ಕನ್ನಡ ಸುದ್ದಿ  /  ಕರ್ನಾಟಕ  /  Shivamogga News: ಹಲಸು ಪ್ರಿಯರಿಗೆ ಗುಡ್‌ನ್ಯೂಸ್‌; ಸಾಗರ, ಹೊಸನಗರ ತಾಲೂಕಿನ 4 ಹಲಸು ತಳಿಗಳಿಗೆ ಪಿಪಿಎಫ್‌ಆರ್‌ಎ ನೋಂದಣಿ

Shivamogga News: ಹಲಸು ಪ್ರಿಯರಿಗೆ ಗುಡ್‌ನ್ಯೂಸ್‌; ಸಾಗರ, ಹೊಸನಗರ ತಾಲೂಕಿನ 4 ಹಲಸು ತಳಿಗಳಿಗೆ ಪಿಪಿಎಫ್‌ಆರ್‌ಎ ನೋಂದಣಿ

ಶಿವಮೊಗ್ಗ ಜಿಲ್ಲೆಯ ಸಾಗರ ಮತ್ತು ಹೊಸನಗರ ತಾಲೂಕುಗಳ ಭಾಗಗಳಲ್ಲಿ ಬೆಳೆಯುವ ನಾಲ್ಕು ವಿಧದ ಹಲಸಿನ ಹಣ್ಣುಗಳು ಸಸ್ಯ ಪ್ರಭೇದಗಳ ರಕ್ಷಣೆ ಮತ್ತು ರೈತರ ಹಕ್ಕುಗಳ ಪ್ರಾಧಿಕಾರ (ಪಿಪಿಎಫ್‌ಆರ್‌ಎ) ದಲ್ಲಿ ನೋಂದಾಯಿಸಲ್ಪಟ್ಟಿದೆ. ಇದರಿಂದ ಬೆಳೆಗಾರರಿಗೆ ಆರ್ಥಿಕ ಪ್ರಯೋಜನಗಳು ಸಿಗುವ ಜೊತೆಗೆ ಈ ತಳಿಗಳನ್ನು ಸಂರಕ್ಷಿಸುವ ಉದ್ದೇಶವೂ ಇದೆ.

ಸಾಗರ, ಹೊಸನಗರ ತಾಲೂಕಿನ 4 ಹಲಸು ತಳಿಗಳಿಗೆ ಪಿಪಿಎಫ್‌ಆರ್‌ಎ ನೋಂದಣಿ
ಸಾಗರ, ಹೊಸನಗರ ತಾಲೂಕಿನ 4 ಹಲಸು ತಳಿಗಳಿಗೆ ಪಿಪಿಎಫ್‌ಆರ್‌ಎ ನೋಂದಣಿ

ಶಿವಮೊಗ್ಗ: ರಾಜ್ಯದ ಶಿವಮೊಗ್ಗ ಜಿಲ್ಲೆಯ ನಾಲ್ಕು ಹಲಸಿನ ಹಣ್ಣಿನ ತಳಿಗಳು ಸಸ್ಯ ಪ್ರಭೇದಗಳ ರಕ್ಷಣೆ ಮತ್ತು ರೈತರ ಹಕ್ಕುಗಳ ಪ್ರಾಧಿಕಾರ (ಪಿಪಿಎಫ್‌ಆರ್‌ಎ) ದಲ್ಲಿ ನೋಂದಾಯಿಸಲ್ಪಟ್ಟಿದೆ.

