ಚಳಿಗಾಲದಲ್ಲಿ ಮಕ್ಕಳಲ್ಲಿ ಕಂಡುಬರುವ ಸಾಮಾನ್ಯ ಕಾಯಿಲೆಗಳಿವು: ಕಂದಮ್ಮಗಳಿಗೆ ಕಾಡುವ ಈ ರೋಗಲಕ್ಷಣಗಳನ್ನು ಗುರುತಿಸಿ

ಚಳಿಗಾಲದಲ್ಲಿ ಮಕ್ಕಳನ್ನು ಎಷ್ಟೇ ಕಾಳಜಿಯಿಂದ ನೋಡಿಕೊಂಡರು ಕೂಡ ಅನಾರೋಗ್ಯಕ್ಕೆ ಒಳಗಾಗುವ ಸಾಧ್ಯತೆ ಹೆಚ್ಚಿರುತ್ತದೆ. ಚಳಿಯ ವಾತಾವರಣ ಇರುವುದರಿಂದ ಮಕ್ಕಳು ಹೊರಗಡೆ ಆಟವಾಡುವುದಿಲ್ಲ. ಮನೆಯಲ್ಲಿ ಬೆಚ್ಚಗೆ ಇರಿಸಿದರೂ ಸೋಂಕು ತಗುಲತ್ತದೆ. ಮನೆಯಲ್ಲಿ ಯಾರಾದರೂ ಅನಾರೋಗ್ಯಕ್ಕೆ ಒಳಗಾಗಿದ್ದರೆ ಅಥವಾ ಸೋಂಕಿತ ವ್ಯಕ್ತಿ ಯಾರಾದರೂ ಮನೆಗೆ ಬಂದಿದ್ದರೂ ಮಕ್ಕಳಿಗೆ ಇದು ಬೇಗನೆ ಹರಡುತ್ತದೆ. ಮಕ್ಕಳಲ್ಲಿ ರೋಗನಿರೋಧಕ ಶಕ್ತಿ ಕಡಿಮೆ ಇರುವುದರಿಂದ ಅವರು ಬೇಗನೇ ಅನಾರೋಗ್ಯಕ್ಕೆ ಒಳಗಾಗುತ್ತಾರೆ. ಚಳಿಗಾಲದಲ್ಲಿ ಮಕ್ಕಳಲ್ಲಿ ಕಂಡುಬರುವ ಸಾಮಾನ್ಯ ಕಾಯಿಲೆಗಳು ಯಾವುವು ಎಂಬುದು ಇಲ್ಲಿದೆ.

ಚಳಿಗಾಲದಲ್ಲಿ ಮಕ್ಕಳಲ್ಲಿ ಕಂಡುಬರುವ ಸಾಮಾನ್ಯ ಕಾಯಿಲೆಗಳು

ಉಸಿರಾಟದ ಸಿನ್ಸಿಟಿಯಲ್ ವೈರಸ್: ಈ ಸೋಂಕು 2 ವರ್ಷಕ್ಕಿಂತ ಕಡಿಮೆ ವಯಸ್ಸಿನ ಮಕ್ಕಳಲ್ಲಿ ಸಂಭವಿಸುತ್ತದೆ. ಇದು ಉಸಿರಾಟದ ಸೋಂಕಿನ ಸಾಮಾನ್ಯ ಸಮಸ್ಯೆಯಾಗಿದೆ. ಶಿಶುಗಳಲ್ಲಿ ಇದು ಗಂಭೀರ ಸಮಸ್ಯೆಯಾಗಿ ಪರಿಣಮಿಸಬಹುದು. ರೋಗಲಕ್ಷಣಗಳು ಕಾಣಿಸಿಕೊಳ್ಳಲು 2 ದಿನಗಳ ಸಮಯವನ್ನು ತೆಗೆದುಕೊಳ್ಳುತ್ತವೆ. ಮುಂದಿನ 3 ರಿಂದ 4 ದಿನಗಳಲ್ಲಿ ಇದು ಅತಿರೇಕಕ್ಕೆ ಹೋಗಬಹುದು. ಹೀಗಾಗಿ ಎಚ್ಚರಿಕೆ ವಹಿಸುವುದು ಹಾಗೂ ರೋಗಲಕ್ಷಣಗಳನ್ನು ಗುರುತಿಸುವುದು ಮುಖ್ಯ. ಈ ರೋಗದ ಸಾಮಾನ್ಯ ಲಕ್ಷಣಗಳೆಂದರೆ, ಸ್ರವಿಸುವ ಮೂಗು (ಶೀತ), ಕೆಮ್ಮು, ತ್ವರಿತ ಉಸಿರಾಟ, ಜ್ವರ, ಕಫ. ಈ ರೋಗಲಕ್ಷಣಗಳನ್ನು ಗುರುತಿಸಿ ಕೂಡಲೇ ಮಗುವನ್ನು ತಜ್ಞ ವೈದ್ಯರ ಬಳಿ ಕರೆದೊಯ್ಯುವುದು ಸೂಕ್ತ.

