ಅಮೇರಿಕಾದಲ್ಲಿ ಒಂದು ದಿನ ಮೊದಲೇ ಪುಷ್ಪ 2 ದಿ ರೂಲ್ ಪ್ರೀಮಿಯರ್; 974 ಸ್ಕ್ರೀನ್‌, 58 ಸಾವಿರ ಟಿಕೆಟ್‌ ಬುಕಿಂಗ್

Pushpa 2 The Rule: ಅಲ್ಲು ಅರ್ಜುನ್‍ ಅಭಿನಯದ ‘ಪುಷ್ಪ 2’ ಚಿತ್ರವು ಡಿಸೆಂಬರ್ 05ರಂದು ಜಗತ್ತಿನಾದ್ಯಂತ ಬಿಡುಗಡೆಯಾಗುತ್ತಿದೆ, ಉತ್ತರ ಅಮೇರಿಕಾ (ಅಮೇರಿಕಾ ಮತ್ತು ಕೆನಡಾ) ಬಿಟ್ಟು. ಅಮೇರಿಕಾದಲ್ಲಿ ಒಂದು ದಿನ ಮೊದಲೇ ಪ್ರೀಮಿಯರ್ ಶೋಗಳನ್ನು ಆಯೋಜಿಸಿದ್ದು, ಈಗಾಗಲೇ ಆ ಪ್ರದರ್ಶನಗಳ ಟಿಕೆಟ್‍ ಮಾರಾಟ ಬಹುತೇಕ ಮುಗಿದಿವೆ.

ವಿದೇಶದಲ್ಲೂ ಕಮಾಲ್

‘ಪುಷ್ಪ 2’ ಚಿತ್ರವು ಡಿಸೆಂಬರ್ 04ರಂದೇ ಅಮೇರಿಕಾದಲ್ಲಿ ಪ್ರೀಮಿಯರ್ ಆಗಲಿದೆ. ಇನ್ನು, ಚಿತ್ರದ ಮುಂಗಡ ಬುಕ್ಕಿಂಗ್ ಪ್ರಾರಂಭವಾಗಿದ್ದು, ದಾಖಲೆಯ 974 ಚಿತ್ರಮಂದಿರಗಳಲ್ಲಿ ಚಿತ್ರ ಬಿಡುಗಡೆಯಾಗುತ್ತದಂತೆ. 58 ಸಾವಿರಕ್ಕೂ ಹೆಚ್ಚು ಟಿಕೆಟ್‍ಗಳು ಇದುವರೆಗೂ ಮಾರಾಟವಾಗಿದ್ದು, ಇದರಿಂದ 1.66 ಮಿಲಿಯನ್‍ ಡಾಲರ್ ಗಳಿಕೆ ಆಗಿದೆ ಎಂದು ಹೇಳಲಾಗುತ್ತದೆ. ಭಾರತೀಯ ಮೌಲ್ಯದ ಪ್ರಕಾರ ಸುಮಾರು 14.04 ಕೋಟಿ ರೂ. ಬಿಡುಗಡೆಗೆ ಮುನ್ನವೇ ಬಂದಿದೆ ಎಂದು ಹೇಳಲಾಗುತ್ತಿದೆ.

ಇದನ್ನೂ ಓದಿ: ಕಲ್ಟ್‌ ಚಿತ್ರದ ಡ್ರೋನ್‌ ಆಪರೇಟರ್‌ ಆತ್ಮಹತ್ಯೆಗೆ ಯತ್ನ; ಸಚಿವ ಜಮೀರ್ ಅಹ್ಮದ್‌ ಖಾನ್‌ ಪುತ್ರ, ನಟ ಝೈದ್‌ ಖಾನ್‌ ವಿರುದ್ಧ ದೂರು ದಾಖಲು

ಇನ್ನು, ಭಾರತದಲ್ಲಿ ಕೇರಳ, ಗುಜರಾತ್‍, ಪಂಜಾಬ್‍ ಮತ್ತು ದೆಹಲಿಯಲ್ಲಿ ಅಡ್ವಾನ್ಸ್ ಬುಕ್ಕಿಂಗ್ ಈಗಾಗಲೇ ಶುರುವಾಗಿದ್ದು, ಈ ಪೈಕಿ ಕೇರಳದಲ್ಲಿ ಅತೀ ಹೆಚ್ಚು ಟಿಕೆಟ್‍ಗಳು ಮಾರಾಟವಾಗಿವೆ ಎಂದು ಹೇಳಲಾಗಿದೆ. ಇದೀಗ ಮಧ್ಯ ಪ್ರದೇಶ, ರಾಜಾಸ್ತಾನ, ಮಹಾರಾಷ್ಟ್ರ, ಪಶ್ಚಿಮ ಬಂಗಾಳ ಮುಂತಾದ ಇತರೆ ರಾಜ್ಯಗಳಲ್ಲೂ ಹಿಂದಿ ಅವತರಣಿಕೆಯ ಬುಕ್ಕಿಂಗ್‍ ಪ್ರಾರಂಭವಾಗಿದೆ. ಬರೀ ಹಿಂದಿ ಅವತರಣಿಕೆಯ 1.88 ಲಕ್ಷ ಟಿಕೆಟ್‍ಗಳು ಇದುವರೆಗೂ ಮಾರಾಟವಾಗಿದೆಯಂತೆ.