ಶಿವಮೊಗ್ಗ ಜಿಲ್ಲೆಯ ಸಾಗರ ಮತ್ತು ಹೊಸನಗರ ತಾಲೂಕುಗಳ ಭಾಗಗಳಲ್ಲಿ ಬೆಳೆಯುವ ನಾಲ್ಕು ವಿಧದ ಹಲಸಿನ ಹಣ್ಣುಗಳು, ಪಿಪಿಎಫ್‌ಆರ್‌ಎ ಸಂಸ್ಥೆಯು ನೋಂದಾಯಿಸಿದ ಹಣ್ಣಿನ ತಳಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿದೆ. ವೈವಿಧ್ಯತೆ ಮತ್ತು ವಿಶಿಷ್ಟ ಲಕ್ಷಣಗಳಿಂದಾಗಿ ಈ ತಳಿಗಳು ನೋಂದಾಯಿಸಲ್ಪಟ್ಟಿದೆ. ಇದರಿಂದ ಬೆಳೆಗಾರರಿಗೆ ಆರ್ಥಿಕ ಪ್ರಯೋಜನಗಳನ್ನು ಒದಗಿಸುವುದರ ಜೊತೆಗೆ ಈ ತಳಿಗಳನ್ನು ರಕ್ಷಿಸುವ ಉದ್ದೇಶವನ್ನು ಹೊಂದಿದೆ.

ಈ ತಳಿಗಳ ವಿಶಿಷ್ಟ ಲಕ್ಷಣಗಳ ಸಂಪೂರ್ಣ ಅಧ್ಯಯನ ನಡೆಸಿದ ಶಿವಮೊಗ್ಗದ ಕೆಳದಿ ಶಿವಪ್ಪ ನಾಯಕ ಕೃಷಿ ಮತ್ತು ತೋಟಗಾರಿಕಾ ವಿಜ್ಞಾನಗಳು ಇದನ್ನು ಪ್ರಸ್ತಾಪಿಸಿದ್ದಾರೆ. ಮಾರ್ಚ್ 20 ರಂದು ಪಿಪಿಎಫ್‌ಆರ್‌ಎ ನೋಂದಣಿ ಪ್ರಮಾಣಪತ್ರವನ್ನು ನೀಡಿದೆ. ಈ ಬಗ್ಗೆ ‘ದಿ ಹಿಂದೂ’ ವರದಿ ತಿಳಿಸಿದೆ.

ಟ್ರೆಂಡಿಂಗ್​ ಸುದ್ದಿ

ಹಾಲಾಡಿ ರುದ್ರಾಕ್ಷಿ

ಹೊಸನಗರ ತಾಲೂಕಿನ ರಿಪ್ಪನ್ ಪೇಟೆ ಸಮೀಪದ ಬರುವೆ ಗ್ರಾಮದ ಅನಂತಮೂರ್ತಿ ಜವಳಿ ಎಂಬುವವರು ತಮ್ಮ ಜಮೀನಿನಲ್ಲಿ ಬೆಳೆದ ಹಾಲಾಡಿ ರುದ್ರಾಕ್ಷಿ ತಳಿಗೆ ಪ್ರಮಾಣ ಪತ್ರ ಪಡೆದರು. ಹೆಚ್ಚು ಮಳೆ ಬೀಳುವ ಪ್ರದೇಶಗಳಲ್ಲಿ ಮರಗಳು ನೆಟ್ಟ ಆರು ವರ್ಷಗಳ ನಂತರ ಇದು ಫಲ ನೀಡಲು ಪ್ರಾರಂಭಿಸುತ್ತವೆ. ಅವು ಗೊಂಚಲುಗಳಲ್ಲಿ ಸಣ್ಣ ಗಾತ್ರದ ಹಣ್ಣುಗಳನ್ನು ಹೊಂದಿರುತ್ತವೆ. ಮಾಗಿದ ಹಣ್ಣಾಗಿದ್ದರೆ, ಸಂಪೂರ್ಣ ಹಳದಿಯಾಗಿ ಕಾಣುತ್ತವೆ. ಹಲಸಿನ ಹಣ್ಣಿನ 20 ತೊಳೆಗಳು ಒಂದು ಕಿಲೋ ತೂಗುತ್ತವೆ. ಒಂದು ಮರವು ವರ್ಷಕ್ಕೆ 300 ಹಣ್ಣುಗಳನ್ನು ನೀಡುತ್ತದೆ. ಎಕರೆಗೆ 180 ಕ್ವಿಂಟಾಲ್ ಇಳುವರಿ ಪಡೆಯಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.

