Zero Shadow Day 2025: ಬೆಂಗಳೂರಿನಲ್ಲಿ ಇಂದು ಶೂನ್ಯ ನೆರಳು ದಿನ ಆಚರಣೆ, ಹೇಗಿರಲಿದೆ ಈ ಚಟುವಟಿಕೆ

ಬೆಂಗಳೂರು: ಶೂನ್ಯ ನೆರಳು ದಿನ ಎಂದು ಕರೆಯಲ್ಪಡುವ ಅಪರೂಪದ ಘಟನೆಗೆ ಬೆಂಗಳೂರು ಏಪ್ರಿಲ್ 24 ರಂದು ಮಧ್ಯಾಹ್ನ 12.17 ಕ್ಕೆ ಸಾಕ್ಷಿಯಾಗಲಿದೆ. ಈ ಅಪರೂಪದ ಕ್ಷಣದಲ್ಲಿ, ಸೂರ್ಯನಿಂದಾಗಿ ನೆರಳು ಇರುವುದಿಲ್ಲ. ಇದರಿಂದಾಗಿ ಲಂಬ ವಸ್ತುಗಳು ತಮ್ಮ ನೆರಳನ್ನು ಸಂಪೂರ್ಣವಾಗಿ ಕಳೆದುಕೊಳ್ಳುತ್ತವೆ ಎಂದು ಇಂಡಿಯನ್ ಇನ್ಸ್ಟಿಟ್ಯೂಟ್ ಆಫ್ ಆಸ್ಟ್ರೋಫಿಸಿಕ್ಸ್ (ಐಐಎ) ವಿಜ್ಞಾನಿಗಳು ದೃಢಪಡಿಸಿದ್ದಾರೆ.

ಐಐಎಯ ವಿಜ್ಞಾನ ಸಂವಹನ, ಸಾರ್ವಜನಿಕ ಔಟ್ರೀಚ್ ಮತ್ತು ಶಿಕ್ಷಣ (ಸ್ಕೋಪ್) ವಿಭಾಗದ ನೇತೃತ್ವ ವಹಿಸಿರುವ ಡಾ.ನಿರುಜ್ ಮೋಹನ್ ರಾಮಾನುಜಂ, ಸೂರ್ಯನು ಆಕಾಶದಲ್ಲಿ ತನ್ನ ಅತ್ಯುನ್ನತ ಬಿಂದುವನ್ನು ತಲುಪಿದಾಗ ಈ ವಿದ್ಯಮಾನ ಸಂಭವಿಸುತ್ತದೆ. ಪರಿಣಾಮವಾಗಿ, ನೆರಳುಗಳು ನೇರವಾಗಿ ವಸ್ತುಗಳ ಕೆಳಗೆ ಬೀಳುತ್ತವೆ ಮತ್ತು ಮಾನವನ ಕಣ್ಣಿಗೆ ಅಗೋಚರವಾಗುತ್ತವೆ ಎಂದು ವಿವರಿಸುತ್ತಾರೆ

ಶೂನ್ಯ ನೆರಳು ದಿನ ಬೆಂಗಳೂರಿಗೆ ಮಾತ್ರ ಸೀಮಿತವಾಗಿಲ್ಲ. ಇದು ಚೆನ್ನೈ ಮತ್ತು ಮಂಗಳೂರಿನಂತಹ ಸ್ಥಳಗಳು ಸೇರಿದಂತೆ ಸಮಭಾಜಕ ವೃತ್ತ ಮತ್ತು ಕರ್ಕಾಟಕ ವೃತ್ತದ ನಡುವೆ ಇರುವ ಎಲ್ಲಾ ನಗರಗಳಲ್ಲಿ ನಡೆಯುತ್ತದೆ. ಬೆಂಗಳೂರಿನಲ್ಲಿ, ಈ ವಿದ್ಯಮಾನವು ಸಾಮಾನ್ಯವಾಗಿ ವರ್ಷಕ್ಕೆ ಎರಡು ಬಾರಿ ಸಂಭವಿಸುತ್ತದೆ. ಏಪ್ರಿಲ್ 24-25 ರ ಸುಮಾರಿಗೆ ಮತ್ತು ಮತ್ತೆ ಆಗಸ್ಟ್ 18 ರ ಸುಮಾರಿಗೆ ಎನ್ನುವುದು ಡಾ.ನಿರುಜ್ ಮೋಹನ್ ರಾಮಾನುಜಂ ನೀಡುವ ವಿವರಣೆ.

