ಅಡುಗೆ ಮಾಡುವಾಗ ಪಾತ್ರೆ ಸುಟ್ಟು ಹೋಗಿದ್ದರೆ ಹೇಗೆ ಸ್ವಚ್ಛಗೊಳಿಸುವುದು ಅನ್ನೋ ಚಿಂತೆ ಬಿಡಿ; ಕಲೆ ತೆಗೆಯಲು ಇಲ್ಲಿದೆ ಟಿಪ್ಸ್

ಅಡುಗೆ ಮಾಡಿದ ಬಳಿಕ ಪಾತ್ರೆಗಳನ್ನು ತೊಳೆಯಲೇಬೇಕು. ಆದರೆ, ಕೆಲವೊಮ್ಮೆ ಅಡುಗೆ ಮಾಡುವಾಗ ಪಾತ್ರೆ ಕಪ್ಪಾಗುತ್ತದೆ. ಆಹಾರ ಹೆಚ್ಚು ಬೆಂದರೂ ಪಾತ್ರೆ ಕಪ್ಪು ಬಣ್ಣಕ್ಕೆ ತಿರುಗುತ್ತದೆ ಅಥವಾ ಸುಟ್ಟು ಹೋಗುತ್ತದೆ. ಇದನ್ನು ಸ್ವಚ್ಛಗೊಳಿಸುವುದು ಸ್ವಲ್ಪ ಕಷ್ಟ. ಬ್ರಷ್‌ನಿಂದ ಎಷ್ಟೇ ಉಜ್ಜಿದರೂ ಕಲೆ ಹೋಗುವುದಿಲ್ಲ. ಹೀಗಾಗಿ ಕೆಲವರು ಅದನ್ನು ಎರಡು ಮೂರು ದಿನಗಳವರೆಗೆ ನೀರಿನಲ್ಲಿ ಬಿಡುತ್ತಾರೆ. ಇಲ್ಲಿ ನೀಡಿರುವ ಸಣ್ಣ ಸಲಹೆಗಳೊಂದಿಗೆ ನಿಮಿಷಗಳಲ್ಲಿ ಪಾತ್ರೆಯನ್ನು ಸ್ವಚ್ಛಗೊಳಿಸಬಹುದು.

ಕಪ್ಪಾಗಿರುವ ಕಡಾಯಿಯನ್ನು ಸ್ವಚ್ಛಗೊಳಿಸಲು ಸಲಹೆ

ವಿನೆಗರ್ ಬಳಸಬಹುದು: ಕಡಾಯಿ ಕಪ್ಪಗಾದಾಗ ಅಡುಗೆ ಸೋಡಾ ಮತ್ತು ವಿನೆಗರ್ ಬಳಸಿ ಸ್ವಚ್ಛಗೊಳಿಸಬಹುದು. ಒಂದು ಸಣ್ಣ ಲೋಟ ನೀರು ತೆಗೆದುಕೊಂಡು ಅದಕ್ಕೆ ವಿನೆಗರ್ ಸೇರಿಸಿ. ಈಗ ಸುಟ್ಟುಹೋದ ಪ್ಯಾನ್ ಅನ್ನು ಒಲೆಯ ಮೇಲೆ ಇರಿಸಿ ಅದಕ್ಕೆ ವಿನೆಗರ್ ಬೆರೆಸಿದ ನೀರನ್ನು ಹಾಕಿ. ಕಡಿಮೆ ಉರಿಯಲ್ಲಿ ಇದನ್ನು ಬಿಸಿ ಮಾಡಿ. ಅದೇ ಪ್ಯಾನ್‌ಗೆ ಎರಡು ಚಮಚ ಅಡುಗೆ ಸೋಡಾ ಸೇರಿಸಿ ಚೆನ್ನಾಗಿ ಬೆರೆಸಿ. ಇದು ಚೆನ್ನಾಗಿ ಕುದಿಯಲು ಪ್ರಾರಂಭಿಸಿದ ನಂತರ, ಒಲೆ ಆಫ್ ಮಾಡಿ. ಈಗ ಇದನ್ನು ತಣ್ಣಗಾಗಲು ಬಿಡಿ. ಕಡಾಯಿ ತಣ್ಣಗಾದ ನಂತರ, ನೀವು ಬ್ರಷ್‌ನಿಂದ ಬಲವಾಗಿ ಉಜ್ಜಿದರೆ, ಅದು ಸ್ವಚ್ಛವಾಗುತ್ತದೆ.

