ಕನ್ನಡ ಸುದ್ದಿ  /  ಕರ್ನಾಟಕ  /  ಮುಂಗಾರು ಹಂಗಾಮು; ಬಿತ್ತನೆ ಬೀಜ ದರ ಏರಿಕೆಗೆ ಕಂಗಾಲಾದ ಕೃಷಿಕರು, 2023- 2024ರ ಬೆಲೆಗಳ ಹೋಲಿಕೆ ವಿವರ ಹೀಗಿದೆ

ಮುಂಗಾರು ಹಂಗಾಮು; ಬಿತ್ತನೆ ಬೀಜ ದರ ಏರಿಕೆಗೆ ಕಂಗಾಲಾದ ಕೃಷಿಕರು, 2023- 2024ರ ಬೆಲೆಗಳ ಹೋಲಿಕೆ ವಿವರ ಹೀಗಿದೆ

ಮುಂಗಾರು ಪೂರ್ವ ಮಳೆ ಕೃಷಿಕರ ಮುಖದಲ್ಲಿ ಮಂದಹಾಸ ಮಿನುಗುವಂತೆ ಮಾಡಿದೆ. ಆದರೆ ಪ್ರಸಕ್ತ ಮುಂಗಾರು ಹಂಗಾಮು ಅವಧಿಯ ಬಿತ್ತನೆ ಬೀಜ ದುಬಾರಿಯಾಗಿದ್ದು, ಕೃಷಿಕರು ಕಂಗಾಲಾಗಿದ್ದಾರೆ. 2023- 2024ರ ಬೆಲೆಗಳ ಹೋಲಿಕೆ ಮಾಡಿರುವ ವಿವರ ವರದಿ ಇಲ್ಲಿದೆ.

ಮುಂಗಾರು ಹಂಗಾಮು; ಬಿತ್ತನೆ ಬೀಜ ದುಬಾರಿ ಆಗಿರುವುದು ನೋಡಿ ಕಂಗಾಲಾದ ಕೃಷಿಕರು 2023- 2024ರ ಬೆಲೆಗಳ ಹೋಲಿಕೆ ವಿವರ ಮುಂದಿಟ್ಟಿದ್ದಾರೆ. (ಸಾಂಕೇತಿಕ ಚಿತ್ರ)
ಮುಂಗಾರು ಹಂಗಾಮು; ಬಿತ್ತನೆ ಬೀಜ ದುಬಾರಿ ಆಗಿರುವುದು ನೋಡಿ ಕಂಗಾಲಾದ ಕೃಷಿಕರು 2023- 2024ರ ಬೆಲೆಗಳ ಹೋಲಿಕೆ ವಿವರ ಮುಂದಿಟ್ಟಿದ್ದಾರೆ. (ಸಾಂಕೇತಿಕ ಚಿತ್ರ)

ಬೆಂಗಳೂರು: ಕರ್ನಾಟಕದ ವಿವಿಧ ಜಿಲ್ಲೆಗಳಲ್ಲಿ ಮುಂಗಾರು ಪೂರ್ವ ಮಳೆ ಉತ್ತಮ ಪ್ರಮಾಣದಲ್ಲಿ ಆಗಿದ್ದು, ರೈತರ ಮುಖದಲ್ಲಿ ಮಂದಹಾಸ ಮಿನುಗಿದೆ. ಆದರೆ ಬಿತ್ತನೆ ಬೀಜಗಳ ದರ ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡ 30 ರಿಂದ ಶೇಕಡ 60 ಹೆಚ್ಚಳವಾಗಿರುವುದು ಕೃಷಿಕರ ಕಳವಳವನ್ನು ಹೆಚ್ಚಿಸಿದೆ. ಆದಾಗ್ಯೂ, ರೈತರು ಎಂದಿನ ರೂಢಿಯಂತೆ ಕೃಷಿ ಚಟುವಟಿಕೆಯಲ್ಲಿ ತೊಡಗಿದ್ದಾರೆ. ಮುಂಗಾರು ಮಳೆ ಮುನ್ಸೂಚನೆ, ಕೃಷಿಗೆ ಪೂರಕ ಹವಾಮಾನದ ಸುಳಿವು ಒಂದು ತಿಂಗಳು ಮುಂಚಿತವಾಗಿಯೆ ಸಿಕ್ಕಿದೆ. ಹೀಗಾಗಿ, ರೈತರು ಮುಂಗಾರು ಬಿತ್ತನೆಗೆ ಸಜ್ಜಾಗುತ್ತಿದ್ದಾರೆ.

