Will Yediyurappa return: ಲೋಕಸಭೆ ಚುನಾವಣೆ 2024; ಮೋದಿ ಗೆಲ್ಲಿಸಲು ಬಿಎಸ್‌ ಯಡಿಯೂರಪ್ಪ ಕಣಕ್ಕೆ ಇಳೀತಾರಾ, ಏನಿದೆ ಪರಿಣತರ ಲೆಕ್ಕಾಚಾರ

ಕರ್ನಾಟಕ ವಿಧಾನಸಭಾ ಚುನಾವಣೆ (Karnataka Assembly Election) ಮುಗಿದಿದೆ. ಕಾಂಗ್ರೆಸ್‌ (Congress) ಪಕ್ಷಕ್ಕೆ ಭರ್ಜರಿ ಬಹುಮತವೂ ಸಿಕ್ಕಾಗಿದೆ. ಸರ್ಕಾರ ರಚನೆಯ ಕಸರತ್ತು ಈಗ ನಡೆಯುತ್ತಿದೆ. ಚುನಾವಣಾ ಫಲಿತಾಂಶ ಘೋಷಣೆಯಾದ ಬಳಿಕ, ಬಿಜೆಪಿ (BJP) ಯ ಪ್ರಭಾವಿ ನಾಯಕ, ಮಾಜಿ ಮುಖ್ಯಮಂತ್ರಿ ಬಿಎಸ್‌ ಯಡಿಯೂರಪ್ಪ (BS Yediyurappa) ಅವರು ಹೇಳಿದ್ದು ಇಷ್ಟು - “ಬಿಜೆಪಿಗೆ ಗೆಲುವು ಮತ್ತು ಸೋಲು ಹೊಸದಲ್ಲ. ಈ ಹಿನ್ನಡೆಯಿಂದ ಅದು ಚೇತರಿಸಿಕೊಳ್ಳಲಿದೆ” ಎಂಬ ಹೇಳಿಕೆ ನೀಡಿದ್ದರು. ಅವರ ಈ ಹೇಳಿಕೆಯೇ ಈಗ ರಾಜಕೀಯ ಚಾವಡಿಯಲ್ಲಿ ಬಹುಚರ್ಚಿತ ವಿಚಾರ.

ಬಿಎಸ್‌ ಯಡಿಯೂರಪ್ಪ ಅವರನ್ನು ಪಕ್ಷ ಮೂಲೆಗುಂಪು ಮಾಡಿರುವುದರ ಪರಿಣಾಮವೂ ಪಕ್ಷದ ಈ ಫಲಿತಾಂಶ ಇರಬಹುದು ಎಂದೂ ರಾಜಕೀಯ ಪಂಡಿತರು ವಿಶ್ಲೇಷಿಸುತ್ತಿದ್ದಾರೆ. ಕೆಲವು ಮಠಾದೀಶರು ಈ ಕುರಿತು ಹೇಳಿಕೆಯನ್ನೂ ಕೊಟ್ಟಿರುವುದನ್ನು ಗಮನಿಸಿರಬಹುದು.

ಇದನ್ನೂ ಓದಿ| BS Yediyurappa: ಬಿಜೆಪಿಗೆ ಸ್ವಂತ ಬಲದ ಮೇಲೆ ಸರ್ಕಾರ ರಚಿಸಲು ಆಗುತ್ತಿಲ್ಲ; ಜನರ ತೀರ್ಪು ಸ್ವೀಕರಿಸಿದ ಬಿಎಸ್ ಯಡಿಯೂರಪ್ಪ

ಈಗಾಗಲೇ 80 ವರ್ಷ ಪೂರೈಸಿರುವ ಹಿರಿಯ ಲಿಂಗಾಯತ ನಾಯಕ ಬಿಎಸ್ ಯಡಿಯೂರಪ್ಪ ಅವರು ಮುಂದಿನ ವರ್ಷ ನಡೆಯಲಿರುವ ಲೋಕಸಭೆ ಚುನಾವಣೆಗೆ ಮುನ್ನ ಕರ್ನಾಟಕದಲ್ಲಿ ಪಕ್ಷವನ್ನು ಬಲಪಡಿಸಬೇಕು. ಅವರನ್ನು ಬಿಟ್ಟರೆ ಅಂತಹ ಪ್ರಭಾವಿ ವರ್ಚಸ್ಸುಇರುವಂತಹ ಬೇರಾವ ನಾಯಕರೂ ರಾಜ್ಯದಲ್ಲಿ ಬಿಜೆಪಿಯ ಮುಖವಾಗಿ ಕಾಣಿಸುತ್ತಿಲ್ಲ.

ಕಳೆದ ವರ್ಷ, ಯಡಿಯೂರಪ್ಪ ಅವರು ತಮ್ಮ ಕಿರಿಯ ಮಗ ಬಿ ವೈ ವಿಜಯೇಂದ್ರ (ಅವರು ಶಿಕಾರಿಪುರದಿಂದ ಗೆದ್ದಿದ್ದಾರೆ) ಗಾಗಿ ತಮ್ಮ ಕ್ಷೇತ್ರವಾದ ಶಿಕಾರಿಪುರವನ್ನು ಬಿಟ್ಟುಕೊಡುವುದಾಗಿ ಘೋಷಿಸಿದರು. ಚುನಾವಣೆಗೆ ಮುಂಚಿತವಾಗಿ, ಬಿಜೆಪಿಯು ತಮ್ಮ ತಪ್ಪನ್ನು ಅರಿತುಕೊಂಡಂತೆ ತೋರಿತ್ತು. ಪ್ರಚಾರದಲ್ಲಿ ಯಡಿಯೂರಪ್ಪನವರನ್ನು ತೊಡಗಿಸಲು ಪ್ರಯತ್ನಿಸಿತು. ಆದರೆ, ಅಷ್ಟರಲ್ಲಾಗಲೇ ಕಾಲ ಮಿಂಚಿ ಹೋಗಿತ್ತು.