ಇದನ್ನೂ ಓದಿ: ಚಳಿಗಾಲದಲ್ಲಿ ಮಕ್ಕಳ ಆರೋಗ್ಯದ ಬಗ್ಗೆ ಇರಲಿ ಕಾಳಜಿ: ತೆಗೆದುಕೊಳ್ಳಲೇಬೇಕಾದ ಮುನ್ನೆಚ್ಚರಿಕಾ ಕ್ರಮಗಳು ಇಲ್ಲಿವೆ

ಇನ್ಫ್ಲುಯೆನ್ಸ: ಇನ್ಫ್ಲುಯೆನ್ಸ ಅಥವಾ ಫ್ಲೂ ಎಂದು ಕರೆಯಲ್ಪಡುವ ಈ ರೋಗವನು ಮತ್ತೊಂದು ಉಸಿರಾಟದ ಸೋಂಕಾಗಿದೆ. ಇದು ಇದ್ದಕ್ಕಿದ್ದಂತೆ ಸಂಭವಿಸಬಹುದು. ಇದರ ರೋಗಲಕ್ಷಣಗಳೆಂದರೆ, ಸ್ರವಿಸುವ ಮೂಗು (ಶೀತ), ಕೆಮ್ಮು, ಅಧಿಕ ಜ್ವರ, ಸ್ನಾಯುಗಳ ನೋವು, ಮೂಗು ಕಟ್ಟುವಿಕೆ, ಅತಿಸಾರ, ಕಣ್ಣು ಕೆಂಪಾಗುವಿಕೆ.

ಸಾಮಾನ್ಯ ಶೀತ: ನೆಗಡಿಯು ಚಳಿಗಾಲದಲ್ಲಿ ಬಹುತೇಕ ಎಲ್ಲರಿಗೂ ಕಂಡುಬರುವ ಸಾಮಾನ್ಯ ಸಮಸ್ಯೆಯಾಗಿದೆ. ಇದು ವೈರಲ್ ಜ್ವರಕ್ಕೂ ಕಾರಣವಾಗಬಹುದು. ಶೀತ ಮತ್ತು ವೈರಲ್ ಜ್ವರವು ಚಳಿಗಾಲದಲ್ಲಿ ಹೆಚ್ಚು ಸಾಮಾನ್ಯವಾಗಿದೆಯಾದರೂ, ಇದು ವರ್ಷವಿಡೀ ಯಾವುದೇ ಮಗುವಿಗೂ ಬರಬಹುದು. ಒಂದು ಮಗು 1 ವಾರದಿಂದ 2 ವಾರಗಳವರೆಗೆ ವೈರಲ್ ಜ್ವರದಿಂದ ಬಳಲಬಹುದು. ಸಾಮಾನ್ಯ ಶೀತ ಅಥವಾ ವೈರಲ್ ಜ್ವರವನ್ನು ಈ ಹಲವಾರು ರೋಗಲಕ್ಷಣಗಳಿಂದ ಕಂಡುಹಿಡಿಯಬಹುದು.

ಅವು ಯಾವುದೆಂದರೆ, ಕೆಮ್ಮು, ಸ್ರವಿಸುವ ಮೂಗು ( ವಿಪರೀತ ಶೀತ), ಗಂಟಲು ನೋವು, ಮೂಗು ಕಟ್ಟುವಿಕೆ, ಜ್ವರ. ಮಗುವಿಗೆ ನೆಗಡಿ ಇದ್ದಾಗ, ಮಗು ಹೈಡ್ರೇಟೆಡ್ (ತೇವಾಂಶ) ಆಗಿರುವಂತೆ ನೋಡಿಕೊಳ್ಳುವುದು ಅತ್ಯಂತ ಮುಖ್ಯವಾದ ವಿಷಯ. ಈ ರೀತಿಯ ಅನಾರೋಗ್ಯವು ತೀವ್ರ ದೌರ್ಬಲ್ಯಕ್ಕೆ ಕಾರಣವಾಗಬಹುದು. ಹೀಗಾಗಿ ವೈದ್ಯರನ್ನು ಸಂಪರ್ಕಿಸಿ ಕೂಡಲೇ ಚಿಕಿತ್ಸೆ ಪಡೆಯಬೇಕು.

ಗಂಟಲು ನೋವು: ಇದೊಂದು ಬ್ಯಾಕ್ಟೀರಿಯಾದ ಸೋಂಕಾಗಿದ್ದು, ಇದು ಚಳಿಗಾಲದಲ್ಲಿ ಮಾತ್ರವಲ್ಲ, ಬೇರೆ ಅವಧಿಯಲ್ಲಿಯೂ ಸಹ ಸಂಭವಿಸಬಹುದು. ಗಂಟಲು ನೋವು ಉಂಟಾದಾಗ ಮಕ್ಕಳಲ್ಲಿ ಈ ರೋಗಲಕ್ಷಣಗಳು ಸಂಭವಿಸಬಹುದು. ಅವು ಯಾವುದೆಂದರೆ, ತಲೆನೋವು, ಹೊಟ್ಟೆ ನೋವು, ನೋಯುತ್ತಿರುವ ಗಂಟಲು, ಜ್ವರ, ನುಂಗಲು ತೊಂದರೆಯಾಗುವುದು.

