ಮೈಸೂರು ದಸರಾ ಜಂಬೂ ಸವಾರಿಗೂ ಮುನ್ನ ಆನೆಗಳ ತೂಕ ಪರೀಕ್ಷೆ; ಕ್ಯಾಪ್ಟನ್ ಅಭಿಮನ್ಯುವೇ ಬಲಶಾಲಿ, ಯಾವ ಆನೆ ತೂಕ ಎಷ್ಟಿದೆ ನೋಡಿ
ಮೈಸೂರು ದಸರಾಗೆ ಬಂದಿರುವ ಆನೆಗಳ ತೂಕದ ಪರೀಕ್ಷೆ ಸೋಮವಾರ ನಡೆಯಿತು. ಕ್ಯಾಪ್ಟನ್ ಅಭಿಮನ್ಯುವೇ ಬಲಶಾಲಿಯಾಗಿ ಹೊರಹೊಮ್ಮಿದ. ಆನೆಗಳ ತೂಕದ ವಿವರ ಇಲ್ಲಿದೆ.
ಮೈಸೂರು: ಮೈಸೂರು ಅರಮನೆ ಆವರಣದಲ್ಲಿ ಒಂದೂವರೆ ತಿಂಗಳಿನಿಂದ ಬೀಡು ಬಿಟ್ಟಿರುವ ದಸರಾ ಗಜಪಡೆಯ ತೂಕ ಪರೀಕ್ಷೆ ಸೋಮವಾರ ನಡೆಯಿತು. ತೂಕದಲ್ಲಿ ಕ್ಯಾಪ್ಟನ್ ಅಭಿಮನ್ಯುವಿಗೇ ಅಗ್ರಸ್ಥಾನದಲ್ಲಿರುವುದು ಮತ್ತೊಮ್ಮೆ ದೃಢವಾಯಿತು. ಒಂದೂವರೆ ತಿಂಗಳ ಹಿಂದೆ ನಡೆಸಿದ್ದಾಗ 5560 ಕೆಜಿ ತೂಕ ಹೊಂದಿದ್ದ ಅಭಿಮನ್ಯು. ಈಗ ತೂಗಿದ್ದು ಬರೋಬ್ಬರಿ 5820 ಕೆಜಿ. ಅಂದರೆ ಒಂದೂವರೆ ತಿಂಗಳ ಅಂತರದಲ್ಲಿ 260 ಕೆಜಿ ತೂಕ ಹೆಚ್ಚಿಸಿಕೊಂಡಿರುವ ಕ್ಯಾಪ್ಟನ್ ಅಭಿಮನ್ಯು ಬಲಶಾಲಿ ಎನ್ನಿಸಿದ್ದಾನೆ.ಪೌಷ್ಠಿಕ ಆಹಾರ ಸೇವನೆಯಿಂದಾಗಿ ಸಹಜವಾಗಿಯೇ ಎಲ್ಲಾ ಆನೆಗಳ ತೂಕದಲ್ಲೂ ಹೆಚ್ಚಳವಾಗಿರುವುದು ಕಂಡು ಬಂದಿದೆ.
