Karnataka Tiger Estimation: ವಾರ್ಷಿಕ ಗಣತಿ ವರದಿ ಬಿಡುಗಡೆ; ಕರ್ನಾಟಕ ಸಂರಕ್ಷಿತ ಪ್ರದೇಶದಲ್ಲಿ ಹುಲಿ ಸಂಖ್ಯೆ ಸ್ಥಿರ, 393 ಇರುವ ಲೆಕ್ಕ

Karnataka Tiger Estimation: ಕರ್ನಾಟಕ ರಾಜ್ಯದ ಹುಲಿ ಸಂರಕ್ಷಿತ ಪ್ರದೇಶಗಳ ಹುಲಿಗಳ ಸಮೀಕ್ಷೆ 2024 ರ ವರದಿಯನ್ನು ಬಿಡುಗಡೆ ಮಾಡಲಾಗಿದೆ. ಈ ವರದಿ ಪ್ರಕಾರ ಕರ್ನಾಟಕದಲ್ಲಿ ಹುಲಿಗಳ ಸಂಖ್ಯೆ ಏರಿಕೆಯಂತೂ ಆಗಿಲ್ಲ. ಕೊಂಚ ಕಡಿಮೆ ಎನ್ನಿಸಿದರೂ ಹುಲಿಗಳ ಪ್ರಮಾಣದಲ್ಲಿ ಸ್ಥಿರತೆಯಂತೂ ಕಂಡು ಬಂದಿದೆ. ಕರ್ನಾಟಕ ಅರಣ್ಯ ಇಲಾಖೆ, ಬೆಂಗಳೂರಿನ ಅರಣ್ಯ ಭವನದಲ್ಲಿ ಸ್ಥಾಪಿಸಿರುವ ಕರ್ನಾಟಕ ವನ್ಯಜೀವಿ ತಾಂತ್ರಿಕ ಘಟಕದ ಮೂಲಕ ಈ ಸಮೀಕ್ಷೆಯ ಮಾಹಿತಿಯನ್ನು ವಿಶ್ಲೇಷಿಸಿ, "ಕರ್ನಾಟಕ - 2024 ಹುಲಿಗಳ, ಸಸ್ಯಾಹಾರಿ ಹಾಗೂ ಇತರ ಪ್ರಾಣಿಗಳ ವಾರ್ಷಿಕ ವರದಿ" ಪ್ರಕಟಿಸಿದೆ. ಈ ವರದಿಯನ್ನು ಕರ್ನಾಟಕ ಅರಣ್ಯ ಸಚಿವ ಈಶ್ವರ ಖಂಡ್ರೆ ಅವರು ಗುರುವಾರ ತಮ್ಮ ಕಚೇರಿಯಲ್ಲಿ ಬಿಡುಗಡೆ ಮಾಡಿದರು.

ರಾಷ್ಟ್ರೀಯ ಹುಲಿ ಸಂರಕ್ಷಣಾ ಪ್ರಾಧಿಕಾರ (NTCA)ದ ಮಾರ್ಗಸೂಚಿಗಳ ಪ್ರಕಾರ, ಅಖಿಲ ಭಾರತ ಹುಲಿ ಗಣತಿಯ (AITE) ಭಾಗವಾಗಿ, ಎಲ್ಲಾ ರಾಜ್ಯಗಳ ಹುಲಿ ಆವಾಸಸ್ಥಾನ ಪ್ರದೇಶಗಳಲ್ಲಿ ಪ್ರತಿ 4 ವರ್ಷಗಳಿಗೊಮ್ಮೆ ಹುಲಿ, ಆನೆ, ಇತರೆ ಬೇಟೆ ಹಾಗೂ ಸಸ್ಯಾಹಾರಿ ಪ್ರಾಣಿಗಳ ಗಣತಿಯನ್ನು ನಡೆಸಲಾಗುತ್ತದೆ. ದೇಶದ ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ ಹುಲಿ ಮತ್ತು ಸಸ್ಯಾಹಾರಿ ಪ್ರಾಣಿಗಳ ವಾರ್ಷಿಕ ಮೇಲ್ವಿಚಾರಣೆಯ ಭಾಗವಾಗಿ, ಎನ್‌ಟಿಸಿಎ ಪ್ರತಿ ವರ್ಷ ಎಲ್ಲಾ ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ ನಾಲ್ಕನೇ ಹಂತದ ಸಮೀಕ್ಷೆಗಳನ್ನು ನಡೆಸಲು ಸಲಹೆ ನೀಡಿದೆ.

