Motivation: ನಮಗೇನು ಬೇಕು ಎನ್ನುವುದನ್ನು ತಿಳಿದುಕೊಂಡರೆ ಮಿಕ್ಕಿದ್ದು ಹಿಂಬಾಲಿಸುತ್ತದೆ! ರಂಗಸ್ವಾಮಿ ಮೂಕನಹಳ್ಳಿ ಅಂಕಣ

ರಂಗಸ್ವಾಮಿ ಮೂಕನಹಳ್ಳಿ ಬರಹ: ನಾವು ಏನು ಯೋಚಿಸುತ್ತೇವೆ ಅದೇ ಆಗುತ್ತೇವೆ ಎನ್ನುತ್ತದೆ ಒಂದು ನಾಣ್ನುಡಿ . ಹೌದು ನಮ್ಮೆಲ್ಲಾ ಒಟ್ಟುಚಿಂತನೆಗಳ ಮೊತ್ತವೇ ನಾವು . ನಮ್ಮನ್ನು ನಾವು ಹೇಗೆ ಕಲ್ಪಿಸಿಕೊಳ್ಳುತ್ತೇವೆ , ಊಹಿಸಿಕೊಳ್ಳುತ್ತೇವೆ ಬದುಕು ಹಾಗೆಯೇ ರೂಪುಗೊಳ್ಳುತ್ತದೆ. ಇದನ್ನು ಸರಳ ಕನ್ನಡದಲ್ಲಿ ಮನಸ್ಸಿನಂತೆ ಮಹಾದೇವ ಎಂದಿದ್ದಾರೆ. ಸಂಸ್ಕೃತ ಸುಭಾಷಿತದಲ್ಲಿ ಯದ್ಭಾವಂ ತದ್ಭವತಿ ಎಂದಿದ್ದಾರೆ. ಯಾವ ಭಾವ , ಯೋಚನೆಯಿದೆಯೋ ಹಾಗೆ ಆಗುತ್ತದೆ ಎನ್ನುವುದು ಅರ್ಥ.

ನಮ್ಮ ಸುತ್ತಮುತ್ತಲಿನ ಜಗತ್ತಿನಲ್ಲಿ ಸದಾ ಬದಲಾವಣೆ ಆಗುತ್ತಿರುತ್ತದೆ , ನಿತ್ಯವೂ ನೊರೆಂಟು ಘಟನೆಗಳು ಜರುಗುತ್ತವೆ. ಇವೆಲ್ಲವೂ ನಮ್ಮ ಯೋಚನೆಯ , ನಿರ್ಧಾರಗಳ ಫಲ. ಒಳ್ಳೆಯ ಯೋಚನೆಯ ಫಲಿತಾಂಶಒಳಿತನ್ನೂ ಕೆಟ್ಟ ಯೋಚನೆಗಳ ಫಲ ಕೆಡುಕನ್ನುನೀಡುತ್ತವೆ. ಹಿಂದಿನ ಅಧ್ಯಾಯವನ್ನು ಮತ್ತೊಮ್ಮೆ ಓದಿನೋಡಿ , ಅಲ್ಲಿ ಇಂದಿನ ನಮ್ಮ ಪರಿಸ್ಥಿತಿಗೆ ಬೇರಾರೂ ಕಾರಣವಲ್ಲ , ನಾವೇ ಕಾರಣಕರ್ತರು ಎಂದು ಹೇಳಲಾಗಿದೆ. ನಾವು ಎಂದರೆ ಯಾರು ? ನಮ್ಮ ಚಿಂತನೆಗಳೇ ನಾವು . ಹೀಗಾಗಿ ನಮ್ಮ ಚಿಂತನೆಗಳನ್ನು ನಿಯಂತ್ರಿಸುವುದರ ಮೂಲಕ ನಮ್ಮ ಬದುಕನ್ನು ಕೂಡ ನಿಯಂತ್ರಿಸಬಹುದು.

