Bangalore Employment Mela: ಬೆಂಗಳೂರಲ್ಲಿ 2025 ಜನವರಿ 7, 8ರಂದು ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನಿಗಮದಿಂದ ಉದ್ಯೋಗ ಮೇಳ

ಬೆಂಗಳೂರು: ಹೊಸ ವರ್ಷದಲ್ಲಿ ನೀವು ಉದ್ಯೋಗ ಹುಡುಕಾಟದಲ್ಲಿದ್ದೀರಾ, ನಿಮ್ಮ ವಿದ್ಯಾರ್ಹತೆ, ಕೌಶಲ್ಯಕ್ಕೆ ಅನುಗುಣವಾಗಿ ಉದ್ಯೋಗ ಸಿಗಬೇಕು ಎನ್ನುವ ಬಯಕೆಯಿದೆಯಾ, ಇದಕ್ಕಾಗಿಯೇ ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನಿಗಮವು 2025ನೇ ಸಾಲಿನ ಮೊದಲ ಉದ್ಯೋಗ ಮೇಳವನ್ನು ಬೆಂಗಳೂರಿನಲ್ಲಿ ಆಯೋಜಿಸಿದೆ. ಬೆಂಗಳೂರಿನ ಶಾಂತಿನಗರದಲ್ಲಿರುವ ಆಸ್ಟಿನ್‌ ಟೌನ್‌ನ ನಂದನ್‌ ಫುಟ್‌ಬಾಲ್‌ ಮೈದಾನದಲ್ಲಿ ಉದ್ಯೋಗ ಮೇಳವು ಜನವರಿ 7 ಮತ್ತು 8 ರಂದು ಆಯೋಜನೆಗೊಂಡಿದೆ. ಈ ಉದ್ಯೋಗಮೇಳಕ್ಕೆ ಬೆಂಗಳೂರಿನ ಪ್ರಮುಖ ಉದ್ಯೋಗದಾತ ಕಂಪೆನಿಗಳು ಭಾಗಿಯಾಗುತ್ತಿದ್ದು. ಮೇಳದಲ್ಲಿ ಆರಂಭಿಕ ಹಂತದ ಮಾಹಿತಿ ಸಂಗ್ರಹ, ಅಭ್ಯರ್ಥಿಗಳ ಕೌಶಲ, ಜ್ಞಾನ, ಅನುಭವ ಆಧರಿಸಿ ನಂತರ ಉದ್ಯೋಗ ಒದಗಿಸಲಿವೆ. ಈ ಮೇಳದಲ್ಲಿ ಪಾಲ್ಗೊಳ್ಳುವವರು ನೋಂದಣಿ ಮಾಡಿಸಿಕೊಳ್ಳಲು ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನಿಗಮವು ಅವಕಾಶವನ್ನು ನೀಡಿದೆ.

ಎರಡು ದಿನವೂ ಬೆಳಿಗ್ಗೆ 9 ರಿಂದ ಸಂಜೆ 5 ಗಂಟೆವರಗೆ ಉದ್ಯೋಗ ಮೇಳ ನಡೆಯಲಿದೆ. ಶಾಂತಿನಗರ ಶಾಸಕ ಎನ್‌.ಎ.ಹ್ಯಾರಿಸ್‌ ಅವರ ನೇತೃತ್ವದಲ್ಲಿಯೇ ಈ ಉದ್ಯೋಗ ಮೇಳವನ್ನು ನಿಗಮವು ಆಯೋಜಿಸಿದೆ.

ಹದಿನೈದು ವರ್ಷದಿಂದ ತರಬೇತಿ

2008 ರಲ್ಲಿ ಸ್ಥಾಪಿಸಲಾದ ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನಿಗಮವು ಕರ್ನಾಟಕ ಸರ್ಕಾರದ ಕೌಶಲ್ಯ ಅಭಿವೃದ್ಧಿ, ಉದ್ಯಮಶೀಲತೆ ಮತ್ತು ಜೀವನೋಪಾಯ ಇಲಾಖೆಯ ಆಶ್ರಯದಲ್ಲಿ, ವಾರ್ಷಿಕವಾಗಿ 60 ಸಾವಿರಕ್ಕೂ ಹೆಚ್ಚು ಅಭ್ಯರ್ಥಿಗಳಿಗೆ ಅಲ್ಪಾವಧಿಯ ವೃತ್ತಿಪರ ತರಬೇತಿಯನ್ನು ಪ್ರಧಾನ ಮಂತ್ರಿ ಕೌಶಲ್ಯ ವಿಕಾಸ್ ಯೋಜನೆ (ಪಿ..ಎಂ.ಕೆ.ಕೆ.ವೈ) ಮತ್ತು ಕೌಶಲ್ಯ ಅಭಿವೃದ್ಧಿಗೆ ರಾಜ್ಯದ ಪ್ರಮುಖ ಯೋಜನೆಯಾದ ಮುಖ್ಯಮಂತ್ರಿಗಳ ಕೌಶಲ್ಯ ಕರ್ನಾಟಕ ಯೋಜನೆ (ಸಿ.ಎಂ.ಕೆ.ಕೆ.ವೈ) ಅಡಿಯಲ್ಲಿ ನೀಡುತ್ತಿದೆ.