ಹೇಗಿರಲಿದೆ ಗಣತಿ

ಹುಲಿ ಸಂರಕ್ಷಣೆಯಲ್ಲಿ ಮುಂಚೂಣಿ ರಾಜ್ಯವಾಗಿರುವ ಕರ್ನಾಟಕ, ಮಾರ್ಗಸೂಚಿಗಳನ್ನು ಅನುಸರಿಸಿ 2015ರಿಂದ ಈ ಸಮೀಕ್ಷೆಗಳನ್ನು ನಿರಂತರವಾಗಿ ನಡೆಸಿಕೊಂಡು ಬಂದಿದೆ. 2023ರ ನವೆಂಬರ್‌ನಿಂದ 2024ರ ಫೆಬ್ರವರಿಯವರೆಗೆ ಕರ್ನಾಟಕ ರಾಜ್ಯದ 5 ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ - ನಾಗರಹೊಳೆ, ಬಂಡೀಪುರ, ಭದ್ರಾ, ಬಿಳಿಗಿರಿರಂಗನಾಥ ಸ್ವಾಮಿ ಬೆಟ್ಟ (BRT) ಮತ್ತು ಕಾಳಿ (ದಾಂಡೇಲಿ-ಅಣಶಿ) ಪ್ರದೇಶಗಳಲ್ಲಿ ಈ ನಾಲ್ಕನೇ ಹಂತದ ಸಮೀಕ್ಷೆಗಳು ಕೈಗೊಳ್ಳಲಾಯಿತು

ನಾಲ್ಕನೇ ಹಂತದ ಸಮೀಕ್ಷೆಗಳು ಮುಖ್ಯವಾಗಿ ಕ್ಯಾಮೆರಾ (Camera Trap) ಸಮೀಕ್ಷೆಯನ್ನು ಒಳಗೊಂಡಿದ್ದು, ಇದು ಹುಲಿ ಹಾಗೂ ಇತರೆ ಬೇಟೆ ಪ್ರಾಣಿಗಳ ಸಂಖ್ಯೆ ಅಂದಾಜಿಗೆ ಉಪಯೋಗಿಸಲಾಗುತ್ತದೆ. ಸಸ್ಯಾಹಾರಿ ಪ್ರಾಣಿಗಳ ಸಂಖ್ಯೆ ಅಂದಾಜು ಮಾಡಲು ಲೈನ್ ಟ್ರಾನ್ಸೆಕ್ಟ್ (Line Transect) ಸಮೀಕ್ಷೆ ಬಳಸಲಾಗುತ್ತದೆ.

ಒಟ್ಟು 2160 ಕ್ಯಾಮೆರಾಗಳನ್ನು ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ ಅಳವಡಿಸಲಾಗಿದ್ದು, ಇದರಿಂದ ಸುಮಾರು 61 ಲಕ್ಷ ವನ್ಯಜೀವಿ ಚಿತ್ರಗಳು ಪಡೆದುಕೊಳ್ಳಲಾಯಿತು. ಹುಲಿ ಚಿತ್ರಗಳನ್ನು ಎಐ ಆಧಾರಿತ ತಂತ್ರಾಂಶದ ಮೂಲಕ ಪ್ರತ್ಯೇಕಿಸಲಾಗಿದ್ದು, ಪ್ರತಿ ಹುಲಿಯ ಎರಡು ಬದಿಯಲ್ಲಿನ ವಿಭಿನ್ನ ಪಟ್ಟೆ ವಿನ್ಯಾಸವನ್ನು ಗುರುತಿಸುವ ಮೂಲಕ ಪ್ರತ್ಯೇಕ ಹುಲಿಗಳನ್ನು ಗುರುತಿಸಲಾಗುತ್ತದೆ.

ಹೀಗಿದೆ ಹುಲಿ ಲೆಕ್ಕ

ಕರ್ನಾಟಕದ 5 ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ ಹುಲಿಗಳ ಸ್ಥಿತಿಯ ಹೋಲಿಕೆ (2014 ರಿಂದ 2024) ಹೀಗಿದೆ.

