ಮೈಸೂರು ಸ್ಯಾಂಡಲ್ ಸೋಪ್‌ಗೆ ಬಾಲಿವುಡ್ ನಟಿ ತಮನ್ನಾ ಭಾಟಿಯಾ ಬ್ರ್ಯಾಂಡ್ ಅಂಬಾಸಿಡರ್: ವಿವಾದಕ್ಕೆ ಕಾರಣವೇನು?

ನಟಿ ತಮನ್ನಾ ಭಾಟಿಯಾ ಅವರನ್ನು ಮೈಸೂರು ಸ್ಯಾಂಡಲ್ ಸೋಪ್‌ನ ಬ್ರ್ಯಾಂಡ್ ಅಂಬಾಸಿಡರ್ ಆಗಿ ಆಯ್ಕೆ ಮಾಡಿರುವ ರಾಜ್ಯ ಸರ್ಕಾರದ ನಿರ್ಧಾರವು ವಿವಾದಕ್ಕೆ ಕಾರಣವಾಗಿದೆ. ಇದು ಶತಮಾನಗಳಷ್ಟು ಹಳೆಯ ಬ್ರಾಂಡ್ ಅನ್ನು ಹೊಸ ಭಾಷಾ ವಿವಾದಕ್ಕೆ ಎಳೆಯುತ್ತಿದೆ. ಅಪ್ರತಿಮ ಉತ್ಪನ್ನವನ್ನು ಹೊಸ ಮಾರುಕಟ್ಟೆಗಳಿಗೆ ಕೊಂಡೊಯ್ಯುವ ಗುರಿಯನ್ನು ಹೊಂದಿರುವ ಈ ನೇಮಕಾತಿಯು ಕನ್ನಡ ಪರ ಸಂಘಟನೆಗಳಿಂದ ಪ್ರತಿಭಟನೆಯನ್ನು ಎದುರಿಸುತ್ತಿದೆ ಮತ್ತು ವಿರೋಧ ಪಕ್ಷದ ನಾಯಕರಿಂದ ಟೀಕೆಗೆ ಗುರಿಯಾಗಿದೆ, ರಾಜ್ಯ ಸರ್ಜಾರದ ಈ ಕ್ರಮಕ್ಕೆ ಪ್ರಾದೇಶಿಕ ಹೆಮ್ಮೆಯನ್ನು ತಳುಕು ಹಾಕಿ ವಿವಾದ ಸೃಷ್ಟಿಸಲಾಗಿದೆ.

ಪ್ಯಾನ್-ಇಂಡಿಯಾ ಆಕರ್ಷಣೆಯನ್ನು ಹೊಂದಿರುವ ಆದರೆ ಕನ್ನಡದ ನಂಟು ಇಲ್ಲದ ನಟಿ ತಮನ್ನಾ ಅವರನ್ನು 6.2 ಕೋಟಿ ರೂ.ಗಳ ಎರಡು ವರ್ಷಗಳ ಒಪ್ಪಂದದ ಅಡಿಯಲ್ಲಿ ಆಯ್ಕೆ ಮಾಡಲಾಗಿದೆ. ಆದರೆ ಈ ನೇಮಕಕ್ಕೆ ರಾಜ್ಯದಲ್ಲಿ ವಿವಿಧ ರೀತಿಯ ಸಂಗತಿಗಳನ್ನು ತಳುಕು ಹಾಕಿ ವಿವಾದ ಸೃಷ್ಟಿಸಲಾಗಿದೆ. ರಾಜ್ಯದ ಪರಂಪರೆಯೊಂದಿಗೆ ಆಳವಾಗಿ ಸಂಬಂಧ ಹೊಂದಿರುವ ಉತ್ಪನ್ನವನ್ನು ಪ್ರತಿನಿಧಿಸಲು ಕನ್ನಡೇತರ ಸೆಲೆಬ್ರಿಟಿಯನ್ನು ಆಯ್ಕೆ ಮಾಡಿರುವ ಸರ್ಕಾರದ ನಿಲುವನ್ನು ಪ್ರತಿಭಟನಾಕಾರರು ಪ್ರಶ್ನಿಸಿದ್ದಾರೆ.

