drinking coffee in paper cup: ಪೇಪರ್ ಕಪ್‌ನಲ್ಲಿ ಕಾಫಿ ಕುಡಿಯುವ ಅಭ್ಯಾಸ ನಿಮಗಿದೆಯೇ? ಹಾಗಾದರೆ ಇಲ್ಲೊಮ್ಮೆ ನೋಡಿ
drinking coffee in paper cup: ನೀವು ಕಾಫಿ ಪ್ರಿಯರಾಗಿದ್ದು, ಪೇಪರ್ ಕಪ್‌ನಲ್ಲಿ ಕಾಫಿ ಕುಡಿಯುತ್ತಿದ್ದೀರಾ? ಸಂಶೋಧನೆಯ ಪ್ರಕಾರ ಎಸೆಯುವ ಪೇಪರ್ ಕಪ್‌ನಲ್ಲಿ ಬಿಸಿದ್ರವವನ್ನು 15 ನಿಮಿಷಗಳ ಕಾಲ ಇರಿಸುವುದರಿಂದ ಸಾವಿರಕ್ಕೂ ಅಧಿಕ ಮೈಕ್ರೋ ಪ್ಲಾಸ್ಟಿಕ್‌ ಕಣಗಳು ಬಿಡುಗಡೆಯಾಗುತ್ತವೆ.
ಕಾಫಿ ನಿಮ್ಮ ದಿನದ ಸಂಗಾತಿಯೇ? ನಿಮ್ಮ ದಿನದ ಆರಂಭದಿಂದ, ದಿನ ಮುಗಿಯುವರೆಗೆ ಬಿಸಿ ಕಾಫಿ ಕುಡಿಯುತ್ತಲೇ ಇರುತ್ತೀರಾ? ಹಾಗಾದರೆ ಇದನ್ನು ಓದಿ.
ನೀವು ಬಿಸಿಕಾಫಿಯನ್ನು ಗಾಜಿನ ಕಪ್‌ ಅಥವಾ ಸ್ಟೀಲಿನ ಲೋಟದಲ್ಲಿ ಹಾಕಿಕೊಂಡು ಕುಡಿಯುತ್ತಿದ್ದರೆ ಅಂತಹ ಸಮಸ್ಯೆ ಇಲ್ಲ. ಆದರೆ ಕೆಲವರು ಕಾಫಿ ಅಥವಾ ಟೀಯನ್ನು ಪೇಪರ್ ಕಪ್‌ನಲ್ಲಿ ಕುಡಿಯುತ್ತಾರೆ. ಪ್ಲಾಸ್ಟಿಕ್‌ ಕಪ್‌ಗಳಿಗೆ ಹೋಲಿಸಿದರೆ ಈ ಕಪ್‌ ಪರಿಸರ ಹಾಗೂ ಆರೋಗ್ಯಕ್ಕೆ ಉತ್ತಮ ನಿಜ. ಆದರೆ ಈ ಕಪ್‌ಗಳೂ ಕೂಡ ಆರೋಗ್ಯಕ್ಕೆ ಹಾನಿ ಉಂಟುಮಾಡುತ್ತವೆ. ಯಾಕೆಂದರೆ ಇದರ ಒಳಗಡೆ ಪ್ಲಾಸ್ಟಿಕ್‌ ಕೋಟ್‌ ಅಳವಡಿಸಿರಲಾಗುತ್ತದೆ. ಸಂಶೋಧನೆಯ ಪ್ರಕಾರ ಪೇಪರ್ ಕಪ್‌ನಲ್ಲಿ 15 ನಿಮಿಷಗಳ ಕಾಲ ಬಿಸಿಯಾದ ವಸ್ತುವನ್ನು ಇರಿಸುವುದರಿಂದ ಸಾವಿರಕ್ಕೂ ಅಧಿಕ ಚಿಕ್ಕ ಪ್ಲಾಸ್ಟಿಕ್‌ ಕಣಗಳು ಆ ವಸ್ತುವಿನೊಂದಿಗೆ ಸೇರುತ್ತವೆ. ಒಬ್ಬ ವ್ಯಕ್ತಿ ಪೇಪರ್ ಕಪ್‌ನಲ್ಲಿ 3 ಕಪ್‌ ಕಾಫಿ ಕುಡಿದರೆ 75000ದಷ್ಟು ಮೈಕ್ರೋ ಪ್ಲಾಸ್ಟಿಕ್‌ ಕಣಗಳನ್ನು ಸೇವಿಸುವುದಕ್ಕೆ ಸಮ.
