ಹುಲಿ- ಚಿರತೆ ಮನುಷ್ಯನನ್ನು ಹುಡುಕಿ ಬೇಟೆಯಾಡುತ್ತವಾ, ಎರಡೂ ಪ್ರಮುಖ ವನ್ಯಜೀವಿಗಳು ಮನುಷ್ಯನ ಮೇಲೆ ದಾಳಿ ಮಾಡುವ ವ್ಯತ್ಯಾಸ ಹೇಗಿರಲಿದೆ

ಕರ್ನಾಟಕದಲ್ಲಿ ಈಗ ಎಲ್ಲಿ ನೋಡಿದರೂ ವನ್ಯಜೀವಿ- ಮಾನವ ಸಂಘರ್ಷ. ಅದರಲ್ಲೂ ಕರ್ನಾಟಕದ ಅರಣ್ಯ ಪ್ರದೇಶದಲ್ಲಿ ನೆಲೆ ಕಂಡುಕೊಂಡಿರುವ, ಅರಣ್ಯದಂಚಿನ ಭಾಗದಲ್ಲೂ ತಮ್ಮ ನೆಲೆ ವಿಸ್ತರಿಸಿಕೊಂಡಿರುವ ಹುಲಿ ಹಾಗೂ ಚಿರತೆ ದಾಳಿ ಪ್ರಕರಣಗಳು ಕರ್ನಾಟಕದಲ್ಲಿ ಹೆಚ್ಚುತ್ತಲೇ ಇವೆ. ಹುಲಿಯಂತೂ ಅರಣ್ಯ ಪ್ರದೇಶ ದಾಟಿ ಹೊರ ಬಂದು ದಾಳಿ ಮಾಡುತ್ತಿದ್ದರೆ, ಅರಣ್ಯದ ಜತೆಗೆ ಬೆಟ್ಟಗುಡ್ಡ, ಪೊದೆಗಳಿರುವ ನಗರ ಪ್ರದೇಶದ ಅಂಚಿಯಲ್ಲೂ ಚಿರತೆಗಳು ಲಗ್ಗೆ ಇಟ್ಟು ದಾಳಿ ಮಾಡುತ್ತಿವೆ. ಈ ಎರಡೂ ಪ್ರಾಣಿಗಳು ಮನುಷ್ಯನನ್ನು ಬೇಟೆಯಾಡುತ್ತವಾ, ಹುಲಿ ಮನುಷ್ಯನ ಮೇಲೆ ದಾಳಿ ಮಾಡಿದಾಗ ಹೇಗಿರುತ್ತದೆ, ಚಿರತೆ ದಾಳಿ ಹೇಗಿರಬಹುದು ಎನ್ನುವ ಕುತೂಹಲಕರ ಮಾಹಿತಿ ಇಲ್ಲಿದೆ.

ಸಾಮಾನ್ಯವಾಗಿ ಕರ್ನಾಟಕ ಮಾತ್ರವಲ್ಲದೇ ಗುಜರಾತ್‌ ಹೊರತುಪಡಿಸಿ ಎಲ್ಲಾ ರಾಜ್ಯಗಳಲ್ಲಿ ಹುಲಿಗಳೇ ಕಾಡಿನ ರಾಜ. ಏಕೆಂದರೆ ಸಿಂಹ ಸೀಮಿತ ಪ್ರದೇಶದಲ್ಲಿ ಇರುವುದು ಬಿಟ್ಟರೆ ಹುಲಿಯ ಸಾಮ್ರಾಜ್ಯವೇ ದೊಡ್ಡದು. ಕರ್ನಾಟಕ, ಮಧ್ಯಪ್ರದೇಶ, ತಮಿಳುನಾಡು, ರಾಜಸ್ತಾನ, ಕೇರಳ, ಉತ್ತರಾಖಂಡ, ಮಹಾರಾಷ್ಟ್ರ ಸಹಿತ ಹಲವು ರಾಜ್ಯಗಳಲ್ಲಿ ಹುಲಿ ಸಂತತಿ ಇದೆ. ಕರ್ನಾಟಕ ಸೇರಿದಂತೆ ಹೆಚ್ಚಿನ ರಾಜ್ಯಗಳಲ್ಲಿ ಅರಣ್ಯಪ್ರದೇಶದ ವ್ಯಾಪ್ತಿ ಮಾತ್ರ ಹಾಗೆಯೇ ಇದೆ. ಆದರೆ ಹುಲಿಗಳ ಸಂಖ್ಯೆ ಇತ್ತೀಚಿನ ವರ್ಷಗಳಲ್ಲಿ ಏರಿಕೆ ಕಂಡಿವೆ. ಇದರಿಂದ ಹುಲಿಗಳು ಅರಣ್ಯ ಮಾತ್ರವಲ್ಲದೇ ಅರಣ್ಯದಂಚಿನ ಭಾಗವನ್ನೂ ತಮ್ಮ ಆವಾಸ ಸ್ಥಾನ ಮಾಡಿಕೊಂಡಿವೆ. ಇದರಿಂದ ದಾಳಿ ಪ್ರಕರಣ ಹೆಚ್ಚುತ್ತಲೇ ಇವೆ. ಮೈಸೂರು, ಕೊಡಗು. ಚಾಮರಾಜನಗರ ಜಿಲ್ಲೆಯಲ್ಲಂತೂ ಇಂತಹ ಪ್ರಕರಣಗಳು ವರದಿಯಾಗುತ್ತಲೇ ಇವೆ. ಸೋಮವಾರವೂ ನಾಗರಹೊಳೆ ರಾಷ್ಟ್ರೀಯ ಉದ್ಯಾನಕ್ಕೆ ಹೊಂದಿಕೊಂಡಂತೆ ಇರುವ ಹುಣಸೂರು ವಿಭಾಗದ ಗುರುಪುರ ಬಳಿ ಪ್ರಾಣಿಯೊಂದು ದಾಳಿ ಮಾಡಿ ಗಿರಿಜನ ನವ ವಿವಾಹಿತ ಯುವಕನನ್ನು ಕೊಂದು ಹಾಕಿತು. ದಾಳಿಯ ತೀವ್ರತೆ ಹಾಗೂ ಶೈಲಿ ಹುಲಿ ದಾಳಿ ಮಾಡಿದೆ ಎಂದು ಮಾಧ್ಯಮಗಳಲ್ಲಿ ವರದಿಯಾಯಿತು. ಸ್ವತಃ ಮೃತ ಯುವಕನ ತಂದೆ ಕೂಡ ಅದು ಹುಲಿ ದಾಳಿಯೇ. ಹುಲಿ ದಾಳಿಯಿಂದಲೇ ನನ್ನ ಮಗ ಸತ್ತಿದ್ದು ಎನ್ನುವ ಹೇಳಿಕೆ ನೀಡಿದ್ದಾರೆ. ಅಲ್ಲಿ ಹುಲಿ ಹೆಜ್ಜೆ ಇತ್ತೆ, ಮೃತನ ದೇಹದ ಮೇಲೆ ಇರುವ ಗಾಯದ ಗುರುತುಗಳನ್ನು ಆಧರಿಸಿ ಅರಣ್ಯ ಇಲಾಖೆ ಇದು ಹುಲಿ ದಾಳಿಯಲ್ಲಿ. ಬದಲಿಗೆ ಚಿರತೆ ದಾಳಿ ಎನ್ನುವ ವರದಿ ನೀಡಿತು.

ಸಹಜವಾಗಿ ಇಂತಹ ಸಮಯದಲ್ಲಿ ಹುಲಿ ದಾಳಿ ಹೇಗಿರುತ್ತದೆ. ಚಿರತೆ ದಾಳಿಯಾದರೆ ಹೇಗೆ ಇರಬಹುದು ಎನ್ನುವ ಕುತೂಹಲ ಇದ್ದೇ ಇರುತ್ತದೆ.

ಹುಲಿ ದಾಳಿಯೂ ಗಂಭೀರವೇ

ಹುಲಿ ಹಾಗೂ ಚಿರತೆಗೆ ಗಾತ್ರದಲ್ಲಿ ಹೋಲಿಸಲು ಆಗದು. ಹುಲಿ ಗಾಂಭಿರ್ಯದ ಪ್ರಾಣಿಯಾದರೆ, ಚಿರತೆ ನಾಚಿಕೆ ಸ್ವಭಾವದ ಪ್ರಾಣಿ. ಎರಡೂ ಪ್ರಾಣಿಗಳು ಎಂದಿಗೂ ಮನುಷ್ಯದ ಬೇಟೆಗೆ ಹೋಗುವ ಪ್ರಮೇಯ ಅತೀ ಕಡಿಮೆ. ಹುಲಿಯಂತೂ ಕಾಡಿನೊಳಗೆ ಇಲ್ಲವೇ ಅರಣ್ಯದಂಚಿನಲ್ಲಿ ಬೇಟೆಯಾಡಿಕೊಂಡು ಇರುತ್ತದೆ. ಹುಲಿ ಹೆಜ್ಜೆ ಹಾಗೂ ಬೇಟೆ ಎಂದರೆ ಕೇಳಬೇಕೇ. ಎಂತಹ ಪ್ರಾಣಿಯನ್ನು ಅದು ಗುರಿಯಾಗಿಸಿಕೊಂಡರೆ ಬೇಟೆಯಾಡಿಯೇ ತೀರುತ್ತದೆ. ಹದಿನೈದು ದಿನಕ್ಕೆ, ಕೆಲವು ಬಾರಿ ತಿಂಗಳಿಗೆ ಒಮ್ಮೆಯಾದರೂ ಬೇಟೆ ಅದರ ಕ್ರಮ. ಆನಂತರ ಬೇಟೆಯಾಡಿದ್ದ ಪ್ರಾಣಿಯ ದೇಹವನ್ನೇ ತಿನ್ನುವುದು ಅದರ ಕ್ರಮ. ಆದರೆ ಜಾನುವಾರಗಳ ಮೇಲೆ ಹುಲಿ ದಾಳಿ ಮಾಡಲು ಶುರು ಮಾಡಿದೆ ಎಂದರೆ ಅದಕ್ಕೆ ಎಂಟು ವಯಸ್ಸು ದಾಟಿದೆ ಎನ್ನಬಹುದು. ಇಲ್ಲವೇ ಕಾಡಿನಲ್ಲಿ ತನ್ನ ಆವಾಸಸ್ಥಾನ ಉಳಿಸಿಕೊಳ್ಳಲು ನಡೆಯುವ ಎರಡು ಹುಲಿಗಳ ನಡುವಿನ ಗಡಿ ಕದನದಲ್ಲಿ ಗೆದ್ದ ಹುಲಿ ಆವಾಸಸ್ಥಾನ ಉಳಿಸಿಕೊಂಡರೆ ಇನ್ನೊಂದು ಹೊರಕ್ಕೆ ತಳ್ಳಲ್ಪಡುತ್ತದೆ. ಆ ಜಗಳದಲ್ಲಿ ಗಾಯವಾಗಿ ಕೋರೆ ಹಲ್ಲು, ಪಾದದ ಬೆರಳುಗಳನ್ನು ಕಳೆದುಕೊಂಡರೆ ಅದರ ಸಾಮರ್ಥ್ಯ ಕುಂದಿದೆ ಎಂದೇ ಹೇಳಬಹುದು. ಆಗ ಜಾನುವಾರುಗಳ ಮೇಲೆ ಅದು ದಾಳಿ ಮಾಡುತ್ತದೆ. ಇಂತಹ ಸಂದರ್ಭದಲ್ಲಿ ಯಾವುದಾದರೂ ಮನುಷ್ಯ ಅಡ್ಡ ಸಿಕ್ಕಾಗ, ತನ್ನ ಬೇಟೆಗೆ ತೊಂದರೆ ಮಾಡುತ್ತಿದ್ದಾನೆ ಎನ್ನಿಸಿದಾಗ ಆತನ ಮೇಲೆ ದಾಳಿ ಮಾಡುತ್ತದೆಯೇ ವಿನಃ ಎಂದೂ ಇಲ್ಲಿನ ಹುಲಿಗಳು