ಶತಮಾನಗಳಷ್ಟು ಹಳೆಯದಾದ ಪರಂಪರೆ

ಮೈಸೂರು ಸ್ಯಾಂಡಲ್ ಸೋಪ್ ಕರ್ನಾಟಕದಲ್ಲಿ ಕೇವಲ ವೈಯಕ್ತಿಕ ಆರೈಕೆ ಉತ್ಪನ್ನ ಮಾತ್ರವಲ್ಲ, ಇದು ಸಾಂಸ್ಕೃತಿಕ ಸಂಕೇತವಾಗಿದೆ. 1916ರಲ್ಲಿ ಮೈಸೂರು ಮಹಾರಾಜ ನಾಲ್ವಡಿ ಕೃಷ್ಣರಾಜ ಒಡೆಯರ್ ಮತ್ತು ದಿವಾನರಾಗಿದ್ದ ಸರ್ ಎಂ.ವಿಶ್ವೇಶ್ವರಯ್ಯ ಅವರು ಶ್ರೀಗಂಧದ ಎಣ್ಣೆ ಕಾರ್ಖಾನೆಯನ್ನು ಸ್ಥಾಪಿಸಿದರು. ಎರಡು ವರ್ಷಗಳ ನಂತರ, 1918 ರಲ್ಲಿ, ಮೈಸೂರು ಸ್ಯಾಂಡಲ್ ಸೋಪ್ ಮಾರುಕಟ್ಟೆಗೆ ಬಂದಿತು, ಶೀಘ್ರದಲ್ಲೇ ದಕ್ಷಿಣ ಭಾರತದಾದ್ಯಂತ ಅದು ಜನಪ್ರಿಯತೆ ಗಳಿಸಿತು.

ದಶಕಗಳಿಂದ, ಸರ್ಕಾರಿ ಸ್ವಾಮ್ಯದ ಸಾಬೂನು ತಯಾರಕರಾದ ಕರ್ನಾಟಕ ಸಾಬೂನು ಮತ್ತು ಮಾರ್ಜಕ ನಿಯಮಿತ ಸಂಸ್ಥೆ ವೈಯಕ್ತಿಕ ಆರೈಕೆ ಕ್ಷೇತ್ರದಲ್ಲಿ ಪ್ರಮುಖ ಉತ್ಪನ್ನವಾಗಿ ಗುರುತಿಸಿಕೊಂಡಿದೆ. ಬ್ರಾಂಡ್ ತನ್ನ ಮೂಲ ಉತ್ಪನ್ನದ ಅಪ್ರತಿಮ ಸ್ಥಾನಮಾನವನ್ನು ಉಳಿಸಿಕೊಂಡು, ಇತರ ಸುಮಾರು 48 ವಿವಿಧ ಉತ್ಪನ್ನಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದೆ. 2016 ರಲ್ಲಿ, ಮೈಸೂರು ಸ್ಯಾಂಡಲ್ ಸೋಪ್ 100 ವರ್ಷಗಳನ್ನು ಆಚರಿಸಿದ್ದು, ಯಾವುದೇ ಭಾರತೀಯ ಬ್ರಾಂಡ್‌ಗೆ ಇದು ಅಪರೂಪದ ಸಾಧನೆಯಾಗಿದೆ.

