Dhoomam Shooting Set: ಪ್ಯಾನ್‌ ಇಂಡಿಯಾ 'ಧೂಮಂ' ಸೆಟ್ಗೆ ವಿಜಯ್ ಕಿರಗಂದೂರು, ರಿಷಬ್‌ ಶೆಟ್ಟಿ ಭೇಟಿ
ಮಲಯಾಳಂನ ಖ್ಯಾತ ನಟ ಫಹಾದ್ ಫಾಸಿಲ್ ಹಾಗೂ ಸೂರರೈ ಪೊಟ್ರು ಖ್ಯಾತಿಯ ಅಪರ್ಣಾ ಬಾಲಮುರಳಿ ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ. ಚಿತ್ರೀಕರಣ ಬೆಂಗಳೂರಿನಲ್ಲೇ ನಡೆಯುತ್ತಿದೆ. ನಿರ್ಮಾಪಕ ವಿಜಯ್ ಕಿರಗಂದೂರು, ರಿಷಬ್‌ ಶೆಟ್ಟಿ, ಸಪ್ತಮಿ ಗೌಡ ಹಾಗೂ ಮುಂತಾದವರು 'ಧೂಮಂ' ಚಿತ್ರೀಕರಣ ಸ್ಥಳಕ್ಕೆ ಭೇಟಿ ನೀಡಿದ್ದಾರೆ.
'ಕೆಜಿಎಫ್‌', 'ಕಾಂತಾರ' ಸಿನಿಮಾ ನಂತರ ಹೊಂಬಾಳೆ ಫಿಲ್ಮ್ಸ್ ಚಿತ್ರ ನಿರ್ಮಾಣ ಸಂಸ್ಥೆ ಹೆಸರು ದೇಶಾದ್ಯಂತ ಹೆಸರಾಗಿದೆ. ಪ್ರಭಾಸ್‌ ಅಭಿನಯದ 'ಸಲಾರ್‌' ಬಳಿಕ 'ಧೂಮಂ' ಎಂಬ ಹೊಸ ಪ್ಯಾನ್‌ ಇಂಡಿಯಾ ಚಿತ್ರವನ್ನು ಕೂಡಾ ನಿರ್ಮಿಸುತ್ತಿದೆ. ಇದೀಗ ಈ ಚಿತ್ರದ ಶೂಟಿಂಗ್‌ ಸೆಟ್ಗೆ ರಿಷಬ್‌ ಶೆಟ್ಟಿ ಹಾಗೂ ವಿಜಯ್ ಕಿರಗಂದೂರು ಭೇಟಿ ನೀಡಿದ್ದಾರೆ.
'ಧೂಮಂ'ಪ್ಯಾನ್‌ ಇಂಡಿಯಾ ಸಿನಿಮಾವಾಗಿದ್ದು ಮಲಯಾಳಂನ ಖ್ಯಾತ ನಟ ಫಹಾದ್ ಫಾಸಿಲ್ ಹಾಗೂ ಸೂರರೈ ಪೊಟ್ರು ಖ್ಯಾತಿಯ ಅಪರ್ಣಾ ಬಾಲಮುರಳಿ ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ. ಚಿತ್ರೀಕರಣ ಬೆಂಗಳೂರಿನಲ್ಲೇ ನಡೆಯುತ್ತಿದೆ. ನಿರ್ಮಾಪಕ ವಿಜಯ್ ಕಿರಗಂದೂರು, ರಿಷಬ್‌ ಶೆಟ್ಟಿ, ಸಪ್ತಮಿ ಗೌಡ ಹಾಗೂ ಮುಂತಾದವರು 'ಧೂಮಂ' ಚಿತ್ರೀಕರಣ ಸ್ಥಳಕ್ಕೆ ಭೇಟಿ ನೀಡಿದ್ದಾರೆ. ಚಿತ್ರತಂಡದ ಸದಸ್ಯರೊಂದಿಗೆ ಸ್ವಲ್ಪ ಸಮಯ ಕಳೆದಿದ್ದಾರೆ. 'ಧೂಮಂ' ಚಿತ್ರವನ್ನು 'ಲೂಸಿಯಾ' ಖ್ಯಾತಿಯ ಪವನ್ ಕುಮಾರ್ ನಿರ್ದೇಶನ ಮಾಡುತ್ತಿದ್ದಾರೆ. ಫಹಾದ್ ಫಾಸಿಲ್ ಮತ್ತು ಅಪರ್ಣಾ ಬಾಲಮುರಳಿ ಜೊತೆಗೆ ಅಚ್ಯುತ್ ಕುಮಾರ್, ಜಾಯ್ ಮ್ಯಾಥ್ಯೂ, ದೇವ್ ಮೋಹನ್, ಅನು ಮೋಹನ್ ಮುಂತಾದವರು ಈ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರಕ್ಕೆ ಪೂರ್ಣಚಂದ್ರ ತೇಜಸ್ವಿ ಅವರ ಸಂಗೀತ ಮತ್ತು ಪ್ರೀತಾ ಜಯರಾಮನ್ ಅವರ ಛಾಯಾಗ್ರಹಣವಿದೆ.
