ಕರ್ನಾಟಕ ಹವಾಮಾನ: ಹೊಸ ವರ್ಷ ಮೊದಲ ದಿನ ಬೆಂಗಳೂರು ಸುತ್ತಮುತ್ತ ಇಂದು ಮುಂಜಾನೆ ಮಂಜು, ಚಳಿ, ಉಳಿದೆಡೆ ಚಳಿಗಾಲದ ಒಣಹವೆ

Weather Today Jan 1, 2025: ಹೊಸ ವರ್ಷದ ಮೊದಲ ದಿನವನ್ನು ತುಸು ಚಳಿಯೊಂದಿಗೆ ಕರ್ನಾಟಕ ಬರಮಾಡಿಕೊಂಡಿದೆ. ಬೆಂಗಳೂರು ಸುತ್ತಮುತ್ತ ಇಂದು (ಜನವರಿ 1,2025) ಮುಂಜಾನೆ ಮಂಜು, ಇಬ್ಬನಿ ಇರಲಿದ್ದು, ಚಳಿ ಕಾಡಲಿದೆ. ಕರ್ನಾಟಕದ ಉಳಿದ ಜಿಲ್ಲೆಗಳಲ್ಲೂ ಇದೇ ಸ್ಥಿತಿ ಇರಲಿದ್ದು, ಒಣಹವೆಯೊಂದಿಗೆ ಚಳಿಗಾಲದ ಚಳಿಯ ಅನುಭವ ಮುಂದುವರಿಯಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆಯ ಹವಾಮಾನ ಮುನ್ಸೂಚನೆ ವರದಿ ತಿಳಿಸಿದೆ. ಭಾರತೀಯ ಹವಾಮಾನ ಇಲಾಖೆ ನಿನ್ನೆ (ಡಿಸೆಂಬರ್ 31) ಅಪರಾಹ್ನ ಬಿಡುಗಡೆ ಮಾಡಿರುವ ವರದಿ ಪ್ರಕಾರ, ಕರ್ನಾಟಕದಲ್ಲಿ ಸದ್ಯ ಚಳಿ ಮತ್ತು ಒಣಹವೆ ಮುಂದುವರಿಯಲಿದೆ. ಕೆಲವು ಕಡೆ ದಟ್ಟ ಮಂಜು ಮುಸುಕಿದ ವಾತಾವರಣ ಮತ್ತು ಚಳಿಯ ವಾತಾವರಣ ಹೆಚ್ಚು ಕಂಡುಬರಲಿದೆ.

ಬೆಂಗಳೂರು ಹವಾಮಾನ ಇಂದು (ಜನವರಿ 1, 2025)

ಬೆಂಗಳೂರು ನಗರ ಮತ್ತು ಬೆಂಗಳೂರು ಗ್ರಾಮಾಂತರ ಜಿಲ್ಲೆಗಳಲ್ಲಿ ಇಂದು ಚಳಿ ಮತ್ತು ಒಣಹವೆ ಇರಲಿದೆ. ಮುಂಜಾನೆ ಹೊತ್ತು ಸ್ವಲ್ಪ ಮಂಜು ಕವಿದ ವಾತಾವರಣ ಇರಲಿದೆ. ಸ್ವಲ್ಪ ಒಳನಾಡು ಪ್ರದೇಶಗಳಲ್ಲಿ ಹೆಚ್ಚು ಮಂಜು, ಜಲಾಶಯಗಳ ಸಮೀಪ ದಟ್ಟ ಮಂಜು ಕಾಡಬಹುದು. ಚಳಿಯೂ ಹೆಚ್ಚಿರಬಹುದು. ಉಳಿದಂತೆ ಸಹಜ ವಾತಾವರಣ ಇರಲಿದೆ. ಎರಡೂ ಜಿಲ್ಲೆಗಳಲ್ಲಿ ಇಂದು ಗರಿಷ್ಠ ತಾಪಮಾನ 28 ಡಿಗ್ರಿ ಸೆಲ್ಶಿಯಸ್ ಮತ್ತು ಕನಿಷ್ಠ ತಾಪಮಾನ 16 ಡಿಗ್ರಿ ಸೆಲ್ಶಿಯಸ್ ದಾಖಲಾಗಬಹುದು ಎಂದು ಬೆಂಗಳೂರು ಪ್ರಾದೇಶಿಕ ಹವಾಮಾನ ಕೇಂದ್ರದ ವಿಜ್ಞಾನಿ ಡಾ ರಾಜವೇಲ್ ಮಣಿಕಮ್ ತಿಳಿಸಿದ್ದಾರೆ.

ಹೊಸ ವರ್ಷದ ಮುನ್ನಾ ದಿನವಾದ ನಿನ್ನೆ (ಡಿಸೆಂಬರ್ 31) ಬೆಂಗಳೂರು ನಗರದಲ್ಲಿ ರಾತ್ರಿ ಚಳಿ ಇದ್ದರೂ, ಹೊಸ ವರ್ಷವನ್ನು ಬರಮಾಡಿಕೊಳ್ಳುವ ಸಂಭ್ರಮ ಹೆಚ್ಚಿತ್ತು. ನಿನ್ನೆ ಗರಿಷ್ಠ ತಾಪಮಾನ 27.2 ಡಿಗ್ರಿ ಸೆಲ್ಶಿಯಸ್, ಕನಿಷ್ಠ ತಾಪಮಾನ 16.6 ಡಿಗ್ರಿ ಸೆಲ್ಶಿಯಸ್ ದಾಖಲಾಗಿದೆ. ಬೆಂಗಳೂರು ಗ್ರಾಮಾಂತರ ಭಾಗದಲ್ಲಿ ಗರಿಷ್ಠ ತಾಪಮಾನ 27.5 ಮತ್ತು ಕನಿಷ್ಠ ತಾಪಮಾನ 18 ಡಿಗ್ರಿ ಸೆಲ್ಶಿಯಸ್ ದಾಖಲಾಗಿದೆ.

ಕರ್ನಾಟಕ ಹವಾಮಾನ ಇಂದು (ಜನವರಿ 1, 2025)

ಕರ್ನಾಟಕದಲ್ಲಿ ಹೊಸ ವರ್ಷದ ಮೊದಲ ದಿನ ಚಳಿಗಾಲ ಮತ್ತು ಒಣಹವೆ ಮುಂದುವರಿಯಲಿದೆ ಎಂದು ಭಾರತೀಯ ಹವಾಮಾನ ಇಲಾಖೆಯ ಬೆಂಗಳೂರು ಪ್ರಾದೇಶಿಕ ಕೇಂದ್ರ ನಿನ್ನೆ (ಡಿಸೆಂಬರ್ 31) ಅಪರಾಹ್ನ ಬಿಡುಗಡೆ ಮಾಡಿರುವ ಹವಾಮಾನ ಮುನ್ಸೂಚನೆ ವರದಿ ಹೇಳಿದೆ.

ಇದರಂತೆ, ಜನವರಿ 3 ರ ತನಕ ಕರ್ನಾಟಕದ ಉತ್ತರ ಒಳನಾಡಿನ ಕೆಲವು ಪ್ರದೇಶಗಳಲ್ಲಿ ಮುಂಜಾನೆ ಮಂಜು ಕವಿದ ವಾತಾವರಣ ಇರಲಿದೆ. ಇಬ್ಬನಿ ಹಾಗೂ ಚಳಿಯ ವಾತಾವರಣ ಕಾಡಲಿದೆ. ಕನಿಷ್ಠ ತಾಪಮಾನದಲ್ಲಿ ಹೆಚ್ಚಿನ ಬದಲಾವಣೆಗಳು ಇರದು. ಅದೇ ರೀತಿ ಕರ್ನಾಟಕದ ದಕ್ಷಿಣ ಒಳನಾಡಿನಲ್ಲಿ ಜನವರಿ 3 ರ ತನಕ ಕೆಲವು ಪ್ರದೇಶಗಳಲ್ಲಿ ಮುಂಜಾನೆ ಮಂಜು ಮತ್ತು ಇಬ್ಬನಿ ಇರಲಿದೆ. ಉಳಿದಂತೆ ಒಣಹವೆ ಮುಂದುವರಿಯಲಿದೆ. ಕನಿಷ್ಠ ತಾಪಮಾನದಲ್ಲೂ ಹೆಚ್ಚಿನ ಬದಲಾವಣೆ ಕಾಣಲಾರದು ಎಂದು ವರದಿ ವಿವರಿಸಿದೆ.

ಪ್ರಮುಖ ನಗರಗಳಲ್ಲಿ ತಾಪಮಾನ ಮತ್ತು ಆರ್ದ್ರತಾ ಮಟ್ಟ ಬೆಳಗ್ಗೆ 6 ಗಂಟೆಗೆ

ಬೆಂಗಳೂರು ನಗರ - ಕನಿಷ್ಠ ತಾಪಮಾನ 20 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 89%

ಮಂಗಳೂರು - ಕನಿಷ್ಠ ತಾಪಮಾನ 25 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 57%

ಚಿತ್ರದುರ್ಗ - ಕನಿಷ್ಠ ತಾಪಮಾನ 27.2 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 30%

ಗದಗ - ಕನಿಷ್ಠ ತಾಪಮಾನ 16.6 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 75%

ಹೊನ್ನಾವರ - ಕನಿಷ್ಠ ತಾಪಮಾನ 24.6 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 56%

ಕಲಬುರಗಿ - ಕನಿಷ್ಠ ತಾಪಮಾನ 22.1 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 71%

ಬೆಳಗಾವಿ - ಕನಿಷ್ಠ ತಾಪಮಾನ 21 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 60%

ಕಾರವಾರ - ಕನಿಷ್ಠ ತಾಪಮಾನ 32.2 ಡಿಗ್ರಿ ಸೆಲ್ಶಿಯಸ್‌ ಮತ್ತು ಆರ್ದ್ರತಾ ಮಟ್ಟ 65%