ಮೊದಲ ಕನ್ನಡ ಸಿನಿಮಾ ಆಡಿಷನ್‌ನಲ್ಲಿ ರಿಜೆಕ್ಟ್‌ ಆಗಿದ್ದೇ ಅನುಷ್ಕಾ ಶೆಟ್ಟಿ ಇದುವರೆಗೂ ಕನ್ನಡದಲ್ಲಿ ನಟಿಸದಿರಲು ಕಾರಣಾನಾ?
ಅನುಷ್ಕಾ, ಮೊದಲ ಕನ್ನಡ ಸಿನಿಮಾ ಆಡಿಷನ್‌ನಲ್ಲಿ ರಿಜೆಕ್ಟ್‌ ಆಗಿದ್ದೇ ಅವರು ಮತ್ತೆ ಕನ್ನಡದಲ್ಲಿ ನಟಿಸದಿರಲು ಕಾರಣ ಇರಬಹುದಾ ಎಂಬ ಮಾತು ಕೂಡಾ ಕೇಳಿ ಬಂದಿತ್ತು. ನೀವು ಕನ್ನಡದಲ್ಲಿ ಏಕೆ ನಟಿಸಿಲ್ಲ ಎಂಬ ಪ್ರಶ್ನೆ ಅನುಷ್ಕಾಗೆ ಸಾಕಷ್ಟು ಬಾರಿ ಎದುರಾಗಿದೆ.
ತೆಲುಗು ಸಿನಿಪ್ರಿಯರಿಗೆ ಮಾತ್ರವಲ್ಲ, ತಮಿಳು, ಕನ್ನಡಿಗರಿಗೂ ಮುದ್ದು ಮೊಗದ ಸ್ವೀಟಿ ಅನುಷ್ಕಾ ಶೆಟ್ಟಿ ಎಂದರೆ ಬಹಳ ಇಷ್ಟ. ಅನುಷ್ಕಾ ಸುಮಾರು 3 ವರ್ಷಗಳಿಂದ ಸಿನಿಮಾಗಳಿಂದ ದೂರ ಉಳಿದಿದ್ದರೂ ಇಂದಿಗೂ ಅವರಿಗೆ ಮೊದಲಿನಷ್ಟೇ ಬೇಡಿಕೆ ಇದೆ. ಇಂದಿಗೂ ಅಭಿಮಾನಿಗಳು ಅವರನ್ನು ಅಷ್ಟೇ ಇಷ್ಟಪಡುತ್ತಾರೆ.
'ಬಾಹುಬಲಿ' ಚಿತ್ರದ ನಂತರ ಅನುಷ್ಕಾ ದಪ್ಪ ಆಗಿದ್ದರಿಂದ ಅವರು ನಂತರ ಯಾವ ಸಿನಿಮಾಗಳಲ್ಲೂ ನಟಿಸಲಿಲ್ಲ, ಸಾರ್ವಜನಿಕವಾಗಿ ಕೂಡಾ ಕಾಣಿಸಿಕೊಂಡಿರಲಿಲ್ಲ ಎಂಬ ಮಾತಿದೆ. ಏನೇ ಆಗಲೀ ಸ್ವೀಟಿ ಈಗ 'ಮಿಸ್‌ ಶೆಟ್ಟಿ ಮಿಸ್ಟರ್‌ ಪೋಲಿಶೆಟ್ಟಿ' ಸಿನಿಮಾ ಮೂಲಕ ಮತ್ತೆ ಅಭಿಮಾನಿಗಳ ಮುಂದೆ ಬರುತ್ತಿದ್ದಾರೆ. ಸೆಪ್ಟೆಂಬರ್‌ 7 ರಂದು ಈ ಸಿನಿಮಾ ರಿಲೀಸ್‌ ಆಗುತ್ತಿದೆ. ಬಹಳ ದಿನಗಳ ನಂತರ ಮೆಚ್ಚಿನ ನಟಿಯನ್ನು ನೋಡಲು ಅಭಿಮಾನಿಗಳು ಕೂಡಾ ತುದಿಕಾಲಿನಲ್ಲಿ ಕಾಯುತ್ತಿದ್ದಾರೆ. ಚಿತ್ರರಂಗದ ಸೆಲೆಬ್ರಿಟಿಗಳು ಕೂಡಾ ಅನುಷ್ಕಾ ಹೊಸ ಸಿನಿಮಾಗೆ ಶುಭ ಹಾರೈಸುತ್ತಿದ್ದಾರೆ.
