ಬಿರು ಬೇಸಿಗೆಯಲ್ಲೂ ತುಂಬಿ ತುಳುಕುವ ತುಂಬೆ ಜಲಾಶಯ; ಮಂಗಳೂರಿಗೆ ಕುಡಿಯುವ ನೀರಿಗೆ ರೇಷನಿಂಗ್ ಭೀತಿ ಇಲ್ಲ

ಮಂಗಳೂರು: ಸಾಮಾನ್ಯವಾಗಿ ಬೇಸಗೆ ಎಂದರೆ ನೀರಿಗೆ ತತ್ವಾರ. ಕಳೆದ ವರ್ಷದವರೆಗೂ ಮಂಗಳೂರಿನವರು ಬೇಸಗೆ ಬಂದರೆ ಏನ್ಮಾಡೋದು ಎಂಬ ಚಿಂತೆಯಲ್ಲಿದ್ದರು. ಈ ಬಾರಿ ಅಕಾಲಿಕ ಮಳೆ ವರದಾನ ಕೊಟ್ಟಂತಾಗಿದೆ. ಕುಡಿಯುವ ನೀರಿನ ಚಿಂತೆ ದೂರವಾಗಿದೆ. ಮಂಗಳೂರಿಗರಿಗೆ ಕುಡಿಯುವ ನೀರೊದಗಿಸಲೆಂದೇ ನೇತ್ರಾವತಿ ನದಿಗೆ ಅಡ್ಡಲಾಗಿ ಕಟ್ಟಲಾದ ಬಂಟ್ವಾಳ ತಾಲೂಕಿನ ತುಂಬೆಯ ಅಣೆಕಟ್ಟು ಜಲಸಮೃದ್ಧಿಯಿಂದ ತುಂಬಿದೆ. ನೀರಿನ ಮಟ್ಟ ಏರಿಕೆಯಾಗಿದ್ದು, 6 ಮೀಟರ್ ಎತ್ತರದಲ್ಲಿ ನೀರು ಸಂಗ್ರಹಗೊಂಡಿದೆ. ಇನ್ನೂ ಒಂದೂವರೆ ತಿಂಗಳವರೆಗೂ ನೀರನ್ನು ಸರಬರಾಜು ಮಾಡಿ ಜನರ ನೀರಿನ ಬವಣೆ ತೀರಿಸಲು ಅಧಿಕಾರಿಗಳು, ಸಿಬ್ಬಂದಿ ಅಣಿಯಾಗಿದ್ದಾರೆ.

ಹಿಂದಿನ ಒಂದು ದಶಕದ ಅವಧಿಯಲ್ಲಿ ಹಲವು ಬಾರಿ ತುಂಬೆ ಜಲಾಶಯದ ನೀರಿನ ಮಟ್ಟ ಬೇಸಿಗೆಯಲ್ಲಿ ಕುಸಿದು ನೀರು ಸರಬರಾಜಿಗೆ ವ್ಯತ್ಯಯವಾದ ಉದಾಹರಣೆಗಳಿವೆ. ಇದರಿಂದ ಮಂಗಳೂರು ಜಿಲ್ಲಾಡಳಿತ ಹಾಗೂ ಮಂಗಳೂರು ಮಹಾನಗರ ಪಾಲಿಕೆಯಿಂದ ನೀರನ್ನು ದಿನ ಬಿಟ್ಟು ದಿನ ಇಲ್ಲವೇ ರೇಷನಿಂಗ್‌ ರೂಪದಲ್ಲಿ ಒದಗಿಸಿದ್ದೂ ಇದೆ. ಇದಕ್ಕಾಗಿ ಅಧಿಕಾರಿಗಳು ಸಿದ್ದತೆ ಮಾಡಿಕೊಳ್ಳುತ್ತಿದ್ದನ್ನೂ ಗಮನಿಸಿದ್ದೇವೆ. ಈ ಬಾರಿ ಮಾತ್ರ ಅಂತಹ ಸನ್ನಿವೇಶ ಇದ್ದಂತಿಲ್ಲ.

ಕಳೆದ ವರ್ಷ ಭಿನ್ನ ಸ್ಥಿತಿ

ಕಳೆದ ವರ್ಷ ಇದೇ ಏಪ್ರಿಲ್ ತಿಂಗಳ 17ರ ವೇಳೆ 5.28 ಮೀಟರ್ ಗೆ ಇಳಿದಿದ್ದ ನೀರಿನ ಮಟ್ಟ ಈ ವರ್ಷ 6 ಮೀಟರ್ ಗೆ ಏರಿಕೆಯಾಗಿದೆ. ಕಳೆದ ವರ್ಷ ಸಮೀಪದ ಎಎಂಆರ್ ಡ್ಯಾಂನಲ್ಲಿ 15.25 ಮೀಟರ್ ನೀರಿನ ಸಂಗ್ರಹ ಇದ್ದರೆ, ಈಗ 18.9 ಮೀಟರ್ ನೀರು ಸಂಗ್ರಹವಿದೆ.