ಇದನ್ನೂ ಓದಿ: ಸಕಲೇಶಪುರದ ಕಾಫಿ ಎಸ್ಟೇಟ್‌ ಹುಡುಗ ಅಮೃತಧಾರೆ ಧಾರಾವಾಹಿಯ ಪಾರ್ಥ ಪಾತ್ರಧಾರಿ ನಟ ಕರಣ್‌ ಬಗ್ಗೆ ನಿಮಗೆಷ್ಟು ಗೊತ್ತು? ಸಂದರ್ಶನ

ಸಾವಿರ ಕೋಟಿ ಸರದಾರ ಈ ಪುಷ್ಪರಾಜ್‌

‘ಪುಷ್ಪ1’ ಚಿತ್ರವು ಸುಮಾರು ಮೂರು ವರ್ಷಗಳ ಹಿಂದೆ ಬಿಡುಗಡೆಯಾಗಿ ದೊಡ್ಡ ಯಶಸ್ಸು ಕಂಡಿತ್ತು. ಅದರ ಮುಂದುವರೆದ ಭಾಗವಾದ ‘ಪುಷ್ಪ 2’ ಚಿತ್ರದ ಬಗ್ಗೆ ಸಾಕಷ್ಟು ಕುತೂಹಲ ಮತ್ತು ನಿರೀಕ್ಷೆಗಳಿವೆ. ಮೊದಲ ಚಿತ್ರ ಬಾಕ್ಸ್ ಆಫೀಸ್‍ನಲ್ಲಿ 350 ಸೇರಿದಂತೆ, ಇನ್ನಿತರ ಮೂಲಗಳಿಂದ 100 ಕೋಟಿ ಗಳಿಸಿದರೆ, ‘ಪುಷ್ಪ 2’ ಚಿತ್ರವು ವಿತರಣೆ, ಡಿಜಿಟಲ್‍, ಸ್ಯಾಟಲೈಟ್‍ ಮುಂತಾದ ಹಕ್ಕುಗಳಿಂದ ಆಗಲೇ 1000 ಕೋಟಿ ಕ್ಲಬ್‍ಗೆ ದಾಖಲಾಗಿದೆ. ಸಾಮಾನ್ಯವಾಗಿ ಚಿತ್ರವೊಂದು ಬಿಡುಗಡೆಯಾಗಿ ಗಳಿಕೆಯಲ್ಲಿ 1000 ಕೋಟಿ ಕ್ಲಬ್‍ ಸೇರುವುದು ವಾಡಿಕೆ. ಆದರೆ, ‘ಪುಷ್ಪ 2’ ಚಿತ್ರವು ಬಿಡುಗಡೆಗೂ ಮೊದಲೇ 1000 ಕೋಟಿ ಕ್ಲಬ್‍ ಸೇರಿರುವುದು ದಾಖಲೆ. ‌

ಇದನ್ನೂ ಓದಿ: ಡಿಸೆಂಬರ್‌ನಲ್ಲಿ ಒಟಿಟಿಗೆ ಬರಲಿರುವ ಕನ್ನಡ ಸಿನಿಮಾಗಳು; ಭೈರತಿ ರಣಗಲ್, ಮರ್ಫಿ ಜೊತೆಗೆ ಮತ್ತೊಂದು ಚಿತ್ರ

12 ಸಾವಿರ ಚಿತ್ರಮಂದಿರಗಳಲ್ಲಿ ಬಿಡುಗಡೆ

‘ಪುಷ್ಪ 2’ ಚಿತ್ರದಲ್ಲಿ ಅಲ್ಲು ಅರ್ಜುನ್‍, ರಶ್ಮಿಕಾ ಮಂದಣ್ಣ, ಧನಂಜಯ್‍, ಫಹಾದ್‍ ಫಾಸಿಲ್‍, ಸುನೀಲ್, ಅನುಸೂಯ ಭಾರದ್ವಾಜ್‍ ಮುಂತಾದವರು ನಟಿಸಿದ್ದು, ಚಿತ್ರಕ್ಕೆ ಸುಕುಮಾರ್ ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ‘ರಾಕ್‍ಸ್ಟಾರ್’ ದೇವಿಶ್ರೀ ಪ್ರಸಾದ್‍ ಈ ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದಾರೆ. ‘ಪುಷ್ಪ 2’ ಚಿತ್ರವು ಡಿ. 5ರಂದು ಜಗತ್ತಿನಾದ್ಯಂತ ಆರು ಭಾಷೆಗಳಲ್ಲಿ 12 ಸಾವಿರಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿ ಪ್ರದರ್ಶನವಾಗಲಿದೆ.

ವರದಿ: ಚೇತನ್‌ ನಾಡಿಗೇರ್