ಮಧ್ಯವರ್ತಿಗಳ ಹಾವಳಿ ಇಲ್ಲದೆ ರೈತರೇ ನೇರವಾಗಿ ದೆಹಲಿ, ಮುಂಬೈಗೂ ಮಾವಿನ ಹಣ್ಣು ತಲುಪಿಸುವುದು ಹೇಗೆ?

ಬೆಂಗಳೂರು: ಮಾವಿನ ಹಣ್ಣಿನ ಸುಗ್ಗಿ ಶುರುವಾಗಿದೆ. ಹಣ್ಣುಗಳ ರಾಜ ಎನಿಸಿಕೊಂಡ ಮಾವು ಮಾರುಕಟ್ಟೆ ದಾಪುಗಾಲಿಟ್ಟಿದ್ದು, ನೀವು ಕೂಡ ಅಂಚೆಯ ಮೂಲಕ ಮನೆ ಬಾಗಿಲಿಗೆ ಮಾವು ತರಿಸಿಕೊಳ್ಳಬಹುದು. ಅದಕ್ಕಾಗಿ ಆನ್​​ಲೈನ್​ನಲ್ಲಿ ಆರ್ಡರ್​ ಮಾಡಬೇಕಷ್ಟೆ. ಆದರೆ ಇದೀಗ ಮಾವು ಬೆಳೆಗಾರರಿಗೂ ಗುಡ್​​ನ್ಯೂಸ್​ ಸಿಕ್ಕಿದೆ. ತಾವು ಬೆಳೆದ ಮಾವನ್ನು ಮುಂಬೈ, ದೆಹಲಿಗೂ ಅಂಚೆ ಮೂಲಕವೇ ತಲುಪಿಸಬಹುದು.

ನಗರದ ಜನರಲ್ ಪೋಸ್ಟ್ ಆಫೀಸ್ (GPO) ಈ ಋತುವಿನಲ್ಲಿ ಮುಂಬೈ ಮತ್ತು ದೆಹಲಿಗೆ ಕರ್ನಾಟಕದ ಮಾವಿನ ಹಣ್ಣುಗಳನ್ನು ತಲುಪಿಸಲಿದೆ ಎಂದು ಕರ್ನಾಟಕ ವೃತ್ತದ ಮುಖ್ಯ ಪೋಸ್ಟ್ ಮಾಸ್ಟರ್ ಜನರಲ್ ಎಸ್ ರಾಜೇಂದ್ರ ಕುಮಾರ್ ಪ್ರಕಟಿಸಿದ್ದಾರೆ. 2019ರಲ್ಲಿ ಪ್ರಾರಂಭವಾದ ಈ ಉಪಕ್ರಮವು ಇಂಡಿಯಾ ಪೋಸ್ಟ್‌ನ ಬೆಂಗಳೂರು ಜಿಪಿಒ ಮತ್ತು ಕರ್ನಾಟಕ ರಾಜ್ಯ ಮಾವು ಅಭಿವೃದ್ಧಿ ಮತ್ತು ಮಾರುಕಟ್ಟೆ ನಿಗಮ ಲಿಮಿಟೆಡ್ ನಡುವಿನ ಸಹಯೋಗವಾಗಿದೆ.

