Viral: ಬೆಂಗಳೂರಿನ ರಸ್ತೆ ಮೇಲೆ ಹೆಲಿಕಾಪ್ಟರ್; ಟ್ರಾಫಿಕ್ ಜಾಮ್ನಿಂದ ವಾಹನ ಸವಾರರ ಪರದಾಟ
Bengaluru: ಬಾನಲ್ಲಿ ಹಾರಾಡಿ ಮೈದಾನದಲ್ಲಿ ಇಳಿಯುವ ಹೆಲಿಕಾಪ್ಟರ್ವೊಂದು ಬೆಂಗಳೂರಿನ ರಸ್ತೆ ಮೇಲೆ ನಿಂತಿರುವ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ.
ಬೆಂಗಳೂರು: ಯಾವಾಗಲೂ ಟ್ರಾಫಿಕ್ ಜಾಮ್ನಿಂದ ವಾಹನ ಸವಾರರು ಪರದಾಡುವ ಬೆಂಗಳೂರಿನಲ್ಲಿ ಹೆಲಿಕಾಪ್ಟರ್ವೊಂದು ಮತ್ತಷ್ಟು ಸಂಚಾರ ದಟ್ಟಣೆಗೆ ಕಾರಣವಾಗಿರುವುದು ಬೆಳಕಿಗೆ ಬಂದಿದೆ. ಅಷ್ಟೇ ಅಲ್ಲ ಇದನ್ನು ಕಂಡ ಜನರು ಆಶ್ಚರ್ಯಚಕಿತರಾಗಿದ್ದಾರೆ.
ಬಾನಲ್ಲಿ ಹಾರಾಡಿ ಮೈದಾನದಲ್ಲಿ ಇಳಿಯುವ ಹೆಲಿಕಾಪ್ಟರ್ವೊಂದು ಬೆಂಗಳೂರಿನ ರಸ್ತೆ ಮೇಲೆ ನಿಂತಿತ್ತು. ಬೆಂಗಳೂರಿನ ಎಚ್ಎಎಲ್ (ಹಿಂದೂಸ್ತಾನ್ ಎರೋನಾಟಿಕಲ್ ಲಿಮಿಟೆಡ್) ಕಚೇರಿಯ ಬಳಿಯ ರಸ್ತೆಯಲ್ಲಿ ಹೆಲಿಕಾಪ್ಟರ್ ನಿಂತಿರುವ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಎಕ್ಸ್ (ಟ್ವಿಟರ್) ಬಳಕೆದಾರರೊಬ್ಬರು ಈ ಫೋಟೋವನ್ನು ಸೆಪ್ಟೆಂಬರ್ 7 ರಂದು ಹಂಚಿಕೊಂಡಿದ್ದಾರೆ.
ಹೆಲಿಕಾಪ್ಟರ್ನಿಂದಾಗಿ ತಮ್ಮ ತಮ್ಮ ಕೆಲಸದ ಸ್ಥಳಗಳಿಗೆ ತೆರಳುತಿದ್ದವರು ಟ್ರಾಫಿಕ್ ಜಾಮ್ನಲ್ಲಿ ಸಿಲುಕಿದ್ದಾರೆ. ಅನೇಕ ಬೈಕ್ಗಳು, ಆಟೋ ಟ್ರಾಫಿಕ್ನಲ್ಲಿ ಸಿಲುಕಿರುವುದು ಫೋಟೋದಲ್ಲಿ ಕಂಡು ಬರುತ್ತದೆ. ಈ ಹೆಲಿಕಾಪ್ಟರ್ ಅನ್ನು ಒಂದು ಸ್ಥಳದಿಂದ ಮತ್ತೊಂದು ಸ್ಥಳಕ್ಕೆ ಕೊಂಡೊಯ್ಯುವಾಗ ಅದು ರಸ್ತೆ ನಡುವೆ ಸಿಲುಕಿದೆ ಎಂದು ಹೇಳಲಾಗಿದೆ.
ಈ ಫೋಟೋಗೆ ಎಕ್ಸ್ ಬಳಕೆದಾರರು ಪರಿಪರಿಯಾಗಿ ಕಾಮೆಂಟ್ ಮಾಡಿದ್ದಾರೆ. “ಹಕ್ಕಿಯೊಂದು ರಸ್ತೆ ದಾಟುತ್ತಿತ್ತು. ಹೀಗಾಗಿ ನಾನು ಇಂದು ತಡವಾಗಿ ಬಂದೆ ಎಂದು ನನ್ನ ಬಾಸ್ಗೆ ಹೇಳಿದೆ” ಎಂದು ಒಬ್ಬರು ತಮಾಷೆಯಗಾಗಿ ಟ್ವೀಟ್ ಮಾಡಿದ್ದಾರೆ. ಇನ್ನೊಬ್ಬರು ಬೆಂಗಳೂರಿನಲ್ಲಿ ಏನೇನೋ ನಡೆಯುತ್ತವೆ ಎಂದು ಹೇಳಲು ರಾಪಿಡೋ ರೈಡ್ ಅನ್ನು ಬುಕ್ ಮಾಡಿದ ನಂತರ ರಾಯಲ್ ಎನ್‌ಫೀಲ್ಡ್ ಬಂದ ಘಟನೆಯನ್ನು ನೆನೆದಿದ್ದಾರೆ.
