ದಿನದಲ್ಲಿ ಇಷ್ಟು ಗಂಟೆಗಳಿಗಿಂತ ಹೆಚ್ಚು ಹೊತ್ತು ಕುಳಿತು ಕೆಲಸ ಮಾಡಿದ್ರೆ ಅಪಾಯ ತಪ್ಪಿದಲ್ಲ; ಡೆಸ್ಕ್ ವರ್ಕ್ ಮಾಡುವವರಿಗಿದು ತಿಳಿದಿರಬೇಕು
ಡೆಸ್ಕ್ ವರ್ಕ್ ಎಂದ ಮೇಲೆ ಹೆಚ್ಚು ಕಾಲ ಕುಳಿತೇ ಇರಬೇಕಾಗುತ್ತದೆ. ಅದರಲ್ಲೂ ಈಗೀಗ ವರ್ಕ್ ಫ್ರಂ ಹೋಂ ದೆಸೆಯಿಂದ ಗಂಟೆಗಟ್ಟಲ್ಲೇ ಕುಳಿತಲ್ಲೇ ಕುಳಿತಿರುತ್ತೇವೆ. ಆದರೆ ದೀರ್ಘಕಾಲದವರೆಗೆ ಕುಳಿತುಕೊಳ್ಳುವುದು ಖಂಡಿತ ಅಪಾಯ. ಇದರಿಂದ ಹಲವು ರೀತಿಯ ದೈಹಿಕ, ಮಾನಸಿಕ ಸಮಸ್ಯೆಗಳು ಶುರುವಾಗುತ್ತವೆ. ಹಾಗಾದರೆ ದಿನಕ್ಕೆ ಎಷ್ಟು ಗಂಟೆಗಳ ಕಾಲ ಕುಳಿತು ಕೆಲಸ ಮಾಡಬಹುದು ನೋಡಿ.
ದೀರ್ಘಕಾಲ ಕುಳಿತು ಕೆಲಸ ಮಾಡುವುದು ಆರೋಗ್ಯಕ್ಕೆ ಅಪಾಯ ಎಂಬುದನ್ನು ನೀವು ಕೇಳಿರಬಹುದು. ಎಲ್ಲಿಯೂ ತಿರುಗಾಡದೇ ಒಂದು ಕಡೆ ಕುಳಿತು ಕೆಲಸ ಮಾಡುವುದು ಹಲವರಿಗೆ ಇಷ್ಟವಾದರೂ ಇದರಿಂದ ಆರೋಗ್ಯಕ್ಕೆ ತೊಂದರೆ ತಪ್ಪಿದ್ದಲ್ಲ. ದೀರ್ಘಕಾಲ ಕುಳಿತಿರುವುದು ಆರೋಗ್ಯದ ಮೇಲೆ ಹಲವು ರೀತಿ ಋಣಾತ್ಮಕ ಪರಿಣಾಮ ಬೀರುವಂತೆ ಮಾಡುತ್ತದೆ. ಇದರಿಂದ ದೈಹಿಕ ಸಮಸ್ಯೆ ಮಾತ್ರವಲ್ಲ, ಮಾನಸಿಕ ಸಮಸ್ಯೆಗಳೂ ಶುರುವಾಗುತ್ತವೆ.
ಇತ್ತೀಚಿನ ಅಧ್ಯಯನವೊಂದರ ಪ್ರಕಾರ ಹೆಚ್ಚು ಗಂಟೆಗಳ ಕಾಲ ಕುಳಿತು ಕೆಲಸ ಮಾಡುವುದು ಆರೋಗ್ಯದ ಮೇಲೆ ಅದರಲ್ಲೂ ಹೃದಯದ ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರುತ್ತದೆ ಎಂಬುದನ್ನು ಸಾಬೀತುಪಡಿಸಿದೆ. ಇದಕ್ಕಾಗಿ ನಾವು ದೀರ್ಘಕಾಲ ಕುಳಿತುಕೊಳ್ಳುವ ಅವಧಿಯನ್ನು ಕಡಿಮೆ ಮಾಡಬೇಕು ಎಂದು ಬೋಸ್ಟನ್‌ನ ಬ್ರಿಗಮ್ ಅಂಡ್‌ ವುಮೆನ್ ಆಸ್ಪತ್ರೆಯ ಹೃದ್ರೋಗ ತಜ್ಞೆ ಡಾ. ಎಜಿಮ್ ಅಜುಫೊ ಹೇಳುತ್ತಾರೆ. ಅವರ ಪ್ರಕಾರ ನೀವೆಷ್ಟೇ ದೈಹಿಕ ಚಟುವಟಿಕೆ ನಡೆಸಿದ್ರೂ ಕೂಡ ದೀರ್ಘಕಾಲದವರೆಗೆ ಕುಳಿತು ಕೆಲಸ ಮಾಡುವುದು ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಉಂಟು ಮಾಡುತ್ತದೆ.
ಜರ್ನಲ್ ಆಫ್ ದಿ ಅಮೆರಿಕನ್ ಕಾಲೇಜ್ ಆಫ್ ಕಾರ್ಡಿಯಾಲಜಿಯಲ್ಲಿ ಪ್ರಕಟವಾದ ಅಧ್ಯಯನಗಳ ಪ್ರಕಾರ ದೀರ್ಘಕಾಲ ಕುಳಿತು ಕೆಲಸ ಮಾಡುವುದು ಮತ್ತು ಹೃದಯರಕ್ತನಾಳದ ಕಾಯಿಲೆಯ ನಡುವೆ ಬಲವಾದ ಸಂಬಂಧ ಇದೆ ಎಂಬುದನ್ನು ಇದು ಸಾಬೀತುಪಡಿಸುತ್ತದೆ.
ದಿನಕ್ಕೆ ಎಷ್ಟು ಹೊತ್ತು ಕುಳಿತು ಕೆಲಸ ಮಾಡಬಹುದು
ಅಧ್ಯಯನ ವರದಿಯ ಪ್ರಕಾರ ದಿನಕ್ಕೆ 10 ಗಂಟೆಗಳಿಗಿಂತಲೂ ಕಡಿಮೆ ಹೊತ್ತು ಕುಳಿತು ಕೆಲಸ ಮಾಡಬಹುದು ಎಂದಿದೆ. ಇದು ಕಠಿಣ ನಿಯಮವಲ್ಲ. ಆದರೂ ಸಾರ್ವಜನಿಕ ಆರೋಗ್ಯದ ದೃಷ್ಟಿಯಿಂದ ಈ ನಿಯಮವನ್ನು ಪಾಲಿಸುವುದು ಅತಿ ಮುಖ್ಯ ಎಂದಿದ್ದಾರೆ. ಆದರೆ 10 ಗಂಟೆಗಳ ನಡುವೆ ಆಗಾಗ ಎದ್ದು ನಿಲ್ಲುವುದು, ಓಡಾಡುವುದು, ಸ್ಟ್ರೆಚಿಂಗ್ ವ್ಯಾಯಾಮಗಳನ್ನು ಮಾಡುವುದು ಅವಶ್ಯ. 10 ಗಂಟೆಗಳಿಗೂ ಹೆಚ್ಚು ಹೊತ್ತು ಕುಳಿತು ಕೆಲಸ ಮಾಡುವುದರಿಂದ ಹಲವು ಆರೋಗ್ಯ ಸಮಸ್ಯೆಗಳು ಎದುರಾಗುತ್ತವೆ. ಅಂತಹ ಕೆಲವು ಸಮಸ್ಯೆಗಳು ಇಲ್ಲಿವೆ ನೋಡಿ.
