Project K: ಕೀಳು ಮಟ್ಟದ ಫಸ್ಟ್‌ಲುಕ್‌ ಕಂಡು ಪ್ರಭಾಸ್‌ ಫ್ಯಾನ್ಸ್ ಬೇಸರ; ಟೀಕೆ, ಟ್ರೋಲ್‌ಗೆ ಆಹುತಿಯಾದ ಪ್ರಾಜೆಕ್ಟ್‌ ಕೆ ಹೊಸ ಪೋಸ್ಟರ್‌
ನಟ ಪ್ರಭಾಸ್‌ ಅವರ ಪ್ರಾಜೆಕ್ಟ್‌ ಕೆ ಚಿತ್ರದ ಫಸ್ಟ್‌ಲುಕ್‌ ಬಿಡುಗಡೆ ಆಗಿದೆ. ಆದರೆ, ಫಸ್ಟ್‌ಲುಕ್‌ ಕಂಡು ಫ್ಯಾನ್ಸ್ ಬೇಸರ ಹೊರಹಾಕಿದ್ದು, ಚೀಪ್‌ ಫೋಟೋಶಾಪ್‌ ವರ್ಕ್‌ ಎಂದು ಜರಿದಿದ್ದಾರೆ.
Projeck K: ನಟ ಪ್ರಭಾಸ್‌ ಪ್ಯಾನ್‌ ಇಂಡಿಯಾ ಹೀರೋ ಎಂದು ಗುರುತಿಸಿಕೊಂಡಿದ್ದೇ ಬಂತು. ಬಾಹುಬಲಿ ಸಿನಿಮಾ ಬಳಿಕ ಅವರ ಅದೃಷ್ಟವೇ ಕೈ ಕೊಟ್ಟಿದೆ. ದೊಡ್ಡ ಬಜೆಟ್‌ನ ಸಿನಿಮಾಗಳು ರಿಲೀಸ್‌ ಆಗುತ್ತಿವೆಯಾದರೂ, ಹಿಟ್‌ ಲಿಸ್ಟ್‌ ಮಾತ್ರ ಸೇರುತ್ತಿಲ್ಲ. ಈ ನಡುವೆ ತಮ್ಮ ಸಿನಿಮಾ ವಿಚಾರವಾಗಿಯೇ ಸಾಕಷ್ಟು ಟೀಕೆ ಟಿಪ್ಪಣಿಗಳನ್ನೂ ಪ್ರಭಾಸ್‌ ಎದುರಿಸುತ್ತಿದ್ದಾರೆ. ಇದೀಗ ಆ ಟೀಕೆಗಳು ಮತ್ತೆ ಶುರುವಾಗಿವೆ.
ಆದಿಪುರುಷ್‌ ಸಿನಿಮಾ 700 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣವಾದ ಸಿನಿಮಾ. ಆ ಮಟ್ಟಕ್ಕೆ ಯಶಸ್ಸು ಕಾಣದ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಪ್ಲಾಪ್‌ ಆಯಿತು. ಇದೀಗ ಇದೇ ಪ್ರಭಾಸ್‌ ತಮ್ಮ ಮುಂದಿನ ಸಿನಿಮಾದ ಮತ್ತೊಂದು ಅಪ್‌ಡೇಟ್‌ ಜತೆಗೆ ಆಗಮಿಸಿದ್ದಾರೆ. ಅದೇ ಪ್ರಾಜೆಕ್ಟ್‌ ಕೆ ಸಿನಿಮಾ. ಈ ಚಿತ್ರದ ಅಪ್‌ಡೇಟ್‌ ನೀಡುವುದಾಗಿ ಚಿತ್ರತಂಡ ಮಾಹಿತಿ ನೀಡಿತ್ತು. ಅದರಂತೆ, ಪೋಸ್ಟರ್‌ ಬಿಡುಗಡೆ ಆಗಿದ್ದು, ಮೆಚ್ಚುಗೆಗಿಂತ ಟ್ರೋಲ್‌ ಆಗಿದ್ದೇ ಹೆಚ್ಚು.
ಹೌದು, ಟಾಲಿವುಡ್‌ನಲ್ಲಿ ತನ್ನ ತಾರಾಬಳಗದ ವಿಚಾರವಾಗಿಯೇ ಸುದ್ದಿಯಲ್ಲಿರುವ ಪ್ರಾಜೆಕ್ಟ್‌ ಕೆ ಸಿನಿಮಾ, ತನ್ನ ಫಸ್ಟ್‌ ಲುಕ್‌ ಪೋಸ್ಟರ್‌ ಮೂಲಕವೇ ನಿರಾಸೆ ಮೂಡಿಸಿದೆ. ಅಭಿಮಾನಿ ವಲಯದಲ್ಲಿಯೇ ಈ ಬಗ್ಗೆ ಟೀಕೆಗಳು ವ್ಯಕ್ತವಾಗುತ್ತಿದ್ದು, ನೋಡುಗರು ಮತ್ತೆ ಬೇಸರಗೊಂಡಿದ್ದಾರೆ. ಸಲಾರ್‌ ಟೀಸರ್‌ನಲ್ಲಿಯೂ ಪ್ರಭಾಸ್‌ ಮುಖವನ್ನು ಸರಿಯಾಗಿ ತೋರಿಸಿರಲಿಲ್ಲ ಎಂದು ಬೇಸರ ಹೊರಹಾಕಿದ್ದರು. ಈಗ ಪ್ರಾಜೆಕ್ಟ್‌ ಕೆ ಸಿನಿಮಾ ವಿಚಾರದಲ್ಲಿ ಬೇರೆ ರೀತಿಯಲ್ಲಿ ಅಸಮಾಧಾನಗೊಂಡಿದ್ದಾರೆ ಫ್ಯಾನ್ಸ್.
ಫ್ಯಾನ್‌ ಮೇಡ್‌ ಪೋಸ್ಟರ್‌ ಇದಕ್ಕಿಂತ ಚೆನ್ನಾಗಿರುತ್ತೆ..
ಇದು ಫ್ಯಾನ್‌ ಮೇಡ್‌ ಪೋಸ್ಟರ್‌ ಇರಬಹುದೇ? ಫ್ಯಾನ್ಸ್‌ಗಳು ಇದಕ್ಕಿಂತ ಚೆನ್ನಾಗಿ ನಿಮ್ಮನ್ನು ತೋರಿಸುತ್ತಿದ್ದರು. ಬಾಹುಬಲಿ ದಾಖಲೆ ಮುರಿಯುತ್ತದೆ ಎಂದು ಹೇಳಿದವರು ಎಲ್ಲೋದ್ರೋ, ಸತ್ಯವಾಗ್ಲೂ ಹೇಳ್ತಿದ್ದೇನೆ ಇದು ಚೆನ್ನಾಗಿಲ್ಲ. ಈ ಪೋಸ್ಟರ್‌ ನನಗೆ ತೃಪ್ತಿ ತಂದಿಲ್ಲ. ಯಾರೋ ಪ್ರಭಾಸ್‌ ಅವರ ಅಕೌಂಟ್‌ ಹ್ಯಾಕ್‌ ಮಾಡಿ, ಈ ಪೋಸ್ಟರ್‌ ಶೇರ್‌ ಮಾಡಿದ್ದಾರೆ. ಫ್ಯಾನ್‌ ಮೇಡ್‌ ಪೋಸ್ಟರ್‌ ಫಸ್ಟ್‌ಲುಕ್‌ ಹೇಗಾಗುತ್ತದೆ, ಪ್ರಭಾಸಣ್ಣ ಏನಾಯ್ತು ನಿಮಗೆ.. ಹೀಗೆ ತರಹೇವಾರಿ ನೆಗೆಟಿವ್‌ ಕಾಮೆಂಟ್‌ಗಳೇ ತುಂಬಿ ತುಳುಕುತ್ತಿವೆ.
ಸ್ಟಾರ್‌ ಕಲಾವಿದರ ದಂಡು
ಪ್ರಭಾಸ್‌ ಅಭಿನಯದ ಪ್ರಾಜೆಕ್ಟ್‌ K ಸಿನಿಮಾ ಘೋಷಣೆ ಆದ ದಿನದಿಂದಲೇ ಒಂದಲ್ಲ ಒಂದು ರೀತಿ ಸದ್ದು ಮಾಡುತ್ತಲೇ ಇದೆ. ಪ್ರಭಾಸ್‌ ಬಳಿಕ ದೀಪಿಕಾ ಪಡುಕೋಣೆ ಈ ಸಿನಿಮಾ ತಂಡ ಸೇರಿಕೊಂಡರು. ಅದಾದ ಬಳಿಕ ಬಾಲಿವುಡ್ ಬಿಗ್‌ ಬಿ ಅಮಿತಾಬ್‌ ಬಚ್ಚನ್‌ ಸಹ ನಟಿಸುವುದು ಅಧಿಕೃತವಾಯ್ತು. ದಿಶಾ ಪಟಾಣಿ ಸಹ ಈ ಚಿತ್ರದ ಭಾಗವಾಗಿದ್ದು ಈ ಹಿಂದೆಯೇ ಅಧಿಕೃತವಾಗಿತ್ತು. ಇತ್ತೀಚೆಗಷ್ಟೇ ಸ್ಟಾರ್‌ ನಟ ಕಮಲ್‌ ಹಾಸನ್‌ ಸಹ ಪ್ರಾಜೆಕ್ಟ್‌ K ಚಿತ್ರದಲ್ಲಿ ನಟಿಸುವುದು ಕನ್ಫರ್ಮ್‌ ಆಗಿತ್ತು. ಹೀಗೆ ಸ್ಟಾರ್‌ಗಳೇ ಇರುವ ಈ ಸಿನಿಮಾವನ್ನು ನಾಗ್‌ಅಶ್ವಿನ್‌ ನಿರ್ದೇಶನ ಮಾಡುತ್ತಿದ್ದಾರೆ. ವೈಜಯಂತಿ ಮೂವೀಸ್‌ ಬ್ಯಾನರ್‌ನಲ್ಲಿ ಸಿನಿಮಾ ನಿರ್ಮಾಣವಾಗುತ್ತಿದೆ.
