New Year 2024: ಹೊಸ ವರ್ಷದ ಸ್ವಾಗತಕ್ಕೆ ಹೊಸ ಸ್ಥಳಗಳ ಹುಡುಕಾಟದಲ್ಲಿದ್ದೀರಾ? ಇಲ್ಲಿವೆ ನೋಡಿ

New Year 2024: ಹೊಸ ವರ್ಷಕ್ಕೆ ಕಾಲಿಡಲು ಇನ್ನೇನು ಬೆರಳೆಣಿಕೆಯ ದಿನಗಳು ಮಾತ್ರ ಬಾಕಿ ಉಳಿದಿವೆ. 2024ನೇ ವರ್ಷವನ್ನು ಇನ್ನಷ್ಟು ಸ್ಮರಣೀಯ ವರ್ಷವೆಂದು ಮಾಡಬೇಕೆಂದು ನೀವು ಎಂದುಕೊಂಡಿದ್ದರೆ ಕುಟುಂಬಸ್ಥರ ಜೊತೆ ಸೇರಿ ಫ್ಯಾಮಿಲಿ ಟೂರ್​​ಗೆ ತೆರಳಲು ಇನ್ನೂ ಕಾಲ ಮಿಂಚಿಲ್ಲ. ಹೊಸ ವರ್ಷವನ್ನು ಪ್ರವಾಸದ ನಡುವೆಯೇ ಕುಟುಂಬಸ್ಥರೆಲ್ಲ ಒಟ್ಟು ಸೇರಿ ಸ್ವಾಗತಿಸಿದರೆ ಅದಕ್ಕಿಂತ ಸ್ಮರಣೀಯ ಕ್ಷಣ ನಿಮಗೆ ಇನ್ನೊಂದು ಸಿಗಲಿಕ್ಕಿಲ್ಲ. ನೀವು ಕೂಡ 2023ರ ಕೊನೆಯ ವೀಕೆಂಡ್​ನಲ್ಲಿ ಕುಟುಂಬಸ್ಥರೆಲ್ಲ ಸೇರಿ ಎಲ್ಲಾದರೂ ಪ್ರವಾಸಕ್ಕೆ ತೆರಳಬೇಕು ಎಂದುಕೊಂಡಿದ್ದರೆ ಇಲ್ಲೊಂದಿಷ್ಟು ಸಲಹೆಗಳು ನಿಮಗೆ ಸಿಗಲಿವೆ.

ನೈನಿತಾಲ್​

ಉತ್ತರಾಖಂಡ್​​ನ ಪ್ರಕೃತಿಯ ಮಡಿಲಲ್ಲಿ ಹೊಸ ವರ್ಷವನ್ನು ಸ್ವಾಗತಿಸುವ ಮಜಾವೇ ಬೇರೆ. ಡಿಸೆಂಬರ್​ ಹಾಗೂ ಜನವರಿ ಸಮಯದಲ್ಲಿ ಇಲ್ಲಿನ ಚುಮು ಚುಮು ಚಳಿ ನಿಮಗೆ ನಿಜವಾಗಿಯೂ ಖುಷಿ ನೀಡಲಿದೆ. ಈ ಸಮಯದಲ್ಲಿ ಹಿಮಪಾತ ಕೂಡ ಇರುವುದರಿಂದ ನೀವು ಸಖತ್​ ಎಂಜಾಯ್​ ಮಾಡಬಹುದು. ಇಲ್ಲಿನ ನೈನಾ ದೇವಿ ದೇವಸ್ಥಾನ ಹಾಗೂ ನೈನಿತಾಲ್​ ಸರೋವರ ಕೂಡ ಈ ಪ್ರವಾಸದ ಕೇಂದ್ರ ಬಿಂದುಗಳು ಎಂದು ಹೇಳಿದರೆ ತಪ್ಪಾಗುವುದಿಲ್ಲ. ಈ ಎಲ್ಲಾ ಪ್ರದೇಶಗಳಿಗೆ ತೆರಳಲು ನಿಮಗೆ ಸುಲಭವಾಗು ಕ್ಯಾಬ್​ ವ್ಯವಸ್ಥೆ ಸಿಗಲಿದೆ.

ರಣತಂಬೋರ್ ರಾಷ್ಟ್ರೀಯ ಉದ್ಯಾನವನ

ಇದು ಕೂಡಾ ಪ್ರಕೃತಿ ಪ್ರಿಯರಿಗೆ ಹೇಳಿ ಮಾಡಿಸಿದಂತಹ ಪ್ರವಾಸಿ ತಾಣವಾಗಿದೆ. ಇಲ್ಲಿ ನೀವು ಸಾಕಷ್ಟು ವನ್ಯ ಜೀವಿಗಳನ್ನು ಅದರಲ್ಲೂ ವಿಶೇಷವಾಗಿ ಹುಲಿಗಳನ್ನು ಅನ್ವೇಷಿಸಬಹುದಾಗಿದೆ. ಐಷಾರಾಮಿ ಹೆರಿಟೇಜ್​ ರೆಸಾರ್ಟ್​ಗಳು, ಅತ್ಯಾಧುನಿಕ ವಸತಿ ವ್ಯವಸ್ಥೆ, ರಾಜಸ್ಥಾನದ ರುಚಿಯಾದ ಪಾಕ ವಿಧಾನ ನಿಮಗೆ ನಿಜಕ್ಕೂ ಮಜಾ ನೀಡಲಿದೆ. ಹನಿಮೂನ್​ಗೆ ಹೋಗಬೇಕೆಂದು ಪ್ಲಾನ್​ ಮಾಡಿದವರೂ ಸಹ ಈ ಸ್ಥಳವನ್ನು ಆಯ್ಕೆ ಮಾಡಿಕೊಳ್ಳಬಹುದು.