CTA icon
ನಿಮ್ಮ ನಗರದ ಹವಾಮಾನ ತಿಳಿಯಲು ಇಲ್ಲಿ ಕ್ಲಿಕ್ ಮಾಡಿ

ಟ್ರೆಂಡಿಂಗ್​ ಸುದ್ದಿ

ಮಳೆಯ ಕೊರತೆ ಆದ ಕಾರಣ ಕಳೆದ ವರ್ಷ ಬೀಜೋತ್ಪನ್ನ ಪ್ರಮಾಣ ತೀವ್ರ ಕುಸಿತ ಕಂಡಿತ್ತು. ಹೀಗಾಗಿ ಈ ವರ್ಷ ಬಿತ್ತನೆ ಬೀಜಗಳು ದುಬಾರಿಯಾಗಿದೆ. ಇದಲ್ಲದೆ, ಬಿತ್ತನೆ ಬೀಜಕ್ಕೆ ಸರ್ಕಾರ ನಿಗದಿ ಮಾಡಿರುವ ಸಹಾಯಧನದಲ್ಲಿ ಯಾವುದೇ ವ್ಯತ್ಯಾಸವಿಲ್ಲ. ಹೀಗಾಗಿ ರೈತರಿಗೆ ಕೈಗೆಟಕುವ ದರದಲ್ಲಿ ಬಿತ್ತನೆ ಬೀಜ ಸಿಗುವುದು ಕಷ್ಟ. ಕರ್ನಾಟಕದ ವಿವಿಧ ಭಾಗಗಳಲ್ಲಿ ಭತ್ತ, ಹೆಸರು, ಸೋಯಾಬೀನ್, ತೊಗರಿ, ಎಳ್ಳು, ಮಕ್ಕೆಜೋಳ, ಹತ್ತಿ ಸೇರಿದಂತೆ ಇತರೆ ಬೆಳೆಗಳನ್ನು ಬಿತ್ತನೆ ಮಾಡಲಾಗುತ್ತದೆ.