ಇದನ್ನೂ ಓದಿ: ಕಿಚನ್ ಸಿಂಕ್ ಪದೇ ಪದೇ ಬ್ಲಾಕ್ ಆಗುವುದು; ಕೊಳಕು ವಾಸನೆ, ಜಿರಳೆಗಳಿಂದ ಬೇಸತ್ತಿದ್ದರೆ ಇಲ್ಲಿದೆ ಪರಿಹಾರ

ಬೇಕಿಂಗ್ ಸೋಡಾ ಪೇಸ್ಟ್: ಪಾತ್ರೆ ತುಂಬಾ ಸುಟ್ಟಿದ್ದರೆ, ಅದನ್ನು ಬೇಕಿಂಗ್ ಸೋಡಾ ಪೇಸ್ಟ್ ಬಳಸಿ ಸ್ವಚ್ಛಗೊಳಿಸಬಹುದು. ಇದಕ್ಕಾಗಿ ಅಡುಗೆ ಸೋಡಾವನ್ನು ಸಮಾನ ಪ್ರಮಾಣದ ನೀರಿನೊಂದಿಗೆ ಬೆರೆಸಿ ಪೇಸ್ಟ್ ತಯಾರಿಸಿ. ಇದನ್ನು ಕಡಾಯಿಗೆ ಹಚ್ಚಿ ಸ್ವಲ್ಪ ಸಮಯ ಇರಿಸಿ. ಅದರ ನಂತರ, ಸ್ಟೀಲ್ ಫೈಬರ್‌ನಿಂದ ಗಟ್ಟಿಯಾಗಿ ಉಜ್ಜಿದರೆ ಎಲ್ಲಾ ಕೊಳೆಯು ಹೊರಬರುತ್ತದೆ. ಕಡಾಯಿ ಹೊಸದರಂತೆ ಹೊಳೆಯುತ್ತದೆ.

ನಿಂಬೆ: ನಿಂಬೆ ಹಣ್ಣು ನೈಸರ್ಗಿಕವಾಗಿ ಕೊಳೆಯನ್ನು ತೊಡೆದುಹಾಕುವ ಗುಣಗಳನ್ನು ಹೊಂದಿದೆ. ಪಾತ್ರೆ ಸುಟ್ಟು ಹೋಗಿದ್ದರೆ ಅದನ್ನು ಹೊಳೆಯುವಂತೆ ಮಾಡಲು ನೀವು ನಿಂಬೆಹಣ್ಣನ್ನು ಬಳಸಬಹುದು. ನಿಂಬೆಯ ಜೊತೆಗೆ, ಪಾತ್ರೆ ತೊಳೆಯುವ ಸೋಪ್ ಸಹ ಅಗತ್ಯವಿರುತ್ತದೆ. ಕಪ್ಪಾಗಿರುವ ಕಡಾಯಿಗೆ ನಿಂಬೆ ರಸವನ್ನು ಹಿಂಡಿ. ಅದಕ್ಕೆ ನಿಂಬೆ ತುಂಡುಗಳನ್ನು ಸೇರಿಸಿ ಮತ್ತು ಅದಕ್ಕೆ ಸ್ವಲ್ಪ ನೀರನ್ನು ಹಾಕಿ. ಬಾಣಲೆಯನ್ನು ಒಲೆಯ ಮೇಲೆ ಇರಿಸಿ, ಸಣ್ಣ ಉರಿಯಲ್ಲಿ ಬಿಸಿ ಮಾಡಿ. ಅದು ಬೆಚ್ಚಗಾದಾಗ, ಸ್ಪಾಂಜ್‍ನಿಂದ ಉಜ್ಜಿ ಒಲೆಯನ್ನು ಆಫ್ ಮಾಡಬೇಕು. ನಂತರ ಅದಕ್ಕೆ ಮತ್ತೆ ಪಾತ್ರೆ ತೊಳೆಯುವ ದ್ರವವನ್ನು ಸೇರಿಸಿ ಕುದಿಸಿ. ನಂತರ ಒಲೆ ಆಫ್ ಮಾಡಿ. ಬಿಸಿ ಕಡಿಮೆಯಾದ ನಂತರ ನೀವು ಅದನ್ನು ಮತ್ತೆ ಸ್ಪಂಜಿನೊಂದಿಗೆ ಉಜ್ಜಿದರೆ, ಕಲೆ ಮಾಯವಾಗುತ್ತದೆ.

ಇದನ್ನೂ ಓದಿ: ಬೇಸಿಗೆಯಲ್ಲಿ ಮನೆಯೊಳಗೆ ಧೂಳಿನ ಸಮಸ್ಯೆ ಹೆಚ್ಚಿದ್ದರೆ ಚಿಂತೆ ಬೇಡ: ಶುಚಿಗೊಳಿಸುವ ಸುಲಭ ವಿಧಾನ ಇಲ್ಲಿದೆ