ಚಿಕ್ಕಮಗಳೂರು ಜಿಲ್ಲೆ ಕಡೂರು ತಾಲ್ಲೂಕಿನ ಹಿರಿಯ ಪತ್ರಕರ್ತ, ಲೇಖಕ ಸಿಕೆ ಮೂರ್ತಿ ನಿಧನ

ಚಿಕ್ಕಮಗಳೂರು: ಚಿಕ್ಕಮಗಳೂರು ಜಿಲ್ಲೆಯ ಬಯಲುಸೀಮೆ ಪ್ರದೇಶ ಎಂದೇ ಹೆಸರುವಾಸಿಯಾಗಿರುವ ಕಡೂರಿನ ಹಿರಿಯ ಪತ್ರಕರ್ತ ಹಾಗೂ ಲೇಖಕ ಸಿ.ಕೆ.ಮೂರ್ತಿ ಅವರು ಬುಧವಾರ ನಿಧನರಾದರು.ಕಡೂರು ಭಾಗದಲ್ಲಿ ನಾಲ್ಕು ದಶಕ ಕಾಲದಿಂದ ಪತ್ರಕರ್ತರಾಗಿ, ಲೇಖಕರಾಗಿ ಗುರುತಿಸಿಕೊಂಡಿದ್ದ ಮೂರ್ತಿ ಅವರು ಈಗಲೂ ಸಕ್ರಿಯರಾಗಿದ್ದರು. ಅನಾರೋಗ್ಯದ ಕಾರಣದಿಂದ ಅವರು ಚಿಕಿತ್ಸ ಪಡೆದಿದ್ದರೂ ಬುಧವಾರ ನಿಧನರಾದರು ಎಂದು ಕುಟುಂಬವರು ತಿಳಿಸಿದ್ದಾರೆ. ಕಡೂರು ಭಾಗದಲ್ಲಿ ಅತ್ಯುತ್ತಮ ಪತ್ರಕರ್ತರಾಗಿ ಹೆಸರು ಮಾಡಿದ್ದ ಮೂರ್ತಿ ಅವರು ವಿಜಯಕರ್ನಾಟಕ, ಸಂಯುಕ್ತ ಕರ್ನಾಟಕ ಸಹಿತ ಹಲವು ಪತ್ರಿಕೆಗಳಲ್ಲಿ, ಚಿಕ್ಕಮಗಳೂರು ಜಿಲ್ಲಾ ಪತ್ರಕರ್ತರ ಸಂಘದ ಪದಾಧಿಕಾರಿಯಾಗಿಯೂ ಕೆಲಸ ಮಾಡಿದ್ದರು. ಕನ್ನಡ ಸಾಹಿತ್ಯ ಪರಿಷತ್ತು ಸಹಿತ ವಿವಿಧ ಸಂಘ ಸಂಸ್ಥೆಗಳ ಮೂಲಕವೂ ಸಿಕೆ ಮೂರ್ತಿ ಅವರು ಗುರುತಿಸಿಕೊಂಡು ಸಮಾಜಮುಖಿಯಾಗಿದ್ದರು.

