Mango Season: ರುಚಿಯಾದ ಮಾವಿನಹಣ್ಣನ್ನು ತಿನ್ನುವ ಮೊದಲು ಗಮನಿಸಿ; ಇಲ್ಲಿದೆ ನೋಡಿ ಸರಿಯಾದ ವಿಧಾನ
ಹಣ್ಣಿನ ರಾಜ ಎಂದು ಕರೆಯಲ್ಪಡುವ ಮಾವು ಈ ಬಾರಿ ವಾಡಿಕೆಗಿಂತ ತಡವಾಗಿ ಮಾರುಕಟ್ಟೆಗೆ ಬಂದಿದೆ. ಬೇಸಿಗೆಯಲ್ಲಿ ಜನರು ಹೆಚ್ಚಿನ ಸಂಖ್ಯೆಯ ಮಾವಿನ ಹಣ್ಣುಗಳನ್ನು ತಿನ್ನುತ್ತಾರೆ. ಅವು ಆರೋಗ್ಯಕ್ಕೆ ಒಳ್ಳೆಯದಾದರೂ, ಅವುಗಳನ್ನು ತಿನ್ನುವುದಕ್ಕೆ ಕೆಲವು ನಿಯಮಗಳಿವೆ. ನೀವು ಸರಿಯಾದ ಪ್ರಮಾಣದಲ್ಲಿ ಮತ್ತು ರೀತಿಯಲ್ಲಿ ತಿನ್ನದಿದ್ದರೆ, ಆರೋಗ್ಯಕ್ಕೆ ಹಾನಿಯಾಗುವ ಸಾಧ್ಯತೆಯಿದೆ.
ಮಾವಿನ ಹಣ್ಣಿನ ಸೀಸನ್ ಆರಂಭವಾಗಿದೆ, ವಿವಿಧ ಬಣ್ಣ, ರುಚಿ ಮತ್ತು ಗಾತ್ರದ ಮಾವಿನ ಹಣ್ಣು ಮಾರುಕಟ್ಟೆ ಪ್ರವೇಶಿಸಿದೆ. ಬೇಸಿಗೆಯಲ್ಲಿ ರುಚಿಕರವಾದ ಮತ್ತು ತಂಪಾದ ಮಾವಿನಹಣ್ಣನ್ನು ಜನರು ಮಾರುಕಟ್ಟೆಯಿಂದ ತಂದು ತಿನ್ನುವುದು ಮಾಮೂಲು. ಹಣ್ಣಿನ ರಾಜ ಮಾವಿನ ರುಚಿ ಸವಿಯಲು ಅನೇಕ ಜನರು ಅದನ್ನು ಆನಂದಿಸಲು ಬೇಸಿಗೆಯ ಆಗಮನವನ್ನು ಎದುರು ನೋಡುತ್ತಾರೆ. ಅನೇಕ ಜನರು ತಿನ್ನಲು ಇಷ್ಟಪಡುವ ಮಾವಿನಹಣ್ಣು ರುಚಿಗೆ ಮಾತ್ರವಲ್ಲದೆ ನಮ್ಮ ಆರೋಗ್ಯಕ್ಕೂ ಒಳ್ಳೆಯದು. ಮಾವಿನಹಣ್ಣಿನಲ್ಲಿ ವಿಟಮಿನ್ ಸಿ ಇದ್ದು, ಇದು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸುತ್ತದೆ, ವಿಟಮಿನ್ ಎ, ಇದು ಚರ್ಮ ಮತ್ತು ಕಣ್ಣುಗಳ ಆರೋಗ್ಯಕ್ಕೆ ಸಹಾಯ ಮಾಡುತ್ತದೆ. ಇದು ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ ಮತ್ತು ಹೃದಯದ ಆರೋಗ್ಯವನ್ನು ಹೆಚ್ಚಿಸುತ್ತದೆ. ಅಷ್ಟೇ ಅಲ್ಲದೆ, ರಕ್ತಹೀನತೆಯನ್ನು ತಡೆಗಟ್ಟಲು ಮತ್ತು ಮನಸ್ಥಿತಿಯನ್ನು ಸುಧಾರಿಸಲು ಸಹಾಯ ಮಾಡುತ್ತದೆ. ಮಾವು ಆರೋಗ್ಯಕ್ಕೆ ಒಳ್ಳೆಯದಾದರೂ, ಅದನ್ನು ಸರಿಯಾದ ಪ್ರಮಾಣದಲ್ಲಿ ಮತ್ತು ಸರಿಯಾದ ರೀತಿಯಲ್ಲಿ ತಿನ್ನದಿದ್ದರೆ, ಅದು ಆರೋಗ್ಯಕ್ಕೆ ಹಾನಿಯುಂಟು ಮಾಡಬಹುದು. ಮಾವಿನ ಹಣ್ಣನ್ನು ತಿನ್ನುವ ಸರಿಯಾದ ವಿಧಾನದ ಬಗ್ಗೆ ಇಲ್ಲಿದೆ ನೋಡಿ ಮಾಹಿತಿ.
