಾಗುತ್ತಿವೆ. ಜಿಗ್ನಾ ಬಿಗ್ ಬಾಸ್ 17 ರಲ್ಲಿ ಸ್ಪರ್ಧಿಯಾಗಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಇಂಡಿಯನ್ ಎಕ್ಸ್‌ಪ್ರೆಸ್ ವರದಿ ದೃಢಪಡಿಸಿದೆ.
ಮನ್ನಾರಾ ಚೋಪ್ರಾ
ಪ್ರಿಯಾಂಕಾ ಚೋಪ್ರಾ ಅವರ ಸೋದರ ಸಂಬಂಧಿ ಮನ್ನಾರಾ ಚೋಪ್ರಾ ಕೂಡ ಈ ವರ್ಷ ಸಲ್ಮಾನ್ ಖಾನ್ ಶೋನ ಭಾಗವಾಗಲಿದ್ದಾರೆ ಎಂದು ವದಂತಿಗಳು ತಿಳಿಸಿವೆ. ಮನ್ನಾರಾ ಅವರು ಥಿಕ್ಕಾ ಮತ್ತು ರೋಗ್ ಸೇರಿದಂತೆ ಕೆಲವು ತಮಿಳು ಮತ್ತು ತೆಲುಗು ಚಲನಚಿತ್ರಗಳಲ್ಲಿ ನಟಿಸಿದ್ದಾರೆ. ಬಾಲಿವುಡ್‌ನ ಜಿದ್‌ ಚಿತ್ರಕ್ಕೂ ಕೆಲಸ ಮಾಡಿದ್ದಾರೆ.
ಮನಸ್ವಿ ಮಾಮಗೈ
ಫೆಮಿನಾ ಮಿಸ್ ಇಂಡಿಯಾ ವರ್ಲ್ಡ್ 2010ನಲ್ಲಿ ಗೆದ್ದಿರುವ ಮನಸ್ವಿ ಮಾಡೆಲ್‌ ಆಗಿ ಜನಪ್ರಿಯತೆ ಪಡೆದಿದ್ದಾರೆ. ಪ್ರಭುದೇವ್‌ ಅವರ ಆಕ್ಷನ್‌ ಜಾಕ್ಸನ್‌ ಚಿತ್ರದಲ್ಲಿ ಅಜಯ್‌ ದೇವಗನ್‌ ಜತೆಗೆ ವಿಲನ್‌ ಆಗಿ ಚಿತ್ರರಂಗಕ್ಕೆ ಆಗಮಿಸಿದ್ದರು. ಕಾಜೋಲ್ ಅವರ ವೆಬ್ ಶೋ ದಿ ಟ್ರಯಲ್‌ನಲ್ಲಿದ್ದರು. ಅಮೇರಿಕನ್ ಗೇಮ್ ಶೋ ದಿ ಪ್ರೈಸ್ ಈಸ್ ರೈಟ್‌ನಲ್ಲಿ ಗೆಲುವು ಪಡೆದಿದ್ದಾರೆ. ಇವರು ಕೂಡ ಬಿಗ್‌ಬಾಸ್‌ 17ನಲ್ಲಿ ಭಾಗವಹಿಸಲಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಐಶ್ವರ್ಯಾ ಶರ್ಮಾ ಮತ್ತು ನೀಲ್ ಭಟ್
ನಟಿ ಐಶ್ವರ್ಯಾ ಶರ್ಮಾ ಇತ್ತೀಚೆಗೆ ಖತ್ರೋನ್ ಕೆ ಖಿಲಾಡಿ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಈಗ ಅವರ ಪತಿ ನೀಲ್ ಭಟ್ ಅವರೊಂದಿಗೆ ಬಿಗ್ ಬಾಸ್ 17 ಗೆ ಪ್ರವೇಶಿಸಲು ಸಿದ್ಧರಾಗಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಐಶ್ವರ್ಯಾ ಶರ್ಮಾ ಅವರು ಘುಮ್ ಹೈ ಕಿಸಿಕೆ ಪ್ಯಾರ್ ಮೇಯಿನ್ ಮತ್ತು ಸ್ಮಾರ್ಟ್ ಜೋಡಿಯಂತಹ ಶೋಗಳಲ್ಲಿ ಭಾಗವಹಿಸಿದ್ದಾರೆ ಎಂದು ಕೂಡ ವದಂತಿ ಹರಡಿದೆ.
ಇಷ್ಟು ಜನರು ಮಾತ್ರವಲ್ಲದೆ ಅರ್ಮಾನ್ ಮಲಿಕ್, ಕನ್ವರ್ ಧಿಲ್ಲೋನ್, ಇಶಾ ಮಾಲ್ವಿಯಾ, ಎಲ್ವಿಶ್ ಯಾದವ್‌ನ ಮಾಜಿ ಕೀರ್ತಿ ಮೆಹ್ರಾ, ಟಿಕ್‌ಟೋಕರ್ ಫೈಜ್ ಬಲೋಚ್, ಜೇ ಸೋನಿ, ಸಂದೀಪ್ ಸಿಕ್ಕಂದ್ ಮತ್ತು ಯೂಟ್ಯೂಬರ್‌ ಅನುರಾಗ್ ದೋಭಾಲ್ ಮುಂತಾದವರು ಈ ಬಾರಿಯ ಬಿಗ್‌ಬಾಸ್‌ 17ನಲ್ಲಿ ಭಾಗವಹಿಸಲಿದ್ದಾರೆ ಎನ್ನಲಾಗಿದೆ. ಇನ್ನು ಮೂರು ದಿನಗಳಲ್ಲಿ ಈ ಎಲ್ಲಾ ವದಂತಿಗಳಿಗೆ ತೆರೆ ಬೀಳಲಿದೆ.