ರಾಜ್ಯದಾದ್ಯಂತ 800 ಕ್ಕೂ ಹೆಚ್ಚು ಮಾನ್ಯತೆ ಪಡೆದಿರುವ ತರಬೇತಿ ಕೇಂದ್ರಗಳ ಮೂಲಕ, ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನಿಗಮವು ಆಟೋಮೋಟಿವ್, ಐಟಿ-ಐಟಿ.ಇ.ಎಸ್, ಲಾಜಿಸ್ಟಿಕ್ಸ್, ಅಪಾರೆಲ್ ಮತ್ತು ಎಲೆಕ್ಟ್ರಾನಿಕ್ಸ್ ಸೇರಿದಂತೆ ಹಲವಾರು ವಲಯಗಳಲ್ಲಿ ಕೌಶಲ್ಯ ತರಬೇತಿಯನ್ನು ನೀಡುತ್ತಿದೆ.

ಇದರೊಂದಿಗೆ, ಕರ್ನಾಟಕದಾದ್ಯಂತ ಕೌಶಲ್ಯ ಅಭಿವೃದ್ಧಿ ಮತ್ತು ಉದ್ಯಮಶೀಲತಾ ಕ್ಷೇತ್ರಗಳಲ್ಲಿ ವಿಶೇಷ ಯೋಜನೆಗಳನ್ನು ವಿನ್ಯಾಸಗೊಳಿಸಿ ಅನುಷ್ಠಾನಗೊಳಿಸುತ್ತದೆ. ಕರ್ನಾಟಕದ ಪ್ರತಿ ಜಿಲ್ಲೆಯಲ್ಲಿ ಜಿಲ್ಲಾ ಕೌಶಲ್ಯ ಅಭಿವೃದ್ಧಿ ಕಛೇರಿಗಳ ಮೂಲಕ ಈ ಕಾರ್ಯಕ್ರಮಗಳನ್ನು ಬೆಂಬಲಿಸಿ ಮೇಲ್ವಿಚಾರಣೆ ಮಾಡುತ್ತಿದೆ.

ಮೌಲ್ಯಮಾಪನಕ್ಕೂ ಅವಕಾಶ

ಮಾನ್ಯತೆ ಪಡೆದ ಸಿ.ಎಂ.ಕೆ.ಕೆ.ವೈ. ಕೇಂದ್ರಗಳಲ್ಲಿ ಉದ್ಯಮಗಳ ಬೇಡಿಕೆಗೆ ಅನುಗುಣವಾಗಿ ತರಬೇತಿ ನೀಡಲಾಗುತ್ತಿದೆ. ತರಬೇತಿಯ ನಂತರ ಮೌಲ್ಯಮಾಪನ ನಡೆಸಿ ಅಭ್ಯರ್ಥಿಗಳನ್ನು ಪ್ರಮಾಣೀಕರಿಸಲಾಗುತ್ತಿದೆ. ಕೆ.ಎಸ್.ಡಿ.ಸಿ.ಯು ಈ ಯೋಜನೆಯಡಿಯಲ್ಲಿ ಅಭ್ಯರ್ಥಿಗಳಿಗೆ ತರಬೇತಿಯ ನಂತರ ಉದ್ಯೋಗಾವಕಾಶವನ್ನು ಒದಗಿಸುತ್ತಿದೆ.

