Hair Care: ಪದೇ ಪದೇ ಹೇರ್ ಕಲರಿಂಗ್ ಮಾಡುವ ಅಭ್ಯಾಸ ನಿಮಗಿದ್ಯಾ: ಕೂದಲಿನ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು ಎಚ್ಚರ

ಹೇರ್ ಸ್ಟೈಲ್ ಮಾಡುವುದೆಂದರೆ ಬಹುತೇಕರು ಇಷ್ಟಪಡುತ್ತಾರೆ. ಸ್ಟ್ರೈಟ್ನಿಂಗ್ ಮಾಡುವುದು ತಲೆಗೂದಲಿಗೆ ಬಣ್ಣಹಚ್ಚುವುದು ಎಂದರೆ ಬಹಳ ಅಚ್ಚುಮೆಚ್ಚು. ಕೆಲವರು ಒಂದು ಬದಿಯಲ್ಲಿ ಮಾತ್ರ ಬಣ್ಣ ಹಚ್ಚಿದ್ರೆ ಇನ್ನೂ ಕೆಲವರು ತಲೆಗೂದಲು ಪೂರ್ತಿ ಬಣ್ಣ ಹಚ್ಚುತ್ತಾರೆ. ತಲೆಗೂದಲಿಗೆ ಬಣ್ಣ ಹಚ್ಚುವುದರಿಂದ ಸೌಂದರ್ಯ ಇಮ್ಮಡಿಗೊಳ್ಳುತ್ತದೆ, ಸುಂದರವಾಗಿ ಕಾಣಲು ತಮಗಿಷ್ಟವಾದ ಬಣ್ಣವನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಇನ್ನೂ ಕೆಲವರು ಬಿಳಿಗೂದಲಿದೆ ಎಂಬ ಕಾರಣಕ್ಕೆ ಡೈಯಿಂಗ್ ಮಾಡಿಕೊಳ್ಳುತ್ತಾರೆ. ಪ್ರತಿ ವಾರಕ್ಕೊಂದು ಬಾರಿ ಹೈರ್ ಡೈಯಿಂಗ್ ಮಾಡುವವರು ಅನೇಕರಿದ್ದಾರೆ. ಆದರೆ, ಈ ರೀತಿ ಪದೇ ಪದೇ ತಲೆಗೂದಲಿಗೆ ಬಣ್ಣ ಹಚ್ಚುವುದರಿಂದ ಅಡ್ಡಪರಿಣಾಮಗಳು ಉಂಟಾಗುತ್ತದೆ. ಇದನ್ನು ಆಗಾಗ್ಗೆ ಹಚ್ಚಿಕೊಳ್ಳುವುದರಿಂದ ತಲೆಗೂದಲು ಮತ್ತು ನೆತ್ತಿಗೆ ಹಾನಿ, ಕಿರಿಕಿರಿ ಮತ್ತು ಅಲರ್ಜಿ ಉಂಟಾಗುವ ಸಾಧ್ಯತೆ ಇರುತ್ತದೆ. ನಿಯಮಿತವಾಗಿ ಬಣ್ಣ ಹಚ್ಚುವುದರಿಂದ ಕೂದಲಿನ ಆರೋಗ್ಯದ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂಬ ಬಗ್ಗೆ ಇಲ್ಲಿದೆ ಇನ್ನಷ್ಟು ಮಾಹಿತಿ.

ತಲೆಗೂದಲಿಗೆ ಪದೇ ಪದೇ ಬಣ್ಣ ಹಚ್ಚುವುದರಿಂದ ಉಂಟಾಗುವ ಅಡ್ಡಪರಿಣಾಮಗಳು

ತಲೆಗೂದಲಿಗೆ ಪದೇ ಪದೇ ಬಣ್ಣ ಹಚ್ಚುವುದರಿಂದ ಹಲವಾರು ಅಡ್ಡಪರಿಣಾಮಗಳಿಗೆ ಕಾರಣವಾಗಬಹುದು. ವಿಶೇಷವಾಗಿ ಸರಿಯಾದ ಉತ್ಪನ್ನಗಳನ್ನು ಬಳಸದಿದ್ದರೆ ಅಥವಾ ಸರಿಯಾದ ಆರೈಕೆಯನ್ನು ಅನುಸರಿಸದಿದ್ದರೆ ಅಡ್ಡಪರಿಣಾಮಗಳು ಉಂಟಾಗುತ್ತದೆ. ಏನೆಲ್ಲಾ ಅಡ್ಡಪರಿಣಾಮಗಳು ಉಂಟಾಗುತ್ತವೆ ಎಂಬ ಬಗ್ಗೆ ಇಲ್ಲಿದೆ ಮಾಹಿತಿ:

ಇದನ್ನೂ ಓದಿ: Hair Care: ಮಳೆ ಶುರುವಾದ ಬೆನ್ನಲ್ಲೇ ಅತಿಯಾಗಿ ಕೂದಲು ಉದುರಲು ಆರಂಭವಾಗಿದ್ಯಾ? ಮಳೆಗಾಲದಲ್ಲಿ ಹೀಗಿರಲಿ ಕೂದಲ ಕಾಳಜಿ

ಹಾನಿ ಮತ್ತು ಶುಷ್ಕತೆ: ತಲೆಗೂದಲಿಗೆ ಪದೇ ಪದೇ ಬಣ್ಣ ಹಚ್ಚುವುದರಿಂದ ಕೂದಲಿನ ನೈಸರ್ಗಿಕ ತೈಲಗಳನ್ನು ಇದು ತೆಗೆದು ಹಾಕಬಹುದು. ಕೂದಲಿನ ಬಣ್ಣವನ್ನು ಬದಲಾಯಿಸುವ ಪ್ರಕ್ರಿಯೆಯು ಕೂದಲಿನ ನೈಸರ್ಗಿಕ ರಚನೆಯನ್ನು ಬದಲಾಯಿಸುವ ರಾಸಾಯನಿಕಗಳನ್ನು ಒಳಗೊಂಡಿರುತ್ತದೆ. ಹೀಗಾಗಿ ತೇವಾಂಶ ಮತ್ತು ಪ್ರೊಟೀನ್‍ಗಳ ನಷ್ಟಕ್ಕೆ ಕಾರಣವಾಗುತ್ತದೆ.

ಸ್ಪ್ಲಿಟ್ ಎಂಡ್ಸ್: ತಮ್ಮ ಕೂದಲಿಗೆ ಪದೇ ಪದೇ ಬಣ್ಣ ಹಚ್ಚುವುದರಿಂದ ಕೂದಲಿನ ತುದಿ ಸ್ಲ್ಲಿಟ್ (ವಿಭಜನೆ) ಆಗುವ ಸಮಸ್ಯೆ ಹೆಚ್ಚಿರುತ್ತದೆ. ಅಲ್ಲದೆ, ಹೇರ್ ಕಲರಿಂಗ್‍ನಲ್ಲಿ ರಾಸಾಯನಿಕ ಇರುವುದರಿಂದ ಇದು ಕೂದಲನ್ನು ದುರ್ಬಲಗೊಳಿಸುತ್ತದೆ. ಇದರಿಂದ ಕೂದಲಿನ ಆರೋಗ್ಯದ ಮೇಲೆ ಗಮನಾರ್ಹ ಪರಿಣಾಮ ಬೀರುತ್ತದೆ.

ನೆತ್ತಿಯ ಕಿರಿಕಿರಿ: ಪದೇ ಪದೇ ಕಲರಿಂಗ್ ಮಾಡಿಕೊಳ್ಳುವುದರಿಂದ ನೆತ್ತಿಯ ಮೇಲೆ ಕಿರಿಕಿರಿ, ತುರಿಕೆ ಅಥವಾ ಅಲರ್ಜಿ ಉಂಟಾಗಬಹುದು. ನೆತ್ತಿಯಲ್ಲಿ ಕೂದಲಿನ ನಷ್ಟಕ್ಕೂ ಕಾರಣವಾಗಬಹುದು.