ಸೂರ್ಯನ ಲಂಬ ಪಥವು ಕರ್ಕಾಟಕ ವೃತ್ತವನ್ನು ಅಪ್ಪಳಿಸುವವರೆಗೂ ಇದು ಮುಂದುವರಿಯುತ್ತದೆ. ಅಲ್ಲಿ ಶೂನ್ಯ ನೆರಳು ದಿನವು ಜೂನ್ 21 ರಂದು ಬೇಸಿಗೆಯ ಅಯನ ಸಂಕ್ರಾಂತಿಯೊಂದಿಗೆ ಹೊಂದಿಕೆಯಾಗುತ್ತದೆ. ಇದು ಹಿಂದೂ ಕ್ಯಾಲೆಂಡರ್ ಪ್ರಕಾರ ಸೂರ್ಯನ ಉತ್ತರ ದಿಕ್ಕಿನ ಚಲನೆಯಾದ ಉತ್ತರಾಯಣದ ಅಂತ್ಯವನ್ನು ಸೂಚಿಸುತ್ತದೆ ಎನ್ನುತ್ತಾರೆ ಅವರು.

ಶೂನ್ಯ ನೆರಳು ದಿನ ಎಂದರೇನು?

ಕೆಲವು ಸ್ಥಳಗಳಲ್ಲಿ ಮಧ್ಯಾಹ್ನ ಸೂರ್ಯನು ನಿಖರವಾಗಿ ಮೇಲ್ಭಾಗದಲ್ಲಿದ್ದಾಗ ಶೂನ್ಯ ನೆರಳು ದಿನ ಸಂಭವಿಸುತ್ತದೆ. ಈ ಸಂಕ್ಷಿಪ್ತ ಅವಧಿಯಲ್ಲಿ, ಕಂಬಗಳಂತಹ ಲಂಬ ವಸ್ತುಗಳು ಅಥವಾ ನೇರವಾಗಿ ನಿಂತಿರುವ ವ್ಯಕ್ತಿಯು ಗೋಚರಿಸುವ ನೆರಳನ್ನು ಬೀರುವುದಿಲ್ಲ. ಇದನ್ನು ಸಮಭಾಜಕ ವೃತ್ತ ಮತ್ತು ಕರ್ಕಾಟಕ ವೃತ್ತದ ನಡುವಿನ ಸ್ಥಳಗಳಲ್ಲಿ ಮಾತ್ರ ಗಮನಿಸಬಹುದು ಮತ್ತು ಪ್ರತಿ ಸ್ಥಳದಲ್ಲಿ ವರ್ಷಕ್ಕೆ ಎರಡು ಬಾರಿ ಸಂಭವಿಸುತ್ತದೆ. ಭೂಮಿಯ ವಾಲುವಿಕೆ ಮತ್ತು ಕಕ್ಷೆಯು ನಾವು ಸೂರ್ಯನನ್ನು ಹೇಗೆ ನೋಡುತ್ತೇವೆ ಎಂಬುದರ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂಬುದನ್ನು ಗಮನಿಸಬಹುದಾಗಿದೆ. ಆದರೆ ಅದ್ಭುತ ಪ್ರದರ್ಶನದ ಜತೆಗೆ ವಿಜ್ಞಾನದ ಕೌತುಕವೂ ಹೌದು.