Emissions Test: ವಾಹನ ಎಮಿಷನ್‌ ಟೆಸ್ಟ್‌ ದರ ಹೆಚ್ಚಳ ಸಾಧ್ಯತೆ, ಸರ್ಕಾರಕ್ಕೆ ಪ್ರಸ್ತಾವನೆ ಸಲ್ಲಿಸಿದ ಪರೀಕ್ಷಾ ಕೇಂದ್ರಗಳು, ಎಷ್ಟು ಬೇಡಿಕೆ
ಕರ್ನಾಟಕದಲ್ಲಿ ವಾಹನ ಮಾಲಿನ್ಯ ತಪಾಸಣೆ ದರವನ್ನು ಪರಿಷ್ಕರಣೆ ಮಾಡುವ ಸಾಧ್ಯತೆಗಳಿದ್ದು, ಈಗಾಗಲೇ ಸರ್ಕಾರಕ್ಕೂ ಬೇಡಿಕೆ ಸಲ್ಲಿಸಲಾಗಿದೆ.
ಬೆಂಗಳೂರು: ನಿಮ್ಮ ವಾಹನಗಳಿಗೆ ಪರಿಸರ ಮಾಲಿನ್ಯದ ಸ್ಥಿತಿಗತಿ ಪತ್ರ ಕಡ್ಡಾಯ. ಈ ಪ್ರಮಾಣ ಪತ್ರವನ್ನು ಸಂಚಾರ ಪೊಲೀಸರು ವಾಹನ ತಪಾಸಣೆ ವೇಳೆ ಕೇಳಬಹುದು. ಅಲ್ಲದೇ ಸಾರಿಗೆ ಅಧಿಕಾರಿಗಳೂ ವಾಹನ ತಪಾಸಣೆ ಮಾಡುವಾಗ ಕೇಳಿ ಪಡೆಯಬಹುದು. ಇದು ಇಲ್ಲದೇ ಇದ್ದರೆ ದಂಡ ವಿಧಿಸಲು ಅವಕಾಶವಿದೆ. ಅದು ಮೊದಲ ಬಾರಿ ಒಂದು ಸಾವಿರ ರೂ. ದಂಡ. ಆನಂತರ ಇನ್ನೂ ಹೆಚ್ಚಾಗಲಿದೆ. ನಿಮ್ಮ ವಾಹನ ಸ್ಥಿತಿಗತಿಯಲ್ಲಿ ಇದೆಯೇ. ಪರಿಸರ ಮಾಲಿನ್ಯ ಮಾಡುತ್ತಿಲ್ಲವೇ ಎನ್ನುವುದನ್ನು ಇದು ದೃಢಪಡಿಸಲಿದೆ. ಇದನ್ನು ಎಮಿಷನ್‌ ಟೆಸ್ಟ್‌ ಎಂದು ಕರೆಯಲಾಗುತ್ತದೆ. ಈ ಪರೀಕ್ಷೆ ಮಾಡಿಸಿಕೊಳ್ಳುವುದಕ್ಕೆ ವಾಹನಗಳಿಗೆ ಇಂತಿಷ್ಟು ದರ ನಿಗದಿ ಮಾಡಲಾಗಿದೆ. ಸಾರಿಗೆ ಕಚೇರಿಯಿಂದಲೇ ಮಾಲಿನ್ಯ ನಿಯಂತ್ರಣದ ಸ್ಥಿತಿಗತಿ ಪ್ರಮಾಣಪತ್ರದ ಮೂಲಕ ವರದಿ ನೀಡುವ ಕೇಂದ್ರಗಳು ಕರ್ನಾಟಕದ ನಾನಾ ಭಾಗಗಳಲ್ಲಿ ಕೆಲಸ ಮಾಡುತ್ತಿವೆ. ಈಗ ಈ ತಪಾಸಣೆ ದರವನ್ನು ಪರಿಷ್ಕರಣೆ ಮಾಡುವ ಸಾಧ್ಯತೆಯಿದೆ.
ಕರ್ನಾಟಕ ಹೊರಸೂಸುವಿಕೆ ಪರೀಕ್ಷಾ ಕೇಂದ್ರಗಳ ಮಾಲೀಕರ ಸಂಘಗಳು ಇತ್ತೀಚೆಗೆ ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ ಅವರನ್ನು ಭೇಟಿಯಾಗಿ ಬಾಡಿಗೆ, ಹೊರಸೂಸುವಿಕೆ ಪರಿಶೀಲನಾ ಉಪಕರಣಗಳು, ಸಂಬಳ ಮತ್ತು ಖರ್ಚು ವೆಚ್ಚ ಹೆಚ್ಚುತ್ತಿರುವ ಬಗ್ಗೆ ಮಾಹಿತಿ ನೀಡಿ ದರಗಳನ್ನು ಪರಿಷ್ಕರಿಸುವಂತೆ ವಿನಂತಿಸಿವೆ. 'ಮಾಲಿನ್ಯ ನಿಯಂತ್ರಣ' ಪ್ರಮಾಣಪತ್ರದ ದರಗಳನ್ನು ಹೆಚ್ಚಿಸುವ ಸಾಧ್ಯತೆಯಿದೆ. ಸುಮಾರು ಮೂರು ವರ್ಷಗಳ ಹಿಂದೆ ದರಗಳನ್ನು ಹೆಚ್ಚಿಸಲಾಗಿದೆ. ಈಗ ದರ ಪರಿಷ್ಕರಣೆಗೆ ಕೋರಿಕೆ ಸಲ್ಲಿಸಲಾಗಿದೆ ಎಂದು ಸಂಘದ ಸದಸ್ಯರೊಬ್ಬರು ತಿಳಿಸಿದ್ದಾಗಿ ಇಂಡಿಯನ್‌ ಎಕ್ಸ್‌ ಪ್ರೆಸ್‌ ವರದಿ ಮಾಡಿದೆ.