ಮನುಷ್ಯನನ್ನು ಹುಡುಕಿಕೊಂಡು ಹೋಗಿ ದಾಳಿ ಮಾಡುವುದೇ ಇಲ್ಲ. ಇನ್ನು ಹುಲಿ ಎಷ್ಟು ಬಲಿಷ್ಠ ಪ್ರಾಣಿ ಎಂದರೆ ಅದರ ಪಾದದ ಭಾಗದಿಂದ ಒಮ್ಮೆ ಹೊಡೆಯಿತು ಎಂದರೆ ಕನಿಷ್ಟ ಮೂರು ಅಡಿಯಾದರೂ ಗಾಯವಾಗುತ್ತದೆ. ತಲೆಯ ಭಾಗಕ್ಕೆ ಹುಲಿ ಹೊಡೆಯುವುದು ಹೆಚ್ಚು. ಅದರ ಹೊಡೆತಕ್ಕೆ ಬದುಕುಳಿಯುವವರು ಅತಿ ಕಡಿಮೆ. ತನ್ನ ದಾಳಿಯಿಂದ ವನ್ಯಜೀವಿಯೇ ಇರಬಹುದು. ಮನುಷ್ಯನೇ ಆಗಬಹುದು ಇಲ್ಲವೇ ರಾಸುವೇ ಆಗಿರಬಹುದು. ಮೃತಪಟ್ಟಾಗ ಮೊದಲು ತೊಡೆ ಅಥವಾ ಚಪ್ಪೆ ಭಾಗದಲ್ಲಿ ರಕ್ತ ಹೀರುತ್ತದೆ. ಆನಂತರ ಇತರೆ ಭಾಗವನ್ನೂ ತಿನ್ನುತ್ತದೆ. ತಿನ್ನುವಾಗ ಅಡ್ಡಿಯಾಗುತ್ತಿದೆ ಎಂದೆನಿಸಿದಾಗ ಅಲ್ಲಿಂದ ಹೋದರೂ ಮತ್ತೆ ಅದು ಅಲ್ಲಿಗೆ ಬಂದೇ ಬರುತ್ತದೆ. ಅದು ಹುಲಿ ಪ್ರಮುಖ ಸ್ವಭಾವ. ಇಷ್ಟೆಲ್ಲಾ ಹುಲಿ ದಾಳಿ, ಬೇಟೆ, ಆಹಾರದ ಕ್ರಮ ಇದ್ದರೂ ಹೊಂಚು ಹಾಕಿ ಹೊಡೆಯುವುದರಲ್ಲಿ ಹುಲಿಗಿಂತ ನಿಷ್ಣಾತ ಹಾಗೂ ಚಾಕಚಕ್ಯತೆಯ ಪ್ರಾಣಿ ಇನ್ನೊಂದು ಇಲ್ಲ.

ಹೆದರಿಕೆಯಿಂದ ಮೇಲೆ ಬೀಳುವ ಚಿರತೆ

ಅದೇ ರೀತಿ ಹುಲಿ ನಂತರದ ಕಾಡಿನ ಮತ್ತೊಂದು ಮಾಂಸಾಹಾರಿ ಪ್ರಾಣಿ ಚಿರತೆ. ಇದು ಕಾಡು ಮಾತ್ರವಲ್ಲದೇ ನಾಡಿನಲ್ಲೂ ಈಗ ನೆಲೆ ಸೃಷ್ಟಿಸಿಕೊಂಡಿವೆ. ಕಾಡಿನಲ್ಲಿ ಅವುಗಳ ಬೇಟೆಯೂ ಹುಲಿ ರೀತಿಯೇ ಇರುತ್ತದೆ. ತಾನು ಗುರುತಿಸಿಕೊಂಡ ಬೇಟೆ ಪ್ರಾಣಿಯ ಮೇಲೆ ದಾಳಿ ಮಾಡುತ್ತದೆ. ಕತ್ತಿನ ಮೇಲೆ ದಾಳಿ ಮಾಡಿ ಬಿಗಿಯಾಗಿ ಹಿಡಿದುಕೊಂಡು ಮರದ ಮೇಲೆಯೋ ಇಲ್ಲವೇ ಪೊಟರೆಯತ್ತ ಎಳೆದುಕೊಂಡು ಹೋಗಿ ತಿನ್ನುವುದು ಚಿರತೆ ಶೈಲಿ.

