ಬಾಯಲ್ಲಿ ನೀರೂರಿಸುವ ರವೆ ಲಾಡು ತಯಾರಿಸುವುದು ತುಂಬಾನೇ ಸಿಂಪಲ್: ಅರ್ಧ ಗಂಟೆಯಲ್ಲಿ ಸಿದ್ಧವಾಗುವ ಈ ಸಿಹಿಖಾದ್ಯ ಮಾಡುವುದು ಹೀಗೆ

ರವೆ ಲಾಡು ಎಂದರೆ ಮಕ್ಕಳಿಗೆ ಮಾತ್ರವಲ್ಲ ದೊಡ್ಡವರಿಗೂ ತುಂಬಾನೇ ಇಷ್ಟ. ಇನ್ನೇನು ದೀಪಾವಳಿ ಹಬ್ಬವಂತು ಸಮೀಪದಲ್ಲಿದೆ. ಏನಾದರೂ ಸಿಹಿ-ತಿಂಡಿ ತಯಾರಿಸಬೇಕು ಅನ್ನೋ ಯೋಚನೆಯಲ್ಲಿದ್ದರೆ ರವೆ ಲಾಡೂ ಅನ್ನು ತಯಾರಿಸಬಹುದು. ಬಹಳ ಬೇಗೆನೆ, ಕೆಲವೇ ನಿಮಿಷಗಳಲ್ಲಿ ರುಚಿಕರವಾದ ರವೆ ಲಾಡುಗಳು ತಯಾರಾಗುತ್ತವೆ. ರವೆ ಲಾಡುವಿನ ರುಚಿ ಹೇಗಿದೆ ಎಂದರೆ ಒಮ್ಮೆ ಸವಿದರೆ ಮತ್ತೆ ಮತ್ತೆ ಬೇಕೆಂದೆನಿಸುತ್ತದೆ. ಇದನ್ನು ಮಾಡುವುದು ಹೇಗೆ ಎಂಬ ಬಗ್ಗೆ ಇಲ್ಲಿ ತಿಳಿದುಕೊಳ್ಳಿ.

ರವೆ ಲಾಡೂ ಮಾಡುವ ವಿಧಾನ ಇಲ್ಲಿದೆ

ಬೇಕಾಗುವ ಸಾಮಗ್ರಿಗಳು: ಸೂಜಿ ಅಥವಾ ಉಪ್ಮಾ ರವಾ- 1 ಕಪ್, ಸಕ್ಕರೆ- 1 ಕಪ್, ತುರಿದ ತೆಂಗಿನಕಾಯಿ- 1/2 ಕಪ್, ಬೆಚ್ಚಗಿನ ಹಾಲು- 1 ಕಪ್, ಗೋಡಂಬಿ- 1 ಟೀ ಚಮಚ, ಬಾದಾಮಿ- 1 ಟೀ ಚಮಚ, ಒಣದ್ರಾಕ್ಷಿ - 1 ಟೀ ಚಮಚ, ಏಲಕ್ಕಿ ಪುಡಿ- 1/4 ಟೀ ಚಮಚ, ತುಪ್ಪ- 6 ಟೀ ಚಮಚ.

ಮಾಡುವ ವಿಧಾನ: ಸ್ಟೌವ್ ಆನ್ ಮಾಡಿ ಬಾಣಲೆಗೆ ಎರಡು ಚಮಚ ತುಪ್ಪ ಹಾಕಿ, ತುಪ್ಪ ಬಿಸಿಯಾದ ನಂತರ ತುರಿದ ಹಸಿ ತೆಂಗಿನಕಾಯಿಯನ್ನು ಸೇರಿಸಿ. ಹಸಿ ತೆಂಗಿನಕಾಯಿ ಅಥವಾ ತುರಿದ ಕೊಬ್ಬರಿಯನ್ನು ಸಹ ಬಳಸಬಹುದು. ಕೊಬ್ಬರಿಯನ್ನು ಕಡಿಮೆ ಉರಿಯಲ್ಲಿ ಸ್ವಲ್ಪ ಹೊತ್ತು ಹುರಿಯಿರಿ. ಅದು ಗೋಲ್ಡನ್ ಕಲರ್ ಆದ ನಂತರ ಕಡಾಯಿಯನ್ನು ಕೆಳಗಿಳಿಸಿ. ತೆಂಗಿನಕಾಯಿಯನ್ನು ಒಂದು ಬಟ್ಟಲಿನಲ್ಲಿ ತೆಗೆದುಕೊಂಡು ಪಕ್ಕಕ್ಕೆ ಇಡಿ.

