Tomato Soup: ರೆಸ್ಟೋರೆಂಟ್ ಶೈಲಿಯಲ್ಲಿ ಟೊಮೆಟೊ ಸೂಪ್ ಮಾಡುವ ಸುಲಭ ವಿಧಾನ ಇಲ್ಲಿದೆ; ಇದರ ಆರೋಗ್ಯ ಪ್ರಯೋಜನಗಳೂ ಹೀಗಿವೆ
Tomato Soup Recipe in Kannada: ಹತ್ತಾರು ಆರೋಗ್ಯ ಪ್ರಯೋಜನಗಳನ್ನು ಹೊಂದಿರುವ ರುಚಿಕರ ಟೊಮೆಟೊ ಸೂಪ್ ಅನ್ನು ರೆಸ್ಟೋರೆಂಟ್ ಶೈಲಿಯಲ್ಲಿ ಹೇಗೆ ಮಾಡೋದು ನೋಡೋಣ ಬನ್ನಿ.
ಟೊಮೆಟೊ ಸೂಪ್ ಕುಡಿಯುವುದರಿಂದ ರೋಗನಿರೋಧಕ ಶಕ್ತಿ ಹೆಚ್ಚುತ್ತದೆ. ಕೂದಲು ಬೆಳವಣಿಗೆಯನ್ನು ಉತ್ತೇಜಿಸುತ್ತದೆ. ಪುರುಷರಲ್ಲಿ ಫಲವತ್ತತೆಯನ್ನು ಹೆಚ್ಚಿಸುತ್ತದೆ. ಕೊಬ್ಬನ್ನು ಕಡಿಮೆ ಮಾಡುತ್ತದೆ. ಹೃದ್ರೋಗದ ಅಪಾಯವನ್ನು ಕಡಿಮೆ ಮಾಡುತ್ತದೆ. ಚರ್ಮದ ಆರೋಗ್ಯವನ್ನು ಕಾಪಾಡುತ್ತದೆ. ಮಧುಮೇಹವನ್ನು ನಿಯಂತ್ರಿಸುತ್ತದೆ. ಕ್ಯಾನ್ಸರ್ ಅಪಾಯವನ್ನು ಕಡಿಮೆ ಮಾಡುತ್ತದೆ ಹಾಗೂ ಮೂಳೆಯನ್ನು ಬಲವಾಗಿರಿಸುತ್ತದೆ. ಇಷ್ಟೆಲ್ಲ ಆರೋಗ್ಯ ಪ್ರಯೋಜನಗಳನ್ನು ಹೊಂದಿರುವ ರುಚಿಕರ ಟೊಮೆಟೊ ಸೂಪ್ ಅನ್ನು ರೆಸ್ಟೋರೆಂಟ್ ಶೈಲಿಯಲ್ಲಿ ಹೇಗೆ ಮಾಡೋದು ನೋಡೋಣ ಬನ್ನಿ.
ಟೊಮೆಟೊ ಸೂಪ್ ಮಾಡಲು ಬೇಕಾಗುವ ಪದಾರ್ಥಗಳು
ಸಿಹಿ ಟೊಮೆಟೊ
ಬೆಣ್ಣೆ
ಬೆಳ್ಳುಳ್ಳಿ
ಪಲಾವ್ ಎಲೆ
ಕಾಳು ಮೆಣಸು
ಈರುಳ್ಳಿ
ಪೀಸ್ ಬ್ರೆಡ್
ಕ್ಯಾರೆಟ್
ಬೀಟ್ರೂಟ್
ಸಕ್ಕರೆ
ಉಪ್ಪು
ನೀರು
ಟೊಮೆಟೊ ಸೂಪ್ ಮಾಡುವ ವಿಧಾನ
ಸ್ಟವ್ ಮೇಲೆ ಪ್ಯಾನ್ ಇಟ್ಟು 2 ಟೇಬಲ್ ಸ್ಪೂನ್ ಬೆಣ್ಣೆಯನ್ನು ಹಾಕಿ. ಬೆಣ್ಣೆ ಕರಗಿದ ನಂತರ ಸಣ್ಣಗೆ ಕತ್ತಿರಿಸ 4 ಬೆಳ್ಳುಳ್ಳಿ ಎಸಳನ್ನು ಹಾಕಿ. ಅರ್ಧ ಪಲಾವ್ ಎಲೆ, ಕಾಲು ಟೀ ಸ್ಪೂನ್ ಕಾಳು ಮೆಣಸು, ಸಣ್ಣದಾಗಿ ಕತ್ತರಿಸಿದ ಅರ್ಧ ಈರುಳ್ಳಿ ಹಾಕಿ. ಮೀಡಿಯಂ ಉರಿಯಲ್ಲಿ ಸ್ಟವ್ ಇಟ್ಟುಕೊಂಡು ಈರುಳ್ಳಿ ಸ್ವಲ್ಪ ಕಂದು ಬಣ್ಣಕ್ಕೆ ತಿರುಗುವ ವರೆಗೆ ಹುರಿದುಕೊಳ್ಳಿ.
