ವಾಣಿಜ್ಯ ನಗರಿ ಜನತೆಗೆ ಗುಡ್​ನ್ಯೂಸ್; ಪುಣೆ-ಹುಬ್ಬಳ್ಳಿ ವಂದೇ ಭಾರತ್ ರೈಲಿಗೆ ಈ ದಿನದಂದು ಮೋದಿ ಚಾಲನೆ; ಸಮಯ ಇಲ್ಲಿದೆ

ಬೆಂಗಳೂರು: ವಾಣಿಜ್ಯ ನಗರಿ ಹುಬ್ಬಳ್ಳಿ ಜನತೆಗೆ ಸಿಹಿ ಸುದ್ದಿ ಸಿಕ್ಕಿದ್ದು, ಸೆಪ್ಟೆಂಬರ್​ 15ರಂದು ಹುಬ್ಬಳ್ಳಿ ಮತ್ತು ಪುಣೆ ನಡುವೆ ವಂದೇ ಭಾರತ್ ರೈಲಿನ ಸೇವೆ ಆರಂಭಗೊಳ್ಳಲಿದೆ. ಪ್ರಧಾನಿ ಪ್ರಧಾನಿ ಮೋದಿ ಅವರು ಸೆಪ್ಟೆಂಬರ್ 15 ರಂದು ಜಾರ್ಖಂಡ್‌ನ ಜೆಮ್​ಶೆಡ್‌ಪುರದಿಂದಲೇ ವರ್ಚುವಲ್ ಸಮಾರಂಭದ ಮೂಲಕ ಮಹಾರಾಷ್ಟ್ರದ ಪುಣೆಯಿಂದ ಕರ್ನಾಟಕದ ಹುಬ್ಬಳ್ಳಿಗೆ ಸಂಪರ್ಕ ಕಲ್ಪಿಸುವ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲನ್ನು ಉದ್ಘಾಟಿಸಲಿದ್ದಾರೆ.

ಅಂದು ಪ್ರಧಾನಿ ಮೋದಿ ಅವರು ಕೇವಲ ಈ ರೈಲ್ವೇ ಸಂಚಾರಕ್ಕೆ ಮಾತ್ರವಲ್ಲ, ದೇಶದ ವಿವಿಧ ನಿಲ್ದಾಣಗಳಲ್ಲಿ ಸಂಚರಿಸುವ ವಂದೇ ಭಾರತ್​ ರೈಲುಗಳ ಸೇವೆಗೆ ಗ್ರೀನ್ ಸಿಗ್ನಲ್ ನೀಡಲಿದ್ದಾರೆ. ಈ ಭಾಗದಲ್ಲಿ ಸಂಚಾರ ನಡೆಸುವ 2ನೇ ವಂದೇ ಭಾರತ್ ರೈಲ್ವೆ ಸಂಚಾರ ಇದಾಗಿದೆ. ಬೆಂಗಳೂರು-ಧಾರವಾಡ ನಡುವೆ ಮೊದಲು ಈ ರೈಲಿನ ಸೇವೆಯನ್ನು ಹೊಂದಿದೆ. ಈ ಮಹತ್ವದ ಬೆಳವಣಿಗೆ ಕುರಿತು ಕೇಂದ್ರ ರೈಲ್ವೆ ಪುಣೆಯ ಸಾರ್ವಜನಿಕ ಸಂಪರ್ಕ ಅಧಿಕಾರಿ ರಾಮ್​ಪಾಲ್ ಬರ್ಪಗ್ಗ ಹೇಳಿದ್ದಾರೆ.

ಸಮಯದ ವಿವರ ಇಲ್ಲಿದೆ

ಇದು ಇಂದು (ಸೆಪ್ಟೆಂಬರ್ 11 ರಂದು) ಬೆಳಿಗ್ಗೆ 11 ಗಂಟೆಗೆ ಪ್ರಾಯೋಗಿಕ ಚಾಲನೆ ಪಡೆದುಕೊಂಡಿದ್ದು, ರನ್ ಆಗಿದೆ. ವಾರದಲ್ಲಿ ಸೋಮವಾರ ಹೊರತುಪಡಿಸಿ ಉಳಿದ 6 ದಿನಗಳ ಕಾಲ ಪುಣೆ-ಹುಬ್ಬಳ್ಳಿ ನಡುವೆ ಸಂಚಾರ ಆಗಲಿದೆ. ಈಗಾಗಲೇ ರೈಲ್ವೆ ಸಚಿವಾಲಯಕ್ಕೆ ಸಲ್ಲಿಸಿದ ಪ್ರಸ್ತಾವನೆ ಪ್ರಕಾರ, ಈ ವಂದೇ ಭಾರತ್ ರೈಲು ಬೆಳಗಿನ ಜಾವ 5 ಗಂಟೆಗೆ ಎಸ್‌ಎಸ್‌ಎಸ್‌ ಹುಬ್ಬಳ್ಳಿ ನಿಲ್ದಾಣದಿಂದ ಹೊರಟು, ಮಧ್ಯಾಹ್ನ 2.10ಕ್ಕೆ ಪುಣೆ ತಲುಪಲಿದೆ. ಮರಳಿ 2.40ಕ್ಕೆ ಪುಣೆಯಿಂದ ಹೊರಟು, ರಾತ್ರಿ 11.50ಕ್ಕೆ ಮರಳಿ ಎಸ್‌ ಎಸ್‌ಎಸ್‌ ಹುಬ್ಬಳ್ಳಿ ನಿಲ್ದಾಣ ತಲುಪಲಿದೆ.