ನೈಸರ್ಗಿಕ ಹೊಳಪನ್ನು ಕಳೆದುಕೊಳ್ಳುವುದು: ತಲೆಗೂದಲಿನ ನೈಸರ್ಗಿಕ ಹೊಳಪನ್ನು ಮಂದಗೊಳಿಸುತ್ತದೆ. ಕೂದಲಿನ ವರ್ಣದ ಪದರಗಳು ಕಾಲಾನಂತರದಲ್ಲಿ ಸಂಗ್ರಹವಾಗುವುದರಿಂದ, ಅವು ನಿಮ್ಮ ಕೂದಲಿನ ಒಟ್ಟಾರೆ ನೋಟ ಮತ್ತು ಗುಣಮಟ್ಟದ ಮೇಲೆ ಪರಿಣಾಮ ಬೀರಬಹುದು.

ರಾಸಾಯನಿಕ ಮಾನ್ಯತೆ: ತಲೆಗೂದಲಿಗೆ ಹಾಕುವ ಬಣ್ಣ (Hair Colour) ಗಳು ಅಮೋನಿಯಾ ಮತ್ತು ಪೆರಾಕ್ಸೈಡ್‌ನಂತಹ ರಾಸಾಯನಿಕಗಳನ್ನು ಹೊಂದಿರುತ್ತವೆ. ಇದನ್ನು ಅತಿಯಾಗಿ ಬಳಸಿದರೆ ಹಾನಿಕಾರಕವಾಗಿ ಪರಿಣಮಿಸಬಹುದು. ಇದು ಉಸಿರಾಟದ ಸಮಸ್ಯೆಗಳು ಅಥವಾ ಇತರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು.

ಅಡ್ಡಪರಿಣಾಮಗಳನ್ನು ಕಡಿಮೆ ಮಾಡಲು ಈ ರೀತಿ ಮಾಡಿ

- ತೇವಾಂಶ ಮತ್ತು ಶಕ್ತಿಯನ್ನು ಕಾಪಾಡಿಕೊಳ್ಳಲು ಸಂಸ್ಕರಿಸಿದ ತಲೆಗೂದಲಿಗೆ ವಿನ್ಯಾಸಗೊಳಿಸಲಾದ ಕೂದಲಿನ ಉತ್ಪನ್ನಗಳನ್ನು ಬಳಸಿ.

- ಕಠಿಣ ರಾಸಾಯನಿಕಗಳನ್ನು ಬಳಸದಿರಿ. ಇಲ್ಲದಿದ್ದಲ್ಲಿ ಹೆಚ್ಚು ನೈಸರ್ಗಿಕ ಅಥವಾ ಕಡಿಮೆ ಹಾನಿಕಾರಕ ಡೈಯಿಂಗ್ ಆಯ್ಕೆ ಮಾಡಿಕೊಳ್ಳಿ.

- ಡೈಯಿಂಗ್ ಅಥವಾ ಹೇರ್ ಕಲರಿಂಗ್ ಮಾಡಿದ ಅವಧಿಯ ನಡುವೆ ಚೇತರಿಸಿಕೊಳ್ಳಲು ತಲೆಗೂದಲಿಗೆ ಸಮಯ ನೀಡಿ.

- ಕೂದಲಿನ ಪ್ರಕಾರ ಮತ್ತು ಅಗತ್ಯಗಳಿಗೆ ಅನುಗುಣವಾಗಿ ವೃತ್ತಿಪರ ಸ್ಟೈಲಿಸ್ಟ್ ಅನ್ನು ಸಂಪರ್ಕಿಸಿ. ಹಾಗೂ ಒಳ್ಳೆಯ ಬ್ರ್ಯಾಂಡ್ ಅನ್ನು ಆಯ್ಕೆ ಮಾಡಿಕೊಳ್ಳುವುದು ಬಹಳ ಮುಖ್ಯ.

ಇದನ್ನೂ ಓದಿ: Hair Care: ನಾರಿಮಣಿಯರೇ, ಅತಿಯಾಗಿ ಕೂದಲು ಉದುರೋದ್ರಿಂದ ಚಿಂತೆ ಆಗಿದ್ಯಾ? ಈ ಅಂಶಗಳೂ ಕಾರಣವಿರಬಹುದು ಗಮನಿಸಿ