ನಂತರ ಇದಕ್ಕೆ ಸಣ್ಣಗೆ ತುರಿದ ಅರ್ಧ ಕ್ಯಾರೆಟ್ ಹಾಕಿ, ಸಣ್ಣಗೆ ತುರಿದ ಕಾಲು ಭಾಗ ಬೀಟ್ರೂಟ್ ಹಾಕಿ.. ಬೀಟ್ರೂಟ್ ಹಾಕುವುದರಿಂದ ಟೊಮೆಟೋ ಸೂಪ್ಗೆ ನೈಸರ್ಗಿಕ ಬಣ್ಣದ ಜೊತೆ ಒಳ್ಳೆಯ ಸುವಾಸನೆ ಕೂಡ ಬರತ್ತೆ. ಇದನ್ನ 2 ನಿಮಿಷ ಚೆನ್ನಾಗಿ ಫ್ರೈ ಮಾಡಿ ಆದ ಮೇಲೆ ಕತ್ತರಿಸಿದ 4-5 ಸಿಹಿ ಟೊಮೆಟೊ ಹಾಕಿ, ಒಂದು ಟೀ ಸ್ಪೂನ್ ಸಕ್ಕರೆ ಹಾಗೂ ರುಚಿಗೆ ತಕ್ಕಷ್ಟು ಉಪ್ಪು ಹಾಕಿ ಚೆನ್ನಾಗಿ ಮಿಕ್ಸ್ ಮಾಡಿ. 2 ಕಪ್ ನೀರು ಹಾಕಿ ಮುಚ್ಚಿಡಿ.
ಟೊಮೆಟೊ ಚೆನ್ನಾಗಿ ಮೆತ್ತಗೆ ಆಗುವವರೆಗೆ ಕುದಿಸಿ. ಮೆತ್ತಗೆ ಆಗುವಷ್ಟು ಟೊಮೆಟೊ ಬಂದಮೇಲೆ ಅದನ್ನು ಮುಚ್ಚಿ ಸ್ಟವ್ನಿಂದ ಇಳಿಸಿ ತಣ್ಣಗಾಗಲು ಬಿಡಿ.
ಈಗ ಒಂದು ಹೆಂಚಿನ ಮೇಲೆ ಒಂದು ಟೀ ಸ್ಪೂನ್ ಬೆಣ್ಣೆ ಹಾಕಿ ಕರಗಲು ಬಿಡಿ. ಅದಕ್ಕೆ 4 ಬದಿ ಕತ್ತರಿಸಿದ 2 ಪೀಸ್ ಬ್ರೆಡ್ ಹಾಕಿ ರೋಸ್ಟ್ ಮಾಡಿಕೊಳ್ಳಿ. ಇದಕ್ಕೆ ಹೆಂಚಿನ ಮೇಲೆ ಹಾಗೆಯೇ ಇರಲು ಬಿಡಿ. ಸೂಪ್ಗೆ ಬ್ರೆಡ್ ಅನ್ನು ಸೇರಿಸಲೇ ಬೇಕು ಎಂದೇನಿಲ್ಲ. ನಿಮಗೆ ಬೇಡವಾದಲ್ಲಿ ಅದನ್ನು ಸ್ಕಿಪ್ ಮಾಡಬಹುದು.
ಈಗ ಟೊಮೆಟೊ ಮಿಶ್ರಣ ತಣ್ಣಗಾಗಿದೆಯಾ ಚೆಕ್ ಮಾಡಿಕೊಂಡು ತಣ್ಣಗಾಗಿದ್ದರೆ ಅದನ್ನು ಒಂದು ಮಿಕ್ಸ್ ಜಾರ್ಗೆ ಸುರಿದುಕೊಂಡು ನುಣ್ಣಗೆ ರುಬ್ಬಿ. ಇದನ್ನ ಪ್ಯಾನ್ಗೆ ಸೋಸಿಕೊಳ್ಳಿ. ಆಗ ಇದರಲ್ಲಿರುವ ಟೊಮೆಟೊ ಸಿಪ್ಪೆ, ಬೀಜ ತೆಗೆದಂತಾಗುತ್ತದೆ.
ಈಗ ಸ್ಟವ್ ಆನ್ ಮಾಡಿ ಟೊಮೆಟೊ ಮಿಶ್ರಣವಿರುವ ಪ್ಯಾನ್ ಅನ್ನು ಇಡಿ. ಇದಕ್ಕೆ ಸ್ವಲ್ಪ ಕಾಳುಮೆಣಸಿನ ಪುಡಿ ಹಾಕಿಕೊಳ್ಳಿ. ಉಪ್ಪು ಕಮ್ಮಿ ಆಗಿದ್ದರೆ ಉಪ್ಪು ಹಾಕಿ ಕುದಿಸಿ. ಇದು ತುಂಬಾ ತೆಳುವಾಗಿಯೂ ಇರಬಾರದು ದಪ್ಪನೂ ಇರಬಾರದು. ಈಗ ಸ್ಟವ್ ಆಫ್ ಮಾಡಿ. ಈಗ ಕ್ರಿಸ್ಪಿಯಾಗಿ ಗಟ್ಟಿಯಾಗಿರುವ ಬ್ರೆಡ್ ಅನ್ನು ತುಂಡರಿಸಿ ಅದರೊಳಗೆ ಹಾಕಿ. ಕೊನೆಯಲ್ಲಿ ಅದರ ಮೇಲೆ ಬೇಕಾದರೆ ಪುದೀನ ಎಲೆ ಅಥವಾ ಕೊತ್ತಂಬರಿ ಸೊಪ್ಪನ್ನು ಹಾಕಿ. ಈಗ ಟೊಮೆಟೊ ಸೂಪ್ ಸವಿಯಲು ರೆಡಿ.