ಇದನ್ನೂ ಓದಿ: ಸಿಹಿತಿಂಡಿಯ ತಿನ್ನುವ ಬಯಕೆಯಾ: ಹಾಗಿದ್ದರೆ ಈ ರಾಗಿ ಲಾಡು ರೆಸಿಪಿ ಟ್ರೈ ಮಾಡಿ ನೋಡಿ, ಮತ್ತೆ ಮತ್ತೆ ತಿನ್ನುವಿರಿ

ನಂತರ ಬಾಣಲೆಯನ್ನು ಮತ್ತೆ ಗ್ಯಾಸ್ ಮೇಲೆ ಇಟ್ಟು ಒಂದು ಚಮಚ ತುಪ್ಪವನ್ನು ಸೇರಿಸಿ. ತುಪ್ಪ ಬಿಸಿಯಾದ ನಂತರ ಬಾದಾಮಿ ಮತ್ತು ಗೋಡಂಬಿ ಹಾಕಿ ಫ್ರೈ ಮಾಡಿ. ಅವು ಸ್ವಲ್ಪ ಬಣ್ಣವನ್ನು ಬದಲಾಯಿಸಿದ ನಂತರ, ಒಣದ್ರಾಕ್ಷಿ ಸೇರಿಸಿ, ಅದನ್ನು ಫ್ರೈ ಮಾಡಿ. ಬಾದಾಮಿ, ಗೋಡಂಬಿ ಮತ್ತು ಒಣದ್ರಾಕ್ಷಿ ಗೋಲ್ಡನ್ ಬ್ರೌನ್‌ಗೆ ತಿರುಗಿದ ನಂತರ, ಅವುಗಳನ್ನು ಒಂದು ಪಾತ್ರೆಯಲ್ಲಿ ತೆಗೆದುಕೊಂಡು ಪಕ್ಕಕ್ಕೆ ಇರಿಸಿ.

ಮತ್ತೆ ಬಾಣಲೆಯನ್ನಿಟ್ಟು ಎರಡು ಚಮಚ ತುಪ್ಪವನ್ನು ಸೇರಿಸಿ. ಕಡಿಮೆ ಉರಿಯಲ್ಲಿ ತುಪ್ಪವನ್ನು ಬಿಸಿ ಮಾಡಿದ ನಂತರ, ಸೂಜಿ ಅಥವಾ ಉಪ್ಮಾ ರವೆಯನ್ನು ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ರವೆ ಕಂದು ಬಣ್ಣ ಬರುವವರೆಗೆ ಹುರಿಯಿರಿ. ಹೀಗೆ ಹುರಿಯುವಾಗ ರವೆಯಿಂದಲೂ ಪರಿಮಳ ಬರುತ್ತದೆ. ನಂತರ ಆ ರವೆಯನ್ನು ಒಂದು ಪಾತ್ರೆಯಲ್ಲಿ ತೆಗೆದುಕೊಂಡು ಪಕ್ಕಕ್ಕೆ ಇಡಿ.

