ಒಂದು ದೇಶ, ಒಂದೇ ಚಾರ್ಜರ್; ಭಾರತದಲ್ಲಿ ಬರಲಿದೆ ನೂತನ ನಿಯಮ, ಟೆಕ್ ಲೋಕದಲ್ಲಿ ಪ್ರಮುಖ ಬದಲಾವಣೆ

ಯುರೋಪಿಯನ್ ಯೂನಿಯನ್‌ನಲ್ಲಿರುವಂತೆ, ಭಾರತದಲ್ಲಿಯೂ ಚಾರ್ಜರ್ ನಿಯಮವನ್ನು ಜಾರಿಗೊಳಿಸಲು ಸಿದ್ಧತೆಗಳು ನಡೆಯುತ್ತಿವೆ. ವರದಿಗಳ ಪ್ರಕಾರ, ಕಾಮನ್ ಚಾರ್ಜಿಂಗ್ ಪೋರ್ಟ್ ನಿಯಮವನ್ನು ಜಾರಿಗೆ ತರಲು ಸರ್ಕಾರ ಯೋಚಿಸುತ್ತಿದೆ. ಈ ನಿಯಮವನ್ನು ಜಾರಿಗೆ ತಂದರೆ, ಎಲ್ಲಾ ಸ್ಮಾರ್ಟ್‌ಫೋನ್‌ಗಳು, ಟ್ಯಾಬ್ಲೆಟ್‌ಗಳಿಗೆ ಒಂದೇ ರೀತಿಯ ಚಾರ್ಜಿಂಗ್ ಪೋರ್ಟ್ ಇರಲಿದೆ. ಸರ್ಕಾರವು ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ಅನ್ನು ಸಾಮಾನ್ಯಗೊಳಿಸಬಹುದು ಎನ್ನಲಾಗಿದೆ. ಯುರೋಪಿಯನ್ ಒಕ್ಕೂಟವು 2022ರಲ್ಲಿ ಈ ನಿಯಮವನ್ನು ಅಳವಡಿಸಿಕೊಂಡಿದೆ. ನಂತರ ಆ್ಯಪಲ್ ಐಫೋನ್‌ನಲ್ಲಿ ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ಅನ್ನು ಸಹ ಒದಗಿಸಬೇಕಾಗಿತ್ತು. ಈ ವರ್ಷಾಂತ್ಯದೊಳಗೆ ಸರ್ಕಾರ ಈ ಬಗ್ಗೆ ಘೋಷಣೆ ಮಾಡಲಿದೆ.

ಸರ್ಕಾರವು ಒಂದು ದೇಶ ಒಂದು ಚಾರ್ಜರ್ ನಿಯಮವನ್ನು ಜಾರಿಗೆ ತಂದರೆ ಗ್ರಾಹಕರು ತಮ್ಮ ಎಲ್ಲಾ ಸ್ಮಾರ್ಟ್‌ಫೋನ್‌ಗಳು ಮತ್ತು ಟ್ಯಾಬ್ಲೆಟ್‌ಗಳನ್ನು ಒಂದೇ ಚಾರ್ಜರ್‌ನಿಂದ ಚಾರ್ಜ್ ಮಾಡಬಹುದು. ಅಲ್ಲದೆ ಮುಂದಿನ ದಿನಗಳಲ್ಲಿ ಲ್ಯಾಪ್‌ಟಾಪ್‌ಗಳಿಗೆ ಕೂಡ ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ಅನ್ನು ಸರ್ಕಾರ ಕಡ್ಡಾಯಗೊಳಿಸುತ್ತದೆ.

ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯವು ಟ್ಯಾಬ್ಲೆಟ್‌ಗಳು, ಸ್ಮಾರ್ಟ್‌ಫೋನ್‌ಗಳು ಮತ್ತು ಲ್ಯಾಪ್‌ಟಾಪ್‌ಗಳಿಗೆ ಒಂದೇ ಚಾರ್ಜಿಂಗ್ ಪೋರ್ಟ್ ಅನ್ನು ಬಳಸಬೇಕೆಂದು ಬಯಸುತ್ತಿದೆ. ಲ್ಯಾಪ್‌ಟಾಪ್‌ಗಳಿಗೆ ಈ ನಿಯಮವನ್ನು 2026 ರಲ್ಲಿ ಜಾರಿಗೆ ತರಲಾಗುತ್ತದೆ. ಆದರೆ ಸ್ಮಾರ್ಟ್‌ಫೋನ್‌ಗಳು ಮತ್ತು ಟ್ಯಾಬ್ಲೆಟ್‌ಗಳಿಗೆ ಸದ್ಯದಲ್ಲೇ ಈ ನಿಯಮ ಜಾರಿಗೆ ಬರಲಿದೆಯಂತೆ. ಸರ್ಕಾರದ ಈ ಕ್ರಮದ ಹಿಂದೆ ಬಲವಾದ ಕಾರಣವಿದೆ. ಎಲ್ಲಾ ಎಲೆಕ್ಟ್ರಿಕ್ ಸಾಧನಗಳಿಗೆ ಒಂದೇ ಚಾರ್ಜರ್​ನಿಂದ ಚಾರ್ಜ್ ಮಾಡುವ ಮೂಲಕ ಬಳಕೆದಾರರ ವೆಚ್ಚವನ್ನು ಕಡಿಮೆ ಮಾಡಲು ಸರ್ಕಾರ ಬಯಸಿದೆ. ಹಾಗೆಯೆ ವಿವಿಧ ಚಾರ್ಜರ್‌ಗಳಿಂದ ಉಂಟಾಗುವ ಎಲೆಕ್ಟ್ರಾನಿಕ್ ತ್ಯಾಜ್ಯವನ್ನು ಕಡಿಮೆ ಮಾಡಲು ಇದು ಬಯಸುತ್ತದೆ.

