Jai Hanuman: ಜೈ ಹನುಮಾನ್‌ನಲ್ಲಿ ರಾಕಿಂಗ್‌ ಸ್ಟಾರ್‌ ಯಶ್ ನಟಿಸ್ತಾರ? ಪ್ರಶಾಂತ್ ವರ್ಮಾ ಸಿನಿಮಾದ ಕುರಿತು ಹೀಗೊಂದು ಗುಲ್ಲು
Jai Hanuman: ತೇಜಾ ಸಜ್ಜ ನಟನೆಯ ಹನುಮಾನ್ ಸಿನಿಮಾದ ಸೀಕ್ವೆಲ್‌ "ಜೈ ಹನುಮಾನ್"ನಲ್ಲಿ ಹನುಮಂತನ ಪಾತ್ರವನ್ನು ಕೆಜಿಎಫ್‌, ಟಾಕ್ಸಿಕ್‌ ನಟ ರಾಕಿಂಗ್‌ ಸ್ಟಾರ್‌ ಯಶ್ ನಟಿಸುತ್ತಾರ? ಪ್ರಶಾಂತ್ ವರ್ಮಾ ನಿರ್ದೇಶನದ ಈ ಚಿತ್ರದಲ್ಲಿ ಕೆಜಿಎಫ್‌ ಹೀರೋ ನಟಿಸಲಿದ್ದಾರೆ ಎಂಬ ವದಂತಿಗೆ ಇದೀಗ ಉತ್ತರ ದೊರಕಿದೆ.
ತೆಲುಗು ನಟ ತೇಜಾ ಸಜ್ಜ ನಟನೆಯ, ಸೃಜನಶೀಲ ನಿರ್ದೇಶಕ ಪ್ರಶಾಂತ್ ವರ್ಮಾ ನಿರ್ದೇಶನದ ಸೂಪರ್‌ಹೀರೋ ಚಿತ್ರ "ಹನುಮಾನ್" ಈಗಾಗಲೇ ಬಾಕ್ಸ್‌ ಆಫೀಸ್‌ನಲ್ಲಿ ಭರ್ಜರಿ ಗಳಿಕೆ ಮಾಡಿದೆ. ತೆಲುಗಿನ ಈ ಚಿತ್ರ, ಕನ್ನಡ, ತಮಿಳು, ಹಿಂದಿಯಲ್ಲೂ ಬಿಡುಗಡೆಯಾಗಿ ಭಾರತೀಯರ ಗಮನ ಸೆಳೆದಿದೆ. ಸಣ್ಣ ಚಿತ್ರವಾಗಿ ಹನುಮಾನ್ ಚಿತ್ರದ ಶೂಟಿಂಗ್‌ ಆರಂಭವಾಗಿತ್ತು. ಆದರೆ, ಬಳಿಕ ಇದನ್ನು ಪ್ಯಾನ್‌ ಇಂಡಿಯಾ ಸಿನಿಮಾವಾಗಿ ಬಿಡುಗಡೆ ಮಾಡಲಾಗಿತ್ತು. ಪ್ರೈಮ್‌ಶೋ ಎಂಟರ್‌ಟೈನ್‌ಮೆಂಟ್‌ನಲ್ಲಿ ಕೆ ನಿರಂಜನ್ ರೆಡ್ಡಿ ಈ ಸಿನಿಮಾ ನಿರ್ಮಿಸಿದ್ದರು. ಸಂಕ್ರಾಂತಿ ಹಬ್ಬದಂದು ಬಿಡುಗಡೆಯಾದ ಈ ಚಿತ್ರ ಗಲ್ಲಾಪೆಟ್ಟಿಗೆ ಕೊಳ್ಳೆ ಹೊಡೆದಿತ್ತು. ಈ ಚಿತ್ರದ ಮುಂದಿನ ಪ್ರೀಕ್ವೆಲ್‌ ಕುರಿತು ಹಲವು ವದಂತಿಗಳು ಈಗ ಹರಿದಾಡುತ್ತಿವೆ.
