ಬೆಂಗಳೂರು ಮೆಟ್ರೋ ಟಿಕೆಟ್ ದರ ಹೆಚ್ಚಳ ಖಚಿತ; ನಮ್ಮ ಮೆಟ್ರೋ ಟೋಕನ್ ದರ ಶೇಕಡ 40 ರಿಂದ 45 ಏರಿಕೆ ಸಾಧ್ಯತೆ

Bengaluru Metro Fare Hike: ಬೆಂಗಳೂರು ಮೆಟ್ರೋ ಟಿಕೆಟ್ ದರ ಹೆಚ್ಚಳ ಪಕ್ಕಾ ಆಗಿದೆ. ಇಂದು ನಡೆದ ಬಿಎಂಆರ್‌ಸಿಎಲ್ ಬೋರ್ಡ್ ಮಿಟಿಂಗ್‌ನಲ್ಲಿ ಈ ವಿಚಾರ ಅಂತಿಮಗೊಂಡಿದ್ದು, ಬಹುತೇಕ ನಾಳೆಯಿಂದ ಅಥವಾ ಸೋಮವಾರದಿಂದ ಶೇಕಡ 40 ರಿಂದ ಶೇಕಡ 45ರಷ್ಟು ದರ ಏರಿಕೆ ನಿರೀಕ್ಷಿಸಲಾಗುತ್ತಿದೆ. ನಮ್ಮ ಮೆಟ್ರೋ ರೈಲು ಪ್ರಯಾಣದ ಟಿಕೆಟ್ ದರವನ್ನು ಹೆಚ್ಚಳ ಮಾಡುವುದಕ್ಕೆ ಬಿಎಂಆರ್‌ಸಿಎಲ್ ಮಂಡಳಿ ಒಪ್ಪಿಗೆ ನೀಡಿದೆ. ಈ ಬಗ್ಗೆ ಮೆಟ್ರೋ ಶೀಘ್ರವೇ ಅಧಿಕೃತ ಹೇಳಿಕೆ ಪ್ರಕಟಿಸಲಿದೆ.

ನಮ್ಮ ಮೆಟ್ರೋ ಟೋಕನ್ ದರ ಶೇಕಡ 40 ರಿಂದ45 ಏರಿಕೆ ಸಾಧ್ಯತೆ

ಬಿಎಂಆರ್‌ಸಿಎಲ್‌ ನಮ್ಮ ಮೆಟ್ರೋ ಟೋಕನ್ ದರವನ್ನು 15-25 ಪ್ರತಿಶತದಷ್ಟು ದರ ಏರಿಕೆ ಮಾಡುವ ಬಗ್ಗೆ ಆಲೋಚಿಸುತ್ತಿತ್ತು. ಆದಾಗ್ಯೂ, ಈ ಬಾರಿ ಕೂಡ ಶೇಕಡ 40 ರಿಂದ ಶೇಕಡ 45 ದರ ಏರಿಕೆ ಮಾಡುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ಇದು 2017 ರಲ್ಲಿ 10-15 ಶೇಕಡಾ ಹೆಚ್ಚಳ ಮಾಡಿದ ನಂತರದಲ್ಲಿ ಇದೆ ಮೊದಲ ಸಲ ದರ ಪರಿಷ್ಕರಣೆ ಮಾಡಲಾಗುತ್ತಿದೆ. ಸದ್ಯ ನಮ್ಮ ಮೆಟ್ರೋ ಟೋಕನ್ ದರವು ಕನಿಷ್ಠ 10 ರೂಪಾಯಿ ಇದ್ದರೆ, ಗರಿಷ್ಠ 60 ರೂಪಾಯಿ ಆಗಿದೆ. ಸ್ಮಾರ್ಟ್ ಕಾರ್ಡ್ ಬಳಕೆದಾರರಿಗೆ ಈ ಹಿಂದೆ ಇದು ಶೇಕಡಾ 15 ಇತ್ತು. ಪ್ರಸ್ತುತ 5 ಪ್ರತಿಶತದಷ್ಟು ರಿಯಾಯಿತಿ ಲಭ್ಯವಿದೆ. ಹೆಚ್ಚುತ್ತಿರುವ ಕಾರ್ಯಾಚರಣೆಯ ವೆಚ್ಚಗಳನ್ನು ನಿಭಾಯಿಸುವ ಸಲುವಾಗಿ ಸ್ಮಾರ್ಟ್‌ ಕಾರ್ಡ್‌ ರಿಯಾಯಿತಿಯನ್ನು 2020 ರಲ್ಲಿ ಶೇಕಡ 10 ಇಳಿಸಲಾಯಿತು ಎಂದು ಬೆಂಗಳೂರು ಮೆಟ್ರೋ ರೈಲು ಕಾರ್ಪೊರೇಷನ್ ಲಿಮಿಟೆಡ್ ಮೂಲಗಳು ತಿಳಿಸಿವೆ.