ತುಂಬೆ ಡ್ಯಾಂನಲ್ಲಿ ನೀರಿನ ಮಟ್ಟ ಇಳಿಕೆಯಾಗುತ್ತಿರುವ ಸಂದರ್ಭ ಜಿಲ್ಲಾಡಳಿತ ಡ್ಯಾಂನ ಕೆಳಭಾಗದ ಅಡ್ಯಾರ್ ಡ್ಯಾಂ ಮೂಲಕ ಶೇಖರಣೆಯಾದ ಸಿಹಿನೀರು ಸುಮಾರು 50 ಎಂಎಲ್ ಡಿ ನೀರನ್ನು ಪ್ರತಿನಿತ್ಯ ತುಂಬೆ ಡ್ಯಾಂಗೆ ಹಾಯಿಸಿ ನದಿ ನೀರಿನ ಮಟ್ಟವನ್ನು ಕಾಯ್ದುಕೊಳ್ಳಲು ಗಮನಹರಿಸಿದ್ದೂ ಇಲ್ಲಿ ಉಲ್ಲೇಖನೀಯ. 2023-24ರ ಏಪ್ರಿಲ್ ಮೇ ತಿಂಗಳಲ್ಲಿ ಅಡ್ಯಾರ್ ಅಣೆಕಟ್ಟಿನಿಂದ ಶೇಖರಣೆಯಾದ ಹಿನ್ನೀರನ್ನು ಬ್ಯಾಕ್ ಪಂಪಿಂಗ್ ಮೂಲಕ ತುಂಬೆ ಅಣೆಕಟ್ಟಿಗೆ ಪಂಪಿಂಗ್ ಮಾಡಲಾಗಿತ್ತು.

ನೀರು ಏರಿಕೆಗೆ ಏನು ಕಾರಣ?

ಬಿರುಬೇಸಗೆ, ಬೆವರೊಡೆಯುವಂಥ ಬಿಸಿಲಿನ ತಾಪವಿದ್ದರೂ ನೇತ್ರಾವತಿ ಬತ್ತಿ ಹೋಗದಿರಲು ಕಾರಣ ಬೆಳ್ತಂಗಡಿ, ಸುಬ್ರಹ್ಮಣ್ಯ ಸಹಿತ ಪಶ್ಚಿಮ ಘಟ್ಟ ಪ್ರದೇಶ ವ್ಯಾಪ್ತಿಯಲ್ಲಿ ಕೆಲವು ದಿನಗಳಿಂದ ಉತ್ತಮ ಮಳೆಯಾಗುತ್ತಿರುವುದು. ಬಿಸಿಲಿನ ಬೇಗೆಯ ಮಧ್ಯೆಯೂ ನೇತ್ರಾವತಿ ನದಿ ನೀರಿನ ಮಟ್ಟ ಏರಿಕೆಯಾಗಲು ಇದೇ ಕಾರಣ ಎನ್ನುತ್ತಾರೆ ಜಲತಜ್ಞರು. ಎಎಂಆರ್ ಡ್ಯಾಂನಲ್ಲಿ ಗರಿಷ್ಠ ನೀರು ನಿಲ್ಲಿಸಿದ ಬಳಿಕ ಹೆಚ್ಚುವರಿಯಾಗಿ ಇದ್ದ ನೀರನ್ನು ಬಿಟ್ಟ ನಂತರ ಹೊಸದಾಗಿ ನಿರ್ಮಿಸಲಾದ ಜಕ್ರಿಬೆಟ್ಟು ಡ್ಯಾಂನಲ್ಲಿ ನೀರು ಭರ್ತಿಯಾಗಿ ತುಂಬೆ ಕಡೆಗೆ ಬಿಡಲಾಗಿತ್ತು. ಇದರಂತೆ ಸದ್ಯ ತುಂಬೆಯ ನೀರಿನ ಮಟ್ಟ 6 ಮೀಟರ್ ಇದೆ.

ಅಲ್ಲದೆ, ಹವಾಮಾನ ಇಲಾಖೆ ಸೂಚನೆ ಪ್ರಕಾರ ಇನ್ನೂ ಕೆಲ ದಿನ ಮಳೆ ಬರುವ ಸಾಧ್ಯತೆ ಇರುವ ಕಾರಣ ತುಂಬೆ ಡ್ಯಾಂನಲ್ಲಿ ನೀರಿನ ಕೊರತೆ ಎದುರಾಗಲಾರದು ಎಂಬ ಅಂದಾಜು ಅಧಿಕಾರಿಗಳದ್ದು.

ಎಷ್ಟಿದೆ ನೀರಿನ ಮಟ್ಟ

2019ರಲ್ಲಿ 5.49 ಮೀಟರ್ ಎತ್ತರದಲ್ಲಿ ಸಂಗ್ರಹವಾಗಿದ್ದರೆ, 2020ರಲ್ಲಿ 6 ಮೀಟರ್, 2021ರಲ್ಲಿ 5.8 ಮೀಟರ್, 2022ರಲ್ಲಿ 6 ಮೀಟರ್, 2023ರಲ್ಲಿ 5.36 ಮೀಟರ್, 2024ರಲ್ಲಿ 5.28 ಹಾಗೂ ಈ ಬಾರಿ 6 ಮೀಟರ್ ಎತ್ತರದಲ್ಲಿ ಏಪ್ರಿಲ್ ಮಧ್ಯಭಾಗದಲ್ಲಿ ನೀರಿನ ಸಂಗ್ರಹ ಇದೆ.

ವರದಿ: ಹರೀಶ ಮಾಂಬಾಡಿ ಮಂಗಳೂರು