ಕನ್ನಡೇತರ ಪ್ರಚಾರ ರಾಯಭಾರಿ ಇದೇ ಮೊದಲೇನಲ್ಲ

ಮೈಸೂರು ಸ್ಯಾಂಡಲ್ ಸೋಪ್ ಪ್ರಚಾರಕ್ಕೆ ಕನ್ನಡೇತರರನ್ನು ಆಯ್ಕೆ ಮಾಡುವ ಬಗ್ಗೆ ಟೀಕಾಕಾರರು ಈಗ ಕಳವಳ ವ್ಯಕ್ತಪಡಿಸುತ್ತಿದ್ದಾರೆ. ಆದರೆ ಕನ್ನಡೇತರರ ಆಯ್ಕೆ ಇದೇ ಮೊದಲೇನಲ್ಲ. 2006 ರಲ್ಲಿ, ಕೆಎಸ್‌ಡಿಎಲ್ ಭಾರತೀಯ ಕ್ರಿಕೆಟಿಗ ಮಹೇಂದ್ರ ಸಿಂಗ್ ಧೋನಿ ಅವರನ್ನು ಬ್ರಾಂಡ್ ಅನ್ನು ಅನುಮೋದಿಸಲು ಸಹಿ ಹಾಕಿತು. ಆ ಸಮಯದಲ್ಲಿ, ಧೋನಿ ಭಾರತೀಯ ಕ್ರಿಕೆಟ್‌ನಲ್ಲಿ ಜನಪ್ರಿಯ ಆಟಗಾರನಾಗಿದ್ದರು ಮತ್ತು 80 ಲಕ್ಷ ರೂ.ಗಳ ಒಪ್ಪಂದವನ್ನು ಗಮನಾರ್ಹ ಮಾರ್ಕೆಟಿಂಗ್ ಉತ್ತೇಜನವೆಂದು ಪರಿಗಣಿಸಲಾಯಿತು. ಆದರೆ 2007 ರಲ್ಲಿ, ಕೆಎಸ್‌ಡಿಎಲ್ ಧೋನಿಯ ಒಪ್ಪಂದವನ್ನು ಪ್ರಚಾರ ಕರ್ತವ್ಯಗಳಿಗೆ ಬದ್ಧರಾಗಲು ಅಸಮರ್ಥತೆಯನ್ನು ಉಲ್ಲೇಖಿಸಿ ಕೊನೆಗೊಳಿಸಿತು ಮತ್ತು ಪರಿಹಾರವನ್ನು ಕೋರಿತು. ಧೋನಿ ಅಂತಿಮವಾಗಿ 2012 ರಲ್ಲಿ ಕಾನೂನು ಹೋರಾಟವನ್ನು ಗೆದ್ದರು. ಅಂದಿನಿಂದ, ನಟಿಯರಾದ ಮುಗ್ಧಾ ಗೋಡ್ಸೆ ಮತ್ತು ಪಾರ್ವತಿ ನಾಯರ್ ಸೇರಿದಂತೆ ಇತರ ಕನ್ನಡೇತರ ಮುಖಗಳು ಸಹ ಈ ಬ್ರಾಂಡ್ ಅನ್ನು ಪ್ರಚಾರ ಮಾಡಿದ್ದಾರೆ, ಆದರೆ ಆ ಸಂದರ್ಭದಲ್ಲಿ ಅಂತಹ ಯಾವುದೇ ರಾಜಕೀಯ ಚರ್ಚೆಗೆ ಈ ಕ್ರಮ ಕಾರಣವಾಗಿರಲಿಲ್ಲ.

ಈಗ ಆಕ್ರೋಶ ಏಕೆ?

ಹಾಗಾದರೆ ತಮನ್ನಾ ಅವರ ಆಯ್ಕೆ ಯಾಕೆ ಈ ಮಟ್ಟದ ವಿರೋಧವನ್ನು ಏಕೆ ಹುಟ್ಟುಹಾಕಿದೆ? ಹಿಂದಿನ ಆಯ್ಕೆ ಬಗ್ಗೆ ಜನರಿಗೆ ಅಸಮಾಧಾನವಿರಲಿಲ್ಲ, ಭಾಷೆ ಮತ್ತು ಅಸ್ಮಿತೆಯ ರಾಜಕೀಯವು ಆಳವಾದ ಸೂಕ್ಷ್ಮ ವಿಷಯಗಳಾಗಿ ಮಾರ್ಪಟ್ಟಿರುವ ಪ್ರಸ್ತುತ ಸಾಮಾಜಿಕ-ರಾಜಕೀಯ ಸನ್ನಿವೇಶವು ಈಗಿರುವ ವಿವಾದವನ್ನು ಹೆಚ್ಚಿಸಿದೆ ಎಂದು ವಿಮರ್ಶಕರು ವಾದಿಸುತ್ತಾರೆ. 6.2 ಕೋಟಿ ರೂ.ಗಳ ಒಪ್ಪಂದವನ್ನು ಅತಾರ್ಕಿಕ ಮತ್ತು ತರ್ಕಬದ್ಧವಲ್ಲ ಎಂದು ರಾಜವಂಶಸ್ಥ ಮತ್ತು ಮೈಸೂರು-ಕೊಡಗು ಸಂಸದ ಯದುವೀರ್ ಒಡೆಯರ್ ಕೂಡ ಆಕ್ಷೇಪಿಸಿದ್ದಾರೆ. ಕನ್ನಡ ಸಂಘಟನೆಗಳು ಮತ್ತು ಭಾಷಾ ಕಾರ್ಯಕರ್ತರು ಕೂಡ ಈ ವಿವಾದಕ್ಕೆ ಕೈಜೋಡಿಸಿದ್ದಾರೆ. ಜತೆಗೆ, ಕರ್ನಾಟಕದ ಪರಂಪರೆಯಲ್ಲಿ ಬೇರೂರಿರುವ ಬ್ರಾಂಡ್ ಅನ್ನು ಕನ್ನಡದ ನಂಟನ್ನು ಹೊಂದಿರುವವರೇ ಪ್ರಚಾರ ಮಾಡಬೇಕು ಎಂಬ ಕೂಗು ಕೇಳಿಬಂದಿದೆ.

