ಪುಷ್ಪ 2 ರಿಲೀಸ್‌ ದಿನ ಘೋಷಣೆ ಆಗ್ತಿದ್ದಂತೆ, ಸಿಂಗಂ ಅಜಯ್‌ ದೇವಗನ್‌ ಎದೆಯಲ್ಲಿ ಢವ ಢವ!
ಪುಷ್ಪ 2 ಚಿತ್ರದ ಬಿಡುಗಡೆ ದಿನಾಂಕ ಅಧಿಕೃತವಾಗಿ ಘೋಷಣೆ ಆಗ್ತಿದ್ದಂತೆ, ಅಜಯ್‌ ದೇವಗನ್‌ ಮತ್ತು ನಿರ್ದೇಶಕ ರೋಹಿತ್‌ ಶೆಟ್ಟಿ ಎದೆಯಲ್ಲಿ ನಡುಕ ಶುರುವಾಗಿದೆ. ಆಗಸ್ಟ್ 15ರಂದೇ ಈ ಎರಡೂ ಸಿನಿಮಾಗಳು ರಿಲೀಸ್‌ ಆಗಲಿವೆ. ಪುಷ್ಪ ಆಗಮನದ ಹಿನ್ನೆಲೆಯಲ್ಲಿ ಸಿಂಗಂ ಅಗೈನ್‌ ಚಿತ್ರ ಮುಂದಕ್ಕೆ ಹೋಗುವ ಸಾಧ್ಯತೆಯೂ ಹೆಚ್ಚಾಗಿದೆ.
Pushpa 2: ಅಲ್ಲು ಅರ್ಜುನ್‌ ನಟನೆಯ ಪುಷ್ಪ 2 ಸಿನಿಮಾ ಕೊನೆಗೂ ಬಿಡುಗಡೆ ದಿನಾಂಕ ಘೋಷಣೆ ಮಾಡಿದೆ. 2024ರ ಆಗಸ್ಟ್ 15ರ ಸ್ವಾತಂತ್ರ್ಯ ದಿನದಂದು ಈ ಚಿತ್ರ ವಿಶ್ವಾದ್ಯಂತ ಬಿಡುಗಡೆ ಆಗಲಿದೆ. ಬಿಡುಗಡೆ ದಿನಾಂಕದ ಬಗ್ಗೆ ಕೌತುಕದಿಂದಲೇ ಕಾದಿದ್ದ ಸಿನಿಮಾ ಪ್ರೇಮಿಗಳಿಗೆ ಸಿಹಿ ಸುದ್ದಿ ನೀಡಿತ್ತು ಚಿತ್ರತಂಡ. ಹೊಸ ಪೋಸ್ಟರ್‌ ಮೂಲಕ ಅಲ್ಲು ಅರ್ಜುನ್‌ ಅವರ ಲುಕ್‌ ಮಗದೊಮ್ಮೆ ಗಮನ ಸೆಳೆದಿತ್ತು. ಇದೀಗ ಪುಷ್ಪ 2 ಸಿನಿಮಾ ಹೀಗೆ ಬಿಡುಗಡೆ ದಿನಾಂಕ ಘೋಷಿಸಿದ್ದೇ ತಡ, ಅಜಯ್‌ ದೇವಗನ್‌ ಎದೆಯಲ್ಲಿ ನಡುಕ ಶುರುವಾಗಿದೆ!
ಬಾಲಿವುಡ್‌ನಲ್ಲಿ ಅಜಯ್‌ ದೇವಗನ್‌ ಮತ್ತು ನಿರ್ದೇಶಕ ರೋಹಿತ್‌ ಶೆಟ್ಟಿ ಜೋಡಿ ಹಲವು ಹಿಟ್‌ ಸಿನಿಮಾಗಳನ್ನು ನೀಡಿದೆ. ಅದರಲ್ಲೂ ಸಿಂಗಂ ಸರಣಿ ಬಾಲಿವುಡ್‌ನ ಸೂಪರ್‌ಹಿಟ್‌ ಸಿರೀಸ್. ಈ ಸಿನಿಮಾಕ್ಕೆ ದಶಕದ ನಂಟಿದೆ. ಇದೀಗ ಸಿಂಗಂ ಅಗೈನ್‌ ಸಿನಿಮಾ ಕೆಲಸಗಳಲ್ಲಿ ಈ ಜೋಡಿ ಬಿಜಿಯಾಗಿದೆ. ಚಿತ್ರೀಕರಣದಲ್ಲೂ ತೊಡಗಿಸಿಕೊಂಡಿದೆ. ಈ ಸಿನಿಮಾದ ಬಿಡುಗಡೆಗೂ ದಿನಾಂಕ ನಿಗದಿಯಾಗಿದ್ದು, ಆ ದಿನಾಂಕವೇ ಇಡೀ ತಂಡಕ್ಕೆ ತಲೆನೋವಾಗಿ ಪರಿಣಮಿಸಿದೆ. ಅದಕ್ಕೆ ಕಾರಣ ಪುಷ್ಪರಾಜನ ಎಂಟ್ರಿ.
