Tollywood News: ಗೀತ ಗೋವಿಂದಂ ಚಿತ್ರಕ್ಕೆ 5 ವರ್ಷಗಳ ಸಂಭ್ರಮ; ವಿಜಯ್‌ ದೇವರಕೊಂಡ, ಪರಶುರಾಮ್‌ ಜೊತೆ ಖುಷಿ ಹಂಚಿಕೊಂಡ ರಶ್ಮಿಕಾ ಮಂದಣ್ಣ
'ಗೀತ ಗೋವಿಂದಂ' ಚಿತ್ರಕ್ಕೆ 5 ವರ್ಷಗಳು ತುಂಬಿವೆ. ನಿಮ್ಮೆಲ್ಲರ ಪ್ರೀತಿಗೆ ಧನ್ಯವಾದಗಳು, ನಿಜವಾಗಲೂ ಸದಾ ನಿಮಗೆ ಕೃತಜ್ಞರಾಗಿರುತ್ತೇವೆ ಎಂದು ರಶ್ಮಿಕಾ ಬರೆದುಕೊಂಡಿದ್ದಾರೆ.
ರಶ್ಮಿಕಾ ಮಂದಣ್ಣ ವಿವಿಧ ಭಾಷೆಗಳ ಸ್ಟಾರ್‌ ನಟರೊಂದಿಗೆ ಸ್ಕ್ರೀನ್‌ ಶೇರ್‌ ಮಾಡುತ್ತಾ ಬ್ಯುಸಿ ಇದ್ದಾರೆ. ಈ ನಡುವೆ ನ್ಯಾಷನಲ್‌ ಕ್ರಷ್‌, ವಿಜಯ್‌ ದೇವರಕೊಂಡ ಹಾಗೂ ನಿರ್ದೇಶಕ ಪರಶುರಾಮ್‌ ಜೊತೆ ಸೇರಿ 'ಗೀತ ಗೋವಿಂದಂ' ಸಿನಿಮಾದ 5 ನೇ ವಾರ್ಷಿಕೋತ್ಸವ ಆಚರಿಸಿದ್ದಾರೆ.
2018ರಲ್ಲಿ ತೆರೆ ಕಂಡಿದ್ದ ಸಿನಿಮಾ
ರಶ್ಮಿಕಾ ಅಭಿನಯಿಸಿದ ತೆಲುಗು ಸಿನಿಮಾಗಳಲ್ಲಿ 'ಗೀತ ಗೋವಿಂದಂ' ದೊಡ್ಡ ಹಿಟ್‌ ನೀಡಿದ ಚಿತ್ರ. ಚಲೋ ಚಿತ್ರದ ಮೂಲಕ ಟಾಲಿವುಡ್‌ಗೆ ಎಂಟ್ರಿ ಕೊಟ್ಟ ರಶ್ಮಿಕಾ, ನಂತರ ಗೀತ ಗೋವಿಂದಂ ಚಿತ್ರದಲ್ಲಿ ನಟಿಸಿದರು. ಗೀತಾ ಪಿಕ್ಚರ್ಸ್‌ ಬ್ಯಾನರ್‌ ಅಡಿ ಬನ್ನಿ ವ್ಯಾಸ್‌ ಈ ಚಿತ್ರವನ್ನು ನಿರ್ಮಿಸಿದರೆ ಪರಶುರಾಮ್‌ ಕಥೆ ಬರೆದು ಆಕ್ಷನ್‌ ಕಟ್‌ ಹೇಳಿದ್ದರು. 5 ಕೋಟಿ ರೂಪಾಯಿ ಬಜೆಟ್‌ನಿಂದ ತಯಾರಾದ ಸಿನಿಮಾ 132 ಕೋಟಿ ರೂಪಾಯಿ ಲಾಭ ಮಾಡಿತ್ತು. ರಶ್ಮಿಕಾ ಹಾಗೂ ವಿಜಯ್‌ ದೇವರಕೊಂಡ ಕೆಮಿಸ್ಟ್ರಿಗೆ ಜನರು ಫಿದಾ ಆಗಿದ್ದರು. ಇದೇ ಸಕ್ಸಸ್‌ ನಂತರ ಈ ಜೋಡಿ ಮತ್ತೆ ಡಿಯರ್‌ ಕಾಮ್ರೇಡ್‌ ಚಿತ್ರದಲ್ಲಿ ಜೊತೆಯಾಗಿ ನಟಿಸಿದ್ದರು.