ನಮ್ಮ ಯೋಚನೆಗಳಿಗೆ , ಚಿಂತನೆಗಳಿಗೆ ಇರುವ ತಾಕತ್ತಿನ ಅರಿವು ನಮಗಾದರೆ ನಾವು ಎಂದಿಗೂ ಋಣಾತ್ಮಕ ಚಿಂತನೆಗಳನ್ನು ಮಾಡುವುದಿಲ್ಲ. ಧನಾತ್ಮಕ ಯೋಚನೆಯಿಂದ ಮಿರಾಕಲ್ ಸೃಷ್ಟಿಯಾಗುತ್ತದೆ. ವೈದ್ಯಕೀಯ ವಿಜ್ಞಾನವನ್ನು ಒಮ್ಮೆ ಗಮನಿಸಿ ನೋಡಿ . ಹತ್ತಿಪತ್ತು ಸಂಖ್ಯೆಯ ಇಲಿಗಳ ಮೇಲಿನ ಪ್ರಯೋಗ ಇದನ್ನು ಸಿದ್ಧಪಡಿಸಿದೆ. ಒಳ್ಳೆಯ ಮಾತು , ಒಳ್ಳೆಯ ವಾತಾವರದಲ್ಲಿದ್ದ ಇಲಿಗಳಿಗೂ , ಋಣಾತ್ಮಕ ವಾತಾವರಣದಲಿದ್ದ ಇಲಿಗಳಿಗೂ ಒಂದೇ ಆಹಾರವನ್ನು ನೀಡಲಾಗುತ್ತದೆ. ಧನಾತ್ಮಕ ಪರಿಸರದಲ್ಲಿನ ಇಲಿಗಳು ಹೆಚ್ಚು ಖುಷಿಯಿಂದ , ಆರೋಗ್ಯದಿಂದ ಇರುವುದು ಕಂಡು ಬಂದಿದೆ.

ನಿತ್ಯವೂ ನಾವು ಆಡುವ ಮಾತು , ನಡೆದು ಕೊಳ್ಳುವರೀತಿ ಅಭ್ಯಾಸವಾಗಿ ಬದಲಾಗುತ್ತದೆ. ಅಭ್ಯಾಸಗಳುನಿಧಾನವಾಗಿ ನಮ್ಮ ಪರಿಚಯವಾಗುತ್ತವೆ , ನಮ್ಮಪರಿಚಯ ನಮ್ಮ ಚಿಂತೆನಗಳನ್ನು ಜಗತ್ತಿಗೆ ಪ್ರಚುರಪಡಿಸುತ್ತವೆ. ಹೀಗಾಗಿ ನಾವು ನಿತ್ಯವೂ ನಮ್ಮ ಅಭ್ಯಾಸಗಳನ್ನು ಸ್ವಲ್ಪ ಬದಲಾವಣೆ ಮಾಡಿಕೊಳ್ಳುವುದರ ಮೂಲಕ ಬದುಕನ್ನು ಖಂಡಿತ ಬದಲಿಸಿಕೊಳ್ಳಬಹುದು.

ಧನಾತ್ಮಕ ಚಿಂತನೆಗಳಿಂದ ಎಲ್ಲವೂ ಸಾಧ್ಯ ಎನ್ನುವುದನ್ನು ಅವಹೇಳನ ಮಾಡುವವರ ಸಂಖ್ಯೆಯೂ ದೊಡ್ಡದಿದೆ. ಎಲ್ಲವೂ ಕೇವಲ ಯೋಚನೆ , ಚಿಂತನೆಗಳಿಂದ ಸಾಧಿಸಿಕೊಳ್ಳಲು ಸಾಧ್ಯವಿಲ್ಲ ಎನ್ನುವ ವಾದ ಇವರದು. ಹೊಟ್ಟೆ ತುಂಬಿದೆ ಎನ್ನುವ ಭಾವನೆಯಿಂದ ಎಷ್ಟು ದಿನ ಊಟ ಮಾಡದೆ ಇರಲು ಸಾಧ್ಯ? ನನಗೆ ಸಮಸ್ಯೆಗಳು ಇಲ್ಲ , ಅಥವಾಸಮಸ್ಯೆಗಳು ಪರಿಹಾರವಾಗುತ್ತವೆ ಎನ್ನುವ ಧನಾತ್ಮಕ ಯೋಚನೆಯಿಂದ ಸಮಸ್ಯೆ ಪರಿಹಾರವಾಗುತ್ತದೆಯೇ ? ಎನ್ನುವ ಪ್ರಶೆಗಳನ್ನು ಕೇಳುತ್ತಾರೆ. ಗಮನಿಸಿ, ಚಿಂತನೆಗಳಿಗೆ ಜೀವ ಕೊಟ್ಟಾಗ ಮಾತ್ರ ಮೇಲೆ ಹೇಳಿದ ಚಮತ್ಕಾರ ನಡೆಯುತ್ತದೆ. ಇದನ್ನು ಕನ್ನಡದ ಒಂದು ನಾಣ್ನುಡಿ ಚೆನ್ನಾಗಿ ವಿವರಿಸುತ್ತದೆ. ದೇವರು ಕೊಟ್ಟಜೋಳಿಗೆ ಎಂದು ಮರಕ್ಕೆ ನೇತು ಹಾಕಿ ನಿದ್ದೆ ಮಾಡಿದರೆಧವಸ ಧಾನ್ಯಗಳು ಸಿಗುವುದಿಲ್ಲ ಎನ್ನುತ್ತದೆ ಆ ಮಾತು. ಸ್ವತಃ ದೇವರೇ ಜೋಳಿಗೆ ಕೊಟ್ಟಿದ್ದರೂ ಕೂಡ ಅದನ್ನು ಹಿಡಿದು ಭಿಕ್ಷೆಗೆ ಊರೂರು ಸುತ್ತಬೇಕಾದ್ದು ಕರ್ತವ್ಯ. ಕೆಲಸವನ್ನು ಸರಿಯಾಗಿ ಮಾಡದೆ ವಿತಂಡವಾದದಿಂದ ಯಾವುದೇ ಪ್ರಯೋಜವಿಲ್ಲ.