ಪ್ಲಾಸ್ಟಿಕ್‌ನಲ್ಲಿನ ಅಪಾಯ
ಪ್ಲಾಸ್ಟಿಕ್‌ ವಸ್ತುಗಳು ಸರ್ವವ್ಯಾಪಿಯಾಗಿವೆ. ಇದನ್ನು ನಮ್ಮ ಸುತ್ತಲೂ ಕಾಣಬಹುದು, ಅಲ್ಲದೇ ದಿನದಲ್ಲಿ ನಾವು ಎಷ್ಟು ಪ್ಲಾಸ್ಟಿಕ್‌ ವಸ್ತುಗಳನ್ನು ಬಳಸುತ್ತೇವೆ ಎಂಬುದನ್ನು ಲೆಕ್ಕ ಮಾಡಬಹುದು. ಮೈಕ್ರೋಪ್ಲಾಸ್ಟಿಕ್‌ಗಳು ನಮ್ಮ ದೇಹವನ್ನು ಹೇಗೆ ಪ್ರವೇಶಿಸಬಹುದು ಎಂಬ ಬಗ್ಗೆ ನಿರಂತರವಾಗಿ ಎಚ್ಚರಿಕೆ ನೀಡುತ್ತಲೇ ಇರುತ್ತಾರೆ ತಜ್ಞರು. ಆ ಕಾರಣಕ್ಕೆ ಹಲವು ದೇಶಗಳು ಒಂದು ಬಾರಿ ಬಳಸಿ ಎಸೆಯುವ ಪ್ಲಾಸ್ಟಿಕ್‌ ಅನ್ನು ಬ್ಯಾನ್‌ ಮಾಡಿವೆ. ಇದೆಲ್ಲದರ ನಡುವೆ ಪೇಪರ್ ಕಪ್‌ನಲ್ಲಿ ಬಿಸಿ ಕಾಫಿ ಅಥವಾ ಟೀ ಕುಡಿಯುವುದು ಅಪಾಯ ಎಂಬ ಅಂಶ ಸಾಬೀತಾಗಿದೆ.
ಪೇಪರ್ ಕಪ್‌ನ ಅಪಾಯಗಳೇನು?
ಪೇಪರ್ ಕಪ್‌ಗಳು ಪ್ಲಾಸ್ಟಿಕ್‌ ಕಪ್‌ಗಳಿಗಿಂತ ಆರೋಗ್ಯಕರ ಎಂಬುದು ನಿಜ. ಆದರೆ ಇದು ಎಷ್ಟರ ಮಟ್ಟಿಗೆ ನಿಜ ಎಂಬುದು ಮಾತ್ರ ಅನುಮಾನ. ಪೇಪರ್ ಕಪ್‌ನಲ್ಲಿ ಬಿಸಿ ಕಾಫಿ ಅಥವಾ ಟೀ ಕುಡಿಯುವುದರಿಂದ ಫಲವಂತಿಕೆಯ ಸಮಸ್ಯೆ, ಜರಠದ ಸಮಸ್ಯೆಗೆ ಕಾರಣವಾಗಬಹುದು. ಪೇಪರ್ ಕಪ್‌ನ ಒಳಭಾಗವು ಪ್ಲಾಸ್ಟಿಕ್‌ನಿಂದ ಲೇಪಿತವಾಗಿದ್ದು, ವಿಷಕಾರಿ ರಾಸಾಯನಿಕಗಳನ್ನು ನಿಮ್ಮ ಬಿಸಿ ಪಾನೀಯಕ್ಕೆ ಸೇರಿಸುತ್ತದೆ ಎನ್ನುತ್ತಾರೆ ತಜ್ಞರು.
ಖಗರ್‌ಪುರದ ಇಂಡಿಯನ್‌ ಇನ್‌ಸ್ಟಿಟ್ಯೂಟ್‌ ಆಫ್‌ ಟೆಕ್ನಾಲಜಿಯ ಸಂಶೋಧಕರು ಈ ಕುರಿತು ಅಧ್ಯಯನವನ್ನು ಕೈಗೊಂಡಿದ್ದರು.