ಪುಷ್ಪ 2 ಸಿನಿಮಾಕ್ಕೂ ಮೊದಲೇ ಆಗಸ್ಟ್ 15ರಂದು ನಾವು ಬರಲಿದ್ದೇವೆ ಎಂದಿತ್ತು ಸಿಂಗಂ ಅಗೈನ್‌ ತಂಡ. ಇದೀಗ ಅದೇ ದಿನವನ್ನೇ ಲಾಕ್‌ ಮಾಡಿಕೊಂಡಿದ್ದಾನೆ ಪುಷ್ಪ. ಕಳೆದ ವರ್ಷ ಬಿಡುಗಡೆಯಾಗಿದ್ದ ಪುಷ್ಪ ಪಾರ್ಟ್‌ 1 ಚಿತ್ರಕ್ಕೆ ಹಿಂದಿಯಲ್ಲಿ ದೊಡ್ಡ ಓಪನಿಂಗ್‌ ಸಿಕ್ಕಿತ್ತು. ಬಾಕ್ಸ್‌ ಆಫೀಸ್‌ನಲ್ಲಿ 100 ಪ್ಲಸ್‌ ಕೋಟಿ ಮೊತ್ತವನ್ನು ಹಿಂದಿ ಭಾಷಿಕ ರಾಜ್ಯಗಳಿಂದಲೇ ಹರಿದುಬಂದಿತ್ತು. ಇತ್ತ ಸಿಂಗಂ ಸಿನಿಮಾ ಸಣ್ಣದೇನಲ್ಲ. ಸಿಂಗಂ ಚಿತ್ರಕ್ಕೂ ಅದರದೇ ಆದ ನೋಡುಗ ವರ್ಗವಿದೆ. ಆದರೆ, ಸದ್ಯ ಬಾಲಿವುಡ್‌ನಲ್ಲಿ ಪುಷ್ಪರಾಜ ಹವಾ ಚಾಲ್ತಿಯಲ್ಲಿದೆ. ಹಾಗಾಗಿ ಈ ಎರಡೂ ಸಿನಿಮಾಗಳು ಏಕಕಾಲದಲ್ಲಿ ಬಿಡುಗಡೆ ಆಗಿದ್ದೇ ಆದರೆ, ಬಾಕ್ಸ್‌ ಆಫೀಸ್‌ನಲ್ಲಿ ದೊಡ್ಡ ಕ್ಲಾಷ್‌ ಏರ್ಪಡಲಿದೆ.
ಹಿಂದಿಯಲ್ಲಿ ಪುಷ್ಪರಾಜನಿಗೆ ಬೇಡಿಕೆ
ಅಲ್ಲು ಅರ್ಜುನ್‌ ಮತ್ತು ಸುಕುಮಾರ್‌ ಕಾಂಬಿನೇಷನ್‌ನ ಪುಷ್ಪ 2 ಸಿನಿಮಾ ದಕ್ಷಿಣದ ಜತೆಗೆ ಉತ್ತರ ಭಾರತದಲ್ಲೂ ಅಪಾರ ಕ್ರೇಜ್‌ ಸೃಷ್ಟಿಸಿಕೊಂಡಿದೆ. ಪಾರ್ಟ್‌ 1ಕ್ಕೆ ಸಿಕ್ಕ ಅದ್ಭುತ ಗೆಲುವು ಎರಡನೇ ಸಿನಿಮಾಕ್ಕೂ ದಕ್ಕಲಿದೆ ಎಂದೇ ಅಂದಾಜಿಸಲಾಗಿದೆ. ಹಾಗಾಗಿ ಹಿಂದಿ ಬೆಲ್ಟ್‌ನಲ್ಲಿ ಸಿಂಗಂ ಅಗೈನ್‌ ಸಿನಿಮಾಕ್ಕಿಂತ ಪುಷ್ಪರಾಜನಿಗೆ ಡಿಮಾಂಡ್‌ ಹೆಚ್ಚಿದೆ. ಈ ಬೆಳವಣಿಗೆ ಅರಿತ ಸಿಂಗಂ ನಿರ್ದೇಶಕ ರೋಹಿತ್‌ ಶೆಟ್ಟಿ ಸಹ ಹೊಸ ಬಿಡುಗಡೆ ದಿನಾಂಕವನ್ನು ಲಾಕ್‌ ಮಾಡುತ್ತಿದ್ದಾರೆ ಎನ್ನಲಾಗುತ್ತಿದೆ. ಆ ವಿಚಾರ ಇನ್ನಷ್ಟೇ ಅಧಿಕೃತವಾಗಬೇಕಿದೆ.
ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ
