ಕನ್ನಡ ಸುದ್ದಿ  /  Lifestyle  /  Forest News Still Man Eater Tigers Are There In Karnataka Forest Area Who Will Decide Tigers Are Man Eater Kub

forest Tales: ಈಗಲೂ ಕರ್ನಾಟಕದ ಅರಣ್ಯದಲ್ಲಿ ನರಭಕ್ಷಕ ಹುಲಿಗಳು ಉಂಟೇ, ನರಭಕ್ಷಕ ಎಂದು ಘೋಷಿಸುವವರು ಯಾರು

Man eater tiger ಹುಲಿಗಳ ಮನುಷ್ಯನ ಮೇಲೆ ದಾಳಿ ಮಾಡಿದಾಗ ನರಭಕ್ಷಕ ಇಲ್ಲವೇ ನರಹಂತಕ ಎನ್ನುವ ಪಟ್ಟ ನೀಡಲಾಗುತ್ತದೆ. ಈಗಲೂ ನಮ್ಮಲ್ಲಿ ನರಭಕ್ಷಕ ಹುಲಿಗಳು ಇವೆಯೇ, ಯಾರು ಇದನ್ನು ಘೋಷಿಸುತ್ತಾರೆ, ಭಾರತದಲ್ಲಿನ ಕೆಲವು ಘಟನಾವಳಿಗಳ ಕುರಿತು ಈ ವಾರದ ಕಾಡಿನ ಕಥೆಗಳಲ್ಲಿ…

ಹುಲಿಯನ್ನು ನರಭಕ್ಷಕ ಎಂದು ಕರೆಯುವ ಕುರಿತು ಚರ್ಚೆಗಳು ನಿರಂತರವಾಗಿ ನಡೆದಿವೆ.
ಹುಲಿಯನ್ನು ನರಭಕ್ಷಕ ಎಂದು ಕರೆಯುವ ಕುರಿತು ಚರ್ಚೆಗಳು ನಿರಂತರವಾಗಿ ನಡೆದಿವೆ.

ಹುಲಿಗಳು ನರಹಂತಕವೇ. ನರಭಕ್ಷಕವೇ..

ಈ ಪ್ರಶ್ನೆಯನ್ನೇನಾದರೂ ಅಪ್ರತಿಮ ಬೇಟೆಗಾರ ಹಾಗೂ ಕಥೆಗಾರ ಜಿಮ್‌ ಕಾರ್ಬೆಟ್‌ ಅವರನ್ನು ಕೇಳಿದರೆ ಹೌದು ಎಂದು ಬಿಡುತ್ತಾರೆ. ಅದಕ್ಕೆ ಅವರು ಟೆಂಪಲ್ ಟೈಗರ್ ಅಂಡ್ ಮೋರ್ ಮ್ಯಾನ್-ಈಟರ್ಸ್ ಆಫ್ ಕುಮಾನ್ ಎಂಬ ಪುಸ್ತಕದಲ್ಲಿ ಜಿಮ್‌ ಕಾರ್ಬೆಟ್‌ ಎರಡು ಹುಲಿಗಳು ನರಭಕ್ಷಕವಾಗಿದ್ದರ ರೋಚಕ ಕಥನವನ್ನು ತೆರೆದಿಡುತ್ತಾರೆ. ಈಗಿನ ಉತ್ತರಾಖಂಡದಲ್ಲಿ 30ರ ದಶಕದಲ್ಲಿ ಜಿಮ್‌ ಕಾರ್ಬೆಟ್‌ ತೆರೆದಿಟ್ಟ ಚಂಪಾವತ್ ಹುಲಿ, ಚುಕಾ ನರಭಕ್ಷಕ ಹುಲಿ, ಥಕ್ ನರಭಕ್ಷಕ, ಸೇಗೂರಿನ ಹುಲಿ, ಶಿಮ್ಲಾದ ಹುಲಿ, ಮುಂಡಚಿಪಳ್ಳದ ಹುಲಿ, ಚೌಗಢದ ಹುಲಿಗಳು, ಜೋಳಗಿರಿಯ ಹುಲಿ ಕಥಾನಕಗಳು ಒಂದಕ್ಕಿಂತ ಒಂದು ರೋಚಕ.

ಇದೇ ಪ್ರಶ್ನೆಯನ್ನು ಅರಣ್ಯ ಇಲಾಖೆಗೆ ಕೇಳಿದರೆ ಹುಲಿಯಿದ್ದರೆ ಕಾಡು, ಕಾಡಿದ್ದರೆ ನಾಡು. ಅದು ಬೇಟೆಯಾಡುವ ಸನ್ನಿವೇಶ, ಹುಲಿ ದೈಹಿಕ ಸ್ಥಿತಿಗತಿ ನೋಡಿಕೊಂಡು ಹೇಳಬೇಕಾಗುತ್ತದೆ ಎನ್ನುತ್ತಾರೆ. ಕಾಡಂಚಿನ ಜನರನ್ನು ಕೇಳಿದರೆ ಅವರಿಗೆ ಕಾಡ ಮೇಲೂ ಅಭಿಮಾನ, ಹುಲಿ ಮೇಲೂ ಪ್ರೀತಿ ಎನ್ನುವ ಸನ್ನಿವೇಶ. ಏನಾದರೂ ತೊಂದರೆಯಾದಾಗ ಮಾತ್ರ ಅವರ ಸಿಟ್ಟು ಹುಲಿ ಮೇಲೆ. ಇಲ್ಲದೇ ಇದ್ದರೆ ಹುಲಿ ಮೇಲಿನ ಸವಾರಿಯಂತಹ ಬದುಕಿನ ನಡುವೆ ಹುಲಿಯನ್ನೂ ಬಿಟ್ಟುಕೊಡುವುದಿಲ್ಲ.

ಹತ್ತಾರು ಕಡೆ ನರಭಕ್ಷಕ ಪಟ್ಟ

  • ಸರಿಯಾಗಿ ಐದು ವರ್ಷದ ಹಿಂದೆ ಇದೇ ನವೆಂಬರ್‌ನಲ್ಲಿ ಮಹಾರಾಷ್ಟ್ರದ ಯಾವತ್ಮಲ್‌ ಜಿಲ್ಲೆಯ ಪಂಧರ್‌ಕಾವಡ ಅರಣ್ಯ ಪ್ರದೇಶದಿಂದ ಹೊರ ಬಂದು ಜನರ ಮೇಲೆ ದಾಳಿ ಮಾಡುತ್ತಲೇ ಇದ್ದ ಹೆಣ್ಣು ಹುಲಿ ಅವನಿ ಕೊನೆಗೆ ನರಭಕ್ಷಕವಾಗಿ ಪರಿವರ್ತನೆಗೊಂಡಿತ್ತು. ತನ್ನ ಮರಿಗಳನ್ನು ರಕ್ಷಿಸಲು ಅನಿವಾರ್ಯವಾಗಿ ಸುಲಭದ ಬೇಟೆಯಾದ ಮನುಷ್ಯನನ್ನು ಅವನಿ ಹಿಡಿಯ ತೊಡಗಿತ್ತು. ಅದು ಬರೋಬ್ಬರಿ 14 ಮಂದಿಯನ್ನುಕೊಂದಿತ್ತು. ಅದರಲ್ಲಿ ಕೆಲವರ ದೇಹದ ಭಾಗಗಳನ್ನೂ ತಿಂದು ಹಾಕಿತ್ತು. ಹುಲಿ ಕೊಂದು ಹಾಕಿ ಎಂದು ಸ್ಥಳೀಯರ ಆಕ್ರೋಶ ಜೋರಾಗಿಯೇ ಇತ್ತು. ಸುಪ್ರೀಂಕೋರ್ಟ್ ಹುಲಿ ಕೊಲ್ಲಲು ಅನುಮತಿ ಕೊಟ್ಟಿತ್ತು. ಮಹಾರಾಷ್ಟ್ರ ಅರಣ್ಯ ಇಲಾಖೆ ಹುಲಿಯನ್ನು ನರಭಕ್ಷಕ ಎಂದು ಘೋಷಿಸಿ ಸೆರೆ ಹಿಡಿಯಲು ಇಲ್ಲವೇ ಗುಂಡಿಕ್ಕಿ ಕೊಲ್ಲಲು ಆದೇಶಿಸಿತು. ಕೊನೆಗೆ ಹುಲಿ ಸೆರೆಗೆ ಎಲ್ಲ ಪ್ರಯತ್ನಗಳು ನಡೆದು ಅವನಿಗೆ ಅರವಳಿಕೆಯನ್ನೂ ನೀಡಲಾಗಿತ್ತು. ಅದರ ಬೆನ್ನಲ್ಲೇ ಗುಂಡಿಕ್ಕಿ ಕೊಲ್ಲಲಾಗಿತ್ತು. ಹುಲಿ ಜೀವ ಬಿಟ್ಟರೆ ಮರಿಗಳು ಅನಾಥವಾಗಿದ್ದವು. ಕೊನೆಗೆ ಅರಣ್ಯ ಇಲಾಖೆಯೇ ಮರಿಗಳ ಪಾಲನೆ ಉಸ್ತುವಾರಿ ಹೊತ್ತಿತ್ತು. ಅವನಿ ಮರಿಗಳು ಎರಡು ವರ್ಷದ ಆರೈಕೆ ನಂತರ ಕಾಡು ಸೇರಿದ್ದವು. ಅವನಿ ಸಾವಿನ ಕುರಿತು ತನಿಖೆ ನಡೆದರೂ ಏನೂ ಆಗಲಿಲ್ಲ.
  • ಕೊಡಗಿನ ಕೆ.ಬಾಡಗ ಗ್ರಾಮದ ಚೂರಿಕಾಡು ಎಂಬಲ್ಲಿ ಇದೇ ವರ್ಷದ ಫೆಬ್ರವರಿಯಲ್ಲಿ ಹುಲಿ ಅಬ್ಬರ. ಒಂದೇ ಕುಟುಂಬದ ಇಬ್ಬರನ್ನು ಸಾಯಿಸಿ ತಿಂದು ಹಾಕಿತ್ತು ಹುಲಿ. ಕೊಡಗಿನ ಜನರ ಆಕ್ರೋಶಕ್ಕೆ ಅರಣ್ಯ ಇಲಾಖೆ ಮಣಿದು ಹುಲಿ ಕೊಂದು ಹಾಕಲು ಆದೇಶಿಸಿತ್ತು. ಆದರೆ ಫೆಬ್ರವರಿ14 ರಂದು 2021ನರಭಕ್ಷಕ ಹುಲಿಯನ್ನು ಸೆರೆ ಹಿಡಿಯಲಾಯಿತು. ಇದಕ್ಕೂ ಎರಡು ವರ್ಷದ ಹಿಂದೆಯೂ ಕೊಡಗಿನ ಪೊನ್ನಂಪೇಟೆ ತಾಲೂಕಿನ ಶ್ರೀಮಂಗಲ ಹೋಬಳಿಯಲ್ಲಿ ಅರಣ್ಯ ಇಲಾಖೆ ಸಿಬ್ಬಂದಿ ಕಾರ್ಯಾಚರಣೆ ನಡೆಸಿ 8-9 ವರ್ಷ ವಯಸ್ಸಿನ ನರಭಕ್ಷಕ ಹೆಣ್ಣು ಹುಲಿಯಲ್ಲಿ ಸೆರೆ ಹಿಡಿಯುವಲ್ಲಿ ಯಶಸ್ವಿಯಾಗಿದ್ದರು. ಇದು ಕೂಡ ಇಬ್ಬರನ್ನು ಕೊಂದಿತ್ತು.
  • ಎರಡು ವರ್ಷದ ಹಿಂದಿನ ಅಕ್ಟೋಬರ್‌ ಸಮಯ. ತಮಿಳುನಾಡಿನ ನೀಲಗಿರಿ ಜಿಲ್ಲೆಯಲ್ಲಿ ನರಭಕ್ಷಕ ಹುಲಿಯ ಕಾಟ ಮಿತಿಮೀರಿತ್ತು. ಕೆಲ ದಿನಗಳಿಂದ ನಾಲ್ವರು ವ್ಯಕ್ತಿಗಳನ್ನು ಹುಲಿ ಕೊಂದಿತ್ತು. ಅಲ್ಲದೇ 20 ಜಾನುವಾರುಗಳನ್ನು ತಿಂದು ಹಾಕಿತ್ತು. ತಮಿಳುನಾಡಿನ ಪ್ರಧಾನ ಮುಖ್ಯ ಅರಣ್ಯ ಮತ್ತು ವನ್ಯಜೀವಿ ಸಂರಕ್ಷಣೆಯ ವಾರ್ಡನ್ ಈ ನರಭಕ್ಷಕ ಹುಲಿಯನ್ನುಕೊಲ್ಲಲು ಆದೇಶ ಹೊರಡಿಸಿದ್ದರು, ಅರಣ್ಯ ಇಲಾಖೆಯ ಅಧಿಕಾರಿಗಳು ಸಂಯಮದಿಂದ ಹುಲಿ ಸೆರೆ ಹಿಡಿದಿದ್ದರು.
  • ಇದು ಕಳೆದ ವರ್ಷ ಬಿಹಾರದಲ್ಲಿ ನಡೆದ ಘಟನೆ. ಅಕ್ಟೋಬರ್ 9, 2022ರಂದು ವಾಲ್ಮೀಕಿ ಹುಲಿ ಸಂರಕ್ಷಿತ ಪ್ರದೇಶದ ನರಭಕ್ಷಕ ಹುಲಿ ಗುಂಡಿಕ್ಕಿ ಕೊಲ್ಲಲು ಆದೇಶಿಸಲಾಗಿತ್ತು. ಒಂದು ತಿಂಗಳ ಅವಧಿಯಲ್ಲಿ ಈ ಹುಲಿ 9 ಮಂದಿ ಕೊಂದು ಕೆಲವರನ್ನು ತಿಂದಿತ್ತು. ಕೊನೆಗೆ ಕಾರ್ಯಾಚರಣೆ ನಡೆಸಿ ಹುಲಿ ಸೆರೆ ಸಿಗದ ಕಾರಣ ಕೊಂದು ಹಾಕಲಾಯಿತು.
  • ಕರ್ನಾಟಕದ ಬಂಡೀಪುರ ಪ್ರದೇಶದಲ್ಲಿ ನಾಲ್ಕು ವರ್ಷದ ಹಿಂದೆ(2019) ಫೆಬ್ರವರಿಯಲ್ಲಿ ಹಾಗೂ ನಾಗರಹೊಳೆಯಲ್ಲಿ ಅಕ್ಟೋಬರ್‌ನಲ್ಲಿ ಹುಲಿ ಉಪಟಳ ಮಿತಿ ಮೀರಿತ್ತು. ಗುಂಡ್ಲುಪೇಟೆ ತಾಲ್ಲೂಕಿನ ಶಿವಮಾದಪ್ಪ ಹಾಗೂ ಶಿವಪ್ಪ ಎಂಬಿಬ್ಬರನ್ನು ಹುಲಿ ಕೊಂದು ಒಬ್ಬರ ದೇಹದ ಭಾಗ ತಿಂದು ಹಾಕಿತ್ತು. ಆಗ ಹುಲಿ ಸೆರೆ ಕಾರ್ಯಾಚರಣೆ ತೀವ್ರಗೊಂಡಿತ್ತು. ಅಕ್ಟೋಬರ್‌ 12ರಂದು ಹುಲಿ ಸಿಗದೇ ಇದ್ದಾಗ ಕೊಂದು ಹಾಕಲಾಗಿತ್ತು. ಹೆಚ್.ಡಿ.ಕೋಟೆ ತಾಲೂಕಿನ ನಾಗರಹೊಳೆ ಅಭಯಾರಣ್ಯದ ಮಾನಿಮೂಲೆ ಹಾಡಿಯ ಮಧು ಎಂಬಾತನನ್ನು ಬಲಿ ಪಡೆದಿದ್ದ ವ್ಯಾಘ್ರ, ಹುಲ್ಮಟ್ಟು ಗ್ರಾಮದ ಚಿನ್ನಪ್ಪ, ಹೊಸೂರು ಹಾಡಿಯ ಕೆಂಚ ಅವರನ್ನು ಕೊಂದು ಹಾಕಿತ್ತು.ಕೊನೆಗೆ ಸೇಬಿನಕೊಲ್ಲಿ ಎಂಬಲ್ಲಿ ಹುಲಿ ಸೆರೆ ಸಿಕ್ಕಿತು.
  • ಇದಾದ ನಾಲ್ಕು ವರ್ಷದ ನಂತರ ಮತ್ತೆ ನಾಗಹೊಳೆ ಹಾಗೂ ಬಂಡೀಪುರ ಭಾಗದಲ್ಲಿ ಈಗ ಹುಲಿ ಉಪಟಳ. ಕೆಲವೇ ದಿನದ ಅಂತರದಲ್ಲಿ ನಾಲ್ವರನ್ನು ಹುಲಿ ಕೊಂದು ಹಾಕಿವೆ. ಕೋಟೆ ತಾಲ್ಲೂಕಿನಲ್ಲಿ ಬಾಲಕನನ್ನು ಕೊಂದಿದ್ದ ಹುಲಿ ಸೆರೆ ಸಿಕ್ಕಿತ್ತು. ಈಗ ನಂಜನಗೂಡು ತಾಲ್ಲೂಕಿನಲ್ಲಿ ರತ್ನಮ್ಮ ಎಂಬುವವರನ್ನು ಕೊಂದು ದೇಹದ ಭಾಗ ತಿಂದಿದೆ. ಸೆರೆ ಸಿಕ್ಕಿರುವ ಈ ಹುಲಿ ನರಭಕ್ಷಕ ಎಂದೇ ಚರ್ಚೆಯಾಗುತ್ತಿದೆ.

ನರಭಕ್ಷಕ ಹಾದಿಯ ಸುತ್ತಾ ಮುತ್ತ

ಭಾರತದಲ್ಲಿ ಹುಲಿಗಳ ಸಂಖ್ಯೆ ಸಹಸ್ರಾರು ಲೆಕ್ಕದಲ್ಲಿ ಇದ್ದುದು ಅದು ಶತಮಾನದ ಹಿಂದಿನ ಕಥೆ. ಕರ್ನಾಟಕದ ಶಿವಮೊಗ್ಗ ಜಿಲ್ಲೆಯ ಸಾಗರ ತಾಲ್ಲೂಕಿನ ತ್ಯಾಗರ್ತಿ ಎಂಬ ಗ್ರಾಮವನ್ನುಹುಲಿಯ ಸಾಮ್ರಾಜ್ಯವಾಗಿತ್ತು. ಹುಲಿ ಬೇಟೆಯೂ ನಡೆಯುತ್ತಿತ್ತು. ಹುಲಿಗಳು ನರಭಕ್ಷಕ ಎನ್ನುವ ಹಣೆಪಟ್ಟಿಯನ್ನೂ ಪಡೆದಿದ್ದವು ಎನ್ನುವುದನ್ನು ಪೂರ್ಣಚಂದ್ರ ತೇಜಸ್ವಿ ಅವರು ಬೆಳ್ಳಂದೂರಿನ ನರಭಕ್ಷಕ ಕೃತಿ ಬಿಂಬಿಸುತ್ತದೆ.

ಅದೇ ರೀತಿ ಜಿಮ್‌ ಕಾರ್ಬೆಟ್‌ ಹಾಗೂ ಕೆನೆತ್‌ ಅಂಡರ್‌ಸನ್‌ ಅವರ ಕೃತಿಗಳಲ್ಲಿ ಹುಲಿ ಹಾಗೂ ಚಿರತೆ ನರಭಕ್ಷಕ ಹೇಗಾದವು ಎಂಬುದರ ಹತ್ತಾರು ರೋಚಕ ಕಥೆಗಳು ಇವೆ.

ಇದು ಆಗಿನ ಕಾಲದ್ದು. ಆಗ ಕಾಡೂ ಯಥೇಚ್ಛವಾಗಿತ್ತು. ವನ್ಯಜೀವಿಗಳೂ ಯಥೇಚ್ಛವಾಗಿಯೇ ಇದ್ದವು. ಈಗ ಕಾಲ ಬದಲಾಗಿದೆ. ಭಾರತದಲ್ಲಿ ಅಳಿವಿನಂಚಿಗೆ ಬಂದು ನಿಂತಿರುವ ಹುಲಿಗಳು ಅಸ್ತಿತ್ವ ಉಳಿಸಿಕೊಳ್ಳಲು ಹೋರಾಡುವ ಅನಿವಾರ್ಯ ಸ್ಥಿತಿಯೂ ಇದೆ.

ಹುಲಿ ಯೋಜನೆ ಜಾರಿಗೊಂಡ ನಂತರ ಹುಲಿಗಳ ಸಂಖ್ಯೆಯೂ ಹೆಚ್ಚಿದೆ. ಆದರೆ ಅರಣ್ಯ ಪ್ರದೇಶ ಮಾತ್ರ ಕಡಿಮೆಯಾಗುತ್ತಿದೆ. ಇದರಿಂದ ಹುಲಿಗಳ ಆವಾಸ ಸ್ಥಾನದಲ್ಲಿ ಕುಸಿತ ಕಂಡಿದೆ. ಸೀಮಿತ ಪ್ರದೇಶದಲ್ಲಿ ತಮ್ಮಆವಾಸ ಸ್ಥಾನ ಉಳಿಸಿಕೊಳ್ಳಲು ಆಂತರಿಕ ಸಂಘರ್ಷ ಎದುರಿಸಿ ಅನಿವಾರ್ಯವಾಗಿ ಕಾಡು ಹೊರಬಿಟ್ಟು ಬರುವ ಹುಲಿಗಳು ಮನುಷ್ಯರ ಮೇಲೆ ದಾಳಿ ಮಾಡಿ ನರಹಂತಕ ಇಲ್ಲವೇ ನರಭಕ್ಷಕ ಪಟ್ಟ ಪಡೆಯುತ್ತಲೇ ಇವೆ.

ಎಂಟು ವರ್ಷದ ಹಿಂದೆ ಚಿಕ್ಕಮಗಳೂರು ಜಿಲ್ಲೆಯ ಭದ್ರಾದಲ್ಲಿ ಗಾಯಗೊಂಡಿದ್ದ ಹುಲಿಯೊಂದನ್ನು ಸೆರೆ ಹಿಡಿದು ಉತ್ತರ ಕನ್ನಡದ ಅಣಶಿ ಕಾಡಿಗೆ ಬಿಡಲಾಗಿತ್ತು. ಅದು ಬೆಳಗಾವಿ ಜಿಲ್ಲೆ ಭೀಮಗಡ ಅರಣ್ಯದಲ್ಲಿ ಕಾಣಿಸಿಕೊಂಡು ಗರ್ಭಿಣಿಯನ್ನು ತಿಂದು ಹಾಕಿತ್ತು. ಒಂದು ಪ್ರದೇಶದಿಂದ ಮತ್ತೊಂದು ಪ್ರದೇಶಕ್ಕೆ ಹುಲಿಯನ್ನು ಸ್ಥಳಾಂತರಿಸುವಾಗಲೂ ಎಚ್ಚರಿಕೆ ವಹಿಸದೇ ಇದ್ದರೆ ಅವುಗಳಿಗೆ ನರಹಂತಕ ಪಟ್ಟ ಸುಲಭವಾಗಿ ಬಂದು ಬಿಡಬಹುದು ಎನ್ನುವುದಕ್ಕೆ ಈ ಘಟನೆ ಸಾಕ್ಷಿಯಾಗಿತ್ತು.

ಹುಲಿ ಬೇಟೆಗಾರ ಪ್ರಾಣಿ. ಅದು ಕನಿಷ್ಟ ವಾರಕ್ಕೆ ಒಂದಾದರೂ ಬೇಟೆಯಾಡುತ್ತದೆ. ಅಂದರೆ ವರ್ಷಕ್ಕೆ 52 ಬೇಟೆ. ಒಮ್ಮೆ ಬೇಟೆಯಾಡಿದರೆ ಕನಿಷ್ಟ ಮೂರ್ನಾಲ್ಕು ದಿನದವರೆಗೂ ಇಟ್ಟುಕೊಂಡು ತಿನ್ನುವ ಸ್ವಭಾವದ ಹುಲಿಯದ್ದು. ಕಾಡಿನೊಳಗಾದರೆ ಕಾಡೆಮ್ಮೆ, ಕಡವೆ, ಜಿಂಕೆ ಅದರ ಪ್ರಮುಖ ಆಹಾರ. ಹುಲಿಗೆ ವಯಸ್ಸಾದರೆ ಇಲ್ಲವೇ ಕಾದಾಟದಲ್ಲಿ ಕೋರೆ ಕಲ್ಲು ಮುರಿದುಕೊಂಡರೆ ಬೇಟೆ ಸಾಮರ್ಥ್ಯ ಕಡಿಮೆಯಾಯಿತೆಂದರೆ ಅರಣ್ಯದಂಚಿನಲ್ಲಿ ಜಾನುವಾರು ಇಲ್ಲವೇ ಮನುಷ್ಯನ ಮೇಲೆಯೇ ದಾಳಿ ಮಾಡುವಂತದ್ದು.