2014ರಲ್ಲಿ 578 ಕ್ಯಾಮರಾ ಸ್ಥಳಗಳಲ್ಲಿ 226 ಹುಲಿಗಳ ಚಿತ್ರ ಸೆರೆ ಹಿಡಿಯಲಾಗಿತ್ತು. ಆಗ 261 ಹುಲಿಗಳ ಇರುವಿಕೆಯ ಅಂದಾಜು ಮಾಡಲಾಗಿತ್ತು.

2018ರಲ್ಲಿ 1776 ಕ್ಯಾಮರಾ ಸ್ಥಳಗಳಲ್ಲಿ 332 ಹುಲಿಗಳ ಚಿತ್ರ ಸೆರೆ ಹಿಡಿಯಲಾಗಿತ್ತು. ಆಗ 472 ಹುಲಿಗಳ ಇರುವಿಕೆಯ ಅಂದಾಜು ಮಾಡಲಾಗಿತ್ತು.

2020 ರಲ್ಲಿ 1818 ಕ್ಯಾಮರಾ ಸ್ಥಳಗಳಲ್ಲಿ 365 ಹುಲಿಗಳ ಚಿತ್ರ ಸೆರೆ ಹಿಡಿಯಲಾಗಿತ್ತು. ಆಗ 403 ಹುಲಿಗಳ ಇರುವಿಕೆಯ ಅಂದಾಜು ಮಾಡಲಾಗಿತ್ತು.

2022 ರಲ್ಲಿ 2179 ಕ್ಯಾಮರಾ ಸ್ಥಳಗಳಲ್ಲಿ 376 ಹುಲಿಗಳ ಚಿತ್ರ ಸೆರೆ ಹಿಡಿಯಲಾಗಿತ್ತು. ಆಗ 417 ಹುಲಿಗಳ ಇರುವಿಕೆಯ ಅಂದಾಜು ಮಾಡಲಾಗಿತ್ತು.

2023 ರಲ್ಲಿ 2162 ಕ್ಯಾಮರಾ ಸ್ಥಳಗಳಲ್ಲಿ 384 ಹುಲಿಗಳ ಚಿತ್ರ ಸೆರೆ ಹಿಡಿಯಲಾಗಿತ್ತು. ಆಗ 408 ಹುಲಿಗಳ ಇರುವಿಕೆಯ ಅಂದಾಜು ಮಾಡಲಾಗಿತ್ತು.

2024 ರಲ್ಲಿ 2160 ಕ್ಯಾಮರಾ ಸ್ಥಳಗಳಲ್ಲಿ 373 ಹುಲಿಗಳ ಚಿತ್ರ ಸೆರೆ ಹಿಡಿಯಲಾಗಿತ್ತು. ಆಗ 393 ಹುಲಿಗಳ ಇರುವಿಕೆಯ ಅಂದಾಜು ಮಾಡಲಾಗಿತ್ತು.

ಹುಲಿ ಸಂಖ್ಯೆ ಏರಿಳಿತ

2024ರ ನಾಲ್ಕನೇ ಹಂತದ ಸಮೀಕ್ಷೆಯ ಪ್ರಕಾರ, ಕರ್ನಾಟಕದ ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ ಒಟ್ಟು 393 ಹುಲಿಗಳ ಸಂಖ್ಯೆ ದಾಖಲಾಗಿದ್ದು, ಕೆಲವು ಹುಲಿಗಳು ಹುಲಿ ಸಂರಕ್ಷಿತ ಪ್ರದೇಶಗಳಿಂದ ಇತರ ಹುಲಿ ವಾಸಸ್ಥಾನ ಪ್ರದೇಶಗಳತ್ತ ವಲಸೆ ಹೋಗುತ್ತಿರುವುದು ಗಮನಿಸಲಾಗಿದೆ. ಹುಲಿಗಳ ಚಲನ ವಲನಗಳ ಕಾರಣದಿಂದ, 5 ಹುಲಿ ಸಂರಕ್ಷಣೆ ಪ್ರದೇಶಗಳ ವಾರ್ಷಿಕ ಹುಲಿ ಸಮೀಕ್ಷೆ ಫಲಿತಾಂಶದಲ್ಲಿ ಏರುಪೇರುಗಳನ್ನು ಕಾಣಬಹುದು. ಆದರೆ, ಇಡೀ ರಾಜ್ಯದಲ್ಲಿ ಪ್ರತಿ ನಾಲ್ಕು ವರ್ಷಕ್ಕೊಮ್ಮೆ ಸಮೀಕ್ಷೆ ಮಾಡಲಾಗುತ್ತಿದ್ದು, 5 ಹುಲಿ ಸಂರಕ್ಷಿತ ಪ್ರದೇಶಗಳು ಹಾಗೂ ಇತರ ಹುಲಿ ವಾಸಸ್ಥಾನಗಳಲ್ಲೂ ಹುಲಿಗಳ ಸಂಖ್ಯೆ ಕ್ರಮೇಣ ಏರಿಕೆಯಾಗಿದೆ.