ಹನುಮಾನ್ ಸಿನಿಮಾವು ಮಹೇಶ್‌ ಬಾಬು ನಟನೆಯ ಗುಂಟೂರು ಕಾರಂ ಬಿಡುಗಡೆಯಾದ ಸಮಯದಲ್ಲಿಯೇ ಬಿಡುಗಡೆಯಾಗಿತ್ತು. ಮೊದಲ ದಿನದಿಂದಲೇ ಗಳಿಕೆ ಏರಿಸಿಕೊಂಡ ಹನುಮಾನ್ ಬಾಯ್ಮಾತಿನ ಪ್ರಚಾರದಿಂದಲೇ ಖ್ಯಾತಿ ಪಡೆಯಿತು. ಈ ಚಿತ್ರ ಭಾರತದ ವಿವಿಧ ಚಿತ್ರಮಂದಿರಗಳಲ್ಲಿ ಇನ್ನೂ ಪ್ರದರ್ಶನಗೊಳ್ಳುತ್ತಿದೆ. ಹೊಸದಾಗಿ ಬಿಡುಗಡೆಯಾದ ಚಿತ್ರಗಳಿಗೂ ಸ್ಪರ್ಧೆ ಒಡ್ಡುತ್ತಿದೆ. ಇದೇ ಸಿನಿಮಾದ ಕ್ಲೈಮ್ಯಾಕ್ಸ್‌ನಲ್ಲಿ ಹನುಮಾನ್ ಸಿನಿಮಾದ ಸೀಕ್ವೆಲ್‌ "ಜೈ ಹನುಮಾನ್" ಬಿಡುಗಡೆಯಾಗಲಿದೆ ಎಂಬ ಸೂಚನೆ ದೊರಕಿದೆ. ಹನುಮಾನ್ ಚಿತ್ರಕ್ಕಿಂತ ಜೈ ಹನುಮಾನ್ ಚಿತ್ರವು ಹೆಚ್ಚು ಭರ್ಜರಿಯಾಗಿರುವ ಸೂಚನೆಯನ್ನು ಈಗಾಗಲೇ ಚಿತ್ರತಂಡ ನೀಡಿದೆ.
ಜೈಹನುಮಾನ್‌ ಸಿನಿಮಾವು ಪ್ರಶಾಂತ್ ವರ್ಮಾ ನಿರ್ದೇಶನದ ಎರಡನೇ ಸಿನಿಮಾವಾಗಿರಲಿದೆ. ಈಗಾಗಲೇ ಇವರು ಜೈಹನುಮಾನ್‌ ಚಿತ್ರದ ಪ್ರಿ-ಪ್ರೊಡಕ್ಷನ್‌ ಕೆಲಸದಲ್ಲಿ ಬಿಝಿಯಾಗಿದ್ದಾರಂತೆ. ಇದೇ ಸಮಯದಲ್ಲಿ ಜೈ ಹನುಮಾನ್ ಚಿತ್ರದ ಕುರಿತು ಹಲವು ವದಂತಿಗಳು ಕೇಳಿ ಬಂದಿವೆ. ಕೆಜಿಎಫ್‌ ನಾಯಕ ಮತ್ತು ಕನ್ನಡದ ರಾಕಿಂಗ್‌ ಸ್ಟಾರ್‌ ಯಶ್ ಅವರು ಜೈ ಹನುಮಾನ್ ಚಿತ್ರದಲ್ಲಿ ಹನುಮಂತನ ಪಾತ್ರದಲ್ಲಿ ಕಾಣಿಸಲಿದ್ದಾರೆ ಎಂದು ವದಂತಿಗಳು ಕೇಳಿಬಂದಿದ್ದವು. ಜೈ ಹನುಮಾನ್ ಚಿತ್ರದಲ್ಲಿ ತೇಜ ಸಜ್ಜ ಮತ್ತೊಮ್ಮೆ ಹನುಮಾನ್ ಆಗಿ ಕಾಣಿಸಿಕೊಳ್ಳಲಿದ್ದಾರೆ. ಇಡೀ ಸಿನಿಮಾ ಹನುಮಂತನ ಪಾತ್ರದ ಸುತ್ತ ಸುತ್ತುತ್ತದೆ ಎಂಬುದು ಗೊತ್ತೇ ಇದೆ.