ಸ್ಥೂಲಕಾಯ, ತೂಕ ಏರಿಕೆ
ದೀರ್ಘಕಾಲದವರೆಗೆ ಕುಳಿತು ಕೆಲಸ ಮಾಡುವುದರಿಂದ ದೇಹದಲ್ಲಿ ಕ್ಯಾಲೊರಿ ಹೆಚ್ಚಾಗಬಹುದು. ಇದರಿಂದ ತೂಕ ಏರಿಕೆಯಾಗುವುದು ಹಾಗೂ ಸ್ಥೂಲಕಾಯತೆಗೆ ಕಾರಣವಾಗಬಹುದು. ನಿಂತಿರುವುದು ಹಾಗೂ ಚಲಿಸುವುದಕ್ಕೆ ಹೋಲಿಸಿದರೆ ಕುಳಿತಿರುವುದು ಕಡಿಮೆ ಕ್ಯಾಲೊರಿ ಸುಡುತ್ತದೆ. ನೀವು ಡೆಸ್ಕ್ ವರ್ಕ್ ಮಾಡುವವರಾದರೆ ಆಗಾಗ ಎದ್ದು ನಿಲ್ಲುವುದು, ತಿರುಗಾಡುವುದು, ಸ್ಟ್ರೆಚಿಂಗ್ ವ್ಯಾಯಾಮಗಳನ್ನು ಮಾಡುವುದನ್ನು ಮಾಡಿ. ನಿಮ್ಮ ದಿನಚರಿಯಲ್ಲಿ ವಾಕಿಂಗ್‌ಗೆ ತಪ್ಪದೇ ಜಾಗ ನೀಡಿ.
ಹೃದಯರಕ್ತನಾಳದ ಕಾಯಿಲೆಯ ಅಪಾಯ
ದೀರ್ಘಾವಧಿಯವರೆಗೆ ಕುಳಿತುಕೊಳ್ಳುವುದು ಹೃದ್ರೋಗ ಮತ್ತು ಪಾರ್ಶ್ವವಾಯು ಸೇರಿದಂತೆ ಹೃದಯರಕ್ತನಾಳದ ಕಾಯಿಲೆಗಳ ಅಪಾಯವನ್ನು ಹೆಚ್ಚಿಸಬಹುದು. ಇದು ರಕ್ತದ ಹರಿವನ್ನು ಕಡಿಮೆ ಮಾಡುತ್ತದೆ. ದೀರ್ಘಾವಧಿ ಕುಳಿತು ಕೆಲಸ ಮಾಡುವವರಾಗಿದ್ದರೆ ಆಗಾಗ ಮಧ್ಯೆ ಮಧ್ಯೆ ಚಿಕ್ಕ ವಿರಾಮ ನೀಡಿ ದೈಹಿಕ ಚಟುವಟಿಕೆ ಮಾಡಿ. ಪ್ರತಿ ಗಂಟೆಗೆ ಒಮ್ಮೆ ಕೆಲವು ನಿಮಿಷಗಳ ಕಾಲ ಸುತ್ತಾಡುವುದು ಅಥವಾ ನಿಲ್ಲುವ ಅಭ್ಯಾಸ ಮಾಡಿ. ವಾಕಿಂಗ್, ಸೈಕ್ಲಿಂಗ್ ಅಥವಾ ಈಜು ಮುಂತಾದ ಹೃದಯರಕ್ತನಾಳಕ್ಕೆ ನೆರವಾಗುವ ವ್ಯಾಯಾಮಗಳನ್ನಿ ನಿಮ್ಮ ದಿನಚರಿಯಲ್ಲಿ ಸೇರಿಸಿ.
ಕಳಪೆ ಭಂಗಿ, ಬೆನ್ನು ನೋವು
ದೀರ್ಘಕಾಲದ ಕುಳಿತೇ ಇರುವುದು ಕಳಪೆ ಭಂಗಿಗೆ ಕಾರಣವಾಗಬಹುದು. ಇದು ಬೆನ್ನುಮೂಳೆಯ ಮೇಲೆ ಒತ್ತಡವನ್ನು ಉಂಟುಮಾಡಬಹುದು ಮತ್ತು ಮಸ್ಕ್ಯುಲೋಸ್ಕೆಲಿಟಲ್ ನೋವಿಗೆ ಕಾರಣವಾಗಬಹುದು. ಭಂಗಿಯನ್ನು ಹಿಗ್ಗಿಸಲು ಮತ್ತು ಸರಿಪಡಿಸಲು ನಿಯಮಿತ ವಿರಾಮಗಳನ್ನು ತೆಗೆದುಕೊಳ್ಳಿ. ಉತ್ತಮ ಭಂಗಿಯನ್ನು ಬೆಂಬಲಿಸಲು ಕೋರ್ ಮತ್ತು ಹಿಂಭಾಗದ ಸ್ನಾಯುಗಳಿಗೆ ಬಲಪಡಿಸುವ ವ್ಯಾಯಾಮಗಳನ್ನು ಪರಿಗಣಿಸಿ.