ದ್ವಿತ್ವ-ಧೂಮಂ ಬೇರೆ ಬೇರೆನಾ?
ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ, ಅಪ್ಪು ಇಂದಿಗೆ ನಮ್ಮ ಜೊತೆಗೆ ಇದ್ದಿದ್ದರೆ, ಈ ವೇಳೆಗಾಗಲೇ 'ದ್ವಿತ್ವ' ಸಿನಿಮಾ ನಿರ್ಮಾಣವಾಗಿರುತ್ತಿತ್ತು. ಆದರೆ ವಿಧಿ ಬರಹವೇ ಬೇರೆ ಆಗಿತ್ತು. ಪುನೀತ್‌ ಅಕಾಲಿಕ ನಿಧನದಿಂದ 'ದ್ವಿತ್ವ' ಸಿನಿಮಾ ಸೆಟ್ಟೇರಲಿಲ್ಲ. ಹೀಗಿರುವಾಗಲೇ ಆ ಸಿನಿಮಾ ಮುಂದುವರೆಯುವುದೋ ಇಲ್ಲವೋ..ಆ ಚಿತ್ರದಲ್ಲಿ ಯಾರು ನಟಿಸಲಿದ್ದಾರೆ..? ಎಂಬಿತ್ಯಾದಿ ಪ್ರಶ್ನೆಗಳು ಕಾಡತೊಡಗಿದ್ದವು. ಆಗ ಕೇಳಿ ಬಂದ ಹೆಸರು ಮಾಲಿವುಡ್‌ ನಟ ಫಹಾದ್ ಫಾಸಿಲ್. 'ದ್ವಿತ್ವ' ಚಿತ್ರದ ಕಥೆಯಲ್ಲಿ ಫಹಾದ್ ನಟಿಸಲಿದ್ದಾರೆ ಎಂಬ ಸುದ್ದಿ ಹರಡಿತ್ತು. ಆದರೆ, ಚಿತ್ರತಂಡ ಮಾತ್ರ ಯಾವುದೇ ಸುಳಿವು ಬಿಟ್ಟುಕೊಡಲಿಲ್ಲ. ಇದೀಗ 'ಧೂಮಂ' ಹೆಸರಿನ ಶೀರ್ಷಿಕೆ ಘೋಷಣೆ ಮಾಡಿ ಚಿತ್ರೀಕರಣ ಆರಂಭವಾಗಿದೆ. ಆದರೆ ದ್ವಿತ್ವ- ಧೂಮಂ ಒಂದೇ ಸಿನಿಮಾನಾ ಅಥವಾ ಎರಡೂ ಬೇರೇನಾ..? ಎಂಬ ಕುತೂಹಲ ಎಲ್ಲರಿಗೂ ಕಾಡುತ್ತಿದೆ.