ಕಿತ್ತಳೆ-ಆರ್‌ಪಿಎನ್

ಸಾಗರ ತಾಲೂಕಿನ ಆನಂದಪುರದ ಪ್ರಕಾಶ್ ನಾಯಕ್ ಎಂಬುವವರು ‘ಕಿತ್ತಳೆ-ಆರ್‌ಪಿಎನ್’ ತಳಿಗೆ ಪ್ರಮಾಣ ಪತ್ರ ಪಡೆದರು. ಈ ತಳಿಯನ್ನು ನೆಟ್ಟ ನಾಲ್ಕು ವರ್ಷಗಳ ನಂತರ ಫಲ ನೀಡಲು ಪ್ರಾರಂಭಿಸಿದೆ. ಇತರ ಪ್ರಭೇದಗಳಿಗೆ ಹೋಲಿಸಿದರೆ ಈ ಹಣ್ಣುಗಳು ಸಾಮಾನ್ಯವಾಗಿ ಗಾತ್ರದಲ್ಲಿ ದೊಡ್ಡದಾಗಿರುತ್ತವೆ ಮತ್ತು ಪ್ರತಿಯೊಂದೂ ಸುಮಾರು 15 ಕಿಲೋಗಳಷ್ಟು ತೂಗುತ್ತದೆ. ಸುಮಾರು 12 ಹಲಸಿನ ಹಣ್ಣಿನ ತೊಳೆಗಳು ಒಂದು ಕಿಲೋ ತೂಗುತ್ತವೆ. ಪ್ರತಿ ಮರವು ಒಂದು ವರ್ಷದಲ್ಲಿ 25 ರಿಂದ 35 ಹಣ್ಣುಗಳ ಇಳುವರಿ ನೀಡುತ್ತದೆ. ಎಕರೆಗೆ 250 ಕ್ವಿಂಟಾಲ್‌ಗಳಷ್ಟು ಇಳುವರಿಯನ್ನು ನೀಡುತ್ತದೆ.

ಕೆಂಪು ರುದ್ರಾಕ್ಷಿ ತಳಿ

ಹೊಸನಗರ ತಾಲೂಕಿನ ವರಕೋಡುವಿನ ಎಸ್. ದೇವರಾಜ್ ಅವರು ಕೆಂಪು ರುದ್ರಾಕ್ಷಿ ತಳಿಯನ್ನು ಪ್ರಾಧಿಕಾರದಲ್ಲಿ ನೋಂದಣಿ ಮಾಡಿದರು. ಮರವು ಗೊಂಚಲುಗಳಲ್ಲಿ ಸಣ್ಣ ಗಾತ್ರದ ಹಣ್ಣುಗಳನ್ನು ಹೊಂದಿರುತ್ತದೆ. ಪ್ರತಿ ಹಣ್ಣು ಸುಮಾರು 3 ಕೆ.ಜಿ ಯಷ್ಟು ತೂಗುತ್ತದೆ. ಮಾಗಿದ ಹಣ್ಣಿನ ತೊಳೆಗಳು ಕೆಂಪು ಬಣ್ಣದಲ್ಲಿರುತ್ತವೆ. 15 ರಿಂದ 16 ತೊಳೆಗಳು ಒಂದು ಕೆ.ಜಿಯಷ್ಟು ತೂಗುತ್ತವೆ. ಒಂದು ಮರವು ವರ್ಷಕ್ಕೆ 125 ಹಣ್ಣುಗಳನ್ನು ನೀಡುತ್ತದೆ. ಎಕರೆಗೆ ಸುಮಾರು 120 ಕ್ವಿಂಟಾಲ್ ಇಳುವರಿ ನೀಡುತ್ತದೆ.

