ಏಪ್ರಿಲ್ 12ರಂದು ಬೆಂಗಳೂರಿನ ಐತಿಹಾಸಿಕ ಕರಗ ಉತ್ಸವ; 2 ಸಾವಿರ ಜನರಿಗೆ ಪ್ರತಿದಿನ ಪ್ರಸಾದ ವಿತರಣೆ
ನಗರದ ಪ್ರಮುಖ ಧಾರ್ಮಿಕ ಸಂಪ್ರದಾಯಗಳಲ್ಲಿ ಒಂದೆಂದು ಪರಿಗಣಿಸಲಾದ ವಾರ್ಷಿಕ ಕಾರ್ಯಕ್ರಮವು ತಿಗಳರಪೇಟೆಯ ಐತಿಹಾಸಿಕ ಶ್ರೀ ಧರ್ಮರಾಯ ಸ್ವಾಮಿ ದೇವಸ್ಥಾನದಲ್ಲಿ ನಡೆಯುತ್ತದೆ.
ಬೆಂಗಳೂರಿನಲ್ಲಿ ಪ್ರತಿ ವರ್ಷವೂ ನಡೆಯುವ ಕರಗ ನೋಡಲು ಸಾಕಷ್ಟು ಜನ ಕಾತರದಿಂದ ಕಾಯುತ್ತಿರುತ್ತಾರೆ. ಅಷ್ಟೇ ಅಲ್ಲ ಕರಗ ಹಿನ್ನೆಲೆ ಹಾಗೂ ಧಾರ್ಮಿಕ ಸಂಪ್ರದಾಯಗಳಲ್ಲಿ ಈ ಆಚರಣೆಗೆ ಮಹತ್ವವಿದೆ. ಬಹಳ ಭಕ್ತಿಯಿಂದ ಕರಗವನ್ನು ಆಚರಿಸಲಾಗುತ್ತದೆ. ಶತಮಾನಗಳಷ್ಟು ಹಳೆಯದಾದ ಬೆಂಗಳೂರಿನ ಅಪ್ರತಿಮ ಕರಗ ಉತ್ಸವವು ಏಪ್ರಿಲ್ 12ರಂದು ಭವ್ಯ ಕರಗ ಮೆರವಣಿಗೆಯೊಂದಿಗೆ ಮುಕ್ತಾಯಗೊಳ್ಳಲಿದೆ ಎಂದು ದಿ ನ್ಯೂ ಇಂಡಿಯನ್ ಎಕ್ಸ್ಪ್ರೆಸ್ ವರದಿ ಮಾಡಿದೆ.
ನಗರದ ಪ್ರಮುಖ ಧಾರ್ಮಿಕ ಸಂಪ್ರದಾಯಗಳಲ್ಲಿ ಒಂದೆಂದು ಪರಿಗಣಿಸಲಾದ ವಾರ್ಷಿಕ ಕಾರ್ಯಕ್ರಮವು ಹಳೆಯ ಬೆಂಗಳೂರಿನ ತಿಗಳರಪೇಟೆಯಲ್ಲಿರುವ ಐತಿಹಾಸಿಕ ಶ್ರೀ ಧರ್ಮರಾಯ ಸ್ವಾಮಿ ದೇವಸ್ಥಾನದಲ್ಲಿ ನಡೆಯುತ್ತದೆ. ಈ ವರ್ಷದ ಕರಗವನ್ನು ಈ ಹಿಂದೆ 14 ಬಾರಿ ಮೆರವಣಿಗೆಯ ನೇತೃತ್ವ ವಹಿಸಿದ್ದ ಅರ್ಚಕ ಜ್ಞಾನೇಂದ್ರ ವನ್ಹಿಕುಲ ಗೌಡ ಅವರು ಹೊತ್ತೊಯ್ಯಲಿದ್ದಾರೆ.
ಏಪ್ರಿಲ್ 12ರ ರಾತ್ರಿ ದ್ರೌಪದಿಯ ಸಂಕೇತವಾದ ಪವಿತ್ರ ಹೂವಿನ ದಿಂಡು ಮತ್ತು ದೇವಿಯ ವಿಗ್ರಹವನ್ನು ಹೊಂದಿರುವ ಕಲಶವನ್ನು ಹೊರಲಿದ್ದಾರೆ. ಮೆರವಣಿಗೆಯು ಬೆಂಗಳೂರಿನ ಹಲವಾರು ಹಳೆಯ ಪ್ರದೇಶಗಳ ಮೂಲಕ ಹಾದುಹೋಗುತ್ತದೆ. ಬೆಳಕು ಹರಿಯುವ ಮುನ್ನ ದೇವಾಲಯಕ್ಕೆ ಮರಳುತ್ತದೆ.
