ನಿಮ್ಮ ಹಳೆಯ ಬಟ್ಟೆಗಳನ್ನು ಸದುಪಯೋಗ ಮಾಡಿಕೊಳ್ಳಲು 5 ಐಡಿಯಾಗಳು; ಬರ್ತಿವೆ ಶ್ರಾವಣದ ಹಬ್ಬ ಸಾಲು ಸಾಲು, ಬೇಗ ಬಟ್ಟೆ ರೆಡಿ ಮಾಡ್ಕೊಳಿ
ಶ್ರಾವಣ ಮಾಸ ಬಂತೆಂದರೆ ಹಬ್ಬಗಳ ಸಾಲು ಆರಂಭವಾಗುತ್ತದೆ. ಹಬ್ಬಗಳು ಎಂದರೆ ಹೊಸ ಬಟ್ಟೆ ಖರೀದಿಸುವುದು ಸಾಮಾನ್ಯ. ಆದರೆ ಈ ಬಾರಿ ಶ್ರಾವಣ ಮಾಸಕ್ಕೆ ನೀವು ಹಳೆಯ ಬಟ್ಟೆಗಳನ್ನೇ ಸದುಪಯೋಗ ಮಾಡಿಕೊಂಡು ಹೊಸ ಬಟ್ಟೆಯಂತೆ ಧರಿಸಬಹುದು. ಹಳೆ ಬಟ್ಟೆಯನ್ನು ಹೇಗೆಲ್ಲಾ ರೀಸೈಕಲ್‌ ಮಾಡಬಹುದು ಎಂಬುದಕ್ಕೆ ಇಲ್ಲಿದೆ ಉಪಾಯ.
ಹಬ್ಬಗಳು ಎಂದರೆ ಸಂಭ್ರಮದ ಸಂಕೇತ, ಹಬ್ಬಗಳ ಸಂದರ್ಭದಲ್ಲಿ ಹೊಸ ಬಟ್ಟೆಗಳನ್ನು ಹೊಲಿಸಿಕೊಳ್ಳುವುದು ಅಥವಾ ಹೊಸ ಬಟ್ಟೆ ಖರೀದಿಸುವುದು ಭಾರತದಲ್ಲಿ ಹೊಸತೇನಲ್ಲ. ಇದೀಗ ಶ್ರಾವಣ ಮಾಸ ಹತ್ತಿರದಲ್ಲೇ ಇದ್ದು ಹಬ್ಬಗಳ ಸಾಲು ಸಾಲು ಆರಂಭವಾಗುತ್ತದೆ. ಈ ಹಬ್ಬಗಳಿಗೆ ನೀವು ಹೊಸ ಬಟ್ಟೆಯನ್ನೇ ಖರೀದಿ ಮಾಡಬೇಕು ಎಂದೇನಿಲ್ಲ. ಬದಲಾಗಿ ಹಳೆಯ ಬಟ್ಟೆಯನ್ನೇ ಹೊಸತನ್ನಾಗಿ ಬದಲಿಸಬಹುದು. ನಿಮಗೆ ಹಳೆ ಬಟ್ಟೆ ಧರಿಸಲು ಬೇಸರ ಎಂದರೆ ಇದನ್ನು ಟ್ರೆಂಡಿಯಾಗಿ ಪರಿವರ್ತನೆ ಕೂಡ ಮಾಡಿಕೊಳ್ಳಬಹುದು. ಕೆಲವೊಮ್ಮೆ ಹಳೆಯ ಬಟ್ಟೆಯನ್ನು ರೀಸೈಕಲ್‌ ಮಾಡಿ ದಾನವನ್ನೂ ಕೊಡಬಹುದು. ಹಾಗಾದರೆ ಶ್ರಾವಣ ಮಾಸದ ಹೊಸ್ತಿಲಿನಲ್ಲಿರುವ ಈ ಹೊತ್ತಿನಲ್ಲಿ ಹಳೆಯ ಬಟ್ಟೆಯನ್ನು ಹೇಗೆಲ್ಲಾ ಬಳಸಬಹುದು ಎಂಬುದನ್ನು ನೋಡೋಣ.