ಗಜಪಡೆಯ ಕ್ಯಾಪ್ಟನ್ ಅಭಿಮನ್ಯು ನೇತೃತ್ವದ 14 ಆನೆಗಳಿಗೆ ತೂಕ ಪರೀಕ್ಷೆ ನಡೆಯಿತು. ಮೈಸೂರಿನ ಧನ್ವಂತರಿ ರಸ್ತೆಯಲ್ಲಿರುವ ಸಾಯಿರಾಂ ಅಂಡ್ ಕೊ ಎಲೆಕ್ಟ್ರಾನಿಕ್ ತೂಕ ಮಾಪನ ಕೇಂದ್ರದಲ್ಲಿ ಆನೆಗಳ ತೂಕ ಪರಿಶೀಲನೆಯನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಹಾಗೂ ಸಿಬ್ಬಂದಿ ಸಮ್ಮುಖದಲ್ಲಿ ನಡೆಯಿತು. ಮೂರನೇ ಬಾರಿ ಕ್ಯಾಪ್ಟನ್ ಅಭಿಮನ್ಯು ಅಂಡ್ ಟೀಂನ ಆನೆಗಳು ತೂಕ ಪರೀಕ್ಷೆಯಲ್ಲಿ ಭಾಗಿಯಾಗಿದ್ದು ಭೀಮ, ಏಕಲವ್ಯ, ಲಕ್ಷ್ಮಿ, ವರಲಕ್ಷ್ಮಿ, ಕಂಜನ್, ಹಿರಣ್ಯ, ಗೋಪಿ, ಪ್ರಶಾಂತ, ಮಹೇಂದ್ರ, ದೊಡ್ಡಹರವೆ ಲಕ್ಷ್ಮಿ ಸೇರಿದಂತೆ ಹದಿನಾಲ್ಕು ಆನೆಗಳು ತೂಕ ಪರಿಶೀಲನೆಯಲ್ಲಿ ಪಾಲ್ಗೊಂಡವು.
ಆನೆಗಳ ತೂಕದ ವಿವರ ಹೀಗಿದೆ.
ಅಭಿಮನ್ಯು : 5820 ಕೆಜಿ ತೂಕ
ಲಕ್ಷ್ಮಿ : 2625 ಕೆಜಿ
ಭೀಮ : 5380 ಕೆಜಿ
ಏಕಲವ್ಯ : 5095 ಕೆಜಿ
ರೋಹಿತ : 3930 ಕೆಜಿ
ದೊಡ್ಡ ಹರವೆ ಲಕ್ಷ್ಮಿ : 3570 ಕೆಜಿ
ಕಂಜನ್ : 4725 ಕೆಜಿ
ಪ್ರಶಾಂತ : 5240 ಕೆಜಿ
ಸುಗ್ರೀವ : 5540 ಕೆಜಿ
ಗೋಪಿ : 5280 ಕೆಜಿ
ವರಲಕ್ಷ್ಮಿ : 3555 ಕೆಜಿ
ಮಹೇಂದ್ರ : 5150 ಕೆಜಿ
ಹಿರಣ್ಯ. : 3160 ಕೆಜಿ
ಧನಂಜಯ : 5255 ಕೆಜಿ
ಅರ್ಜುನ ಸ್ಥಾನ ತುಂಬಲಿರುವ ಧನಂಜಯ
ವಿಜಯದಶಮಿ ಜಂಬೂಸವಾರಿ ಮೆರವಣಿಗೆಗೆ ಐದು ದಿನ ಮಾತ್ರ ಬಾಕಿ ಇರುವಾಗ ದಸರಾ ಗಜಪಡೆಯ ಆನೆಗಳಿಗೆ ಜವಾಬ್ದಾರಿಯನ್ನು ಅರಣ್ಯ ಇಲಾಖೆ ಹಂಚಿಕೆ ಮಾಡಿದೆ.
ಈ ಬಾರಿಯ ವಿಜಯದಶಮಿ ಜಂಬೂಸವಾರಿ ಮೆರವಣಿಗೆಯನ್ನು ಮುನ್ನಡೆಸುವ ಮಹತ್ವದ ಜವಾಬ್ದಾರಿ ಧನಂಜಯನಿಗೆ ವಹಿಸಿದ ಅರಣ್ಯ ಇಲಾಖೆ ಅಧಿಕಾರಿಗಳು.