ರಾಷ್ಟ್ರೀಯ ವ್ಯಾಪ್ತಿಯನ್ನು ಹೊಂದಿರುವ ಮತ್ತು ಕನ್ನಡ ಮಾತನಾಡುವ ಸೆಲೆಬ್ರಿಟಿಗಳಿಗೆ ರಾಜ್ಯದಲ್ಲಿ ಕೊರತೆಯಿಲ್ಲ ಎಂದು ಕೆಲವರು ಈಗಾಗಲೇ ಸರ್ಕಾರದ ಗಮನಸೆಳೆದಿದ್ದಾರೆ. ದೀಪಿಕಾ ಪಡುಕೋಣೆ, ರಶ್ಮಿಕಾ ಮಂದಣ್ಣ ಮತ್ತು ಪೂಜಾ ಹೆಗ್ಡೆ ಅವರಂತಹ ನಟಿಯರು ಕರ್ನಾಟಕದೊಂದಿಗೆ ಸಂಬಂಧ ಹೊಂದಿದ್ದಾರೆ. ಆದಾಗ್ಯೂ, ಈ ತಾರೆಯರು ಕೆಎಎಸ್‌ಡಿಎಲ್‌ನ ಬಜೆಟ್ ಅನ್ನು ಮೀರಿದ್ದಾರೆ ಎಂದು ಸರ್ಕಾರಿ ಮೂಲಗಳು ಹೇಳುತ್ತವೆ, ಮತ್ತು ತಮನ್ನಾ ಅವರ ಕಾಲ್‌ಶೀಟ್, ಪರಿಣಾಮಕಾರಿ ವೆಚ್ಚ ಹಾಗೂ ಪ್ಯಾನ್-ಇಂಡಿಯಾ ಜನಪ್ರಿಯತೆ ಪರಿಗಣಿಸಿ ಆಯ್ಕೆ ಮಾಡಲಾಗಿದೆ. ತಮನ್ನಾ ಆಯ್ಕೆಯನ್ನು ಕೆಎಸ್ ಡಿಎಲ್ ಸಮರ್ಥಿಸಿಕೊಂಡಿದ್ದು, ಹೆಚ್ಚುತ್ತಿರುವ ಬೇಡಿಕೆಗೆ ಅನುಗುಣವಾಗಿ, ಬ್ರ್ಯಾಂಡ್ ಪ್ರಚಾರಕ್ಕೆ ಅಷ್ಟೊಂದು ಮೊತ್ತವನ್ನು ವಿನಿಯೋಗಿಸಲು ಮತ್ತು ಮಾರುಕಟ್ಟೆ ವಿಸ್ತರಿಸಲು ಸಜ್ಜಾಗಿದ್ದೇವೆ ಎಂದು ಹೇಳಿದೆ. ಒಪ್ಪಂದವನ್ನು ರದ್ದುಗೊಳಿಸುವಂತೆ ಈಗಾಗಲೇ ಹೆಚ್ಚುತ್ತಿರುವ ಬೇಡಿಕೆಗಳಿಗೆ ಸಂಸ್ಥೆ ಪ್ರತಿಕ್ರಿಯಿಸಿಲ್ಲ. ಅಲ್ಲದೆ ನಟಿ ತಮನ್ನಾ ಸ್ವತಃ ವಿವಾದದ ಬಗ್ಗೆ ಮೌನವಾಗಿದ್ದಾರೆ.