ನಂತರ, ರವೆಯನ್ನು ಪಾತ್ರೆಯಲ್ಲಿ ತೆಗೆದುಕೊಂಡು ಅದಕ್ಕೆ ಹುರಿದ ಹಸಿ ತೆಂಗಿನಕಾಯಿ ಅಥವಾ ಕೊಬ್ಬರಿಯನ್ನು ಸೇರಿಸಿ, ಮಿಶ್ರಣ ಮಾಡಿ. ಚೆನ್ನಾಗಿ ಮಿಶ್ರಣ ಮಾಡಿದ ನಂತರ, 10 ನಿಮಿಷಗಳ ಕಾಲ ಇರಿಸಿ. ಇದನ್ನು 10 ನಿಮಿಷಗಳ ಕಾಲ ಹಾಗೆಯೇ ಇಡುವುದರಿಂದ ತೆಂಗಿನಕಾಯಿಯಲ್ಲಿರುವ ಎಲ್ಲಾ ಸುವಾಸನೆಯು ಹೀರಲ್ಪಡುತ್ತದೆ. ಈ ವೇಳೆ ಒಂದು ಕಪ್ ಸಕ್ಕರೆಯನ್ನು (ರವೆ ತೆಗೆದುಕೊಂಡ ಅದೇ ಕಪ್‍ನಲ್ಲಿ) ತೆಗೆದುಕೊಂಡು ಅದನ್ನು ಮಿಕ್ಸಿ ಜಾರಿಗೆ ಹಾಕಿ ಪುಡಿ ಮಾಡಿ. ಬಳಿಕ ಬಟ್ಟಲಿನಲ್ಲಿ ರವೆ ಹಾಕಿ ಅದಕ್ಕೆ ಪುಡಿ ಮಾಡಿದ ಸಕ್ಕರೆ ಸೇರಿಸಿ. ನಂತರ ಬಾದಾಮಿ, ಗೋಡಂಬಿ ಮತ್ತು ಒಣದ್ರಾಕ್ಷಿಗಳ ಮಿಶ್ರಣವನ್ನು ಹಾಕಿ ಮಿಕ್ಸ್ ಮಾಡಿ. ಜೊತೆಗೆ ಏಲಕ್ಕಿ ಪುಡಿ ಹಾಕಿ ಚೆನ್ನಾಗಿ ಕಲಸಿ. ರವೆಯೊಂದಿಗೆ ಎಲ್ಲಾ ಪದಾರ್ಥಗಳು ಚೆನ್ನಾಗಿ ಮಿಶ್ರಣವಾಗಿದೆ ಎಂದು ಖಚಿತವಾದ ನಂತರ, ಎರಡು ಚಮಚ ಬೆಚ್ಚಗಿನ ಹಾಲನ್ನು ಸೇರಿಸಿ ಮಿಶ್ರಣ ಮಾಡಿ. ಹಾಲನ್ನು ನಿಧಾನವಾಗಿ ಹಾಕಬೇಕು. ಅದು ಪೇಸ್ಟ್ ಆಗುವವರೆಗೆ ತುಪ್ಪವನ್ನು ಮಿಶ್ರಣ ಮಾಡಿ. ಅಂಗೈಗೆ ತುಪ್ಪವನ್ನು ಹಚ್ಚಿ ರವೆ ಉಂಡೆಯನ್ನು ಕಟ್ಟಿಕೊಂಡರೆ ರುಚಿಕರವಾದ ರವೆ ಉಂಡೆ ಸವಿಯಲು ಸಿದ್ಧ.

ಇದನ್ನೂ ಓದಿ: ಅಂಗಡಿಯಲ್ಲಿ ಸಿಗುವಂತೆ ಅದೇ ರುಚಿಯ ಬೇಸನ್ ಲಾಡು ಮನೆಯಲ್ಲೇ ಹೇಗೆ ಮಾಡೋದು ಅಂತ ನೋಡ್ತಿದ್ದೀರಾ, ನಿಮಗಾಗಿ ಇಲ್ಲಿದೆ ಲಡ್ಡು ಮಾಡುವ ಸಿಂಪಲ್ ವಿಧಾನ