ಭಾರತದ 54 ಹುಲಿ ಸಂರಕ್ಷಿತ ಪ್ರದೇಶಗಳಲ್ಲಿ 10 ಹೆಚ್ಚು ರಾಜ್ಯಗಳ 20 ಕ್ಕೂ ಅಧಿಕ ಹುಲಿ ಧಾಮಗಳಲ್ಲಿ ಇಂತಹ ಸಂಘರ್ಷಗಳಿವೆ. ಹಲವು ಹುಲಿಗಳು ನರಭಕ್ಷಕ ಪಟ್ಟ ಕಟ್ಟಿಕೊಂಡು ಗುಂಡೇಟಿಗೆ ಬಲಿಯಾಗಿವೆ. ಮೃಗಾಲಯ ಅಥವಾ ಪುನರ್ವಸತಿ ಕೇಂದ್ರ ಸೇರಿದ ಉದಾಹರಣೆಯೇ ಹೆಚ್ಚಿವೆ. ಒಂದು ದಶಕದಲ್ಲಿಯೇ ಭಾರತದಲ್ಲಿ 30 ಕ್ಕೂ ಅಧಿಕ ನರಭಕ್ಷಕ ಹುಲಿಗಳ ರೋಚಕ ಕಥೆಗಳನ್ನು ನೋಡಿದ್ದೇವೆ.

ತಜ್ಞರು ಹೇಳುವಂತೆ

ಎಂಬತ್ತರ ದಶಕದಲ್ಲಿ ನಾನು ನೋಡಿದ ಹಾಗೆ ಹುಲಿಗಳ ಸಂಖ್ಯೆ ಕಡಿಮೆಯಿದ್ದವು. ಆನಂತರದ ಸಂರಕ್ಷಣಾ ಕಾರ್ಯಕ್ರಮಗಳ ಫಲವಾಗಿ ಈಗ ಹುಲಿಗಳ ಸಂಖ್ಯೆ ಅಧಿಕವಾಗಿದೆ. ಇದು ಸಂಘರ್ಷದ ಪ್ರಮಾಣ ಹೆಚ್ಚಿಸಿದೆ. ಹುಲಿ ಹೊಂಚು ಹಾಕಿ ಬೇಟೆಯಾಡುವ ಪ್ರಾಣಿ. ಅದಕ್ಕೆ ಸಾಮರ್ಥ್ಯ ಇರುವ ತನಕದ ಕಾಡಿನಲ್ಲೇ ಬೇಟೆಯಾಡುತ್ತದೆ. ಗಾಯಗೊಂಡ ನಂತರ ಇಲ್ಲವೇ ವಯಸ್ಸಾದಾಗ ಅನಿವಾರ್ಯವಾಗಿ ಮನುಷ್ಯದ ಮೇಲೆ ದಾಳಿ ಮಾಡಬಹುದು. ಮನುಷ್ಯನನ್ನೂ ತಿಂದ ಉದಾಹರಣೆಗಳೂ ಸಾಕಷ್ಟಿವೆ. ಇವು ನರಭಕ್ಷಕ ಎಂದೇ ಗುರುತಿಸಿಕೊಳ್ಳುತ್ತವೆ. ಇವು ಇನ್ನಷ್ಟು ಜನ, ಜಾನುವಾರುಗಳನ್ನು ಕೊಂದು ಅರಣ್ಯದಂಚಿನ ಜನರಲ್ಲಿ ಆಕ್ರೋಶ ಹುಟ್ಟು ಹಾಕುವ ಮೊದಲೇ ಗುಂಡಿಕ್ಕಿ ಕೊಲ್ಲಿ ಎಂದು ನಾನು ಮೊದಲಿನಿಂದಲೂ ಪ್ರತಿಪಾದಿಸುತ್ತಿದ್ದೇನೆ. ಈಗಲೂ ಬಂಡೀಪುರದಲ್ಲಿ ಆಗಿರುವ ಸನ್ನಿವೇಶಕ್ಕೂ ಅದನ್ನೇ ಹೇಳೋದು ಎಂದು ಹಿರಿಯ ವನ್ಯಜೀವಿ ತಜ್ಞ ಡಾ.ಉಲ್ಲಾಸ ಕಾರಂತ ಹೇಳುತ್ತಾರೆ.