ರೈತ ಸಂಪರ್ಕ ಕೇಂದ್ರ, ಕೃಷಿ ಸಂಪರ್ಕ ಕೇಂದ್ರಗಳಲ್ಲೂ ಬಿತ್ತನೆ ಬೀಜದ ದರದಲ್ಲಿ ಭಾರಿ ಹೆಚ್ಚಳ

ಕರ್ನಾಟಕ ರಾಜ್ಯ ಬೀಜ ನಿಗಮ ಸರ್ಕಾರಿ ಸ್ವಾಮ್ಯದ ಸಂಸ್ಥೆಯಾಗಿದ್ದು, ಪ್ರತಿ ವರ್ಷ ರೈತರಿಂದ ಬಿತ್ತನೆ ಬೀಜ ಖರೀದಿ ಒಪ್ಪಂದಮಾಡಿಕೊಳ್ಳುತ್ತದೆ. ಅದರಂತೆ ಕಳೆದ ವರ್ಷ ಒಪ್ಪಂದ ಮಾಡುವಾಗ ಹಳೆಯ ದರದಂತೆ ಒಪ್ಪಂದ ಮಾಡಿಕೊಂಡಿತ್ತು. ಆದರೆ, ನಂತರದ ದಿನಗಳಲ್ಲಿ ಭತ್ತ ಸೇರಿ ಎಲ್ಲ ಬಿತ್ತನೆ ಬೀಜಗಳ ಉತ್ಪಾದನೆ ಪ್ರಮಾಣ ಕುಸಿತ ಕಂಡ ಕಾರಣ ಮಾರುಕಟ್ಟೆ ದರ ಭಾರಿ ಪ್ರಮಾಣದಲ್ಲಿ ಏರಿಕೆ ಕಂಡಿತ್ತು. ಹೀಗಾಗಿ ಬೀಜ ನಿಗಮ ರೈತರ ಜೊತೆಗಿನ ಒಪ್ಪಂದ ಪರಿಷ್ಕರಿಸಿ, ದರ ಏರಿಸಿತ್ತು. ಇಲ್ಲದೇ ಇದ್ದರೆ ಬಿತ್ತನೆ ಬೀಜವನ್ನು ಅವರು ಖಾಸಗಿಯವರಿಗೆ ಮಾರಾಟ ಮಾಡುತ್ತಿದ್ದರು ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಬೀಜ ನಿಗಮವು ಬಿತ್ತನೆ ಬೀಜಗಳನ್ನು ರೈತ ಸಂಪರ್ಕ ಕೇಂದ್ರ, ಕೃಷಿ ಸಂಪರ್ಕ ಕೇಂದ್ರಗಳಿಗೆ ಕಳುಹಿಸಿ ಅಲ್ಲಿಂದ ರೈತರಿಗ ತಲುಪುತ್ತದೆ. ಮುಂಗಾರು ಮಳೆಗೆ ಮುನ್ನವೇ ಕೃಷಿ ಸಂಪರ್ಕ ಕೇಂದ್ರಗಳಲ್ಲಿ ರಸಗೊಬ್ಬರ, ಬಿತ್ತನೆ ಬೀಜ ದಾಸ್ತಾನು ತಲುಪುವುದು ವಾಡಿಕೆ. ಈ ಬಾರಿ ರೈತರಿಗೆ ಬೆಲೆ ಏರಿಕೆ ಬಿಸಿ ತಟ್ಟಿದೆ. ಹೆಸರು ಬೀಜ ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ಕೆ.ಜಿ.ಗೆ 100 ರೂಪಾಯಿ ಹೆಚ್ಚಳವಾಗಿದೆ. ರೈತ ಸಂಪರ್ಕ ಕೇಂದ್ರದಲ್ಲಿ 5 ಕೆ.ಜಿ.ಪ್ಯಾಕೇಟ್ ಹೆಸರು 2023ರಲ್ಲಿ 500 ರೂ. ಇತ್ತು. ಈ ವರ್ಷ 850 ರೂ. ಏರಿಕೆಯಾಗಿದೆ.

ಕೃಷಿ ಸಂಪರ್ಕ ಕೇಂದ್ರಗಳಲ್ಲಿ ಬಿತ್ತನೆ ಬೀಜದ ದರ (5 ಕಿಲೋ ಬ್ಯಾಗ್);  2023 ಮತ್ತು 2024ರ ಹೋಲಿಕೆ

ಬಿತ್ತನೆ ಬೀಜ2023ರಲ್ಲಿ ಬಿತ್ತನೆ ಬೀಜದ ದರ (5 ಕಿಲೋ ಬ್ಯಾಗ್) ರೂಪಾಯಿ 2024ರಲ್ಲಿ ಬಿತ್ತನೆ ಬೀಜದ ದರ (5 ಕಿಲೋ ಬ್ಯಾಗ್) ರೂಪಾಯಿ
ಯಾವುದುಸಾಮಾನ್ಯ ವರ್ಗದವರಿಗೆ ಎಸ್‌ಸಿ/ಎಸ್‌ಟಿಗಳಿಗೆಸಾಮಾನ್ಯ ವರ್ಗದವರಿಗೆಎಸ್‌ಸಿ/ಎಸ್‌ಟಿಗಳಿಗೆ
ಹೆಸರು501.25439.75805724.5
ತೊಗರಿ525462.5770707.5
ಜೋಳ202.5157.5285240