ಇದನ್ನೂ ಓದಿ | ನಿಮಗೆ ಜ್ವರ ಇದೆಯೋ ಇಲ್ಲವೋ ಎಂದು ಹೇಳುತ್ತದೆ ಈ ಫೋನ್; ಹೊಸ ತಂತ್ರಜ್ಞಾನಕ್ಕೆ ಟೆಕ್ ಲೋಕವೇ ಬೆರಗು

“ಎಲ್ಲಾ ಫೋನ್ ತಯಾರಕರು ಈ ನಿಯಮಗಳನ್ನು ಅನುಸರಿಸಲು ಕಾನೂನುಬದ್ಧವಾಗಿ ಬದ್ಧರಾಗಿರುತ್ತಾರೆ ಮತ್ತು ಈ ಮಾನದಂಡಗಳ ಉಲ್ಲಂಘನೆಯು ಗ್ರಾಹಕ ಸಂರಕ್ಷಣಾ ಕಾಯ್ದೆಯ ಪ್ರಕಾರ ದಂಡವನ್ನು ವಿಧಿಸಲಾಗುತ್ತದೆ,” ಎಂದು ಸರ್ಕಾರದ ಮೂಲಗಳು ಹೇಳಿವೆ. ಈಗಾಗಲೇ ಶವೋಮಿ ಮತ್ತು ಒಪ್ಪೋನಂತಹ ಫೋನ್ ತಯಾರಕರು ಈ ನಿಯಮಕ್ಕೆ ಬೆಂಬಲವನ್ನು ವ್ಯಕ್ತಪಡಿಸಿದ್ದಾರೆ.

ಆ್ಯಪಲ್ ವಿರೋಧ

ಯುರೋಪಿಯನ್ ಒಕ್ಕೂಟವು 2022ರಲ್ಲಿ ಈ ನಿಬಂಧನೆಯನ್ನು ಅಳವಡಿಸಿಕೊಂಡಿತ್ತು. ಆದರೆ, ಆ ಸಮಯದಲ್ಲಿ ಆ್ಯಪಲ್ ಇದನ್ನು ವಿರೋಧಿಸಿತು. ಕಂಪನಿಯು ಲೈಟ್ನಿಂಗ್ ಪೋರ್ಟ್‌ಗಾಗಿ ಸಾಕಷ್ಟು ವಾದ ನಡೆಸಿತ್ತು. ಆದರೆ, ಅಂತಿಮವಾಗಿ ಕಳೆದ ವರ್ಷ ಕಂಪನಿಯು ತನ್ನ ಫೋನ್‌ಗಳಲ್ಲಿ ಲೈಟ್ನಿಂಗ್ ಪೋರ್ಟ್ ಬದಲಿಗೆ ಟೈಪ್-ಸಿ ಚಾರ್ಜಿಂಗ್ ಪೋರ್ಟ್ ಅನ್ನು ಬಳಸಲು ಪ್ರಾರಂಭಿಸಿತು.

ವಿಶೇಷ ಎಂದರೆ ಆ್ಯಪಲ್ ಟೈಪ್-ಸಿ ಪೋರ್ಟ್​ಗೆ ತನ್ನದೇ ಆದ ಚಾರ್ಜರ್ ಬಿಡುಗಡೆ ಮಾಡಿತು. ಐಫೋನ್ ಬಳಕೆದಾರರು ಎಲ್ಲಾದರು ಬೇರೆ ಬ್ರಾಂಡ್ ಚಾರ್ಜರ್‌ನೊಂದಿಗೆ ಚಾರ್ಜ್ ಮಾಡಿದಾಗ ಫೋನ್ ಹೀಟಿಂಗ್ ಸಮಸ್ಯೆಯನ್ನು ಎದುರಿಸುತ್ತದೆ.

ಇನ್ನಷ್ಟು ಟೆಕ್ನಾಲಜಿ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ

ಇನ್ನೂ ಓದಿ : ಕನಿಷ್ಠ ಎಷ್ಟು ದಿನಗಳಿಗೊಮ್ಮೆ ಕಾರನ್ನು ಓಡಿಸಬೇಕು; ಕಾರು ಸ್ಟಾರ್ಟ್ ಮಾಡದಿದ್ದರೆ ಏನಾಗುತ್ತದೆ?