ವಾರಣಾಸಿ

ಭಾರತದ ಪುರಾತನ ನಗರಗಳ ಪೈಕಿ ಉತ್ತರ ಪ್ರದೇಶದ ವಾರಣಾಸಿ ಕೂಡ ಒಂದು . ಇಲ್ಲಿನ ದುರ್ಗಾ ದೇವಾಲಯ ಹಾಗೂ ಕಾಶಿ ವಿಶ್ವನಾಥ ದೇಗುಲಗಳು ಫ್ಯಾಮಿಲಿ ಟೂರ್​ಗೆ ಹೇಳಿ ಉತ್ತಮ ಸ್ಥಳ ಎನಿಸಲಿದೆ. ಇನ್ನೂ ಅನೇಕ ಐತಿಹಾಸಿಕ ದೇಗುಲಗಳನ್ನು ನೀವು ಅನ್ವೇಷಣೆ ಮಾಡಬಹುದಾಗಿದೆ. ಗಂಗಾ ನದಿಯಲ್ಲಿ ದೋಣಿ ವಿಹಾರವನ್ನೂ ನೀವು ಮಾಡಬಹುದಾಗಿದೆ. ಇಲ್ಲಿನ ಬನಾರಸಿ ಸೀರೆಗಳು ಮಹಿಳೆಯರಿಗೆ ಇಷ್ಟವಾಗದೇ ಇರದು.

ಜೈಪುರ , ರಾಜಸ್ಥಾನ

ರಾಜಸ್ಥಾನದ ರಾಜಧಾನಿ ಎನಿಸಿರುವ ಜೈಪುರ ಕೂಡ ನಿಮ್ಮ ವರ್ಷಾಂತ್ಯದ ಪ್ರವಾಸಕ್ಕೆ ಉತ್ತಮ ಆಯ್ಕೆಯಾಗಿದೆ. ರಾಜಸ್ಥಾನದ ರಾಜಮನೆತನಗಳ ವೈಭವವನ್ನು ನೀವು ಈ ಪ್ರವಾಸದ ಮೂಲಕ ತಿಳಿದುಕೊಳ್ಳಬಹುದು. ಜನವರಿಯಲ್ಲಿ ಜೈಪುರದಲ್ಲಿ ಪ್ರಖ್ಯಾತ ಜೈಪುರ ಸಾಹಿತ್ಯ ಉತ್ಸವ ಕೂಡ ನಡೆಯುತ್ತದೆ. ಈ ಸಮಯದಲ್ಲಿ ನೀವು ಜೈಪುರದ ರಾಜ ವೈಭವವನ್ನು ಇನ್ನಷ್ಟು ಕಣ್ತುಂಬಿಕೊಳ್ಳಬಹುದಾಗಿದೆ.

ಮಾಮಲ್ಲಾಪುರಂ, ಮಧುರೈ

ಜನವರಿಯಲ್ಲಿ ಪ್ರವಾಸಕ್ಕೆ ಹೋಗಬೇಕು ಎಂದುಕೊಳ್ಳುವವರಿಗೆ ತಮಿಳುನಾಡಿನ ಈ ಪ್ರದೇಶಗಳು ಒಳ್ಳೆಯ ಸ್ಥಳವಾಗಿವೆ. ಮಮಲ್ಲಾಪುರಂ ನೃತ್ಯೋತ್ಸವ ಹಾಗೂ ಮಧುರೈನ ಪೊಂಗಲ್​ ಆಚರಣೆಗಳಿಗೆ ನೀವು ಸಾಕ್ಷಿಯಾಗಬಹುದಾಗಿದೆ. ಇಲ್ಲಿನ ಸ್ಥಳೀಯ ಪಾಕ ವಿಧಾನ ಕೂಡ ಬಾಯಲ್ಲಿ ನೀರು ತರಿಸಲಿದೆ. ಪೊಂಗಲ್​ ಸಮಯದಲ್ಲಿ ಇಲ್ಲಂತೂ ರಂಗೋಲಿಗಳ ಹಬ್ಬವೇ ಇರಲಿದೆ. ಇವುಗಳನ್ನು ಕಣ್ತುಂಬಿಕೊಳ್ಳುವುದೇ ಪರಮಾನಂದ ಎನಿಸಲಿದೆ.

ಇದನ್ನೂ ಓದಿ: ಹೊಸ ವರ್ಷಾಚರಣೆ: ನಂದಿ ಬೆಟ್ಟಕ್ಕೆ ಪ್ರವೇಶ ನಿರ್ಬಂಧ ಹೇರಿದ ಚಿಕ್ಕಬಳ್ಳಾಪುರ ಜಿಲ್ಲಾಡಳಿತ

ಇದನ್ನೂ ಓದಿ: ನ್ಯೂ ಇಯರ್‌ಗೆ ಟ್ರಿಪ್‌ ಹೊರಟಿದ್ದೀರಾ? ಹಾಗಾದರೆ ಸೂಟ್‌ಕೇಸ್‌ ಪ್ಯಾಕಿಂಗ್‌ ಮಾಡುವಾಗ ಈ ಜಾಣ್ಮೆ ತೋರಿಸಿ