Salaar Teaser: ಪ್ರಭಾಸ್‌ ಸಲಾರ್‌ ಟೀಸರ್‌ಗೆ ದಾಖಲೆಯ ವ್ಯೂವ್ಸ್; ಇದೆಲ್ಲಾ ಫೇಕ್‌ ಎಲ್ಲಾ ದುಡ್ಡಿನ ಮಹಿಮೆ ಎಂದು ಆರೋಪಿಸಿದ ನೆಟಿಜನ್ಸ್‌
ಜುಲೈ 6 ರಂದು ರಿಲೀಸ್ ಆದ ಪ್ರಭಾಸ್‌ ಅಭಿನಯದ ಸಲಾರ್‌ ಟೀಸರ್‌ ಇದುವರೆಗೂ 109 ಮಿಲಿಯನ್‌ ವ್ಯೂವ್ಸ್ ಪಡೆದಿದೆ. ಇಷ್ಟು ಕಡಿಮೆ ಅವಧಿಯಲ್ಲಿ ಇಷ್ಟು ವ್ಯೂವ್ಸ್ ಹೇಗೆ ಸಾಧ್ಯ? ನಿರ್ಮಾಪಕರು ಹಣ ಸುರಿದು ಟೀಸರ್‌ಗೆ ಇಷ್ಟು ವ್ಯೂವ್ಸ್ ಗಳಿಸಿದ್ದಾರೆ ಎಂದು ಕೆಲವರು ಆರೋಪಿಸಿದ್ದಾರೆ.
ಆದಿಪುರುಷ್‌ ಸಿನಿಮಾ ನಂತರ ಪ್ರಭಾಸ್‌ ಅಭಿನಯದ ಹೊಸ ಸಿನಿಮಾ 'ಸಲಾರ್‌' ನತ್ತ ಚಿತ್ತ ನೆಟ್ಟ ಅಭಿಮಾನಿಗಳಿಗೆ ಟೀಸರ್‌ ನೋಡಿ ಚಿತ್ರದ ಮೇಲಿನ ನಿರೀಕ್ಷೆ ಇನ್ನಷ್ಟು ಹೆಚ್ಚಾಗಿದೆ. ಇದು ಇನ್ನೊಂದು ಆದಿಪುರುಷ್‌ ಆಗುವುದು ಬೇಡ ಎಂದು ಪ್ರಭಾಸ್‌ ಅಭಿಮಾನಿಗಳು ಪ್ರಾರ್ಥಿಸುತ್ತಿದ್ದಾರೆ. ಈ ನಡುವೆ ಸಲಾರ್‌ ಚಿತ್ರತಂಡದ ವಿರುದ್ಧ ಗಂಭೀರ ಆರೋಪವೊಂದು ಕೇಳಿಬಂದಿದೆ.
ಜುಲೈ 6 ರಂದು ರಿಲೀಸ್ ಆಗಿದ್ದ ಟೀಸರ್‌
ಸಲಾರ್‌ ಚಿತ್ರೀಕರಣ ಆರಂಭವಾಗಿ 2 ವರ್ಷಗಳೇ ಕಳೆದಿವೆ. ಆರಂಭದಲ್ಲಿ ಒಂದೆರಡು ಪೋಸ್ಟರ್‌ಗಳನ್ನು ರಿಲೀಸ್ ಮಾಡಿದ್ದನ್ನು ಬಿಟ್ಟರೆ, ಪ್ರಶಾಂತ್‌ ನೀಲ್‌ ಈ ಸಿನಿಮಾ ಬಗ್ಗೆ ಹೆಚ್ಚಿನ ಮಾಹಿತಿ ಹಂಚಿಕೊಂಡಿರಲಿಲ್ಲ. ಸಿನಿಮಾ ಬಗ್ಗೆ ಹೆಚ್ಚಿನ ಮಾಹಿತಿ ತಿಳಿಯಲು ಸಿನಿಮಾಭಿಮಾನಿಗಳು ಕುತೂಹಲದಿಂದ ಕಾಯುತ್ತಿದ್ದ ಕ್ಷಣದಲ್ಲೇ ಸಲಾರ್‌ ಟೀಸರ್‌ ರಿಲೀಸ್ ಮಾಡುವುದಾಗಿ ಚಿತ್ರತಂಡ ಘೋಷಿಸಿತ್ತು. ಜುಲೈ 6 ರಂದು ಚಿತ್ರತಂಡ ಬೆಳಗ್ಗೆ 5.12ಕ್ಕೆ ಟೀಸರ್‌ ರಿಲೀಸ್ ಮಾಡಿತ್ತು. ಬೆಳ್ಳಂ ಬೆಳಗ್ಗೆ ಟೀಸರ್‌ ರಿಲೀಸ್ ಮಾಡುತ್ತಿರುವುದಕ್ಕೆ ಕೆಲವು ಅಭಿಮಾನಿಗಳು ಕೆಜಿಎಫ್‌ ಲಿಂಕ್‌ ಕೊಟ್ಟಿದ್ದರು.