ಕೆಲವೊಮ್ಮೆ ಈ ರೋಗಲಕ್ಷಣಗಳು ಶೀತ ಮತ್ತು ಕೆಮ್ಮು ಮುಂತಾದ ಇತರ ರೋಗಲಕ್ಷಣಗಳೊಂದಿಗೆ ಕೂಡ ಸಂಭವಿಸಬಹುದು. ಈ ರೋಗಲಕ್ಷಣಗಳ ಬಗ್ಗೆ ನೀವು ವಿಶೇಷ ಕಾಳಜಿಯನ್ನು ತೆಗೆದುಕೊಳ್ಳಬೇಕು. ಕೆಲವೊಮ್ಮೆ ಮಕ್ಕಳಲ್ಲಿ ಕೆಂಪು ದದ್ದು ಅಥವಾ ಟಾನ್ಸಿಲ್ ಆಗುವಂತಹ ಸಾಧ್ಯತೆಯಿರುತ್ತದೆ

ಹೊಟ್ಟೆ ಜ್ವರ: ಇದು ಮುಖ್ಯವಾಗಿ ವೈರಲ್ ಕರುಳಿನ ಸೋಂಕು ಮತ್ತು ನೊರೊವೈರಸ್ನಿಂದ ಉಂಟಾಗುತ್ತದೆ. ಹೊಟ್ಟೆ ಜ್ವರವನ್ನು ಪತ್ತೆಹಚ್ಚುವ ಒಂದು ವಿಧಾನವೆಂದರೆ ಮಗು ಕೆಲವು ದಿನಗಳವರೆಗೆ ನಿರಂತರವಾಗಿ ವಾಂತಿ ಮಾಡಬಹುದು. ಇದು 2 ದಿನಗಳಿಂದ ಒಂದು ವಾರದವರೆಗೆ ಇರುತ್ತದೆ. ಅನಾರೋಗ್ಯವನ್ನು ಪತ್ತೆಹಚ್ಚಲು ಸಹಾಯ ಮಾಡುವ ಕೆಲವು ಸಾಮಾನ್ಯ ಲಕ್ಷಣಗಳಿವೆ: ನೀರಿನಂಶದಿಂದ ಕೂಡಿರುವ ಅತಿಸಾರ, ವಾಂತಿ, ಸೌಮ್ಯ ಜ್ವರ, ಹೊಟ್ಟೆಯಲ್ಲಿ ನೋವು, ಆಯಾಸ, ತಲೆನೋವು.

ಈ ವೈರಸ್ ಮಗುವಿನ ದೇಹದಲ್ಲಿ 24 ಗಂಟೆಗಳಿಗಿಂತ ಕಡಿಮೆ ಸಮಯದಲ್ಲಿ ದಾಳಿ ಮಾಡಬಹುದು. ಹೀಗಾಗಿ ಚಳಿಗಾಲದಲ್ಲಿ ಮಕ್ಕಳ ಬಗ್ಗೆ ವಿಶೇಷ ಕಾಳಜಿ ವಹಿಸುವುದು ಮುಖ್ಯವಾಗಿದೆ.

ಒಟ್ಟಿನಲ್ಲಿ ಚಳಿಗಾಲದ ತಿಂಗಳುಗಳಲ್ಲಿ ಮಕ್ಕಳ ಬಗ್ಗೆ ವಿಶೇಷ ಕಾಳಜಿ ವಹಿಸುವ ಅಗತ್ಯವಿದೆ. ಈ ಋತು ವಿಶೇಷವಾಗಿ ಮಕ್ಕಳಿಗೆ ಹಲವಾರು ಕಾಯಿಲೆಗಳನ್ನು ಆಹ್ವಾನಿಸುವ ಋತುವಾಗಿದೆ. ಪಾಲಕರು ತಮ್ಮ ಮಕ್ಕಳ ಬಗ್ಗೆ ವಿಶೇಷ ಕಾಳಜಿ ವಹಿಸಬೇಕು ಮತ್ತು ಸೋಂಕುಗಳನ್ನು ನಿಭಾಯಿಸಲು ಆರೋಗ್ಯಕರ ನೈರ್ಮಲ್ಯ ಅಭ್ಯಾಸಗಳನ್ನು ರೂಢಿಸಿಕೊಳ್ಳಬೇಕು. ಹಾಗೆಯೇ, ಆರೋಗ್ಯಕರ ಆಹಾರವನ್ನು ಸೇವಿಸಬೇಕು.

ಇದನ್ನೂ ಓದಿ: ಮಕ್ಕಳ ಆರೋಗ್ಯದ ಮೇಲೆ ಮ್ಯಾಜಿಕ್ ಮಾಡುತ್ತೆ ಮಿರಾಕಲ್ ಜ್ಯೂಸ್‌; ಇದನ್ನು ಕುಡಿಯುವುದರಿಂದ ಎಷ್ಟೆಲ್ಲಾ ಪ್ರಯೋಜನಗಳಿವೆ ನೋಡಿ