ಇಲ್ಲಿಯವರೆಗೆ, ಇದು ಒಂದು ಲಕ್ಷಕ್ಕೂ ಹೆಚ್ಚು ಪೆಟ್ಟಿಗೆಗಳಲ್ಲಿ 3.51 ಲಕ್ಷ ಕೆಜಿ ಮಾವಿನಹಣ್ಣನ್ನು ತಲುಪಿಸಿದೆ. ಮಧ್ಯವರ್ತಿಗಳನ್ನು ನಿವಾರಿಸುವ ಮೂಲಕ ರೈತರಿಗೆ ನೇರ ಮಾರುಕಟ್ಟೆ ಪ್ರವೇಶ ಒದಗಿಸುವುದು ಇದರ ಪ್ರಮುಖ ಗುರಿಯಾಗಿದೆ. 'ಈ ವರ್ಷ ನಾವು ಮುಂಬೈ ಮತ್ತು ದೆಹಲಿಗೆ ಸ್ಪೀಡ್ ಪೋಸ್ಟ್ ಮೂಲಕ ವಾಯು ಸಾರಿಗೆಯ ಮೂಲಕ ಮಾವಿನ ಹಣ್ಣುಗಳ ವಿತರಣೆ ಪ್ರಾರಂಭಿಸುತ್ತೇವೆ. ಶೀಘ್ರದಲ್ಲೇ ಪ್ರಾಯೋಗಿಕವಾಗಿ ಇದರ ಬಗ್ಗೆ ಕ್ರಮ ಕೈಗೊಳ್ಳಲಾಗುವುದು' ಎಂದು ಭರವಸೆ ನೀಡಿದ್ದಾರೆ.

3 ಕೆಜಿಯಷ್ಟು ಪೆಟ್ಟಿಗೆಗಳಲ್ಲಿ ಪ್ಯಾಕ್

'ಇದು ಕರ್ನಾಟಕದ ಹೊರಗಿನ ಜನರು ನಮ್ಮ ಮಾವಿನ ಹಣ್ಣುಗಳನ್ನು ಸವಿಯಲು ಮತ್ತು ಆನಂದಿಸಲು ಅನುವು ಮಾಡಿಕೊಡುತ್ತದೆ' ಎಂದು ಕುಮಾರ್ ಹೇಳಿದ್ದಾರೆ. 'ಮುಂಬರುವ ವರ್ಷಗಳಲ್ಲಿ ಈ ಸೇವೆಯನ್ನು ಇತರ ಮಹಾನಗರಗಳಿಗೂ ವಿಸ್ತರಿಸಲಾಗುವುದು' ಎಂದು ಹೇಳಿದ್ದಾರೆ. 'ಮಾವಿನ ಹಣ್ಣುಗಳನ್ನು ರೈತರು 3 ಕೆಜಿಯಷ್ಟು ಪೆಟ್ಟಿಗೆಗಳಲ್ಲಿ ಪ್ಯಾಕ್ ಮಾಡುತ್ತಾರೆ. ಮರುದಿನ ಪೋಸ್ಟ್‌ಮ್ಯಾನ್ ಮೂಲಕ ತಲುಪಿಸುತ್ತೇವೆ. ಪ್ರಸ್ತುತ, ಈ ಸೇವೆ ಬೆಂಗಳೂರಿನಲ್ಲಿ ಮಾತ್ರ ಲಭ್ಯವಿದೆ' ಎಂದಿದ್ದಾರೆ.

ಕರ್ನಾಟಕ ರಾಜ್ಯ ಮಾವು ಅಭಿವೃದ್ಧಿ ಮತ್ತು ಮಾರುಕಟ್ಟೆ ನಿಗಮ ಲಿಮಿಟೆಡ್‌ನ ವ್ಯವಸ್ಥಾಪಕ ನಿರ್ದೇಶಕ ಸಿಜಿ ನಾಗರಾಜು ಈ ಬಗ್ಗೆ ಇನ್ನಷ್ಟು ವಿವರಿಸಿದ್ದಾರೆ. 'ಆನ್‌ಲೈನ್ ರೈತ ಪೋರ್ಟಲ್‌ಗಳು ಈಗ 45,000ಕ್ಕೂ ಹೆಚ್ಚು ಖಾಯಂ ಗ್ರಾಹಕರನ್ನು ಹೊಂದಿವೆ' ಎಂದು ಮಾಹಿತಿ ನೀಡಿದ್ದಾರೆ. 'ನಾವು ರೈತರನ್ನು ಅಪಾರ್ಟ್‌ಮೆಂಟ್ ಸಂಘಗಳೊಂದಿಗೆ ಸಂಪರ್ಕಿಸಿದ್ದೇವೆ. ಇತರ ಆಧುನಿಕ ಮಾರುಕಟ್ಟೆ ತಂತ್ರಗಳನ್ನು ಅಳವಡಿಸಿಕೊಂಡಿದ್ದೇವೆ' ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ: ಎಸ್​ ಜಾನಕಿ ಎಷ್ಟು ಭಾಷೆಗಳಲ್ಲಿ ಹಾಡಿದ್ದಾರೆ?