ಕೆಂಪು-ಆರ್‌ಟಿಬಿ

ಇನ್ನು, ಸಾಗರದ ಮಂಕಾಳಲೆಯ ರಾಜೇಂದ್ರ ಟಿ. ಎಂಬುವವರು ‘ಕೆಂಪು-ಆರ್ ಟಿಬಿ’ ತಳಿಯ ನೋಂದಣಿಯನ್ನು ಮಾಡಿದ್ದಾರೆ. ಈ ತಳಿಯ ಹಣ್ಣುಗಳು 10 ರಿಂದ 15 ಕೆ.ಜಿಯಷ್ಟು ತೂಕವನ್ನು ಹೊಂದಿರುತ್ತದೆ. ಈ ಹಣ್ಣಿನ ಪದರಗಳು ಕೆಂಪು ಬಣ್ಣವನ್ನು ಹೊಂದಿರುತ್ತವೆ. ಒಂದು ಮರವು ವರ್ಷಕ್ಕೆ 75 ಹಣ್ಣುಗಳ ಇಳುವರಿಯನ್ನು ನೀಡುತ್ತದೆ. ಎಕರೆಗೆ 200 ಕ್ವಿಂಟಾಲ್ ನಷ್ಟು ಇಳುವರಿ ಬರುತ್ತದೆ.

ವಿಶಿಷ್ಟ ತಳಿಗಳನ್ನು ರಕ್ಷಿಸುವ ಉದ್ದೇಶ 

ಈ ಬಗ್ಗೆ ಮಾಹಿತಿ ನೀಡಿದ ವಿಶ್ವವಿದ್ಯಾನಿಲಯದ ಸಂಶೋಧನಾ ನಿರ್ದೇಶಕ ಡಾ. ಸುಶ್ಯಂತ್ ಕುಮಾರ್, ವಿಶ್ವವಿದ್ಯಾನಿಲಯದ ವಿಜ್ಞಾನಿಗಳು ಪ್ರಭೇದಗಳನ್ನು ಕಂಡುಹಿಡಿದು ಪ್ರಮಾಣೀಕರಣವನ್ನು ಪ್ರಸ್ತಾಪಿಸಿದರು. ʼನೋಂದಣಿಯ ಧ್ಯೇಯವು ವಿಭಿನ್ನ ತಳಿಗಳ ಹಣ್ಣುಗಳ ರಕ್ಷಣೆ ಮಾಡುವ ಉದ್ದೇಶಕ್ಕಾಗಿ ಮಾಡಲಾಗಿದೆ. ನೋಂದಣಿ ಪಡೆದ ರೈತರನ್ನು ವಿಶ್ವವಿದ್ಯಾನಿಲಯ ಅಭಿನಂದಿಸುತ್ತದೆ. ವಿಶ್ವವಿದ್ಯಾನಿಲಯವು ಭವಿಷ್ಯದಲ್ಲಿ ಈ ತಳಿಗಳನ್ನು ಮತ್ತು ಅವುಗಳ ಕೃಷಿಯನ್ನು ಜನಪ್ರಿಯಗೊಳಿಸಲು ಕ್ರಮ ಕೈಗೊಳ್ಳುತ್ತದೆʼ ಎಂದು ಹೇಳಿದರು.

ಕೃಷಿ ಮತ್ತು ರೈತರ ಕಲ್ಯಾಣ ಇಲಾಖೆಯ ಅಡಿಯಲ್ಲಿ ಕಾರ್ಯನಿರ್ವಹಿಸುವ ಪಿಪಿಎಫ್‌ಆರ್‌ಎನ ಉದ್ದೇಶವು ವಿಭಿನ್ನ ತಳಿಗಳ ರಕ್ಷಣೆಯಾಗಿದೆ. ತಳಿಗಳ ರಕ್ಷಣೆ ಮತ್ತು ಅವುಗಳನ್ನು ಸಂರಕ್ಷಿಸುವುದು ರೈತರಿಗೆ ಪ್ರಯೋಜನವನ್ನು ನೀಡುತ್ತದೆ. ಸಂರಕ್ಷಿತ ತಳಿಗಳನ್ನು ವಾಣಿಜ್ಯ ಉತ್ಪಾದನೆಗೆ ತೆಗೆದುಕೊಂಡರೆ, ಪ್ರಮಾಣಪತ್ರ ಹೊಂದಿರುವ ರೈತರಿಗೆ ಆರ್ಥಿಕ ಲಾಭ ಸಿಗುತ್ತದೆ. ಸಂರಕ್ಷಿತ ತಳಿಗಳ ಬೆಳೆಗಾರರು ಯಾವುದೇ ನಷ್ಟವನ್ನು ಎದುರಿಸಿದರೂ, ಕಾಯಿದೆಯ ಪ್ರಕಾರ ಅವರು ಪರಿಹಾರಕ್ಕೆ ಅರ್ಹರಾಗಿದ್ದಾರೆ ಎಂದು ಶಿವಮೊಗ್ಗ ಪ್ರಾಧಿಕಾರದ ದಕ್ಷಿಣ ಭಾರತದ ಶಾಖೆಯ ಸಸ್ಯ ವೈವಿಧ್ಯ ಪರೀಕ್ಷಕ ಡಾ.ಎ.ಕೆ. ಸಿಂಗ್ ಹೇಳಿದ್ರು.