ಏಪ್ರಿಲ್ 4 - ಏಪ್ರಿಲ್ 14 ರವರೆಗೆ
ಏಪ್ರಿಲ್ 4 ರಂದು ಪ್ರಾರಂಭವಾದ ಈ ಉತ್ಸವವು ಏಪ್ರಿಲ್ 14 ರವರೆಗೆ ನಡೆಯಲಿದ್ದು, ಚೈತ್ರ ಮಾಸದ ಹುಣ್ಣಿಮೆಯ ರಾತ್ರಿಯಾದ ಏಪ್ರಿಲ್ 12 ರಂದು ಕರಗ ಮೆರವಣಿಗೆ ನಡೆಯಲಿದೆ. ಶ್ರೀ ಧರ್ಮರಾಯಸ್ವಾಮಿ ದೇವಸ್ಥಾನದ ಅಧ್ಯಕ್ಷ ಕೆ. ಸತೀಶ್ ಮಾತನಾಡಿ, "ಕರಗವನ್ನು ಅದ್ಧೂರಿಯಾಗಿ ಆಚರಿಸಲು ಎಲ್ಲಾ ಕ್ರಮಗಳನ್ನು ತೆಗೆದುಕೊಳ್ಳಲಾಗಿದೆ. ಉತ್ಸವದಲ್ಲಿ ಭಾಗವಹಿಸುವ ಜನರು ತಮ್ಮದೇ ಆದ ಕತ್ತಿಗಳು, ವಸ್ತ್ರಗಳು, ಮಲ್ಲಿಗೆ ಮತ್ತು ಆರತಿಗಾಗಿ ದೀಪಗಳನ್ನು ತರುತ್ತಾರೆ. ಆದರೆ ಈ ವರ್ಷ, ಇವೆಲ್ಲವನ್ನೂ ದೇವಾಲಯದಲ್ಲಿ ಲಭ್ಯವಾಗುವಂತೆ ಮಾಡಲಾಗುವುದು" ಎಂದು ಹೇಳಿದ್ದಾರೆ.
ದೈನಂದಿನ ಪ್ರಸಾದ ವಿತರಣೆ
ಹೆಚ್ಚಿನ ಸಂಖ್ಯೆಯ ಭಾಗವಹಿಸುವವರಿಗೆ ಸ್ಥಳಾವಕಾಶ ಕಲ್ಪಿಸಲು, ದೇವಾಲಯವು ಏಪ್ರಿಲ್ 4ರಿಂದ ಉತ್ಸವ ಮುಗಿಯುವವರೆಗೆ 2,000 ಜನರಿಗೆ ಪ್ರತಿದಿನ ಪ್ರಸಾದ ವಿತರಣೆಯ ವ್ಯವಸ್ಥೆ ಮಾಡಿದೆ. ನಗರ ಭಾಗದ ಮತ್ತು ಹೊರಗಿನ ಭಕ್ತರು ಉತ್ಸವಗಳಲ್ಲಿ ಭಾಗವಹಿಸುವ ನಿರೀಕ್ಷೆಯಿದೆ. ಇದನ್ನು ದ್ರೌಪದಿಯ ಮರಳುವಿಕೆ ಮತ್ತು ಸ್ತ್ರೀ ಶಕ್ತಿಯ ಶಕ್ತಿಯ ಸಾಂಕೇತ ಎಂದು ಹೇಳಲಾಗುತ್ತದೆ.
ಏಪ್ರಿಲ್ 12ರ ಮೆರವಣಿಗೆಗೆ ಬಿಗಿ ಭದ್ರತೆ, ಸಂಚಾರ ವ್ಯವಸ್ಥೆಗಳು ಮತ್ತು ಜನಸಂದಣಿ ನಿರ್ವಹಣಾ ತಂತ್ರಗಳನ್ನು ಜಾರಿಗೆ ತರಲಾಗುತ್ತಿದೆ. ಸಾವಿರಾರು ಸಂಖ್ಯೆಯಲ್ಲಿ ಭಕ್ತಾದಿಗಳು ಆಗಮಿಸಿ ಕರಗ ವೀಕ್ಷಣೆ ಮಾಡುವ ಕಾರಣಕ್ಕೆ ಅಂದು ಜನಸಂದಣಿ ಹೆಚ್ಚಿರಲಿದೆ. ವಾಹನ ದಟ್ಟಣೆಯ ಬಗ್ಗೆಗೂ ಗಮನಹರಿಸಬೇಕಿದೆ. ಅಗತ್ಯ ಕ್ರಮಗಳನ್ನು ಕೈಗೊಳ್ಳಲಾಗುತ್ತಿದೆ.
Suma Gaonkar