ನಂಬಿಕೆ , ಧನಾತ್ಮಕತೆ ಎಲ್ಲವೂ ಬದುಕಿಗೆ ಬೇಕು , ಅವೆಲ್ಲವುಗಳ ಜೊತೆಗೆ ನಿತ್ಯ ಜೀವನಕ್ಕೆ ಬೇಕಾಗುವ ಸಾಮಾನ್ಯ ಜ್ಞಾನ ಮತ್ತು ರಿಯಾಲಿಟಿಗಳ ಅರಿವು ಕೂಡ ಮುಖ್ಯ. ಯಾವ ಸನ್ನಿವೇಶಕ್ಕೆ ಹೇಗೆ ಪ್ರತಿಕ್ರಿಯಿಸಬೇಕು ಎನ್ನುವುದನ್ನು ಯಾರೂ ಹೇಳಿಕೊಡಲು ಸಾಧ್ಯವಿಲ್ಲ. ಅದನ್ನು ನಾವೇ ಕಲಿಯಬೇಕು.

ಇದನ್ನೂ ಓದಿ: ಪ್ಯಾಶನ್‌ ಹಿಂದೆ ಹೋಗುವವರಿಗೆ ಅರವಿಂದ ಸ್ವಾಮಿ, ವಿವೇಕ್ ಒಬೆರಾಯ್ ಸ್ಫೂರ್ತಿಯಾಗಲಿ- ರಂಗಸ್ವಾಮಿ ಮೂಕನಹಳ್ಳಿ ಬರಹ

ಬದುಕಿನ ಪ್ರಥಮ ಇಪ್ಪತ್ತು ವರ್ಷಗಳು ನನಗೇನು ಬೇಕು ಎನ್ನುವುದು ನನಗೆ ಗೊತ್ತಿರಲಿಲ್ಲ. ಬದುಕಿನಿಂದ ಏನು ಬಯಸಬೇಕು ಗೊತ್ತಿರಲಿಲ್ಲ. ಸದಾ ಬೇಸರ , ಜಿಗುಪ್ಸೆ ಎನ್ನುವ ಪದಗಳ ಜೊತೆಯಲ್ಲಿ ನನ್ನ ಜೀವನ ಸಾಗುತ್ತಿತ್ತು. ನನ್ನ ಕಣ್ಣಿಗೆ ಜಗತ್ತೆಲ್ಲವೂ ಶತ್ರುಗಳಂತೆ , ನನ್ನ ವಿರುದ್ಧ ಪಿತೂರಿ ಮಾಡುತ್ತಿರುವಂತೆ ಅನ್ನಿಸುತ್ತಿತ್ತು. ನನ್ನೆಲ್ಲಾ ಸೋಲುಗಳಿಗೆ ಬೇರೆಯವರೇ ಕಾರಣ , ಈ ಸಮಾಜ ಪಟ್ಟಭದ್ರ ಹಿತಾಸಕ್ತಿಗಳಿಂದ ತುಂಬಿ ಹೋಗಿದೆ , ಎಲ್ಲರೂ ಅವರವರಿಗೆ ಬೇಕಾದವರಿಗೆ ಸಹಾಯ ಮಾಡುತ್ತಾರೆ , ಹೀಗಾಗಿ ಅವರ ಬದುಕು ಹಸನಾಗಿದೆ ಎನ್ನುವ ಚಿಂತನೆಯಲ್ಲಿ ಮುಳುಗಿದ್ದೆ. ನನ್ನ ೨೩ ವಯಸ್ಸಿನಲ್ಲಿ ' ಬದುಕಲು ಕಲಿಯಿರಿ ' ಎನ್ನುವ ಪುಸ್ತಕ ಓದಲು ಸಿಕ್ಕಿತು. ಅದು ಬದುಕನ್ನು ಬದಲಿಸಿತು. ನಾವು ಚಿಂತಿಸುವ ರೀತಿ ಬದಲಾಯಿಸಿಕೊಳ್ಳುವುದರಿಂದ ಬದುಕನ್ನು ಬದಲಾಯಿಸಿಕೊಳ್ಳಬಹುದು ಎನ್ನುವುದನ್ನು ಆ ಪುಸ್ತಕ ಕಲಿಸಿತು. ಬರಿ ಪುಸ್ತಕ ಓದುವುದರಿಂದ ಬದಲಾವಣೆ ಸಾಧ್ಯವಿಲ್ಲ. ಅಲ್ಲಿನ ಚಿಂತನೆಗಳನ್ನು ಅನುಷ್ಠಾನಕ್ಕೆ ತರಬೇಕಾಗುತ್ತದೆ.