ಇದೇ ರೀತಿ, ವಿವಿಧ ಭತ್ತದ ತಳಿಗಳ ಬಿತ್ತನೆ ಬೀಜದ ದರ ಕ್ವಿಂಟಾಲ್‌ಗೆ 675 ರೂಪಾಯಿಯಿಂದ 1,875 ರೂಪಾಯಿವರೆಗೂ ಏರಿಕೆಯಾಗಿದೆ. ಹೆಸರು (5 ಕೆಜಿ) 501 ರೂಪಾಯಿಯಿಂದ 785 ರೂಪಾಯಿವರೆಗೆ, ತೊಗರಿ (5 ಕೆಜಿ) 525 ರೂಪಾಯಿಯಿಂದ 770 ರೂಪಾಯಿವರೆಗೆ ಏರಿಕೆಯಾಗಿದೆ. ಬಿತ್ತನೆ ಬೀಜದ ದಾಸ್ತಾನು ಸಾಕಷ್ಟಿದ್ದರೂ, ದರ ಏರಿಕೆಯಾಗಿರುವುದು ಮಾತ್ರ ಬಡ ರೈತರಿಗೆ ಹೊರೆಯಾಗಿದೆ.

ಭತ್ತ ಬಿತ್ತನೆ ಬೀಜದ ದರ 2023 ಮತ್ತು 2024ರಲ್ಲಿ ಹೀಗಿತ್ತು 

ಭತ್ತ ಬಿತ್ತನೆ ಬೀಜ2023 (ಕ್ವಿಂಟಾಲ್‌/ ರೂಪಾಯಿ)2024 (ಕ್ವಿಂಟಾಲ್‌/ ರೂಪಾಯಿ)
ಸಹ್ಯಾದ್ರಿ ಕೆಂಪುಮುಕ್ತಿ28754750
ಜಯ27253850
ಜ್ಯೋತಿ37754600
ಎಂಒ-437754750
ಉಮಾ32503925

ಪ್ರತಿ ವರ್ಷದಂತೆ ಈ ಬಾರಿಯೂ ರಾಜ್ಯ ಸರ್ಕಾರವು ಭತ್ತದ ಬಿತ್ತನೆ ಬೀಜಕ್ಕೆ ಕ್ವಿಂಟಾಲ್‌ಗೆ 800 ರೂಪಾಯಿ ಸಬ್ಸಿಡಿ ನೀಡಿದೆ. ಆದರೆ, ಭತ್ತದ ಮಾರುಕಟ್ಟೆ ದರ ಭಾರೀ ಏರಿಕೆಯಾಗಿರುವುದರಿಂದ ಬಿತ್ತನೆ ಬೀಜಕ್ಕೂ ಅದರ ಬಿಸಿ ತಟ್ಟಿದೆ.

ಕೃಷಿ ಇಲಾಖೆಯಿಂದ ರಿಯಾಯಿತಿ ದರದಲ್ಲಿ ದೊರೆಯಬೇಕಾದ ಬಿತ್ತನೆ ಬೀಜದ ದರಲ್ಲಿ ಹೆಚ್ಚಳವಾಗಿದೆ. ಇದರ ಪರಿಣಾಮ, ಮುಕ್ತ ಮಾರುಕಟ್ಟೆಯಲ್ಲಿ ಕೂಡ ರಿಟೇಲ್ ದರವನ್ನು ಶೇಕಡ 100 ರಷ್ಟು ಹೆಚ್ಚಿಸಿದ್ದಾರೆ. ವಿವಿಧ ಕಂಪನಿಗಳ ಬೀಜದ ಬೆಲೆಯಲ್ಲಿ ಭಾರಿ ಏರಿಕೆಯಾಗಿದೆ. ಇದರಿಂದ ಬಹುತೇಕ ರೈತರು ಕೃಷಿ ರೈತ ಸಂರ್ಪಕ ಕೇಂದ್ರಗಳತ್ತ ಮುಖ ಮಾಡುತ್ತಿದ್ದಾರೆ. ಆದರೆ, ಸರ್ಕಾರದ ರೈತ ಸಂಪರ್ಕ ಕೇಂದ್ರದಲ್ಲಿ ಎಲ್ಲ ತಳಿಯ ಬೀಜಗಳ ಬೆಲೆ ದುಪ್ಪಟ್ಟಾಗಿದೆ ಎಂದು ರೈತರು ಹೇಳುತ್ತಿದ್ದಾರೆ.

ಟಿ20 ವರ್ಲ್ಡ್‌ಕಪ್ 2024