ಮಕ್ಕಳೇ ಹಾಲು ಕುಡಿಯಿರಿ ಎಂದರೆ ಮಾರುದೂರ ಓಡುತ್ತಾರಾ: ಮನೆಯಲ್ಲಿಯೇ ತಯಾರಿಸಿ ಪ್ರೋಟೀನ್ ಪೌಡರ್, ಇಷ್ಟಪಟ್ಟು ಕುಡಿಯುತ್ತಾರೆ ನೋಡಿ
ಮಕ್ಕಳ ಆರೋಗ್ಯ, ಬೆಳವಣಿಗೆಗೆ ಹಾಲು ಕುಡಿಯುವುದು ಅತ್ಯಗತ್ಯ. ಆದರೆ, ಬಹುತೇಕ ಮಕ್ಕಳಿಗೆ ಹಾಲೆಂದರೆ ಆಗುವುದೇ ಇಲ್ಲ. ಹೀಗಾಗಿ ಹಾಲಿಗೆ ಪ್ರೋಟೀನ್ ಪುಡಿ ಬೆರೆಸಿ ಕುಡಿಸಬಹುದು. ಈ ಪ್ರೋಟೀನ್ ಪುಡಿಗಳನ್ನು ಮಾರುಕಟ್ಟೆಯಲ್ಲಿ ಖರೀದಿಸುವ ಬದಲು ಮನೆಯಲ್ಲಿಯೇ ತಯಾರಿಸಬಹುದು. ಇದು ಹಾಲಿನ ರುಚಿಯನ್ನು ಹೆಚ್ಚಿಸುತ್ತದೆ. ಇಲ್ಲಿದೆ ರೆಸಿಪಿ.
ಹಾಲು ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಮಕ್ಕಳ ಬೆಳವಣಿಗೆಗೆ ಹಾಲು ಅತ್ಯಗತ್ಯ. ಆದರೆ, ಮಕ್ಕಳಿಗೆ ಹಾಲು ಕಂಡರೆ ಕುಡಿಯಲು ಮನಸ್ಸಾಗುವುದಿಲ್ಲ. ಹಾಲೆಂದರೆ ಸಾಕು ಮಾರು ದೂರ ಓಡುತ್ತಾರೆ. ಮಕ್ಕಳಿಗೆ ಹಾಲು ಕುಡಿಸುವುದು ಹೇಗೆ ಎಂಬ ಚಿಂತೆ ನಿಮಗೆ ಕಾಡುತ್ತಿರಬಹುದು. ಇದಕ್ಕೆ ಯಾವುದೇ ಸಿಹಿ ಪುಡಿಯನ್ನು ಸೇರಿಸಿ ಮಕ್ಕಳಿಗೆ ಕುಡಿಸಬಹುದು. ಮಾರುಕಟ್ಟೆಯಲ್ಲಿ ಹಲವು ರೀತಿಯ ಎನರ್ಜಿ ಪೌಡರ್‌ಗಳಿವೆ. ಅವುಗಳಲ್ಲಿ ಒಂದು ಪ್ರೋಟೀನ್ ಪುಡಿ. ಇದು ಹೆಚ್ಚಿನ ಮಕ್ಕಳನ್ನು ಆಕರ್ಷಿಸುತ್ತದೆ. ಇದನ್ನು ಮನೆಯಲ್ಲಿಯೇ ಬಹಳ ಸುಲಭವಾಗಿ ಮಾಡಬಹುದು.