ಇದನ್ನೂ ಓದಿ: ಲಾಭವಿಲ್ಲದ ಒಳಿತು ಯಾರಿಗೂ ಬೇಡ. ಲಾಭವಾಗುವುದಿದ್ದರೆ ರಾವಣನೂ ಓಕೆ; ರಂಗಸ್ವಾಮಿ ಮೂಕನಹಳ್ಳಿ ಬರಹ

ನನ್ನ ಮಗಳು ವರ್ಷದ ಮಗುವಾಗಿದ್ದ ಸಮಯದಿಂದ ಅವಳ ಕಿವಿಯಲ್ಲಿ ಐದು ಧನಾತ್ಮಕ ಪದಗಳನ್ನು ಹೇಳುತ್ತಾ ಬಂದೆವು. ಇಂದಿಗೆ ಅವುಗಳನ್ನು ಅವಳೇ ಜಪಿಸುತ್ತಾಳೆ. ಈ ಮಂತ್ರಗಳನ್ನು ನಿಮಗೂ ಹೇಳುವೆ . ಅದು ಕೇವಲ ತುಟಿಯ ಮೇಲಿನ ಶಬ್ದಗಳಾಗಿರದೆ, ಮನಸ್ಸಿನಿಂದ ಬಂದವಾಗಿರಲಿ .

1. ಐ ಆಮ್ ದಿ ಬೆಸ್ಟ್ .
2. ಟುಡೇ ಇಸ್ ಮೈ ಡೇ
3. ಐ ಕ್ಯಾನ್ ಡು ಇಟ್
4. ಐ ಆಮ್ ದಿ ವಿನ್ನರ್
5. ಗಾಡ್ , ಯುವರ್ ವಿಥ್ ಮಿ

ನಂಬಿಕೆಯಿಲ್ಲದೆ ಮೇಲಿನ ಮಂತ್ರಗಳ ಉಚ್ಚಾರಣೆಯಿಂದ ಯಾವುದೇ ಪ್ರಯೋಜನವಿಲ್ಲ. ನಿಮ್ಮ ಮನೆಯಲ್ಲಿ ಮಕ್ಕಳಿದ್ದರೆ ಅವರಿಗೆ ಈ ಮಂತ್ರೋಪದೇಶ ತಪ್ಪದೆ ಮಾಡಿ .

ಹೋಗುವಮುನ್ನ: ನಮ್ಮ ಚಿಂತನೆಗಳನ್ನು ಬದಲಾಯಿಸಿಕೊಳ್ಳುವುದರ ಮೂಲಕ ಬದುಕನ್ನು ಬದಲಾಯಿಸಿಕೊಳ್ಳಬಹುದು . ಧನಾತ್ಮಕತೆ ಎಂದರೆ ರಿಯಾಲಿಟಿಯನ್ನು ಒಪ್ಪಿಕೊಂಡು ಬದಲಾವಣೆಗೆ ಚಿಂತಿಸುವುದು . ಯೋಚನೆ -ಭಾವನೆ -ಬದಲಾವಣೆ -ಕಾರ್ಯ ತತ್ಪರತೆ ಇವೆ ಧನಾತ್ಮಕತೆ .

• ಬರಹ: ರಂಗಸ್ವಾಮಿ ಮೂಕನಹಳ್ಳಿ