ಹಾಸನ ಜಿಲ್ಲೆ ಹೆಬ್ಬಾಲೆಯವರಾದ ಮೂರ್ತಿ ಎಂಬತ್ತರ ದಶಕದಲ್ಲೇ ಕಡೂರಿಗೆ ಬಂದು ನೆಲೆಸಿದ್ದರು. ಗಿರಿ ವಾರ್ತೆ ಪತ್ರಿಕೆ ಮೂಲಕ ಪತ್ರಕರ್ತರಾಗಿ ವೃತ್ತಿ ಆರಂಭಿಸಿದ್ದರು. ನಂತರ ಹೊಸದಿಗಂತ, ಶಿರೋರತ್ನ, ಮಾರ್ಗ ಪ್ರಭ ಪತ್ರಿಕೆಯಲ್ಲಿ ಕೆಲಸ ಮಾಡಿ ಹೊಸ ಅಧ್ಯಾಯ ಎನ್ನುವ ವಾರಪತ್ರಿಕೆ ಆರಂಭಿಸಿದ್ದರು. ಹಾಸನ ಜಿಲ್ಲೆಯ ಜನತಾಮಾಧ್ಯಮ, ಜನಮಿತ್ರರಾಗಿ ಉಪಸಂಪಾದಕರಾಗಿದ್ದರು. ಪ್ರಜಾವಾಣಿ, ಸಂಯುಕ್ತಕರ್ನಾಟಕ. ವಿಜಯಕರ್ನಾಟಕದಲ್ಲೂ ವರದಿಗಾರರಾಗಿ ಕಡೂರಲ್ಲಿ ಸೇವೆ ಸಲ್ಲಿಸಿದರು. ಚಿಕ್ಕಮಗಳೂರು ಜಿಲ್ಲಾ ಪತ್ರಕರ್ತರ ಸಂಘದ ಪ್ರಧಾನ ಕಾರ್ಯದರ್ಶಿ, ಕರ್ನಾಟಕ ರಾಜ್ಯ ಪತ್ರಕರ್ತರ ಸಂಘದ ರಾಜ್ಯ ಸದಸ್ಯರಾಗಿದ್ದರು. ಚಿಕ್ಕಮಗಳೂರು ಲೇಖಕರ ಸಂಘದ ಸಹ ಕಾರ್ಯದರ್ಶಿ, ಕಸಾಪ ಅಜೀವ ಸದಸ್ಯರೂ ಆಗಿದ್ದರು ಅವರಿಗೆ ಕಡೂರು ತಾಲ್ಲೂಕು ಕನ್ನಡ ಸಾಹಿತ್ಯ ಪರಿಷತ್‌ ರಾಜ್ಯೋತ್ಸವ ಪ್ರಶಸ್ತಿ, ಕಡೂರು ಜೇಸಿ ಪ್ರಶಸ್ತಿ ಬಂದಿದ್ದವು, ಕಡೂರು ಸಾರ್ವಜನಿಕ ಆಸ್ಪತ್ರೆಯಲ್ಲಿ ಆರೋಗ್ಯ ರಕ್ಷಾ ಸಮಿತಿ ಸದಸ್ಯರೂ ಆಗಿದ್ದರು.

ಮೃತರಿಗೆ ಪತ್ನಿ ಪುಷ್ಪಲತಾ ಇದ್ದಾರೆ. ಅಂತ್ಯಕ್ರಿಯೆ ಕಡೂರಿನಲ್ಲಿಯೇ ನೆರವೇರಿತು.

ಎರಡು ವರ್ಷದ ಹಿಂದೆ ಕಡೂರಿನಲ್ಲಿ ಬಗರ್‌ ಹುಕುಂ ಸಮಿತಿ ಭೂಮಿಯ ಅವ್ಯವಹಾರ ನಡೆದಿದ್ದನ್ನು ಮೊದಲು ಬಯಲಿಗೆಳೆದವರೇ ಸಿಕೆ ಮೂರ್ತಿ ಅವರು. ಸರ್ಕಾರ ಇದನ್ನು ಗಂಭೀರವಾಗಿ ಪರಿಗಣಿಸಿ ತಹಸಿಲ್ದಾರ್‌ ಅವರನ್ನು ಅಮಾನತುಗೊಳಿಸಿತು. ಈಗಲೂ ಪ್ರಕರಣದ ವಿಚಾರಣೆ ನಡೆದಿದೆ. ಇದೇ ರೀತಿ ವೃತ್ತಿ ಜೀವನದುದ್ದಕ್ಕೂ ಹಲವು ವರದಿಗಳನ್ನು ಅವರು ಮಾಡಿದ್ದಾರೆ ಕಡೂರಿನ ಪತ್ರಕರ್ತರಾದ ಬಾಲು ಮಚ್ಚೇರಿ ನೆನಪಿಸಿಕೊಳ್ಳುತ್ತಾರೆ.