ಅಂತಾರಾಷ್ಟ್ರೀಯ ರಫ್ತು ಸಾಧ್ಯವೇ?

ಅಂತಾರಾಷ್ಟ್ರೀಯ ರಫ್ತಿಗೆ ಸಂಬಂಧಿಸಿದಂತೆ ಈ ಪ್ರಕ್ರಿಯೆಯು ಬೇಸರದ ಸಂಗತಿಯಾಗಿದೆ. ಬಹು ಗುಣಮಟ್ಟದ ತಪಾಸಣೆ ಮತ್ತು ಕ್ವಾರಂಟೈನ್ ಚಿಕಿತ್ಸೆ ಒಳಗೊಂಡಿರುವುದರಿಂದ ಮಾವು ಮಂಡಳಿಗೆ ಇದು ದುಬಾರಿಯಾಗಿದೆ ಎಂದು ನಾಗರಾಜು ಹೇಳಿದ್ದಾರೆ. 'ಇದರ ಹೊರತಾಗಿಯೂ, ಯುನೈಟೆಡ್ ಸ್ಟೇಟ್ಸ್ ಮತ್ತು ಯುರೋಪಿಯನ್ ರಾಷ್ಟ್ರಗಳು ಸೇರಿದಂತೆ ಹಲವಾರು ದೇಶಗಳು ಕರ್ನಾಟಕದ ಮಾವಿನ ಹಣ್ಣನ್ನು ಆಮದು ಮಾಡಿಕೊಳ್ಳುತ್ತವೆ' ಎಂದು ಅವರು ಹೇಳಿದ್ದಾರೆ.

ಕರ್ನಾಟಕದ ಅಂಕೋಲಾ ಪ್ರದೇಶದಲ್ಲಿ ಬೆಳೆಯುವ ಜಿಐ-ಟ್ಯಾಗ್ ಮಾಡಲಾದ ಮಾವಿನ ಹಣ್ಣಾದ ಕರಿ ಇಶಾದ್, ಬಾದಾಮಿ, ಸಿಂಧೂರ ಮತ್ತು ಅಲ್ಫೋನ್ಸೊದಂತಹ ಕೆಲವು ವಾಣಿಜ್ಯಿಕವಾಗಿ ಜನಪ್ರಿಯ ಪ್ರಭೇದಗಳಿಗೆ ಹೆಚ್ಚಿನ ಬೇಡಿಕೆಯಿದೆ ಎಂದು ಅವರು ಹೇಳಿದ್ದಾರೆ. 2019ರಲ್ಲಿ ಪ್ರಾರಂಭವಾದಾಗಿನಿಂದ ಮ್ಯಾಂಗೋ ಪೋಸ್ಟ್ ಉಪಕ್ರಮವು ಇಂಡಿಯಾ ಪೋಸ್ಟ್‌ಗೆ 83 ಲಕ್ಷ ರೂಪಾಯಿ ಆದಾಯ ಗಳಿಸಿದೆ.

ಇದನ್ನೂ ಓದಿ: ಬೆಳಗಾವಿ, ಬಾಗಲಕೋಟೆ, ಹುಬ್ಬಳ್ಳಿ, ಚೆನ್ನೈ ಮೂರು ಜೋಡಿ ಎಕ್ಸ್‌ಪ್ರೆಸ್ ರೈಲುಗಳಿಗೆ ಎಲ್‌ಎಚ್‌ಬಿ ಬೋಗಿಗಳ ಸೇರ್ಪಡೆ