4 ದಿನಗಳಲ್ಲಿ 109 ಮಿಲಿಯನ್‌ ವ್ಯೂವ್ಸ್
ಟೀಸರ್‌ ನೋಡಿದ ಸಿನಿಪ್ರಿಯರು ಉತ್ತಮ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದರು. ಆದರೂ ಅದರಲ್ಲಿ ಪ್ರಭಾಸ್‌ ಮುಖವನ್ನು ಸರಿಯಾಗಿ ತೋರಿಸಿಲ್ಲ ಎಂದು ಬೇಸರ ವ್ಯಕ್ತಪಡಿಸಿದ್ದರು. ಈ ನಡುವೆಯೂ ಟೀಸರ್‌ 4 ದಿನಗಳಲ್ಲಿ 109 ಮಿಲಿಯನ್‌ ವ್ಯೂವ್ಸ್ ಕಂಡು ನಂಬರ್‌ ಒನ್‌ ಟ್ರೆಂಡಿಂಗ್‌ನಲ್ಲಿದೆ. ಚಿತ್ರತಂಡ, ದುಡ್ಡು ಕೊಟ್ಟು ಟೀಸರ್‌ಗೆ ಇಷ್ಟು ವ್ಯೂವ್ಸ್ ಪಡೆದಿದೆ. ಇದು ಫೇಕ್‌, ಸಿನಿಮಾ ಚೆನ್ನಾಗಿದೆ ಎಂದಾದರೆ ದುಡ್ಡು ಕೊಟ್ಟು ಟೀಸರ್‌ ಗೆಲ್ಲಿಸುವ ಅವಶ್ಯಕತೆ ಏನಿದೆ? ಎಲ್ಲಾ ದುಡ್ಡಿನ ಮಹಿಮೆ ಅಷ್ಟೇ, ದುಡ್ಡು ಸುರಿದಿದ್ದರಿಂದಲೇ ಟೀಸರ್‌ಗೆ ಇಷ್ಟು ದೊಡ್ಡ ಮಟ್ಟಿನ ವ್ಯೂವ್ಸ್ ಸಿಕ್ಕಿದೆ. ಯೂಟ್ಯೂಬ್‌ನಲ್ಲಿ ಬೇರೆ ಯಾವುದೇ ವಿಡಿಯೋಗಳನ್ನು ನೋಡಲು ಕ್ಲಿಕ್‌ ಮಾಡಿದರೆ, ಆ ವಿಡಿಯೋಗೂ ಮುನ್ನ ಸಲಾರ್‌ ಟೀಸರ್‌ ಬರುತ್ತಿದೆ ಎಂದು ಆರೋಪಿಸುತ್ತಿದ್ದಾರೆ.
ಆದರೆ ಇನ್ನೂ ಕೆಲವರು, ಯಾವುದೇ ಸಿನಿಮಾ ಆಗಲೀ, ಟೀಸರ್‌ ಆಗಲೀ ಪ್ರಮೋಷನ್‌ ಇರಲೇಬೇಕು. ಇಲ್ಲದಿದ್ದರೆ ಸಿನಿಮಾ ಬಗ್ಗೆ ಜನರಿಗೆ ತಿಳಿಯುವುದು ಹೇಗೆ? ಕೆಲವೊಮ್ಮೆ ದುಡ್ಡು ಕೊಟ್ಟರೂ ಯಾರೂ ನೋಡುವುದಿಲ್ಲ, ಅಂತದ್ದರಲ್ಲಿ ಜನರು ಟೀಸರ್‌ ನೋಡಿದ್ದಾರೆ ಎಂದರೆ ಅದು ಚಿತ್ರಕ್ಕೆ ಇರುವ ತಾಕತ್ತು ಎಂದೆಲ್ಲಾ ಪ್ರಭಾಸ್‌ ಅಭಿಮಾನಿಗಳು ಕಾಮೆಂಟ್‌ ಮಾಡುತ್ತಿದ್ದಾರೆ.
'ಸಲಾರ್‌' ಚಿತ್ರವನ್ನು ಹೊಂಬಾಳೆ ಫಿಲ್ಮ್‌ ಬ್ಯಾನರ್‌ ಅಡಿಯಲ್ಲಿ ವಿಜಯ್‌ ಕಿರಗಂದೂರು ನಿರ್ಮಿಸಿ ಪ್ರಶಾಂತ್‌ ನೀಲ್‌ ಕಥೆ ಬರೆದು ನಿರ್ದೇಶಿಸುತ್ತಿದ್ದಾರೆ. ಚಿತ್ರದ ಹಾಡುಗಳಿಗೆ ರವಿ ಬಸ್ರೂರು ಸಂಗೀತ ನೀಡಿದ್ದಾರೆ. ಭುವನ್‌ ಗೌಡ ಕ್ಯಾಮರಾ ವರ್ಕ್‌ ಚಿತ್ರಕ್ಕಿದ್ದು ಸಿನಿಮಾದಲ್ಲಿ ಪ್ರಭಾಸ್‌ಗೆ ಶ್ರುತಿ ಹಾಸನ್‌ ನಾಯಕಿಯಾಗಿ ನಟಿಸಿದ್ದಾರೆ. ಪೃಥ್ವಿರಾಜ್‌ ಸುಕುಮಾರನ್‌, ಜಗಪತಿ ಬಾಬು, ಮೀನಾಕ್ಷಿ ಚೌಧರಿ ಹಾಗೂ ಇನ್ನಿತರರು ನಟಿಸಿದ್ದಾರೆ.