ಜಂಬೂಸವಾರಿ ಮೆರವಣಿಗೆಯಲ್ಲಿ ನಿಶಾನೆ ಆನೆಯಾಗಿ ಎಲ್ಲರಿಗಿಂತ ಮುಂಚೂಣಿಯಲ್ಲಿರುವ ಸಾಗುವ ಮೂಲಕ ಮೆರವಣಿಗೆಯನ್ನು ಧನಂಜಯ ಮುನ್ನಡೆಸಲಿದ್ದಾನೆ. ಕಳೆದ ವರ್ಷದ ದಸರಾದಲ್ಲಿ ನಿಶಾನೆ ಆನೆಯಾಗಿ ಮೆರವಣಿಗೆ ಮುನ್ನಡೆಸಿದ್ದ ಅರ್ಜುನ. ಅರ್ಜುನನ ಅಕಾಲಿಕ ಸಾವಿನಿಂದ ನಿಶಾನೆ ಆನೆ ಆಯ್ಕೆಗೆ ತಲೆಬಿಸಿ ಮಾಡಿಕೊಂಡಿದ್ದ ಅರಣ್ಯ ಇಲಾಖೆ ಅಳೆದು ತೂಗಿ ಧನಂಜಯ ನಿಶಾನೆ ಆನೆಯಾಗಿ ಆಯ್ಕೆ ಮಾಡಿದೆ.
ಜಂಬೂಸವಾರಿಯಲ್ಲಿ ಅಭಿಮನ್ಯು ಚಿನ್ನದ ಅಂಬಾರಿ ಹೊರಲಿದ್ದಾನೆ. ಅಭಿಮನ್ಯುವಿನ ಎಡಬಲದಲ್ಲಿ ಹಿರಣ್ಯ ಹಾಗು ಲಕ್ಷ್ಮಿ ಕುಮ್ಕಿ ಆನೆಗಳಾಗಿ ಸಾಥ್ ನೀಡಲಿವೆ.
ನೌಫತ್ ಆನೆಯಾಗಿ ಗೋಪಿ ಆನೆ ಆಯ್ಕೆ ಮಾಡಲಾಗಿದೆ. ಜಂಬೂಸವಾರಿಯಲ್ಲಿ ಒಟ್ಟು 9 ಆನೆಗಳು ಭಾಗಿಯಾಗಲಿವೆ ಎನ್ನುವುದು ಮೈಸೂರು ವನ್ಯಜೀವಿ ಉಪವಿಭಾಗದ ಡಿಸಿಎಫ್‌ ಡಾ.ಪ್ರಭುಗೌಡ ಬಿರಾದಾರ ವಿವರಣೆ.
ಲಕ್ಷ್ಮಿ ಆನೆ ಆತಂಕ ಬೇಡ
ಶ್ರೀರಂಗಪಟ್ಟಣ ದಸರಾದಲ್ಲಿ ಲಕ್ಷ್ಮಿ ಆನೆ ವಿಚಲಿತಗೊಂಡ ವಿಚಾರದ ಕುರಿತು ಪ್ರತಿಕ್ರಿಯಿಸಿದ ಡಿಸಿಎಫ್‌, ಲಕ್ಷ್ಮಿ ಆನೆ ವಾಪಸ್ ಕರೆದುಕೊಂಡು ಹೋಗುತ್ತಾರೆ ಎಂಬ ಕಾರಣಕ್ಕೆ ಕೆಲ ಕಾಲ ಲಾರಿಯೇರಲು ಹಿಂದೇಟು ಹಾಕಿತು. ಬಳಿಕ ನಮ್ಮ ಮಾವುತರು ಕಾವಾಡಿಗರು ಲಾರಿ ಅತ್ತಿಸುವ ಕೆಲಸಕ್ಕೆ ಮುಂದಾದರು. ಅದಕ್ಕೂ ಮುಂಚೆ 3 ಗಂಟೆ ಅಂಬಾರಿ ಆನೆ ಜೊತೆ ಜನರ ನಡುವೆ ಲಕ್ಷ್ಮಿ ಯಶಸ್ವಿಯಾಗಿ ಹೆಜ್ಜೆ ಹಾಕಿದೆ. ಲಕ್ಷ್ಮಿ ಆನೆ ಕೂಡ ಜಂಬೂಸವಾರಿಗೆ ಸಂಪೂರ್ಣ ಸಿದ್ದವಾಗಿದೆ. ಯಾವುದೇ ಆತಂಕ ಬೇಡ ಎಂದು ಹೇಳಿದರು.