ಈ ಕುರಿತಾದ ವದಂತಿಗೆ ಸ್ಪಷ್ಟನೆ ದೊರಕಿದೆ. ಯಶ್ ತಂಡದ ಮೂಲವನ್ನು ಉಲ್ಲೇಖಿಸಿ ಇಂಡಿಯಾ ಟುಡೇ ವರದಿ ಮಾಡಿದ್ದು "ಈ ವದಂತಿ ಅರ್ಥವಿಲ್ಲದ್ದು ಮತ್ತು ಸುಳ್ಳು" ಎಂದು ತಿಳಿಸಿದೆ. "ಜೈ ಹನುಮಾನ್‌ನಲ್ಲಿ ಯಶ್ ನಟಿಸಲಿದ್ದಾರೆ ಎಂಬ ವರದಿಗಳಲ್ಲಿ ಯಾವುದೇ ಸತ್ಯವಿಲ್ಲ. ಈ ಪಾತ್ರದಲ್ಲಿ ನಟಿಸಲು ರಾಕಿಂಗ್‌ ಸ್ಟಾರ್‌ ಯಶ್‌ಗೆ ಸಾಕಷ್ಟು ಸಮಯ ಬೇಕು. ಸದ್ಯ ಇವರು ಟಾಕ್ಸಿಕ್‌ ಸಿನಿಮಾದಲ್ಲಿ ಬ್ಯುಸಿ ಇದ್ದಾರೆ" ಎಂದು ಮೂಲಗಳು ತಿಳಿಸಿವೆ.
ಜೈ ಹನುಮಾನ್ ಚಿತ್ರದಲ್ಲಿ ಹನುಮಂತನ ಪಾತ್ರವನ್ನು ಯಾರು ಮಾಡಲಿದ್ದಾರೆ ಎಂಬ ಕುತೂಹಲವಿತ್ತು. ಈಗಾಗಲೇ ಯಶ್ ಮಾತ್ರವಲ್ಲದೆ ಹಲವು ಹೀರೋಗಳ ಹೆಸರುಗಳು ಕೇಳಿಬಂದಿವೆ. ಹನುಮಂತನಾಗಿ ಮೆಗಾಸ್ಟಾರ್ ಚಿರಂಜೀವಿ ನಟಿಸುತ್ತಿದ್ದಾರೆ ಎಂಬ ಮಾತು ಕೇಳಿಬಂದಿತ್ತು. ಆದರೆ ಅದರಲ್ಲಿ ಯಾವುದೇ ಸತ್ಯಾಂಶವಿಲ್ಲ ಎಂದು ನಂತರ ತಿಳಿದುಬಂತು. ಈಗ ಈ ಪಾತ್ರದಲ್ಲಿ ಯಶ್ ನಟಿಸಲಿದ್ದಾರೆ ಎಂಬ ವದಂತಿ ಆರಂಭವಾಗಿದೆ. ಹನುಮಂತನ ಪಾತ್ರದಲ್ಲಿ ಯಶ್ ನಟಿಸುತ್ತಿದ್ದಾರೆ ಎಂಬ ಸುದ್ದಿಯಲ್ಲಿ ಯಾವುದೇ ಸತ್ಯಾಂಶವಿಲ್ಲ ಎಂದು ವರದಿಗಳು ಹೇಳಿವೆ.
ಯಶ್ ಈಗ ಟಾಕ್ಸಿಕ್‌ ಸಿನಿಮಾದ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ. ಮಾತ್ರವಲ್ಲದೆ ಬಾಲಿವುಡ್ ನಿರ್ದೇಶಕ ನಿತೇಶ್‌ ತಿವಾರಿ ನಟನೆಯ ರಾಮಾಯಣ ಚಿತ್ರದಲ್ಲಿ ರಾವಣನ ಪಾತ್ರದಲ್ಲಿ ನಟಿಸಲಿದ್ದಾರೆ. ಜೈ ಹನುಮಾನ್ ಚಿತ್ರದಲ್ಲಿ ಹನುಮಂತನ ಪಾರ್ಟ್‌ ಅನ್ನು ದಗ್ಗುಬಾಟಿ ರಾಣಾ ಮಾಡಲಿದ್ದಾರೆ ಎಂಬ ಸುದ್ದಿಯೂ ಹರಿದಾಡುತ್ತಿದೆ.