ಇದನ್ನೂ ಓದಿ: ಬಿಜೆಪಿ ಕಚೇರಿ ಸ್ಫೋಟಿಸಲು ಉಗ್ರರು ಸ್ಕೆಚ್; ಭದ್ರತೆ ಬಿಗಿಗೊಳಿಸಿದ ರಾಜ್ಯ ಸರ್ಕಾರ, ಕಮಲ ಪಡೆ ಬೇಡಿಕೆ ಇಟ್ಟಿದ್ದೇನು?

2 ಸುತ್ತುಗಳಲ್ಲೂ 2 ಗಂಟೆಗಳ ಪ್ರಯಾಣ

ಈ ಕುರಿತು ನೈಋತ್ಯ ರೈಲ್ವೆಯ ಹಿರಿಯ ಅಧಿಕಾರಿ ಮಾಹಿತಿ ನೀಡಿದ್ದು, ಧಾರವಾಡ, ಬೆಳಗಾವಿ, ಮೀರಜ್, ಸಾಂಗ್ಲಿ, ಸತಾರಾ ನಿಲ್ದಾಣಗಳಲ್ಲಿ ಈ ರೈಲು ನಿಲುಗಡೆಗೊಳ್ಳಲಿದೆ ಎಂದು ತಿಳಿಸಿದ್ದಾರೆ. ರೈಲ್ವೇ ಅಧಿಕಾರಿಗಳ ಪ್ರಕಾರ, ವೇಳಾಪಟ್ಟಿಯು ಪ್ರಯಾಣಿಕರಿಗೆ ಎರಡು ಜಂಕ್ಷನ್‌ಗಳ ನಡುವೆ ಅನುಕೂಲಕರವಾಗಿ ಪ್ರಯಾಣಿಸಲು ಅನುವು ಮಾಡಿಕೊಡುತ್ತದೆ. ಈ ಉಭಯ ನಗರಗಳ ನಡುವಿನ ಸಂಚಾರ ಅವಧಿ 8.5 ಗಂಟೆ ಇರಲಿದೆ.

ಪ್ರತಿ ಮಾರ್ಗದಲ್ಲೂ ಸುಮಾರು 8.5 ಗಂಟೆಗಳ ಕಾಲ ಅವಧಿ ಇರಲಿದ್ದು, ಪ್ರಯಾಣಿಕರು ಇಳಿದುಕೊಳ್ಳಲು ಮತ್ತು ರೈಲು ಹತ್ತಲು ಪುಣೆಯಲ್ಲಿ ಸ್ವಲ್ಪ ಹೊತ್ತು ನಿಲುಗಡೆಯಾಗುತ್ತದಷ್ಟೆ. ಏಕೆಂದರೆ ಎರಡೂ ರೌಂಡ್​​​​ಗಳ ಪ್ರಯಾಣದ ಅವಧಿಯನ್ನು 17 ಗಂಟೆಗಳಲ್ಲಿ ಪೂರ್ಣಗೊಳಿಸಲು ಗುರಿ ಹೊಂದಿದ್ದೇವೆ. ಏಕೆಂದರೆ ಉಳಿದ ರೈಲುಗಳ ಸಂಚಾರಕ್ಕೆ ಸಂಬಂಧಿಸಿ ಅಡಚಣೆ ಉಂಟಾಗಬಾರದು ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ: ಗ್ರೂಪ್ ಬಿ ಮತ್ತು ಸಿ ನೇಮಕಾತಿ, ಉದ್ಯೋಗಾಂಕ್ಷಿಗಳಿಗೆ ಸಿಹಿ ಸುದ್ದಿ: PSI ಪರೀಕ್ಷೆ ಮುಂದೂಡಿಕೆ ಬಗ್ಗೆ ಪರಮೇಶ್ವರ ಹೇಳಿದ್ದೇನು?