ಈ ಪ್ರೊಟೀನ್ ಪುಡಿಗಳು ಹಾಲಿನ ರುಚಿಯನ್ನು ಹೆಚ್ಚಿಸುವುದು ಮಾತ್ರವಲ್ಲದೆ ಹೆಚ್ಚುವರಿ ಪ್ರಯೋಜನಗಳನ್ನು ನೀಡುತ್ತದೆ. ಆದರೆ, ಹೊರಗಡೆ ಮಾರಾಟ ಮಾಡುವ ಉತ್ಪನ್ನಗಳಿಗಿಂತ ಮನೆಯಲ್ಲಿಯೇ ಈ ಪುಡಿಯನ್ನು ತಯಾರಿಸಿದರೆ ಮಕ್ಕಳಿಗೆ ಎಲ್ಲ ರೀತಿಯಿಂದಲೂ ಆರೋಗ್ಯಕಾರಿ. ಇದಕ್ಕೆ ಕೃತಕ ಸಿಹಿಯನ್ನು ಬಳಸದೆಯೇ ತಯಾರಿಸಬಹುದು. ನೀವು ಮನೆಯಲ್ಲಿಯೇ ಮಕ್ಕಳಿಗೆ ರುಚಿಕರವಾದ ಪ್ರೋಟೀನ್ ಪುಡಿಯನ್ನು ತಯಾರಿಸಬಹುದು. ಇದನ್ನು ತಯಾರಿಸುವುದು ತುಂಬಾ ಸುಲಭ. ಮನೆಯಲ್ಲಿ ಆರೋಗ್ಯಕರ ಮತ್ತು ರುಚಿಕರವಾದ ಪ್ರೋಟೀನ್ ಭರಿತ ಪುಡಿಯನ್ನು ತಯಾರಿಸಲು ಏನೇನು ಬೇಕು ಎಂಬುದು ಇಲ್ಲಿದೆ.
ಪ್ರೋಟೀನ್ ಭರಿತ ಪುಡಿ ತಯಾರಿಸುವ ವಿಧಾನ ಇಲ್ಲಿದೆ
ಬೇಕಾಗುವ ಸಾಮಗ್ರಿಗಳು: ಗೋಧಿ- ಒಂದು ಕಪ್, ಬಾದಾಮಿ- ಐವತ್ತು ಗ್ರಾಂ, ಕಡಲೆಕಾಯಿ- ಐವತ್ತು ಗ್ರಾಂ, ಹಾಲಿನ ಪುಡಿ- ಐವತ್ತು ಗ್ರಾಂ, ಒಂದು ಚಮಚ ಏಲಕ್ಕಿ ಪುಡಿ, ಕೋಕೋ ಪೌಡರ್- ಒಂದು ಚಮಚ.
ಮಾಡುವ ವಿಧಾನ: ಮನೆಯಲ್ಲಿ ಪ್ರೋಟೀನ್ ಪೌಡರ್ ತಯಾರಿಸುವುದು ಬಹಳ ಮುಖ್ಯ. ಇದು ಟೇಸ್ಟಿ ಮಾತ್ರವಲ್ಲ ಆರೋಗ್ಯಕರವೂ ಆಗಿದೆ. ಮೊದಲು ಗೋಧಿಯನ್ನು ತೊಳೆದು ಒಂದು ಅಥವಾ ಎರಡು ರಾತ್ರಿ ನೆನೆಸಿಡಿ. ಗೋಧಿಯನ್ನು ಮೃದುವಾಗುವವರೆಗೆ ನೆನೆಸಿಡಿ. ಗೋಧಿಯನ್ನು ಎರಡು ದಿನ ನೆನೆಸಿಟ್ಟರೆ, ಮಧ್ಯೆ ನೀರನ್ನು ಬದಲಾಯಿಸುತ್ತಿರಿ. ಗೋಧಿ ಮೃದುವಾದ ನಂತರ ಮೊಳಕೆಯೊಡೆಯಬೇಕು. ಇದಕ್ಕಾಗಿ ಗೋಧಿಯನ್ನು ತೆಳುವಾದ ಬಟ್ಟೆಯಲ್ಲಿ ಕಟ್ಟಬೇಕು. ಒಂದೂವರೆ ದಿನಗಳಲ್ಲಿ ಗೋಧಿ ಮೊಳಕೆಯೊಡೆಯಲು ಪ್ರಾರಂಭಿಸುತ್ತದೆ. ಮೊಳಕೆಯೊಡೆದ ನಂತರ, ಅವುಗಳನ್ನು ಚೆನ್ನಾಗಿ ಒಣಗಲು ಬಿಡಿ. ಅದನ್ನು ಬಿಸಿಲಿನಲ್ಲಿ ಅಥವಾ ಫ್ಯಾನ್ ಅಡಿಯಲ್ಲಿ ಒಣಗಿಸಬಹುದು. ಗೋಧಿಯಲ್ಲಿ ತೇವಾಂಶ ಉಳಿಯಬಾರದು.