ಇಲ್ಲಿಯವರೆಗೆ, ದ್ವಿಚಕ್ರ ವಾಹನಗಳು 65 ರೂ, ಆಟೋಗಳು 75 ರೂ, ನಾಲ್ಕು ಚಕ್ರಗಳ ಪೆಟ್ರೋಲ್ ವಾಹನಗಳು 115 ರೂ ಮತ್ತು ಡೀಸೆಲ್ ವಾಹನಗಳು ಪಿಯುಸಿ ಪ್ರಮಾಣಪತ್ರಗಳಿಗೆ 160 ರೂ ಪಾವತಿಸುತ್ತಿವೆ. ದ್ವಿಚಕ್ರ ವಾಹನಗಳ ಹೊರಸೂಸುವಿಕೆ ದರ ಪ್ರಮಾಣ ಪತ್ರ ನೀಡುವ ದರವನ್ನು 110 ರೂ.ಗೆ , ಆಟೋಗಳಿಗೆ 100 ರೂ. ಕ್ಕೆ, ನಾಲ್ಕು ಚಕ್ರಗಳ ಪೆಟ್ರೋಲ್ ಮತ್ತು ಸಿಎನ್‌ ಜಿ ವಾಹನಗಳ ಹೊರಸೂಸುವಿಕೆ ದರವನ್ನು 200ಕ್ಕೆ ಮತ್ತು ಡೀಸೆಲ್ ವಾಹನಗಳ ಹೊರಸೂಸುವಿಕೆ ಪ್ರಮಾಣ ಪತ್ರ ನೀಡುವ ದರವನ್ನು 250 ರೂ.ಗೆ ಹೆಚ್ಚಿಸುವಂತೆ ಸಂಘವು ಸರ್ಕಾರವನ್ನು ಒತ್ತಾಯಿಸಿದೆ.
ಹೊರಸೂಸುವಿಕೆ ಪರೀಕ್ಷೆಯ ದರಗಳನ್ನು ಪರಿಷ್ಕರಿಸಿ ಸುಮಾರು ಮೂರು ವರ್ಷಗಳು ಕಳೆದಿವೆ. ಕರ್ನಾಟಕಾದ್ಯಂತ 2,600 ಕ್ಕೂ ಹೆಚ್ಚು ಹೊರಸೂಸುವಿಕೆ ಪರೀಕ್ಷಾ ಕೇಂದ್ರಗಳಿವೆ. ಅವುಗಳಲ್ಲಿ 700 ಬೆಂಗಳೂರಿನಲ್ಲಿವೆ. ಪೆಟ್ರೋಲ್/ ಡಿಸೆಲ್‌ ದರಗಳು, ಹೊರಸೂಸುವಿಕೆ ಪರೀಕ್ಷಾ ಉಪಕರಣಗಳ ವೆಚ್ಚ ಮತ್ತು ಸಿಬ್ಬಂದಿ ವೇತನ ಹೆಚ್ಚಾಗಿದೆ. ಹೆಚ್ಚುತ್ತಿರುವ ವೆಚ್ಚವನ್ನು ನಿಭಾಯಿಸಲು, ದರಗಳನ್ನು ಹೆಚ್ಚಿಸುವಂತೆ ನಾವು ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ ಮತ್ತು ಸಾರಿಗೆ ಆಯುಕ್ತ ಎ.ಎಂ.ಯೋಗೀಶ ಅವರನ್ನು ಕೋರಿದ್ದೇವೆ ಎಂದು ಕರ್ನಾಟಕ ಹೊರಸೂಸುವಿಕೆ ಪರೀಕ್ಷಾ ಕೇಂದ್ರಗಳ ಮಾಲೀಕರ ಸಂಘಗಳ ಅಧ್ಯಕ್ಷ ಯೋಗೇಶ್ ಖಚಿತಪಡಿಸಿದರು.
ಸಾರಿಗೆ ಇಲಾಖೆಯು ಎಲ್ಲಾ ಹೊರಸೂಸುವಿಕೆ ಪರೀಕ್ಷಾ ಕೇಂದ್ರಗಳನ್ನು ಒಂದೇ ಸರ್ವರ್ ಅಡಿಯಲ್ಲಿ ಕೇಂದ್ರೀಕರಿಸುವ ಮತ್ತು ಸುರಕ್ಷಿತ ಪಿಯುಸಿ ಪ್ರಮಾಣಪತ್ರಗಳನ್ನು ನೀಡುವ ಗುರಿಯನ್ನು ಹೊಂದಿದೆ. ಇದು ಕೂಡ ಸದ್ಯದಲ್ಲೇ ಜಾರಿಯಾಗಬಹುದು ಎನ್ನುತ್ತವೆ ಸಾರಿಗೆ ಇಲಾಖೆ ಮೂಲಗಳು.