ಮೊದಲ ಕನ್ನಡ ಸಿನಿಮಾ ಆಡಿಷನ್‌ನಲ್ಲಿ ರಿಜೆಕ್ಟ್‌ ಆಗಿದ್ದ ಸ್ವೀಟಿ
ಅನುಷ್ಕಾ ತಮ್ಮ ಸೌಂದರ್ಯ ಹಾಗೂ ನಟನೆಯಿಂದ ಮಾತ್ರವಲ್ಲದೆ, ತಮ್ಮ ಕನ್ನಡ ಪ್ರೇಮದಿಂದ ಕೂಡಾ ಕನ್ನಡಿಗರ ಮನಸ್ಸು ಗೆದ್ದಿದ್ದಾರೆ. ಸಾಮಾನ್ಯವಾಗಿ ಇಲ್ಲಿಂದ ಬೇರೆ ಭಾಷೆಗೆ ಹೋದ ನಟಿಯರು ಕನ್ನಡದ ಬಗ್ಗೆ ಹೆಚ್ಚು ಗಮನ ಕೊಡುವುದಿಲ್ಲ. ಆದರೆ ಅನುಷ್ಕಾ ಶೆಟ್ಟಿ ಆ ರೀತಿ ಅಲ್ಲ. ಹಬ್ಬ ಹರಿದಿನದಂತ ವಿಶೇಷ ಸಂದರ್ಭಗಳಲ್ಲಿ ಅನುಷ್ಕಾ, ಸೋಷಿಯಲ್‌ ಮೀಡಿಯಾದಲ್ಲಿ ಕನ್ನಡದಲ್ಲೇ ಶುಭ ಕೋರುತ್ತಿದ್ದರು. ಕನ್ನಡದ ಬಗ್ಗೆ ಇಷ್ಟೆಲ್ಲಾ ಅಭಿಮಾನ ಇರುವ ಅನುಷ್ಕಾ ಇಷ್ಟು ವರ್ಷಗಳಾದರೂ ಕನ್ನಡದಲ್ಲಿ ಏಕೆ ನಟಿಸಲಿಲ್ಲ ಎಂಬ ಪ್ರಶ್ನೆ ಕಾಡುವುದು ಸಹಜ.
ಆದರೆ ಬಹಳ ಜನರಿಗೆ ಗೊತ್ತಿಲ್ಲದ ವಿಚಾರವೊಂದಿದೆ. ಅನುಷ್ಕಾ ಶೆಟ್ಟಿ 'ಸೂಪರ್‌' ಚಿತ್ರಕ್ಕೂ ಮುನ್ನ ಕನ್ನಡ ಸಿನಿಮಾವೊಂದಕ್ಕೆ ಆಡಿಷನ್‌ ನೀಡಿದ್ದರು. ಆದರೆ ಆ ಚಿತ್ರಕ್ಕೆ ಅವರು ಸೆಲೆಕ್ಟ್‌ ಆಗಲಿಲ್ಲ, ರಿಜೆಕ್ಟ್‌ ಆದರು. ಮುಂದೊಂದು ದಿನ ಈ ಹುಡುಗಿ ಸ್ಟಾರ್‌ ನಟಿಯಾಗಿ ಹೆಸರು ಮಾಡುತ್ತಾಳೆ ಎಂದು ಮೊದಲೇ ತಿಳಿದಿದ್ದರೆ ಬಹುಶ: ಆ ಚಿತ್ರತಂಡ ಅನುಷ್ಕಾ ಅವರನ್ನು ಬಿಟ್ಟುಕೊಡುತ್ತಿರಲಿಲ್ಲವೇನೋ. ದರ್ಶನ್‌ ಜೊತೆ ಅನುಷ್ಕಾ 'ಜಗ್ಗುದಾದ' ಸಿನಿಮಾಗೆ ಆಯ್ಕೆ ಆಗಿದ್ದಾರೆ ಎಂಬ ಸುದ್ದಿ ಆಗ ಹರಿದಾಡಿತ್ತು. ಆದರೆ ಈ ಸುದ್ದಿ ನಿಜವೋ, ಸುಳ್ಳುಸುದ್ದಿಯೋ ಚಿತ್ರತಂಡಕ್ಕೆ ಮಾತ್ರ ತಿಳಿದಿರುವ ವಿಚಾರ.
ಒಳ್ಳೆ ಸ್ಟ್ರಿಪ್ಟ್‌ ಸಿಕ್ಕರೆ ಅಭಿನಯಿಸುತ್ತೇನೆ ಎಂದ ಅನುಷ್ಕಾ ಶೆಟ್ಟಿ
ಅನುಷ್ಕಾ, ಮೊದಲ ಕನ್ನಡ ಸಿನಿಮಾ ಆಡಿಷನ್‌ನಲ್ಲಿ ರಿಜೆಕ್ಟ್‌ ಆಗಿದ್ದೇ ಅವರು ಮತ್ತೆ ಕನ್ನಡದಲ್ಲಿ ನಟಿಸದಿರಲು ಕಾರಣ ಇರಬಹುದಾ ಎಂಬ ಮಾತು ಕೂಡಾ ಕೇಳಿ ಬಂದಿತ್ತು. ನೀವು ಕನ್ನಡದಲ್ಲಿ ಏಕೆ ನಟಿಸಿಲ್ಲ ಎಂಬ ಪ್ರಶ್ನೆ ಅನುಷ್ಕಾಗೆ ಸಾಕಷ್ಟು ಬಾರಿ ಎದುರಾಗಿದೆ. 'ಬಾಹುಬಲಿ' ಚಿತ್ರದ ಪ್ರಮೋಷನ್‌ ಸಮಯದಲ್ಲಿ ಅಭಿಮಾನಿಗಳು ಆನ್‌ಲೈನ್‌ನಲ್ಲಿ ಕೇಳುವ ಪ್ರಶ್ನೆಗಳಿಗೆ ಪ್ರಭಾಸ್‌, ರಾಣಾ ದಗ್ಗುಬಾಟಿ, ಅನುಷ್ಕಾ, ತಮನ್ನಾ ಉತ್ತರಿಸುವ ಕಾರ್ಯಕ್ರಮ ವಾಹಿನಿಯೊಂದರಲ್ಲಿ ಪ್ರಸಾರವಾಗಿತ್ತು. ಈ ಸಮಯದಲ್ಲಿ ಅಭಿಮಾನಿಯೊಬ್ಬರು ಅನುಷ್ಕಾಗೆ ಪ್ರಶ್ನೆ ಕೇಳಿದ್ದರು. ಫ್ಯಾನ್‌ ಕೇಳಿದ ಈ ಪ್ರಶ್ನೆಯನ್ನು ರಾಣಾ ದಗ್ಗುಬಾಟಿ ಅನುಷ್ಕಾಗೆ ತಿಳಿಸಿದರು. ಸ್ವೀಟಿ ನೀವು ಕನ್ನಡ ಸಿನಿಮಾದಲ್ಲಿ ನಟಿಸುತ್ತೀರಾ? ಎಂಬುದು ಆ ಪ್ರಶ್ನೆಯಾಗಿತ್ತು. ಇದಕ್ಕೆ ಕನ್ನಡದಲ್ಲೇ ಉತ್ತರಿಸುವ ಅನುಷ್ಕಾ, ''ಸ್ಕ್ರಿಪ್ಟ್‌ ಚೆನ್ನಾಗಿದ್ದರೆ ಖಂಡಿತ ನಟಿಸುತ್ತೇನೆ'' ಎಂದಿದ್ದರು. ಈ ವಿಡಿಯೋ ವೈರಲ್‌ ಆಗಿತ್ತು. ಅನುಷ್ಕಾ ಕನ್ನಡ ಪ್ರೀತಿಗೆ ಕನ್ನಡಿಗರು ಹ್ಯಾಟ್ಸ್‌ ಹಾಫ್‌ ಹೇಳಿದ್ದರು.
ಅನುಷ್ಕಾಗೆ ಕನ್ನಡದಲ್ಲಿ ನಟಿಸಬೇಕೆಂಬ ಆಸೆ ಇಂದಿಗೂ ಇದೆ. ಆದರೆ ಕನ್ನಡ ನಿರ್ಮಾಪಕರು, ನಿರ್ದೇಶಕರು ಕೂಡಾ ಮನಸ್ಸು ಮಾಡಬೇಕಿದೆ. ಅನುಷ್ಕಾ ಅವರನ್ನು ಕನ್ನಡ ಚಿತ್ರರಂಗಕ್ಕೆ ಕರೆ ತರುವ ಪ್ರಯತ್ನ ಮಾಡಬೇಕಿದೆ.