ಗೋಧಿ ಚೆನ್ನಾಗಿ ಆರಿದ ನಂತರ ಬಾಣಲೆಯನ್ನು ಒಲೆಯ ಮೇಲೆ ಇಟ್ಟು ಕಡಿಮೆ ಉರಿಯಲ್ಲಿ ಸ್ವಲ್ಪ ಹೊತ್ತು ಹುರಿಯಿರಿ. ಚೆನ್ನಾಗಿ ವಾಸನೆ ಬರುವವರೆಗೆ ಹುರಿಯಿರಿ. ಈಗ ಈ ಹುರಿದ ಗೋಧಿಯನ್ನು ಮಿಕ್ಸಿಯಲ್ಲಿ ಹಾಕಿ ರುಬ್ಬಿಕೊಳ್ಳಿ. ಇದನ್ನು ಸಾಧ್ಯವಾದಷ್ಟು ನುಣ್ಣಗೆ ಪುಡಿಮಾಡಿ. ಅದು ಹಾಲಿನಲ್ಲಿ ಚೆನ್ನಾಗಿ ಕರಗುತ್ತದೆ. ಈಗ ಸ್ಟೌವ್ ಮೇಲೆ ಬಾಣಲೆ ಇಟ್ಟು ಕಡಿಮೆ ಉರಿಯಲ್ಲಿ ಕಡಲೆಕಾಯಿ ಮತ್ತು ಬಾದಾಮಿಯನ್ನು ಹುರಿದುಕೊಳ್ಳಿ. ಕಡಲೆಕಾಯಿಯನ್ನು ಹುರಿದ ನಂತರ, ಸಿಪ್ಪೆಯನ್ನು ತೆಗೆಯಿರಿ. ನಂತರ ಅವುಗಳನ್ನು ನುಣ್ಣಗೆ ಪುಡಿ ಮಾಡಿ. ನಂತರ ಮಿಕ್ಸಿಯಲ್ಲಿ ಬಾದಾಮ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಅದನ್ನು ಕೂಡ ಪಕ್ಕಕ್ಕೆ ಇಡಬೇಕು.
ಈಗ ಒಂದು ಪಾತ್ರೆಯಲ್ಲಿ ಗೋಧಿ ಹಿಟ್ಟು, ಕಡಲೆ ಪುಡಿ ಮತ್ತು ಹಾಲಿನ ಪುಡಿ ಮಿಶ್ರಣವನ್ನು ಹಾಕಿ ಮಿಶ್ರಣ ಮಾಡಿ, ಒಂದು ಕಂಟೇನರ್‌ಗೆ ವರ್ಗಾಯಿಸಿ. ಈಗ ಆರೋಗ್ಯಕರ ಪ್ರೋಟೀನ್ ಪೌಡರ್ ಮನೆಯಲ್ಲಿಯೇ ಸಿದ್ಧವಾಗುತ್ತದೆ. ಈಗ ಈ ಪುಡಿಯನ್ನು ಹಾಲಿಗೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ರುಚಿಗೆ ಬೇಕಿದ್ದರೆ ಏಲಕ್ಕಿ ಪುಡಿ ಹಾಕಬಹುದು. ಮಕ್ಕಳಿಗೆ ಚಾಕೋಲೇಟ್ ಫ್ಲೇವರ್ ಹೆಚ್ಚು ಇಷ್ಟವಾದರೆ ಅದಕ್ಕೆ ಕೋಕೋ ಪೌಡರ್ ಸಹ ಹಾಕಬಹುದು.