ಹುಲಿ ಮನುಷ್ಯನ ಮೇಲೆ ದಾಳಿ ಮಾಡಿ ದೇಹದ ಭಾಗ ತಿಂದು ಹಾಕಿದಾಗ ಅದನ್ನು ನರಭಕ್ಷಕ ಎಂದು ನಾವು ಹೇಳುತ್ತೇವೆ. ಅದನ್ನು ಘೋಷಿಸಬೇಕಾದವರು ಅರಣ್ಯ ಇಲಾಖೆಯವರು. ಅವರು ಜನ ಒತ್ತಾಯಿಸಿದರು ಎಂದ ತಕ್ಷಣ ನರಭಕ್ಷಕ ಎಂದು ಬಿಡುವುದಿಲ್ಲ. ರಾಷ್ಟ್ರೀಯ ಹುಲಿ ಸಂರಕ್ಷಣಾ ಪ್ರಾಧಿಕಾರವು ಇದಕ್ಕಾಗಿಯೇ ಕೆಲವು ಮಾರ್ಗಸೂಚಿಗಳನ್ನು ರೂಪಿಸಿದೆ. ಹುಲಿ ಮನುಷ್ಯನ ಬೇಟೆಗೆ ಇಳಿದ ಸನ್ನಿವೇಶ, ಅದರ ವಯಸ್ಸು, ದಾಳಿ ಮಾಡಿದ ರೀತಿ ಎಲ್ಲವನ್ನೂ ಪರಿಗಣನೆಗೆ ತೆಗೆದುಕೊಳ್ಳುತ್ತದೆ. ಬರೀ ಮನುಷ್ಯರನ್ನೇ ಗುರಿಯಾಗಿಸಿಕೊಂಡು ದಾಳಿ ಮಾಡಿದರೆ ಆಗ ನರಭಕ್ಷಕ ಎಂದು ಆಯಾ ರಾಜ್ಯಗಳ ಪ್ರಧಾನ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ಹಾಗೂ ವನ್ಯಜೀವಿ ಪರಿಪಾಲಕರು ಅದಕ್ಕೆ ಆದೇಶ ನೀಡಬೇಕಾಗುತ್ತದೆ. ಹಾಗೆ ಆದೇಶ ನೀಡಿದ ಉದಾಹರಣೆಗಳೂ ಹಲವು ಕಡೆ ಇದೆ. ನ್ಯಾಯಾಲಯವೂ ಈ ವಿಚಾರದಲ್ಲಿ ಹಲವು ಪ್ರಕರಣಗಳಲ್ಲಿ ಸೂಚನೆಯನ್ನು ನೀಡಿದ್ದೂ ಇದೆ.

ಹುಲಿಗಳು ನರಭಕ್ಷಕ ಹೌದೋ ಅಲ್ಲವೋ ಎನ್ನುವ ಚರ್ಚೆಗಳು ಭಾರತದಲ್ಲಿ ಹೊಸದೇನೂ ಅಲ್ಲ. ಹುಲಿ ಯಾರದೋ ಮೇಲೆ ದಾಳಿ ಮಾಡಿದಾಗ ನರ ಹಂತಕ ಇಲ್ಲವೇ ನರಭಕ್ಷಕ ಎನ್ನುವ ಮಾತುಗಳು ಕೇಳಿ ಬರುತ್ತವೆ. ಸ್ವಲ್ಪ ದಿನದಲ್ಲಿ ಇದು ಮರೆತೇ ಹೋಗುತ್ತದೆ. ಮತ್ತದು ಚರ್ಚೆಗೆ ಬರಲು ಹುಲಿ ಮತ್ತೆಲ್ಲೋ ದಾಳಿ ಮಾಡಲೇಬೇಕಷ್ಟೇ.

(ಈ ಬರಹದ ಬಗ್ಗೆ ನಿಮ್ಮ ಸಲಹೆ, ಅಭಿಪ್ರಾಯಗಳಿಗೆ ಸ್ವಾಗತ. ನಿಮ್ಮ ಪ್ರತಿಕ್ರಿಯೆ ನಮ್ಮ ಬರೆಹಗಳಿಗೆ ಜೀವಾಳ. umesh.bhatta@htdigital.in ಅಥವಾ ht.kannada@htdigital.in ಗೆ ಪ್ರತಿಕ್ರಿಯೆ ಇ-ಮೇಲ್​ ಮಾಡಬಹುದು.)