ವಿಶ್ವವಿದ್ಯಾನಿಲಯದ ಅರೆಕಾ ಸಂಶೋಧನಾ ಕೇಂದ್ರದ ಮುಖ್ಯಸ್ಥ ಡಾ. ನಾಗರಾಜಪ್ಪ ಅಡಿವೆಪ್ಪರ್ ಅವರು ಈ ನಾಲ್ಕು ತಳಿಗಳನ್ನು ಗುರುತಿಸಿ ನೋಂದಣಿಗೆ ಪ್ರಸ್ತಾವನೆ ಸಲ್ಲಿಸಿದರು. ಈ ಪ್ರಕ್ರಿಯೆಯು ಸಾಕಷ್ಟು ಸಮಯ ತೆಗೆದುಕೊಳ್ಳುತ್ತದೆ. ಹಣ್ಣಿನ ಗಾತ್ರ, ತೊಳೆ ಗಾತ್ರ, ತೂಕ, ರುಚಿ, ಬಣ್ಣ, ಮರದ ಗಾತ್ರ ಮತ್ತು ಹಣ್ಣುಗಳನ್ನು ಹೊಂದಿರುವ ಮಾದರಿ ಸೇರಿದಂತೆ ವೈವಿಧ್ಯತೆಯ ಎಲ್ಲಾ ಗುಣಲಕ್ಷಣಗಳನ್ನು ವಿಶ್ಲೇಷಿಸುವ ಮೂಲಕ ಪ್ರಸ್ತಾವನೆಯನ್ನು ಸಿದ್ಧಪಡಿಸಬೇಕು. ಪ್ರಯೋಗಾಲಯದಲ್ಲಿ ಪ್ರಭೇದಗಳನ್ನು ತಾಂತ್ರಿಕವಾಗಿ ವಿಶ್ಲೇಷಿಸಲಾಗುತ್ತದೆ. ನಂತರ, ಇದನ್ನು ಪರಿಶೀಲಿಸಲು ಪ್ರಾಧಿಕಾರವು ತಜ್ಞರ ತಂಡವನ್ನು ಕಳುಹಿಸುತ್ತದೆ ಎಂದು ಹೇಳಿದರು.

ವಿಭಿನ್ನ ಭತ್ತದ ತಳಿಗಳನ್ನು ಬೆಳೆಯುವ ರೈತರಿಗೆ ವಿಶ್ವವಿದ್ಯಾನಿಲಯವು ಪ್ರಮಾಣಪತ್ರಗಳನ್ನು ಪಡೆದುಕೊಂಡಿದೆ. ಆದರೆ, ಮೊದಲ ಬಾರಿಗೆ ಹಣ್ಣಿನ ಪ್ರಭೇದಗಳನ್ನು ಪ್ರಸ್ತಾಪಿಸಲಾಯಿತು. ಇದು ವಿಭಿನ್ನ ರೀತಿಯ ಹಣ್ಣುಗಳನ್ನು ರಕ್ಷಿಸಲು ರೈತರಿಗೆ ಉತ್ತೇಜಿಸುತ್ತದೆ ಎಂದು ಡಾ.ಅಡಿವೆಪ್ಪರ್ ಹೇಳಿದ್ದಾರೆ.