ಪ್ರಯಾಣಿಕರ ಆಗ್ರಹಕ್ಕೆ ಮಣಿದ ಬಿಎಂಆರ್‌ಸಿಎಲ್: ಶೌಚಾಲಯ ಬಳಕೆಗೆ ನಿಗದಿಯಾಗಿದ್ದ ಶುಲ್ಕ ಹಿಂಪಡೆದ ನಮ್ಮ ಮೆಟ್ರೋ

ಬೆಂಗಳೂರು: ಸಾರ್ವಜನಿಕರು ಮತ್ತು ಪ್ರಯಾಣಿಕರ ಆಕ್ರೋಶಕ್ಕೆ ಮಣಿದ ಬೆಂಗಳೂರು ಮೆಟ್ರೋ ರೈಲ್‌ ಕಾರ್ಪೋರೇಷನ್‌ ಲಿ (ಬಿಎಂಆರ್‌ಸಿಎಲ್‌) ಮೆಟ್ರೋ ನಿಲ್ದಾಣಗಳಲ್ಲಿರುವ ಸಾರ್ವಜನಿಕ ಶೌಚಾಲಯಗಳ ಬಳಕೆಗೆ ವಿಧಿಸಿದ್ದ ಶುಲ್ಕವವನ್ನು ರದ್ದುಗೊಳಿಸಿದೆ. ನಗರದ 12 ಮೆಟ್ರೋ ನಿಲ್ದಾಣಗಳಲ್ಲಿರುವ ಶೌಚಾಲಯಗಳ ಬಳಕೆಗೆ ಶುಲ್ಕ ವಿಧಿಸಿತ್ತು. ಇದಕ್ಕಾಗಿ ಲಾಭ ರಹಿತ ಸಂಘಟನೆಯಾದ ಸುಲಭ್‌ ಇಂಟರ್‌ನ್ಯಾಶನಲ್ ಜತೆ ಒಪ್ಪಂದ ಮಾಡಿಕೊಂಡಿತ್ತು. ಇದೀಗ ಒಪ್ಪಂದವನ್ನು ರದ್ದುಗೊಳಿಸಿದೆ.

ಟಿಕೆಟ್‌ ವಲಯಗಳಿಂದ ಹೊರಗೆ ಇರುವ ಶೌಚಾಲಯಗಳ ನಿರ್ವಹಣೆಯನ್ನು ಸುಲಭ್‌ ಶೌಚಾಲಯ ಇಂಟರ್‌ನ್ಯಾಶನಲ್‌ಗೆ ವಹಿಸಿತ್ತು. ಒಪ್ಪಂದದ ಪ್ರಕಾರ ಮೂತ್ರ ವಿಸರ್ಜನೆಗೆ 2 ರೂ. ಮತ್ತು ಶೌಚಾಲಯ ಬಳಕೆಗೆ ರೂ. 5 ನಿಗದಿಪಡಿಸಲಾಗಿತ್ತು. ನಮ್ಮ ಮೆಟ್ರೋದ ಈ ನಿರ್ಧಾರಕ್ಕೆ ಪ್ರತಿದಿನ ಮೆಟ್ರೋ ರೈಲುಗಳಲ್ಲಿ ಸಂಚರಿಸುವ ಪ್ರಯಾಣಿಕರು ಮತ್ತು ಸಾರ್ವಜನಿಕರು ಶುಲ್ಕ ನಿಗದಿಗೆ ಆಕ್ರೋಶ ವ್ಯಕ್ತಪಡಿಸಿದ್ದರು. ಈಗಾಗಲೇ ಶೇ. 71 ರಷ್ಟು ಪ್ರಯಣ ದರ ಹೆಚ್ಚಿಸಲಾಗಿದ್ದು, ಶೌಚಾಲಯ ಬಳಕೆಗೂ ದರದ ಬರೆ ಎಳೆಯುವುದು ಸರಿಯೇ ಎಂದು ಪ್ರಶ್ನಿಸಿದ್ದರು.

ಕಳೆದ ಸೋಮವಾರ ವಕೀಲರು ಮತ್ತು ಪ್ರಯಾಣಿಕರು ವಿಧಾನಸೌಧದ ಬಿ ಆರ್‌ ಅಂಬೇಡ್ಕರ್‌ ನಿಲ್ದಾಣದ ಎದುರು ಪ್ರತಿಭಟನೆ ನಡೆಸಿದ್ದರು. ಬ್ಯಾನರ್‌ ಹಿಡಿದು ಘೋಷಣೆಗಳನ್ನು ಕೂಗಿ ನಮ್ಮ ಮೆಟ್ರೋ ವಿರುದ್ಧ ಕಿಡಿ ಕಾರಿದ್ದರು. ಶೌಚಾಲಯಗಳು ಮೂಲಭೂತ ಸೌಕರ್ಯವಾಗಿದ್ದು ಇದರಿಂದ ಲಾಭ ಮಾಡಿಕೊಳ್ಳಬಾರದು ಎಂದು ಒತ್ತಾಯಿಸಿದ್ದರು.

ಈ ಪ್ರತಿಭಟನೆಯ ನಂತರ ಬಿಎಂಆರ್‌ಸಿಎಲ್‌ ಅಧಿಕಾರಿಗಳು ಶೌಚಾಲಯ ಬಳಕೆಗೆ ವಿಧಿಸಲಾಗಿದ್ದ ಶುಲ್ಕದ ಆದೇಶವನ್ನು ಹಿಂಪಡೆಯಲಾಗಿದೆ. ಸುಲಭ್‌ ಜತೆ ಮಾಡಿಕೊಂಡ ಒಪ್ಪಂದವನ್ನು ರದ್ದುಗೊಳಿಸಲಾಗಿದೆ ಎಂದು ತಿಳಿಸಿದ್ದಾರೆ. ಆರಂಭದಲ್ಲಿ ಶೌಚಾಲಯಗಳ ನಿರ್ವಹಣೆಗಾಗಿ ಶುಲ್ಕ ವಿಧಿಸಲಾಗುತ್ತಿತ್ತೇ ಹೊರತು ಲಾಭ ಮಾಡಲು ಅಲ್ಲ . ಇನ್ನು ಮುಂದೆ ಬಿಎಂಆರ್‌ಸಿಎಲ್‌ ಶೌಚಾಲಯಗಳ ನಿರ್ವಹಣೆ ಮಾಡಲಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

ಟಿಕೆಟ್‌ ಸ್ವೈಪ್‌ ಮಾಡಿದ ನಂತರ ಇರುವ ಶೌಚಾಲಯಗಳ ಬಳಕೆ ಉಚಿತವಾಗಿರುತ್ತದೆ. ಟಿಕೆಟ್ ನೀಡುವ ಸ್ಥಳದಲ್ಲಿ ಇರುವ ಶೌಚಾಲಯಗಳನ್ನು ಪ್ರಯಾಣಿಕರಷ್ಟೇ ಅಲ್ಲದೆ ಸಾರ್ವಜನಿಕರೂ ಬಳಸುತ್ತಿದ್ದಾರೆ.

ವರದಿ: ಎಚ್.ಮಾರುತಿ