ಮಾವಿನ ಹಣ್ಣನ್ನು ತಿನ್ನುವ ಮೊದಲು ಇಲ್ಲಿ ಗಮನಿಸಿ
ಅನೇಕ ಜನರು ಮಾವಿನಹಣ್ಣುಗಳನ್ನು ತಂದ ಕೂಡಲೇ ಫ್ರಿಡ್ಜ್‌ನಲ್ಲಿ ಇರಿಸುತ್ತಾರೆ. ಮಾವು ಹಾಳಾಗದಂತೆ, ಹೆಚ್ಚಿನ ಸಮಯ ತಾಜಾವಾಗಿಡಲು ಜನರು ಅದನ್ನು ಫ್ರಿಡ್ಜ್‌ನಲ್ಲಿ ಇರಿಸುತ್ತಾರೆ ನಿಜ. ಆದರೆ ತಿನ್ನುವ ಮೊದಲು ಅವುಗಳನ್ನು ಹೊರತೆಗೆದು ನೇರವಾಗಿ ಹಾಗೆಯೇ ತಿನ್ನಬಾರದು. ವಾಸ್ತವವಾಗಿ, ಮಾವಿನಹಣ್ಣುಗಳನ್ನು ಮಾರುಕಟ್ಟೆಯಿಂದ ತಂದ ತಕ್ಷಣ ತೊಳೆಯುವುದು ಸರಿಯಾದ ಮಾರ್ಗವಲ್ಲ. ನೀವು ಅವುಗಳನ್ನು ತಕ್ಷಣ ತಿನ್ನಲು ಬಯಸಿದರೆ, ಮಾವಿನ ಹಣ್ಣುಗಳನ್ನು ಒಂದು ಪಾತ್ರೆಯಲ್ಲಿ ಅಥವಾ ಟಬ್‌ನಂತಹ ಅಗಲವಾದ ಬಟ್ಟಲಿನಲ್ಲಿ ಹಾಕಿ ಅದರಲ್ಲಿ ಹಾಕಿ 25 ರಿಂದ 30 ನಿಮಿಷಗಳ ಕಾಲ ನೆನೆಸಿಡಬಹುದು. ನಂತರ ಅದನ್ನು ತಣ್ಣೀರಿನಲ್ಲಿ ತೊಳೆದು ತಿನ್ನುವುದು ಉತ್ತಮ. ಅಲ್ಲದೆ, ಮಾವಿನ ಹಣ್ಣಿನ ಮೇಲ್ಮೈ ಅಂಟಿನ ಅಂಶ ಕಂಡುಬಂದರೆ, ನೀರಿನಲ್ಲಿ ನೆನೆಸುವಾಗ ಸ್ವಲ್ಪ ಪ್ರಮಾಣದ ಉಪ್ಪು ಸೇರಿಸುವುದು ಉತ್ತಮ. ಇದರಿಂದ ಮಾವಿನ ಹಣ್ಣಿನ ಮೇಲ್ಮೈಗೆ ಕೀಟನಾಶಕ ಸಿಂಪಡಿಸಿದ್ದರೆ, ಅದನ್ನು ನಿವಾರಿಸಿ ತಿನ್ನುವುದು ಸೂಕ್ತ.
ಮಾವಿನ ಹಣ್ಣನ್ನು ಮನೆಯಲ್ಲಿ ಸಂಗ್ರಹಿಸುವುದು ಹೇಗೆ?
ಸಂಪೂರ್ಣವಾಗಿ ಹಣ್ಣಾಗದ ಮಾವಿನಹಣ್ಣುಗಳನ್ನು ನೀವು ಮನೆಗೆ ತಂದರೆ, ಅವುಗಳನ್ನು ಫ್ರಿಡ್ಜ್‌ನಲ್ಲಿ ಇಡಬೇಡಿ. ಅವು ಕೋಣೆಯ ಸಾಮಾನ್ಯ ತಾಪಮಾನದಲ್ಲಿರುವುದರಿಂದ 5-7 ದಿನಗಳಲ್ಲಿ ಪಕ್ವವಾಗುತ್ತವೆ.
ಹಣ್ಣುಗಳನ್ನು ಕಾಗದದಿಂದ ಮುಚ್ಚಿ ಇರಿಸಿದರೆ, ಹಣ್ಣುಗಳು ಬೇಗನೆ ಹಣ್ಣಾಗುತ್ತವೆ. ಹಣ್ಣುಗಳನ್ನು ನೇರವಾಗಿ ಬೆಳಕಿಗೆ ಒಡ್ಡಿಕೊಳ್ಳುವ ಸ್ಥಳದಲ್ಲಿ ಇಡುವುದರಿಂದ ಅವುಗಳಿಗೆ ಹಾನಿಯಾಗಬಹುದು. ಅದರಲ್ಲೂ, ಬೈಹುಲ್ಲು ಇದ್ದರೆ, ಅದರಲ್ಲಿ ಮುಚ್ಚಿ ಇರಿಸಿದರೆ ಇನ್ನೂ ಉತ್ತಮ. ಆದರೆ ನಗರಗಳಲ್ಲಿ ಮನೆ ಇರುವವರಿಗೆ ಬೈಹುಲ್ಲು ಇರುವುದಿಲ್ಲ, ಅದರ ಬದಲು ಪೇಪರ್‌ ಬಳಕೆ ಸೂಕ್ತ.
ನೀವು ಮಾವಿನಹಣ್ಣುಗಳನ್ನು ಸಂಗ್ರಹಿಸಲು ಬಯಸಿದರೆ, ಅವುಗಳನ್ನು ಇತರ ಹಣ್ಣುಗಳೊಂದಿಗೆ ಒಟ್ಟಿಗೆ ಇಡಬೇಡಿ, ಏಕೆಂದರೆ ಇತರ ಹಣ್ಣುಗಳಿಂದ ಬಿಡುಗಡೆಯಾಗುವ ಎಥಿಲೀನ್ ಅನಿಲವು ಈ ಹಣ್ಣನ್ನು ತ್ವರಿತವಾಗಿ ಹಾನಿಗೊಳಿಸುತ್ತದೆ.
ನೀವು ಮಾವಿನಹಣ್ಣುಗಳನ್ನು ಫ್ರಿಡ್ಜ್‌ನಲ್ಲಿ ಸಂಗ್ರಹಿಸಿ ಇಟ್ಟಿದ್ದರೆ, ತಿನ್ನುವ ಅರ್ಧ ಗಂಟೆ ಮೊದಲು ಅವುಗಳನ್ನು ಹೊರತೆಗೆಯಿರಿ ಮತ್ತು ತಂಪು ಕಡಿಮೆಯಾದ ನಂತರ ಕತ್ತರಿಸಿ ತಿನ್ನಿರಿ.
ಮಾವಿನಹಣ್ಣು ತಿಂದ ನಂತರ:
ಮಾವಿನಹಣ್ಣು ತಿಂದ ನಂತರ, ಕೆಲವು ಆಹಾರಗಳ ಸೇವನೆ ತಪ್ಪಿಸಬೇಕು ಮತ್ತು ಕೆಲವು ರೀತಿಯ ಕೆಲಸಗಳನ್ನು ಮಾಡಬಾರದು ಎಂದು ತಜ್ಞರು ಹೇಳುತ್ತಾರೆ.