ಟೈಪ್ 2 ಮಧುಮೇಹದ ಅಪಾಯ
ದೀರ್ಘಕಾಲದ ಕುಳಿತುಕೊಳ್ಳುವಿಕೆಯು ಟೈಪ್ 2 ಮಧುಮೇಹದ ಅಪಾಯವನ್ನು ಹೆಚ್ಚಿಸುತ್ತದೆ, ಇನ್ಸುಲಿನ್ ಸಂವೇದನೆ ಕಡಿಮೆಯಾಗುವುದು ಹಾಗೂ ಗೊಕ್ಲೋಸ್ ಚಯಾಪಚಯ ದುರ್ಬಲವಾಗುವುದು ಇದಕ್ಕೆ ಕಾರಣವಾಗಬಹುದು. ವಾಕಿಂಗ್ ಅಥವಾ ಲಘು ವ್ಯಾಯಾಮದಂತಹ ಕಡಿಮೆ ಅವಧಿಯ ಚಟುವಟಿಕೆಯೊಂದಿಗೆ ಕುಳಿತುಕೊಳ್ಳುವ ಸಮಯಕ್ಕೆ ಬ್ರೇಕ್ ಹಾಕಿ. ಇನ್ಸುಲಿನ್ ಸಂವೇದನೆ ಮತ್ತು ಗ್ಲೂಕೋಸ್ ಚಯಾಪಚಯವನ್ನು ಸುಧಾರಿಸಲು ದಿನವಿಡೀ ನಿಯಮಿತ ದೈಹಿಕ ಚಟುವಟಿಕೆಯ ಗುರಿಯನ್ನು ಹೊಂದಿರಿ.
ಮಸ್ಕ್ಯುಲೋಸ್ಕೆಲಿಟಲ್ ನೋವು
ದೀರ್ಘ ಗಂಟೆಗಳ ಕಾಲ ಕುಳಿತುಕೊಳ್ಳುವುದು ಬೆನ್ನು ನೋವು, ಕುತ್ತಿಗೆ ನೋವು, ಕೀಲುನೋವು ಸೇರಿದಂತೆ ಮಸ್ಕ್ಯುಲೋಸ್ಕೆಲಿಟಲ್ ನೋವಿಗೆ ಕಾರಣವಾಗಬಹುದು. ಮಸ್ಕ್ಯುಲೋಸ್ಕೆಲಿಟಲ್ ಎಂದರೆ ಸ್ನಾಯು, ಮೂಳೆ, ಗಂಟುಗಳಲ್ಲಿ ನೋವು ಉಂಟಾಗುವುದು. ಇದು ಸಾಮಾನ್ಯವಾಗಿ ಕಳಪೆ ಭಂಗಿ ಮತ್ತು ಸ್ನಾಯುವಿನ ಅಸಮತೋಲನದ ಕಾರಣದಿಂದಾಗಿರುತ್ತದೆ. ಇದಕ್ಕಾಗಿ ನೀವು ಆಗಾಗ ಎದ್ದು ನಿಲ್ಲುವುದು, ಚಿಕ್ಕಪುಟ್ಟ ಎಕ್ಸ್‌ಸೈಜ್ ಮಾಡುವುದು ಇಂಥವಕ್ಕೆ ಗಮನ ಕೊಡಿ.
ಮಾನಸಿಕ ನೆಮ್ಮದಿ ಕೆಡುವುದು
ದೀರ್ಘಕಾಲ ಕುಳಿತುಕೊಳ್ಳುವುದು ದೈಹಿಕ ಆರೋಗ್ಯ ಮಾತ್ರವಲ್ಲ ಮಾನಸಿಕ ಆರೋಗ್ಯದ ಮೇಲೂ ಪರಿಣಾಮ ಬೀರುತ್ತದೆ. ಇದರಿಂದ ಆತಂಕ ಹಾಗೂ ಖಿನ್ನತೆಯ ಸಮಸ್ಯೆಗಳು ಕಾಡಬಹುದು. ಯಾಮವು ಮನಸ್ಥಿತಿಯನ್ನು ಸುಧಾರಿಸುತ್ತದೆ ಮತ್ತು ಖಿನ್ನತೆ ಮತ್ತು ಆತಂಕದ ಲಕ್ಷಣಗಳನ್ನು ಕಡಿಮೆ ಮಾಡುತ್ತದೆ. ನಿಮ್ಮ ದೈನಂದಿನ ದಿನಚರಿಯಲ್ಲಿ ನಿಯಮಿತ ವ್ಯಾಯಾಮಗಳನ್ನು ರೂಢಿಸಿಕೊಳ್ಳಿ.