ಇದನ್ನೂ ಓದಿ| BY Vijayendra: ಚುನಾವಣಾ ರಾಜಕೀಯಕ್ಕೆ ಬಿ ವೈ ವಿಜಯೇಂದ್ರ ಎಂಟ್ರಿ; ಬಿಜೆಪಿ ಭದ್ರಕೋಟೆ ಶಿಕಾರಿಪುರದಲ್ಲಿ ಆಗುತ್ತಾ ‘ಸನ್’​ ರೈಸ್​?

ಪರಿಣತರು ಹೇಳುವುದೇನು?

“ಯಡಿಯೂರಪ್ಪ ತಮ್ಮ ವಯಸ್ಸಿನ ಕಾರಣ ಪ್ರಚಾರದಲ್ಲಿ ಹೆಚ್ಚು ಸಕ್ರಿಯರಾಗಿರಲಿಲ್ಲ. ಮಧ್ಯ ಕರ್ನಾಟಕ ಮತ್ತು ಹುಬ್ಬಳ್ಳಿ ಪ್ರದೇಶಕ್ಕೆ ತಮ್ಮನ್ನು ಸೀಮಿತಗೊಳಿಸಿಕೊಂಡರು. ಲಿಂಗಾಯತರು ಬೊಮ್ಮಾಯಿ ಅವರನ್ನು ಯಡಿಯೂರಪ್ಪ ಅವರಿಗೆ ಬದಲಿಯಾಗಿ ಕಾಣಲಿಲ್ಲ. ಇದಲ್ಲದೆ, ಬೊಮ್ಮಾಯಿ ಅವರು ಯಡಿಯೂರಪ್ಪ ಅವರಂತೆ ಲಿಂಗಾಯತರನ್ನು ಮೀರಿದ ಇಮೇಜ್‌ ಅನ್ನು ಹೊಂದಿರಲಿಲ್ಲ ”ಎಂದು ಅಜೀಂ ಪ್ರೇಮ್‌ಜಿ ವಿಶ್ವವಿದ್ಯಾಲಯದ ರಾಜ್ಯಶಾಸ್ತ್ರ ಪ್ರಾಧ್ಯಾಪಕ ಎ ನಾರಾಯಣ ಅವರು ಹಿಂದುಸ್ತಾನ್ ಟೈಮ್ಸ್‌ಗೆ ತಿಳಿಸಿದರು.

ರಾಜಕೀಯ ವಿಶ್ಲೇಷಕ ಚಂಬಿ ಪುರಾಣಿಕ್ ಅವರು ಹೇಳುವ ಪ್ರಕಾರ, 2024 ರ ಲೋಕಸಭೆ ಚುನಾವಣೆಯಲ್ಲಿ ಬಿಜೆಪಿ ಉತ್ತಮ ಸಾಧನೆ ಮಾಡಬೇಕು ಎಂದಾದರೆ, ಯಡಿಯೂರಪ್ಪ ಅವರೇ ಇರಬೇಕು.

"ಅವರು ಬಿಜೆಪಿಗೆ ನಿಷ್ಠರು. ಏಕೆಂದರೆ ಅವರ ಇಬ್ಬರು ಪುತ್ರರಾದ ಬಿವೈ ವಿಜಯೇಂದ್ರ ಮತ್ತು ಬಿವೈ ರಾಘವೇಂದ್ರ ಅವರ ರಾಜಕೀಯ ಭವಿಷ್ಯವು ಪಕ್ಷದ ಹೈಕಮಾಂಡ್ ಕೈಯಲ್ಲಿದೆ" ಎಂದು ಪುರಾಣಿಕ್ ವಿವರಿಸಿದರು.

ಈ ಇಬ್ಬರ ವಿಶ್ಲೇಷಣೆ ಗಮನಿಸುವುದಾದರೆ, ಬಿಜೆಪಿ ನಾಯಕರು ಲೋಕಸಭೆ ಚುನಾವಣೆಯ ಗೆಲುವಿಗಾಗಿ ಬಿಎಸ್‌ ಯಡಿಯೂರಪ್ಪ ಅವರನ್ನು ಮತ್ತೆ ರಾಜ್ಯ ಪ್ರವಾಸಕ್ಕೆ ಒತ್ತಾಯಿಸಬಹುದಾ? ಅವರು ಅದಕ್ಕೆ ಒಪ್ಪಿಗೆ ಸೂಚಿಸಿ, ಮೋದಿ ಅವರನ್ನು ಮತ್ತೊಮ್ಮೆ ಪ್ರಧಾನಿ ಮಾಡಲು ಕೆಲಸ ಮಾಡುವರೇ? ಎಂಬುದು ಸದ್ಯದ ಕುತೂಹಲ.