ತಣ್ಣೀರು ಕುಡಿಯಬೇಡಿ: ಮಾವಿನ ಹಣ್ಣನ್ನು ತಿಂದ ನಂತರ ತಣ್ಣೀರು ಕುಡಿಯುವುದರಿಂದ ಜೀರ್ಣಕ್ರಿಯೆಯ ಮೇಲೆ ಪರಿಣಾಮ ಬೀರುತ್ತದೆ.
ಡೈರಿ ಉತ್ಪನ್ನಗಳನ್ನು ತಿನ್ನಬೇಡಿ: ಮಾವು ಮತ್ತು ಹಾಲಿನ ಸಂಯೋಜನೆಯು ಜೀರ್ಣಕಾರಿ ಸಮಸ್ಯೆಗಳು, ಮಲಬದ್ಧತೆ ಅಥವಾ ಹೊಟ್ಟೆಯ ಅಸ್ವಸ್ಥತೆಗೆ ಕಾರಣವಾಗಬಹುದು. ಆದ್ದರಿಂದ ಮಾವಿನ ಹಣ್ಣನ್ನು ತಿಂದ ನಂತರ ಹಾಲು ಕುಡಿಯಬೇಡಿ.
ಧೂಮಪಾನ ಅಥವಾ ಮದ್ಯಪಾನ ಮಾಡಬೇಡಿ: ಮಾವಿನಹಣ್ಣು ತಿಂದ ನಂತರ ಧೂಮಪಾನ ಅಥವಾ ಮದ್ಯಪಾನವು ಜೀರ್ಣಕ್ರಿಯೆಯ ಮೇಲೆ ಪ್ರತಿಕೂಲ ಪರಿಣಾಮ ಬೀರುತ್ತದೆ.
ಬಿಸಿ ಬಿಸಿ ಆಹಾರವನ್ನು ತಿನ್ನಬೇಡಿ: ಮಾವಿನಹಣ್ಣು ತಿಂದ ನಂತರ ಬಿಸಿ ಅಥವಾ ಮಸಾಲೆಯುಕ್ತ ಆಹಾರವನ್ನು ಸೇವಿಸುವುದು ಸೂಕ್ತವಲ್ಲ, ಏಕೆಂದರೆ ಇದು ಹೊಟ್ಟೆಯಲ್ಲಿ ಅಸ್ವಸ್ಥತೆಯನ್ನು ಉಂಟುಮಾಡುತ್ತದೆ.
ಇತರ ಹಣ್ಣುಗಳನ್ನು ತಿನ್ನಬೇಡಿ: ಮಾವಿನಹಣ್ಣು ತಿಂದ ನಂತರ ಇತರ ಹಣ್ಣುಗಳನ್ನು ತಿನ್ನುವುದರಿಂದ ಜೀರ್ಣಕಾರಿ ಸಮಸ್ಯೆಗಳು, ಗ್ಯಾಸ್ ಅಥವಾ ಅಜೀರ್ಣ ಉಂಟಾಗಬಹುದು.
ನಿದ್ರೆ ಮಾಡಬೇಡಿ: ಮಾವಿನಹಣ್ಣು ತಿಂದ ತಕ್ಷಣ ನಿದ್ರೆಗೆ ಜಾರುವುದರಿಂದ ಜೀರ್ಣಕ್ರಿಯೆಯಲ್ಲಿ ತೊಂದರೆಯಾಗಬಹುದು. ಊಟ ಮಾಡಿದ ನಂತರ ಕನಿಷ್ಠ ಅರ್ಧ ಗಂಟೆ ಬಿಟ್ಟು ನಂತರ ಬೇಕಾದಲ್ಲಿ ನಿದ್ದೆ ಮಾಡಿ.
