ಶ್ರೀಲಂಕಾದಿಂದ ಧನುಷ್‌ಕೋಡಿಯವರೆಗೆ 28 ಕಿಮೀ ಕಡಲು ಈಜಿದ ಖಾಕಿ ಐರನ್ ಮ್ಯಾನ್ ಮುರುಗೇಶ ಚನ್ನಣ್ಣವರ; ತಂಡದ ಸಾಥ್

ಹುಬ್ಬಳ್ಳಿ: ಹುಬ್ಬಳ್ಳಿ ಗ್ರಾಮೀಣ ಠಾಣೆಯ ಪೊಲೀಸ್‌ ಇನ್ಸ್‌ಪೆಕ್ಟರ್ ಆಗಿರುವ ಮುರುಗೇಶ ಚನ್ನಣ್ಣವರ, ತಮ್ಮ ಸಾಹಸಿ ತಂಡದೊಂದಿಗೆ ಹೊಸ ದಾಖಲೆ ನಿರ್ಮಿಸಿದ್ದಾರೆ. ಇದು ಒಬ್ಬ ಪೊಲೀಸ್‌ ಅಧಿಕಾರಿಯಾಗಿ ಅಲ್ಲ. ಬದಲಿಗೆ ಸಮುದ್ರ ಈಜುವ ಸಾಹಸಮಯ ಕ್ರೀಡೆಯಿಂದ. ಬರೋಬ್ಬರಿ 28 ಕಿ.ಮೀ ದೂರ ಕಡಲೀಜಿ ದಾಖಲೆ ಬರೆದಿದ್ದಾರೆ. ಇವರಿಗೆ ಎಂಬಿಬಿಎಸ್ ವಿದ್ಯಾರ್ಥಿ ಅಮನ್ ಶಾನಭಾಗ ಸೇರಿದಂತೆ ಹಲವರು ಸಾಥ್‌ ನೀಡಿದ್ದಾರೆ

ಕ್ರೀಡೆ ಮನುಷ್ಯನ ಆರೋಗ್ಯ ಸುಧಾರಿಸುತ್ತದೆ. ಸದೃಢ ಮತ್ತು ಆರೋಗ್ಯವಂತ ದೇಹಕ್ಕೆ ಕ್ರೀಡೆ ಅತ್ಯಗತ್ಯ. ಕೆಲವು ಕ್ರೀಡೆಗಳಿಗೆ ಶಕ್ತಿ ಮಾತ್ರವಲ್ಲದೆ ಯುಕ್ತಿಯ ಅಗತ್ಯವಿದೆ. ಅದರಲ್ಲಿ ಈಜು ಕೂಡಾ ಒಂದು. ಶಕ್ತಿ, ಯುಕ್ತಿಯ ಜೊತೆಗೆ ತಾಳ್ಮೆಯ ಅಗತ್ಯವಿರುವ ಈಜಿನ ಮೂಲಕ ಮುರುಗೇಶ ಚನ್ನಣ್ಣವರ ದಾಖಲೆ ಮಾಡಿದ್ದಾರೆ. ಇವರ ಸಾಧನೆಯ ಶಿಖರವೇರಲು ತಾಳ್ಮೆಯ ಜೊತೆಗೆ ಸತತ ಪರಿಶ್ರಮ ಬೇಕಾಗಿತ್ತು.

ಹುಬ್ಬಳ್ಳಿ ಗ್ರಾಮೀಣ ಠಾಣೆಯ ಅಧಿಕಾರಿಯಾಗಿರುವ ಇವರು ಹೊಸ ಮೈಲುಗಲ್ಲು ಸಾಧಿಸಿದ್ದಾರೆ. ರಾಮಸೇತು ಈಜುವ ಮೂಲಕ ಈ ಸಾಧನೆ ಮಾಡಿದ್ದಾರೆ. ಶ್ರೀಲಂಕಾದಿಂದ ಭಾರತದ ಧನುಷ್‌ಕೋಡಿಯವರೆಗೆ ರಾಮ ಸೇತು ಮೂಲಕ 28 ಕಿ.ಮೀ. ದೂರವನ್ನು ಈಜು ರಿಲೇ ತಂಡದೊಂದಿಗೆ ಮುಗಿಸಿದ್ದಾರೆ. ಇದಕ್ಕಾಗಿ ಇವರ ತಂಡ ತೆಗೆದುಕೊಂಡ ಸಮಯ 8 ಗಂಟೆ 30 ನಿಮಿಷಗಳು.