ಶಾರುಖ್‌ ಖಾನ್‌ ಸಿನಿಮಾ ನಿರ್ಮಾಣ ಮಾಡಲಿದ್ಯಾ ಹೊಂಬಾಳೆ ಫಿಲ್ಮ್ಸ್..?
ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆಯು 2014 ರಲ್ಲಿ ನಿನ್ನಿಂದಲೇ, 2015 ರಲ್ಲಿ ಮಾಸ್ಟರ್‌ ಪೀಸ್‌, 2017 ರಲ್ಲಿ ರಾಜಕುಮಾರ, 2018 ರಲ್ಲಿ ಕೆಜಿಎಫ್‌-1,2021 ರಲ್ಲಿ ಯುವರತ್ನ ಹಾಗೂ ಕೆಜಿಎಫ್‌-2 ಸಿನಿಮಾಗಳನ್ನು ನಿರ್ಮಿಸಿದೆ. ಈ ಚಿತ್ರ ನಿರ್ಮಾಣದ ಸಂಸ್ಥೆಯಿಂದ ತಯಾರಾಗಿರುವ 'ಕಾಂತಾರ' ಸೆಪ್ಟೆಂಬರ್‌ 30 ರಂದು ತೆರೆ ಕಂಡಿತ್ತು. ಜಗ್ಗೇಶ್‌ ಅಭಿನಯದ 'ರಾಘವೇಂದ್ರ ಸ್ಟೋರ್ಸ್‌' ಶೀಘ್ರದಲ್ಲೇ ತೆರೆ ಕಾಣಲಿವೆ. ಇದರ ಜೊತೆಗೆ ಪ್ಯಾನ್‌ ಇಂಡಿಯಾ ಸಿನಿಮಾ ಸಲಾರ್‌, ಮಲಯಾಳಂನ ಟೈಸನ್‌, ಫಹಾದ್ ಫಾಸಿಲ್ ಜೊತೆ ಧೂಮಂ, ಕನ್ನಡದಲ್ಲಿ ಬಘೀರ, ರಿಚರ್ಡ್‌ ಆಂಟೋನಿ ಸಿನಿಮಾಗಳು ಚಿತ್ರೀಕರಣದ ಹಂತದಲ್ಲಿವೆ.
ಇದೀಗ ಬಾಲಿವುಡ್‌ನತ್ತ ಕೂಡಾ ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆ ಪ್ರಯಾಣ ಬೆಳೆಸಿದೆ ಎನ್ನಲಾಗುತ್ತಿದೆ. ಅದೂ ಕೂಡಾ ಬಾಲಿವುಡ್ ಕಿಂಗ್‌ ಖಾನ್‌ ಶಾರುಕ್‌ ಖಾನ್‌ ಚಿತ್ರಕ್ಕೆ ವಿಜಯ್ ಕಿರಗಂದೂರು ಬಂಡವಾಳ ಹೂಡುತ್ತಿದ್ದಾರೆ ಎಂಬ ಮಾತು ಸ್ಯಾಂಡಲ್ವುಡ್ ಅಂಗಳದಲ್ಲಿ ಕೇಳಿ ಬರುತ್ತಿದೆ. ಕನ್ನಡದ ಚಿತ್ರ ನಿರ್ಮಾಣ ಸಂಸ್ಥೆಯೊಂದು ಈ ಮಟ್ಟಕ್ಕೆ ಹೆಸರು ಮಾಡುತ್ತಿರುವುದು ನಿಜಕ್ಕೂ ಸಂತೋಷದ ವಿಚಾರ. ಆದರೆ ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆ ಶಾರುಖ್‌ ಖಾನ್‌ ಚಿತ್ರವನ್ನು ನಿರ್ಮಿಸುತ್ತಿರುವ ವಿಚಾರವನ್ನು ಶಾರುಖ್‌ ಆಗಲೀ, ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆ ಆಗಲೀ ಅನೌನ್ಸ್‌ ಮಾಡಿಲ್ಲ.