ಮಾವಿನಹಣ್ಣು ತಿಂದ ನಂತರ 30 ನಿಮಿಷದಿಂದ 1 ಗಂಟೆಯವರೆಗೆ ತೂಕ ಎತ್ತುವ ಅಥವಾ ದೈಹಿಕ ವ್ಯಾಯಾಮ ಮಾಡಬೇಡಿ. ಇದು ಜೀರ್ಣಕ್ರಿಯೆಯನ್ನು ಹಾನಿಗೊಳಿಸುತ್ತದೆ.
ದಿನಕ್ಕೆ ಎಷ್ಟು ಮಾವಿನಹಣ್ಣುಗಳನ್ನು ತಿನ್ನಬೇಕು?
ಅನೇಕ ಜನರು ಮಾವಿನಹಣ್ಣುಗಳನ್ನು ತುಂಬಾ ಇಷ್ಟಪಡುತ್ತಾರೆ, ಅವರು ಒಂದೇ ಬಾರಿಗೆ ಎರಡರಿಂದ ಮೂರು ಮಾವಿನಹಣ್ಣುಗಳನ್ನು ತಿನ್ನುತ್ತಾರೆ. ಒಂದು ಸಮಯದಲ್ಲಿ 5 ರಿಂದ 6 ಮಾವಿನಹಣ್ಣುಗಳನ್ನು ತಿನ್ನುವ ಅನೇಕ ಜನರಿದ್ದಾರೆ. ಇದು ತುಂಬಾ ತಪ್ಪು. ನೀವು ಹೀಗೆ ಮಾಡಿದರೆ, ಹಣ್ಣಿನ ಸೇವನೆಯ ಪ್ರಯೋಜನಗಳ ಬದಲು ಆರೋಗ್ಯಕ್ಕೆ ಸಮಸ್ಯೆಯಾಗಬಹುದು. ಅಲ್ಲದೆ, ಜೀರ್ಣಕಾರಿ ಸಮಸ್ಯೆಗಳು ಹೆಚ್ಚಾಗುತ್ತವೆ. ತಜ್ಞರ ಸಲಹೆಯ ಪ್ರಕಾರ, ದಿನಕ್ಕೆ 1-2 ಕಪ್, ಅಂದರೆ ದಿನಕ್ಕೆ 150 ರಿಂದ 330 ಗ್ರಾಂ ಮಾವಿನಹಣ್ಣುಗಳನ್ನು ತಿನ್ನಲು ಸಲಹೆ ನೀಡಲಾಗುತ್ತದೆ. ಅಂದರೆ, ದಿನಕ್ಕೆ ಒಂದಕ್ಕಿಂತ ಹೆಚ್ಚು ಮಧ್ಯಮ ಗಾತ್ರದ ಮಾವಿನಹಣ್ಣುಗಳನ್ನು ತಿನ್ನಬಹುದು. ಸಿಹಿ ಇದೆ ಮತ್ತು ರುಚಿಯಾಗಿದೆ ಎಂದು ಒಮ್ಮೆಲೆ ಹೆಚ್ಚಿನ ಪ್ರಮಾಣದಲ್ಲಿ ಹಣ್ಣು ಸೇವಿಸಿದರೆ, ಹೊಟ್ಟೆ ಕೆಡಬಹುದು.
(ಗಮನಿಸಿ: ಈ ಮಾಹಿತಿಯು ಸಾಮಾನ್ಯಜ್ಞಾನ ಹಾಗೂ ಅಂತರ್ಜಾಲದಲ್ಲಿ ಸಿಕ್ಕ ಮಾಹಿತಿಯನ್ನ ಆಧರಿಸಿದೆ. ಈ ವಿಚಾರ ಸಂಪೂರ್ಣ ನಿಖರವಾಗಿದೆ ಎಂದು ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಪ್ರತಿಪಾದಿಸುವುದಿಲ್ಲ. ಈ ವಿಷಯದ ಕುರಿತ ನಿಖರ ಮಾಹಿತಿಗಾಗಿ ಸಂಬಂಧಪಟ್ಟ ಕ್ಷೇತ್ರದ ತಜ್ಞರನ್ನು ಸಂಪರ್ಕಿಸಿ)
Kiran Kumar I G