ದಾನ ಮಾಡುವುದು
ಹಳೆಯ ಬಟ್ಟೆಯನ್ನು ಸದುಪಯೋಗ ಮಾಡಿಕೊಳ್ಳುವುದು ಎಂದರೆ ಅದನ್ನು ನೀವೇ ಬಳಸಬೇಕು ಎಂದೇನಿಲ್ಲ. ನಿಮ್ಮಲ್ಲಿರುವ ಹಳೆಯ ಬಟ್ಟೆಗಳನ್ನು ಮರುಬಳಕೆ ಮಾಡಲು ಸುಲಭವಾದ ಮತ್ತು ಅತ್ಯಂತ ಉದಾತ್ತ ಮಾರ್ಗವೆಂದರೆ ಅವುಗಳನ್ನು ಚಾರಿಟಿ ಅಥವಾ ಅನಾಥಶ್ರಮಗಳಿಗೆ ದಾನ ಮಾಡುವುದು. ಹಳೆ ಬಟ್ಟೆಗಳನ್ನು ಸ್ವೀಕರಿಸಿ ನಿರ್ಗತಿಕರಿಗೆ ಹಂಚುವ ಅಥವಾ ಕಡಿಮೆ ಬೆಲೆಗೆ ಮಾರಾಟ ಮಾಡುವ ಹಲವು ಸಂಸ್ಥೆಗಳಿವೆ. ಆನ್‌ಲೈನ್‌ನಲ್ಲಿ ಹುಡುಕುವ ಮೂಲಕ ಅಥವಾ ಕೇಳುವ ಮೂಲಕ ನಿಮ್ಮ ನಗರ ಅಥವಾ ಪಟ್ಟಣದಲ್ಲಿ ಅಂತಹ ಸಂಸ್ಥೆಗಳಿವೆಯೇ ಎಂದು ಪರಿಶೀಲನೆ ಮಾಡಬಹುದು. ನಿಮ್ಮ ಹಳೆಯ ಬಟ್ಟೆಯನ್ನು ಇನ್ಯಾರೋ ಹೊಸತನ್ನಾಗಿ ಧರಿಸಬಹುದು. ಆ ಮೂಲಕ ನಿಮ್ಮ ವಾರ್ಡ್‌ರೋಬ್‌ ಅನ್ನು ಡೀಕ್ಲೆಟರ್‌ ಮಾಡಿದಂತಾಗುತ್ತದೆ.
ಮಾರಾಟ ಮಾಡುವುದು
ಹಳೆಯ ಬಟ್ಟೆಗಳನ್ನು ಮರುಬಳಕೆ ಮಾಡುವ ಇನ್ನೊಂದು ವಿಧಾನವೆಂದರೆ ಅವುಗಳನ್ನು ಆನ್‌ಲೈನ್ ಅಥವಾ ಆಫ್‌ಲೈನ್‌ನಲ್ಲಿ ಮಾರಾಟ ಮಾಡುವುದು. ನಿಮ್ಮ ಬಟ್ಟೆಗಳನ್ನು ಮರುಮಾರಾಟ ಮಾಡಲು ಮತ್ತು ಕೆಲವು ಹೆಚ್ಚುವರಿ ನಗದು ಅಥವಾ ಕ್ರೆಡಿಟ್ ಗಳಿಸಲು ನಿಮಗೆ ಅನುಮತಿಸುವ ಅನೇಕ ವೇದಿಕೆಗಳಿವೆ. eBay, Etsy, ಅಥವಾ Facebook ಮಾರುಕಟ್ಟೆಯಂತಹ ವೆಬ್‌ಸೈಟ್‌ಗಳನ್ನು ಅಥವಾ Poshmark, Depop, ಅಥವಾ ThredUp ನಂತಹ ಅಪ್ಲಿಕೇಶನ್‌ಗಳನ್ನು ಬಳಸಬಹುದು. ಇದರಿಂದ ಹಳೆಯ ಬಟ್ಟೆಯನ್ನು ಸುದುಪಯೋಗ ಮಾಡಿಕೊಂಡ ಹಾಗೂ ಆಗುತ್ತದೆ, ಸ್ವಲ್ಪ ಹಣ ಗಳಿಸಲು ನೆರವಾಗುತ್ತದೆ.
ಸೃಜನಾತ್ಮಕ ವಿಧಾನ
ಹಳೆ ಬಟ್ಟೆಯನ್ನ ಸೃಜನಾತ್ಮಕ ವಿಧಾನದಲ್ಲಿ ಧರಿಸುವ ಮೂಲಕವು ಮರುಬಳಕೆ ಮಾಡಿಕೊಳ್ಳಬಹುದು. ಅಪ್ಸೈಕ್ಲಿಂಗ್ ಎನ್ನುವುದು ತ್ಯಾಜ್ಯ ವಸ್ತುಗಳನ್ನು ಹೆಚ್ಚಿನ ಮೌಲ್ಯ ಅಥವಾ ಗುಣಮಟ್ಟದ ಹೊಸ ಉತ್ಪನ್ನಗಳಾಗಿ ಪರಿವರ್ತಿಸುವ ಪ್ರಕ್ರಿಯೆಯಾಗಿದೆ. ನಿಮ್ಮ ಹಳೆಯ ಬಟ್ಟೆಗಳಿಗೆ ಹೊಸ ನೋಟವನ್ನು ನೀಡಲು ಕಸೂತಿ, ಪ್ಯಾಚ್‌ವರ್ಕ್, ಟೈ-ಡೈ ಅಥವಾ ಅಪ್ಲಿಕ್‌ನಂತಹ ತಂತ್ರಗಳನ್ನು ನೀವು ಬಳಸಬಹುದು. ಅನನ್ಯ ವಿನ್ಯಾಸಗಳನ್ನು ರಚಿಸಲು ನೀವು ವಿಭಿನ್ನ ಬಟ್ಟೆಗಳು, ಬಣ್ಣಗಳು ಮತ್ತು ಮಾದರಿಗಳನ್ನು ಮಿಶ್ರಣ ಮಾಡಬಹುದು. ಇದರಿಂದ ನಿಮ್ಮ ಹಳೆ ಬಟ್ಟೆಯನ್ನು ಹೊಸತನ್ನಾಗಿ ರೂಪಿಸಬಹುದು.