ಪ್ರಾದೇಶಿಕ, ರಾಷ್ಟ್ರೀಯ ಮತ್ತು ಅಂತರಾಷ್ಟ್ರೀಯ ಮಾರುಕಟ್ಟೆಗಳಲ್ಲಿ ಸ್ಪರ್ಧಿಸಲು ಕರ್ನಾಟಕದ ಜನತೆಯನ್ನು ಸಿದ್ಧಗೊಳಿಸಲು ವಿಶ್ವದ ಉದ್ಯಮ, ಶೈಕ್ಷಣಿಕ ಮತ್ತು ಇತರೆ ಸಾರ್ವಜನಿಕ ಸಂಸ್ಥೆಗಳೊoದಿಗೆ ಕೈ ಜೋಡಿಸಿ ರಾಜ್ಯದ ಕೌಶಲ್ಯ ಕೊರತೆಯ ಅಂತರವನ್ನು ಕಡಿಮೆ ಮಾಡಲು ಅಲ್ಪಾವಧಿಯ ವೃತ್ತಿಪರ ತರಬೇತಿ ಮತ್ತು ಉದ್ಯಮಶೀಲತೆ ಅಭಿವೃದ್ಧಿ ಕಾರ್ಯಕ್ರಮಗಳನ್ನು ಕೆ.ಎಸ್.ಡಿ.ಸಿ. ನೀಡುತ್ತಿದೆ.

ಉದ್ಯೋಗ ಮೇಳ ಹೇಗೆ

ಇದಲ್ಲದೇ ಉದ್ಯೋಗ ಮೇಳಗಳನ್ನು ಅವರ ಕೌಶಲಕ್ಕೆ ಆಧರಿಸಿ ಆಯೋಜಿಸುತ್ತಾ ಬರುತ್ತಿದೆ. ಕಳೆದ ವರ್ಷ ರಾಮನಗರ ಜಿಲ್ಲೆ ಚನ್ನಪಟ್ಟಣದಲ್ಲಿ ಇಂತಹದೇ ಉದ್ಯೋಗ ಮೇಳವನ್ನು ನಿಗಮವು ಆಯೋಜಿಸಿತ್ತು. ಈಗ ಬೆಂಗಳೂರಿನಲ್ಲಿಯೇ ಮೇಳ ಆಯೋಜಿಸಲಾಗುತ್ತಿದೆ.

ಹೀಗೆ ನೊಂದಾಯಿಸಿಕೊಳ್ಳಿ

ಮೇಳದಲ್ಲಿ ವಿವಿಧ ಪದವೀಧರರು, ಡಿಪ್ಲೊಮಾ,ಐಟಿಐ ಶಿಕ್ಷಣ ಪಡೆದವರು, ಇತರೆ ಪದವಿ ಪೂರೈಸಿದವರು ನೋಂದಣಿ ಮಾಡಿಕೊಳ್ಳಬಹುದು. ಇದಲ್ಲದೇ ಉದ್ಯೋಗದಾತರೂ ಕೂಡ ನೋಂದಣಿ ಮಾಡಿಕೊಳ್ಳಲು ನಿಗಮ ಅವಕಾಶ ನೀಡಿದೆ.

https://udyogamela.skillconnect.kaushalkar.com/BENGALURUURBAN/CandidateRegistration/2024-25 ಲಿಂಕ್‌ ಬಳಸಿಕೊಂಡು ಮೇಳಕ್ಕೆ ನೋಂದಣಿ ಮಾಡಿಸಿಕೊಳ್ಳಬಹುದು.

ಉದ್ಯೋಗ ಮೇಳಕ್ಕಾಗಿ ಅಭ್ಯರ್ಥಿಗಳ ನೋಂದಣಿ ನಮೂನೆಯನ್ನು ನೀಡಲಾಗಿದ್ದು, ಅಲ್ಲಿ ನಿಮ್ಮ ವಿವರಗಳನ್ನು ಸಲ್ಲಿಸಬೇಕು. ಉದ್ಯೋಗ ಮೇಳ / ಉದ್ಯೋಗಾವಕಾಶಗಳ ಕುರಿತು ಹೆಚ್ಚಿನ ಮಾಹಿತಿಗಾಗಿ ದಯವಿಟ್ಟು 1800 599 9918 ವಿಸ್ತರಣಾ ಸಂಖ್ಯೆ(5) ಗೆ ಸಂಪರ್ಕಿಸಿ ಅಥವಾ udyogamela.ksdc@karnataka.gov.in ಗೆ ಇಮೇಲ್‌ಗೆ ಮಾಹಿತಿ ನೀಡಿ ವಿವರಗಳನ್ನು ಪಡೆಯಬಹುದು ಎಂದು ತಿಳಿಸಲಾಗಿದೆ.