ಈ ವಿಶೇಷ ತಂಡದಲ್ಲಿ ಉತ್ತರ ಪ್ರದೇಶ ಮತ್ತು ಹರಿಯಾಣದ ಇಬ್ಬರು ಐಎಎಸ್ ಅಧಿಕಾರಿಗಳು ಹಾಗೂ ಪಶ್ಚಿಮ ಬಂಗಾಳ ಮತ್ತು ಹರಿಯಾಣದ ವಿಕಲಚೇತನ ಕ್ರೀಡಾಪಟುಗಳು ಕೂಡಾ ಇದ್ದಾರೆ.

ಸಮುದ್ರದ ಕ್ಲಿಷ್ಟಕರ ಮಾರ್ಗ

ಈ ತಂಡವು ಕಷ್ಟಕರವಾದ 28 ಕಿ.ಮೀ ಈಜನ್ನು ಹಿಂದೂಮಹಾಸಾಗರ ಮತ್ತು ಬಂಗಾಲಕೊಲ್ಲಿಯ ಸಮುದ್ರದಲ್ಲಿ ಪ್ರತಿಕೂಲ ವಾತಾವರಣ ಮತ್ತು ಭಾರಿ ಅಲೆಗಳ ಅಡೆತಡೆಯ ನಡುವೆಯೂ ಮುಗಿಸಿದ್ದಾರೆ. ನಿರಂತರವಾಗಿ ಎಂಟೂವರೆ ಗಂಟೆಯಲ್ಲಿ ಈಜಿ ಗುರಿ ತಲುಪಿದ್ದಾರೆ.

ಮುರುಗೇಶ ಅವರು ಈಜು ಸಾಧನೆಗೆ ಸ್ಫೂರ್ತಿಯಾಗಿ ಧರ್ಮಪತ್ನಿ ಶ್ವೇತಾ ಚನ್ನಣ್ಣವರ ಅವರನ್ನು ಜೊತೆಯಲ್ಲಿ ಬೋಟಿನಲ್ಲಿ ಶ್ರೀಲಂಕಾಗೆ ಕರೆದುಕೊಂಡು ಹೋಗಿದ್ದರು. ಈ ಹಿಂದೆ ಕಾಶ್ಮೀರದಿಂದ ಕನ್ಯಾಕುಮಾರಿವರೆಗೆ ಸೈಕ್ಲಿಂಗ್ ಮುಂತಾದ ಸಾಧನೆಗಳ ಮೂಲಕ ಇವರು ಗಮನೆ ಸೆಳೆದು ಐರನ್‌ಮ್ಯಾನ್ ಎಂದೇ ಖ್ಯಾತಿ ಪಡೆದಿದ್ದಾರೆ.

ಮುಂದಿನ ಗುರಿ ಇಂಗ್ಲಿಷ್‌ ಕಾಲುವೆ

ಮೇಲಿಂದ ಮೇಲೆ ಒಂದೊಂದು ಸಾಧನೆಯ ಗುರಿ ಹಾಕಿಕೊಂಡಿರುವ ಇವರು, ಮತ್ತೊಂದು ಮೈಲುಗಲ್ಲು ಸಾಧಿಸುವ ನಿರೀಕ್ಷೆಯಲ್ಲಿದ್ದಾರೆ. ಚನ್ನಣ್ಣನವರ ಮತ್ತು ಅಮನ್ ಶಾನಭಾಗ ಮುಂಬರುವ ಜೂನ್ ತಿಂಗಳಲ್ಲಿ ವಿಶ್ವದ ಅತಿ ಕಷ್ಟಕರ ಎನಿಸಿರುವ ಇಂಗ್ಲಿಷ್‌ ಕಾಲುವೆಯನ್ನು ಈಜಲು ಹೊರಟಿದ್ದಾರೆ. ಇಂಗ್ಲೆಂಡ್‌ ಮತ್ತು ಫ್ರಾನ್ಸ್ ನಡುವೆ 36 ಕಿಲೋ ಮೀಟರ್ ಕಾಲುವೆ ದೂರದ ಕಾಲುವೆ ಇದಾಗಿದೆ.

ಇದನ್ನೂ ಓದಿ | ಕರ್ನಾಟಕದ ಸರ್ಕಾರಿ ಶಾಲೆಗಳಿಗೆ ಹೊಸ ಪಾತ್ರೆ; ಮಕ್ಕಳ ಆರೋಗ್ಯದ ದೃಷ್ಟಿಯಿಂದ ನೂತನ ಕ್ರಮ -ಸಚಿವ ಮಧು ಬಂಗಾರಪ್ಪ