ಸ್ನೇಹಿತರು, ಸಂಬಂಧಿಕರೊಂದಿಗೆ ಹಂಚಿಕೊಳ್ಳಿ
ಹಳೆ ಬಟ್ಟೆಯನ್ನು ಮರುಬಳಕೆ ಮಾಡಲು ಸಾಮಾಜಿಕ ಮತ್ತು ಆರ್ಥಿಕ ಮಾರ್ಗವೆಂದರೆ ಅವುಗಳನ್ನು ನಿಮ್ಮ ಸ್ನೇಹಿತರು ಅಥವಾ ಕುಟುಂಬದೊಂದಿಗೆ ವಿನಿಮಯ ಮಾಡಿಕೊಳ್ಳುವುದು. ಇದು ಯಾವುದೇ ಹಣ ಖರ್ಚಿಲ್ಲದೇ ಬೇರೆಯವರೊಂದಿಗೆ ಬಟ್ಟೆ ವಿನಿಮಯ ಮಾಡಿಕೊಳ್ಳುವ ವಿಧಾನವಾಗಿದೆ. ನಿಮ್ಮ ಸ್ನೇಹಿತರು ಅಥವಾ ಕುಟುಂಬದೊಂದಿಗೆ ನೀವು ಸ್ವಾಪಿಂಗ್ ಪಾರ್ಟಿಯನ್ನು ಆಯೋಜಿಸಬಹುದು, ಅಲ್ಲಿ ಎಲ್ಲರೂ ತಮ್ಮ ಹಳೆ ಬಟ್ಟೆ ತರಬೇಕು. ನಂತರ ನೀವು ವಿನಿಮಯ ಮಾಡಿಕೊಳ್ಳಬಹುದು. ನೀವು ಆನ್‌ಲೈನ್ ಅಥವಾ ಆಫ್‌ಲೈನ್ ಸ್ವ್ಯಾಪಿಂಗ್ ಸಮುದಾಯಗಳಿಗೆ ಸೇರಬಹುದು, ಅಲ್ಲಿ ನಿಮ್ಮಂತೆಯೇ ಅಭಿರುಚಿ ಮತ್ತು ಗಾತ್ರಗಳನ್ನು ಹೊಂದಿರುವ ಜನರನ್ನು ನೀವು ಕಾಣಬಹುದು. ಈ ವಿಧಾನದ ಮೂಲಕವು ಹಳೆಯ ಬಟ್ಟೆಗಳನ್ನು ಹೊಸತಾಗಿ ಪರಿವರ್ತನೆ ಮಾಡಬಹುದು.
ಕರಕುಶಲ ವಸ್ತುಗಳನ್ನಾಗಿಸಿ
ಹಳೆಯ ಬಟ್ಟೆಯನ್ನು ಎಸೆಯುವ ಬದಲು ಅದರಿಂದ ಮನೆಗೆ ಬೇಕಾಗುವ ಕರಕುಶಲ ವಸ್ತುಗಳನ್ನು ತಯಾರಿಸಬಹುದು. ಹಳೆಯ ಬಟ್ಟೆಗಳನ್ನು ಅಲಂಕೃತವಾದ ಕುಶನ್ ಕವರ್‌ಗಳು, ರಗ್ಗುಗಳು ಅಥವಾ ಕರ್ಟನ್‌ಗಳಾಗಿ ಪರಿವರ್ತಿಸಬಹುದು. ನಿಮ್ಮ ಎಥ್ನಿಕ್‌ ವೇರ್‌ಗಳಿಂದ ಸುಂದರ ಕಲಾಕೃತಿಗಳನ್ನೂ ತಯಾರಿಸಬಹುದು.
ವಿಭಾಗ