ಜೀವಿತಾವಧಿ ಕಡಿಮೆಯಾಗುತ್ತದೆ
ದೀರ್ಘಕಾಲದ ಕುಳಿತು ಕೆಲಸ ಮಾಡುವುದು ನಮ್ಮ ಜೀವಿತಾವಧಿಯ ಮೇಲೆ ಪರಿಣಾಮ ಬೀರಬಹುದು ಎಂದು ಕೆಲವು ಅಧ್ಯಯನಗಳು ತೋರಿಸಿವೆ. ನಿಮ್ಮ ದಿನಚರಿಯಲ್ಲಿ ಹೆಚ್ಚು ನಿಂತಿರುವ ಅಥವಾ ಚಲಿಸುವ ಅಭ್ಯಾಸ ರೂಢಿಸಿಕೊಳ್ಳಿ. ಒಟ್ಟಾರೆ ಆರೋಗ್ಯ ಮತ್ತು ದೀರ್ಘಾಯುಷ್ಯವನ್ನು ಸುಧಾರಿಸಲು ನಿಯಮಿತ ದೈಹಿಕ ಚಟುವಟಿಕೆಗೆ ಆದ್ಯತೆ ನೀಡಿ.
ದೀರ್ಘಕಾಲ ಕುಳಿತುಕೊಳ್ಳುವ ಋಣಾತ್ಮಕ ಪರಿಣಾಮಗಳನ್ನು ಎದುರಿಸಲು, ದಿನವಿಡೀ ನಿಲ್ಲಲು, ಹಿಗ್ಗಿಸಲು ಮತ್ತು ಚಲಿಸಲು ನಿಯಮಿತ ವಿರಾಮಗಳನ್ನು ತೆಗೆದುಕೊಳ್ಳುವುದು ಮುಖ್ಯ. ಹೆಚ್ಚುವರಿಯಾಗಿ, ನಿಯಮಿತ ದೈಹಿಕ ಚಟುವಟಿಕೆಯಲ್ಲಿ ತೊಡಗಿಸಿಕೊಳ್ಳುವುದು ಮತ್ತು ಆರೋಗ್ಯಕರ ಜೀವನಶೈಲಿಯನ್ನು ಕಾಪಾಡಿಕೊಳ್ಳುವುದು ದೀರ್ಘಾವಧಿಯ ಕುಳಿತುಕೊಳ್ಳುವಿಕೆಗೆ ಸಂಬಂಧಿಸಿದ ಅಪಾಯಗಳನ್ನು ತಗ್ಗಿಸಲು ಸಹಾಯ ಮಾಡುತ್ತದೆ ಎನ್ನುತ್ತಾರೆ ತಜ್ಞರು.
(ಗಮನಿಸಿ: ಈ ಲೇಖನದಲ್ಲಿ ವಿವರಿಸಲಾದ ಅಂಶಗಳು ಸಾಮಾನ್ಯ ಮಾಹಿತಿ ಹಾಗೂ ಅಂತರ್ಜಾಲದಲ್ಲಿ ಸಿಕ್ಕ ವಿಷಯಗಳನ್ನು ಒಳಗೊಂಡಿದೆ. ಈ ಕುರಿತ ಹೆಚ್ಚಿನ ಮಾಹಿತಿಗಾಗಿ ನೀವು ಸಂಬಂಧಿತ ಕ್ಷೇತ್ರದ ತಜ್ಞರನ್ನು ಭೇಟಿ ಮಾಡಬೇಕು)
ವಿಭಾಗ