ಆ ಅಧ್ಯಯನದ ಪ್ರಕಾರ 15 ನಿಮಿಷಗಳ ಕಾಲ ಪ್ಲಾಸ್ಟಿಕ್‌ ಕಪ್‌ನಲ್ಲಿ ಬಿಸಿ ಪದಾರ್ಥವಿದ್ದರೆ ಆ ಕಪ್‌ಗಳು 25,000ದಷ್ಟು ಪ್ರಮಾಣದ ಮೈಕ್ರೊ ಪ್ಲಾಸ್ಟಿಕ್‌ ಕಣಗಳು, ಹಾನಿಕಾರಕ ಅಯಾನುಗಳು ಹಾಗೂ ಭಾರೀ ಲೋಹವನ್ನು ಬಿಸಿ ಪದಾರ್ಥಕ್ಕೆ ಬಿಡುಗಡೆ ಮಾಡುತ್ತವೆ. ಬಿಸಿ ಕಾಫಿ ಇರುವ ಪೇಪರ್ ಕಪ್‌ನಲ್ಲಿ ಫ್ಲೋರೈಡ್‌, ಕ್ಲೋರೈಡ್‌, ನೈಟ್ರೇಟ್‌ ಹಾಗೂ ಸಲ್ಫೇಟ್‌ನಂತಹ ವಿಷಕಾರಿ ಲೋಹದಂತಹ ಅಯಾನುಗಳನ್ನು ಸಂಶೋಧಕರು ಕಂಡುಕೊಂಡಿದ್ದಾರೆ.
ಈ ರೀತಿ ಮೈಕ್ರೋಪ್ಲಾಸ್ಟಿಕ್‌ ಅಂಶ ಇರುವ ಪೇಪರ್ ಕಪ್‌ನಲ್ಲಿ ಬಿಸಿ ಕಾಫಿ ಅಥವಾ ಟೀ ಕುಡಿಯುವುದರಿಂದ ಹಾರ್ಮೋನುಗಳ ಅಸಮತೋಲನ, ಸಂತಾನೋತ್ಪತ್ತಿಯ ಸಮಸ್ಯೆ, ಕರುಳಿನ ಸಮಸ್ಯೆ, ಕ್ಯಾನ್ಸರ್‌ ಹಾಗೂ ನರದ ಸಮಸ್ಯೆಗಳು ಉಂಟಾಗಬಹುದು.
ಕೋಲ್ಡ್‌ ಡ್ರಿಂಕ್ಸ್‌ ಕುಡಿಯಬಹುದೇ?
ಐಐಟಿ ಸಂಶೋಧಕರ ಪ್ರಕಾರ ಕೋಣೆಯ ತಾಪಮಾನದಲ್ಲಿ ಪ್ಲಾಸ್ಟಿಕ್‌ನಲ್ಲಿ ನೀರು ಹಾಕುವುದರಿಂದ ಯಾವುದೇ ಸಮಸ್ಯೆ ಉಂಟಾಗುವುದಿಲ್ಲ. ಆ ಕಾರಣದಿಂದ ಪೇಪರ್ ಕಪ್‌ನಲ್ಲಿ ಕೋಲ್ಡ್‌ ಡ್ರಿಂಕ್ಸ್‌ ಕುಡಿಯಲು ಸಮಸ್ಯೆ ಇಲ್ಲ.
ಕಾಫಿ ಕುಡಿಯುವ ಸುರಕ್ಷಿತ ಮಾರ್ಗ
ಮೈಕ್ರೋಪ್ಲಾಸ್ಟಿಕ್‌ ಬಿಡುಗಡೆ ಮಾಡುವ ಪೇಪರ್ ಕಪ್‌ಗಿಂತ ಸ್ಟೀಲ್‌ ಅಥವಾ ಗಾಜಿನ ಲೋಟದಲ್ಲಿ ಬಿಸಿ ಕಾಫಿ, ಟೀ ಕುಡಿಯುವುದು ಉತ್ತಮ. ಇದು ನಿಮ್ಮ ಆರೋಗ್ಯ ಹಾಗೂ ಪರಿಸರ ಎರಡಕ್ಕೂ ಉತ್ತಮ.
ವಿಭಾಗ