ಭಾರತದಾದ್ಯಂತ ಮೆಟ್ರೋ ರೈಲು ಸೇವೆಯ ದರಗಳನ್ನು ನಿರ್ಧರಿಸುವ ಶಾಸನಬದ್ಧ ಸಂಸ್ಥೆ ಶುಲ್ಕ ನಿಗದಿ ಸಮಿತಿ (ಎಫ್‌ಎಫ್‌ಸಿ). ಇದು ಅರೆ-ನ್ಯಾಯಾಂಗ ಅಧಿಕಾರವನ್ನು ಹೊಂದಿದ್ದು, ವಿಶೇಷವಾಗಿ ಮೆಟ್ರೋ ಕಾರ್ಯಾಚರಣೆಗಳು, ನಿರ್ವಹಣೆ ಮತ್ತು ಸಿಬ್ಬಂದಿಗೆ ಸಂಬಂಧಿಸಿದ ಹೆಚ್ಚುತ್ತಿರುವ ವೆಚ್ಚಗಳನ್ನು ಪರಿಗಣಿಸಿ ದರ ಪರಿಷ್ಕರಿಸುವ ಕೆಲಸ ಮಾಡುತ್ತದೆ. ಶುಲ್ಕ ನಿಗದಿ ಸಮಿತಿ (ಎಫ್‌ಎಫ್‌ಸಿ) ಅಂತಿಮ ನಿರ್ಧಾರವನ್ನು ತೆಗೆದುಕೊಳ್ಳುವ ಮೊದಲು ಎಲ್ಲಾ ಪಾಲುದಾರರ ಸಲಹೆ ಸೂಚನೆಗಳನ್ನು ಪರಿಗಣಿಸುತ್ತದೆ. ಮೆಟ್ರೋ ಸೇವೆಗಳನ್ನು ಪರಿಣಾಮಕಾರಿಯಾಗಿ ನಿರ್ವಹಿಸುವುದಕ್ಕಾಗಿ, ಅದರ ನಿರ್ವಹಣೆ, ಸಿಬ್ಬಂದಿ ವೆಚ್ಚಗಳನ್ನೂ ಗಮನಿಸುತ್ತದೆ ಎಂದು ಬಿಎಂಆರ್‌ಸಿಎಲ್‌ ಮೂಲಗಳು ತಿಳಿಸಿವೆ.

ನಮ್ಮ ಮೆಟ್ರೋ ಟೋಕನ್‌ ದರ ಪರಿಷ್ಕರಣೆ ಶಿಫಾರಸಿಗೆ ತ್ರಿಸದಸ್ಯ ಸಮಿತಿ

ನಮ್ಮ ಮೆಟ್ರೋದ ಪ್ರಯಾಣ ದರವನ್ನು ಪರಿಶೀಲಿಸಲು ಮದ್ರಾಸ್ ಹೈಕೋರ್ಟ್‌ನ ನಿವೃತ್ತ ನ್ಯಾಯಾಧೀಶರಾದ ನ್ಯಾಯಮೂರ್ತಿ ಆರ್.ಧರಣಿ ಅವರ ನೇತೃತ್ವದಲ್ಲಿ ಮೂವರು ಸದಸ್ಯರ ಸಮಿತಿಯನ್ನು ರಚಿಸಲಾಗಿದೆ. ಸಮಿತಿಯಲ್ಲಿ ವಸತಿ ಮತ್ತು ನಗರ ವ್ಯವಹಾರಗಳ ಸಚಿವಾಲಯದ ಹೆಚ್ಚುವರಿ ಕಾರ್ಯದರ್ಶಿ ಸತ್ಯೇಂದ್ರ ಪಾಲ್ ಸಿಂಗ್ ಮತ್ತು ಕರ್ನಾಟಕದ ಮಾಜಿ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಇ.ವಿ. ರಮಣ ರೆಡ್ಡಿ ಇದ್ದಾರೆ. ಮೆಟ್ರೋ ರೈಲು ದರ ನಿಗದಿ ಸಮಿತಿಯೊಂದಿಗೆ ಶುಲ್ಕ ಪರಿಷ್ಕರಣೆಗಾಗಿ ತಮ್ಮ ಸಲಹೆಗಳನ್ನು ಹಂಚಿಕೊಳ್ಳುವಂತೆ ಬಿಎಂಆರ್‌ಸಿಎಲ್‌ ಅಕ್ಟೋಬರ್‌ನಲ್ಲಿ ನಾಗರಿಕರಲ್ಲಿ ಮನವಿ ಮಾಡಿತ್ತು. ಇದರ ಅಂತಿಮ ಗಡುವು ಅಕ್ಟೋಬರ್ 21 ಆಗಿತ್ತಾದರೂ ನಂತರ ವಾರದ ತನಕ ಅಂದರೆ ಅಕ್ಟೋಬರ್ 28ರ ತನಕ ವಿಸ್ತರಿಸಿತ್ತು.

ಬಿಎಂಆರ್‌ಸಿಎಲ್‌ ಅಧಿಕಾರಿಗಳ ಪ್ರಕಾರ, ತ್ರಿಸದಸ್ಯ ಸಮಿತಿಯು ಭಾರತದ ವಿವಿಧ ನಗರಗಳಲ್ಲಿ ಮತ್ತು ಅಂತರಾಷ್ಟ್ರೀಯವಾಗಿ ಪ್ರಯಾಣ ದರ ಪರಿಷ್ಕರಣೆಗೆ ಸಮರ್ಪಕ ವಿಧಾನವನ್ನು ಖಚಿತಪಡಿಸಿಕೊಳ್ಳಲು ಮೆಟ್ರೋ ಟೋಕನ್‌ ದರಗಳ ಆಳ ಅಧ್ಯಯನವನ್ನು ನಡೆಸಿದೆ. ಸಮಿತಿಯು ತನ್ನ ಕಂಡುಕೊಳ್ಳುವಿಕೆ ಮತ್ತು ಶಿಫಾರಸುಗಳನ್ನು ಬೆಂಗಳೂರು ಮೆಟ್ರೋ ಟೋಕನ್ ದರ ಏರಿಕೆಗೆ ಸಂಬಂಧಿಸಿದ ಸಮಗ್ರ ವರದಿಯಲ್ಲಿ ಪ್ರಸ್ತುತಪಡಿಸಿದೆ.