ಗೋಪಿ ಸುಂದರ್‌ ಸಂಗೀತ ನಿರ್ದೇಶನದ ಹಾಡುಗಳು
ಇನ್ನು ಸಿನಿಮಾ ಹಾಡುಗಳಂತೂ ಒಂದಕ್ಕಿಂದ ಒಂದು ಚೆಂದ. ಗೋಪಿ ಸುಂದರ್‌ ಸಂಗೀತ ನಿರ್ದೇಶನದಲ್ಲಿ ಸಿದ್‌ ಶ್ರೀರಾಮ್‌, ಚಿನ್ಮಯ್‌, ಗೋಪಿ ಸುಂದರ್‌, ಅನುರಾಗ್‌ ಕುಲಕರ್ಣಿ ಹಾಡಿದ ಹಾಡುಗಳು ಇಂದಿಗೂ ಸಿನಿಪ್ರಿಯರ ಕಿವಿಯಲ್ಲಿ ಗುನುಗುತ್ತಿದೆ. ಅದರಲ್ಲೂ ಇಂಕೇಮ್‌ ಇಂಕೇಮ್‌ ಕಾವಾಲೇ... ಹಾಗೂ ವಚ್ಚಿಂದಮ್ಮ.. ಹಾಡುಗಳಂತೂ ಎಲ್ಲರ ಮೋಸ್ಟ್‌ ಫೇವರೆಟ್. ಚಿತ್ರದಲ್ಲಿ ರಶ್ಮಿಕಾ, ವಿಜಯ್‌ ದೇವರಕೊಂಡ ಜೊತೆಗೆ ರಾಹುಲ್‌ ರಾಮಕೃಷ್ಣ, ವೆನ್ನಿಲ ಕಿಶೋರ್‌, ನಾಗಬಾಬು, ರವಿ ಪ್ರಕಾಶ್‌, ಚಿತ್ರಂ ಸೀನು, ಅನು ಇಮ್ಯಾನುಯಲ್‌, ನಿತ್ಯಾ ಮೆನನ್‌ ಹಾಗೂ ಇನ್ನಿತರರು ನಟಿಸಿದ್ದರು.
ಕೃತಜ್ಞತೆ ಸಲ್ಲಿಸಿದ ರಶ್ಮಿಕಾ ಮಂದಣ್ಣ
'ಗೀತ ಗೋವಿಂದಂ' ಚಿತ್ರಕ್ಕೆ 5 ವರ್ಷ ತುಂಬಿದ ಹಿನ್ನೆಲೆ ರಶ್ಮಿಕಾ ಹಾಗೂ ಚಿತ್ರತಂಡ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್‌ ಹಂಚಿಕೊಂಡಿದ್ದಾರೆ. ''ನಮ್ಮ ಕಡೆಯಿಂದ ಎಲ್ಲರಿಗೂ ಸ್ವಾತಂತ್ರ್ಯೋತ್ಸವದ ಶುಭಾಶಯಗಳು. ಹಾಗೇ ಗೀತ ಗೋವಿಂದಂ ಚಿತ್ರಕ್ಕೆ 5 ವರ್ಷಗಳು ತುಂಬಿವೆ. ನಿಮ್ಮೆಲ್ಲರ ಪ್ರೀತಿಗೆ ಧನ್ಯವಾದಗಳು, ನಿಜವಾಗಲೂ ಸದಾ ನಿಮಗೆ ಕೃತಜ್ಞರಾಗಿರುತ್ತೇವೆ'' ಎಂದು ರಶ್ಮಿಕಾ ಬರೆದುಕೊಂಡಿದ್ದಾರೆ.
ವಿಜಯ್‌ ದೇವರಕೊಂಡ ಕೂಡಾ ಮೂವರೂ ಜೊತೆಗಿರುವ ಫೋಟೋವನ್ನು ಹಂಚಿಕೊಂಡಿದ್ದಾರೆ. ''ಇವತ್ತು ಬಹಳ ಖುಷಿಯಾಗುತ್ತಿದೆ. ಸ್ವಾತಂತ್ರ್ಯೋತ್ಸವ ಒಂದೆಡೆ ಆದರೆ ಗೀತ ಗೋವಿಂದಂ ಚಿತ್ರಕ್ಕೆ 5 ವರ್ಷ ತುಂಬಿದೆ. ಅದರೊಂದಿಗೆ ಖುಷಿ ಚಿತ್ರದ ಆಡಿಯೋ ಬಿಡುಗಡೆಯಾಗಿದೆ'' ಎಂದು ವಿಜಯ್‌ ದೇವರಕೊಂಡ ಖುಷಿ ವ್ಯಕ್ತಪಡಿಸಿದ್ದಾರೆ. ರಶ್ಮಿಕಾ, ವಿಜಯ್‌ ದೇವರಕೊಂಡ ಹಾಗೂ ಚಿತ್ರತಂಡಕ್ಕೆ ಅಭಿಮಾನಿಗಳು ಶುಭ ಹಾರೈಸುತ್ತಿದ್ದಾರೆ. ಮತ್ತೆ ನೀವಿಬ್ಬರೂ ಜೊತೆಯಾಗಿ ನಟಿಸುವುದು ಯಾವಾಗ ಎಂದು ಪ್ರಶ್ನಿಸುತ್ತಿದ್ದಾರೆ.