ಮುಂಬರುವ ಅಖಿಲ ಭಾರತ ಹುಲಿ ಗಣತಿ (AITE) - 2026, ಹುಲಿ ಸಂರಕ್ಷಿತ ಪ್ರದೇಶಗಳಿಂದ ವಲಸೆ ಹೋದ ಹುಲಿಗಳು ಇತರ ಸಂರಕ್ಷಿತ ಪ್ರದೇಶಗಳಲ್ಲಿ ಸ್ಥಾಪಿತವಾಗಿರುವ ಬಗ್ಗೆ ಸ್ಪಷ್ಟವಾದ ಚಿತ್ರಣವನ್ನು ನೀಡುವ ನಿರೀಕ್ಷೆಯಿದೆ.

ಕರ್ನಾಟಕ ಅರಣ್ಯ ಇಲಾಖೆ ತನ್ನ ರಾಜ್ಯಮಟ್ಟದ ವನ್ಯಜೀವಿ ತಾಂತ್ರಿಕ ಘಟಕ 2013ರಿಂದ ಪ್ರತಿ ವರ್ಷ ಕ್ಯಾಮೆರಾ ಸಮೀಕ್ಷೆಗಳಲ್ಲಿ ಸೆರೆಹಿಡಿದ ಹುಲಿಗಳ ಮಾಸ್ಟರ್ ಡೇಟಾಬೇಸ್ ಅನ್ನು ನಿರ್ವಹಿಸುತ್ತಿದ್ದು, ಇದು ಪ್ರತಿ ಹುಲಿಯ ವಿವರಗಳನ್ನು, ವಯಸ್ಸು, ಲಿಂಗ, ಆವಾಸ ಸ್ಥಾನದ ಪರಿಮಿತಿ , ವಲಸೆ ಚಲನ-ವಲನಗಳ ಬಗ್ಗೆ ಮಾಹಿತಿಯನ್ನು ಒಳಗೊಂಡಿದೆ. ಈ ಅಂಕಿ ಸಂಖ್ಯೆಗಳು ಹುಲಿಗಳನ್ನು ಗುರುತಿಸಲು ಪ್ರಮುಖ ನಿರ್ವಹಣಾ ಉಪಕರಣವಾಗಿದ್ದು, ಮಾನವ-ಹುಲಿ ಸಂಘರ್ಷದಲ್ಲಿ ಭಾಗಿಯಾಗಿರುವ ಹುಲಿಗಳನ್ನು ಗುರುತಿಸುವುದು, ಗಾಯಗೊಂಡ ಅಥವಾ ಸಾವನ್ನಪ್ಪಿದ ಹುಲಿಗಳನ್ನು ಅವುಗಳ ಪಟ್ಟೆ ವಿನ್ಯಾಸಗಳನ್ನು ಹೊಂದಾಣಿಕೆ ಮಾಡುವ ಮೂಲಕ ಪತ್ತೆ ಹಚ್ಚುವುದು ಮುಂತಾದ ಕಾರ್ಯಗಳಿಗೆ ಸಹಾಯ ಮಾಡುತ್ತವೆ ಎನ್ನುವುದು ಹಿರಿಯ ಐಎಫ್‌ಎಸ್‌ ಅಧಿಕಾರಿ ಕುಮಾರ ಪುಷ್ಕರ್‌ ಅವರ ವಿವರಣೆ.