ಮೂರ್ನಾಲ್ಕು ವರ್ಷದಿಂದ ಮೈಸೂರು,ತುಮಕೂರು, ಚಾಮರಾಜನಗರ, ಮಂಡ್ಯ, ಹಾಸನ ಸಹಿತ ಹಲವು ಭಾಗಗಳಲ್ಲಿ ಚಿರತೆ ದಾಳಿ ಹಾಗೂ ಅದರಿಂದ ಮನುಷ್ಯ ಸಾವಿನ ಘಟನೆಗಳನ್ನು ಗಮನಿಸಿರಬಹುದು. ಇದು ಕೂಡ ಹುಲಿಯಂತೆ ಮನುಷ್ಯನ ಮೇಲೆ ಬೇಟೆ ಮಾಡುವುದೇ ಇಲ್ಲ. ಮನುಷ್ಯನನ್ನು ಕಂಡರೆ ಆದಷ್ಟೂ ದೂರವೇ ಇರುತ್ತದೆ ಚಿರತೆ. ನಾಡಿನ ಸುತ್ತಮುತ್ತಲು ನೆಲೆಸಿರುವ ಚಿರತೆಗಳಿಗೆ ಮುಖ್ಯ ಆಹಾರ ನಾಯಿ, ಮೇಕೆ ಇಲ್ಲವೇ ಕುರಿ. ಮನೆಯ ಬಾಗಿಲಲ್ಲಿ ಮಲಗಿದ್ದ ನಾಯಿಯನ್ನೋ ಇಲ್ಲವೇ ಕೊಟ್ಟಿಗೆಯಲ್ಲಿ ಕಟ್ಟಿ ಹಾಕಿದ್ದ ಮೇಕೆ, ಕುರಿ, ಕರುವನ್ನು ಎತ್ತಿಕೊಂಡು ಹೋಗುವುದು ಚಿರತೆ ಶೈಲಿ. ಈ ವೇಳೆ ಮನುಷ್ಯ ಎಲ್ಲಾದರೂ ಅಡ್ಡ ಬಂದು ನನ್ನ ಮೇಲೆ ದಾಳಿ ಪ್ರಯತ್ನ ಆಗುತ್ತಿದೆ ಎನ್ನಿಸಿದಾಗ, ಕೆಲವೊಮ್ಮೆ ಅಚಾನಕ್ಕಾಗಿ ಮನುಷ್ಯನೇ ಭಯ ಪಟ್ಟು ಓಡುವಾಗ ಚಿರತೆ ದಾಳಿಗೆ ಸಿಲುಕಿಕೊಳ್ಳುತ್ತಾನೆ. ಆಗ ಚಿರತೆ ಕತ್ತಿನ ಭಾಗಕ್ಕೆ ಪರಚುತ್ತದೆ. ಇಲ್ಲವೇ ಬೆನ್ನು ಭಾಗದಲ್ಲೂ ಪರಚಬಹುದು. ಪರಚಿದ ಗಂಭೀರತೆಗಿಂತ ಭಯಕ್ಕೆ ಮನುಷ್ಯ ಜೀವ ಕಳೆದುಕೊಳ್ಳುವ ಸಾಧ್ಯತೆಯೇ ಅಧಿಕ. ಚಿರತೆ ಕೂಡ ಬೇಟೆ ನಿಷ್ಣಾತ ಪ್ರಾಣಿಯಾದರೂ ಎರಡರ ಬೇಟೆ ಶೈಲಿ, ದಾಳಿಯ ಕ್ರಮ ಕೊಂಚ ಬೇರೆಯಾದರೂ ಗುರಿ ಮಾತ್ರ ಒಂದೇ. ಮನುಷ್ಯ ಮಾತ್ರ ಎಂದಿಗೂ ಎರಡು ಪ್ರಾಣಿಗಳ ಬೇಟೆ ಅಲ್ಲವೇ ಅಲ್ಲ.