ವಾಟ್ಸ್​ಆ್ಯಪ್​ನಿಂದ ಬೆರಗುಗೊಳಿಸುವ ಫೀಚರ್: ಇನ್ಮುಂದೆ ಫೋಟೊ, ವಿಡಿಯೊ ಕಳುಹಿಸಲು ಇಂಟರ್ನೆಟ್ ಬೇಡ

ವಿಶ್ವದ ನಂಬರ್ ಒನ್ ಮೆಸೇಜಿಂಗ್ ಅಪ್ಲಿಕೇಷನ್ ವಾಟ್ಸ್​ಆ್ಯಪ್ (WhatsApp) ತನ್ನ ಬಳಕೆದಾರರ ಅನುಭವವನ್ನು ಸುಧಾರಿಸಲು ನಿರಂತರವಾಗಿ ಹೊಸ ವೈಶಿಷ್ಟ್ಯಗಳನ್ನು ಪರಿಚಯಿಸುತ್ತಿರುತ್ತದೆ. ಕಾಲ ಕಾಲಕ್ಕೆ ನೂತನ ಅಪ್ಡೇಟ್​ಗಳನ್ನು ಪರಿಚಯಿಸುವ ಮೆಟಾ ಒಡೆತನದ ಈ ಜನಪ್ರಿಯ ಮೆಸೇಜಿಂಗ್ ಆ್ಯಪ್ ಈ ಬಾರಿಯೂ ಹೊಸ ವೈಶಿಷ್ಟ್ಯವನ್ನು (WhatsApp New Feature) ತರಲು ಸಿದ್ಧತೆ ನಡೆಸಿದೆ. ಈ ಹೊಸ ಫೀಚರ್ ಬಳಕೆದಾರರ ಫೈಲ್ ಹಂಚಿಕೆಯನ್ನು ಸುಲಭಗೊಳಿಸುತ್ತದೆ.

WABetaInfo ವರದಿಯ ಪ್ರಕಾರ, ವಾಟ್ಸ್​ಆ್ಯಪ್​ ನಿಮಗೆ ಹತ್ತಿರದ ಜನರೊಂದಿಗೆ ಫೈಲ್‌ಗಳನ್ನು ಹಂಚಿಕೊಳ್ಳಲು ಅನುವು ಮಾಡಿಕೊಡುತ್ತದೆ. ಈ ವೈಶಿಷ್ಟ್ಯದ ಸಹಾಯದಿಂದ, ನೀವು ಇಂಟರ್ನೆಟ್ ಇಲ್ಲದೆ ಇತರರಿಗೆ ಡಾಕ್ಯುಮೆಂಟ್‌ಗಳು, ಫೋಟೋಗಳು, ವೀಡಿಯೊಗಳು ಮತ್ತು ಇತರ ಯಾವುದೇ ಫೈಲ್‌ಗಳನ್ನು ಸುಲಭವಾಗಿ ಕಳುಹಿಸಲು ಸಾಧ್ಯವಾಗುತ್ತದೆ. ಈ ವೈಶಿಷ್ಟ್ಯವು ಮೊದಲು ಆಂಡ್ರಾಯ್ಡ್ ಬಳಕೆದಾರರಿಗೆ ಬಂದಿತ್ತು, ಆದರೆ ಇದನ್ನು ಇನ್ನೂ ಎಲ್ಲರಿಗೂ ವಿಸ್ತರಿಸಲಾಗಿಲ್ಲ. ಈಗ ಈ ವೈಶಿಷ್ಟ್ಯವು ಐಒಎಸ್ ಬಳಕೆದಾರರಿಗೆ ಪರೀಕ್ಷಾ ಹಂತದಲ್ಲಿದೆ. ಅಂದರೆ ಎರಡೂ ಆವೃತ್ತಿಗಳು (ಆಂಡ್ರಾಯ್ಡ್ ಮತ್ತು ಐಒಎಸ್) ಪ್ರಸ್ತುತ ಪರೀಕ್ಷೆಯಲ್ಲಿವೆ.

ಇದನ್ನೂ ಓದಿ: ಹಳೇ ಆಭರಣ ಎಕ್ಸ್‌ಚೇಂಜ್ ಮಾಡಿಸೋಕೆ ಹೊರಟಿದ್ರೆ ಈ ವಿಷಯ ನಿಮಗೆ ಗೊತ್ತಿರಲೇಬೇಕು, ಈ ಹಂತ ದಾಟದೆ ಹಳೇ ಒಡವೆ ಯಾರೂ ತಗೊಳ್ಳಲ್ಲ

ಆ್ಯಪಲ್‌ನ ಏರ್‌ಡ್ರಾಪ್‌ನಂತೆ ಇರುತ್ತದೆ

ಪರೀಕ್ಷೆಗಾಗಿ ಬಿಡುಗಡೆ ಮಾಡಿದ ಆ್ಯಪ್‌ನಲ್ಲಿ ಸ್ಕ್ರೀನ್‌ಶಾಟ್ ತೋರಿಸಲಾಗಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಇದರಲ್ಲಿ, ಡಿಸ್​ಪ್ಲೇ ಮೇಲೆ ಸ್ಕ್ಯಾನರ್ ಕಾಣಿಸಿಕೊಳ್ಳುತ್ತದೆ, ಅದರ ಸಹಾಯದಿಂದ ನೀವು ಹತ್ತಿರದ ಜನರಿಗೆ ಫೋಟೋಗಳು, ವಿಡಿಯೊಗಳು ಮತ್ತು ಇತರ ಫೈಲ್‌ಗಳನ್ನು ಕಳುಹಿಸಲು ಸಾಧ್ಯವಾಗುತ್ತದೆ. ಈ ವೈಶಿಷ್ಟ್ಯದ ಹೆಸರು "Neraby Share" ಆಗಿರುತ್ತದೆ.

ವಾಟ್ಸ್​ಆ್ಯಪ್​ ತನ್ನ iOS ಅಪ್ಲಿಕೇಶನ್‌ನಲ್ಲಿಯೂ ಇದೇ ರೀತಿಯ ವೈಶಿಷ್ಟ್ಯವನ್ನು ತರಲು ಯೋಚಿಸುತ್ತಿದೆ ಎಂದು ಸ್ಕ್ರೀನ್‌ಶಾಟ್ ತೋರಿಸುತ್ತದೆ, ಅದರ ಮೂಲಕ ನೀವು ಹತ್ತಿರದ ಜನರಿಗೆ ಫೈಲ್‌ಗಳನ್ನು ಕಳುಹಿಸಲು ಸಾಧ್ಯವಾಗುತ್ತದೆ. ಈ ವೈಶಿಷ್ಟ್ಯವು ಆ್ಯಪಲ್​ನ ಏರ್‌ಡ್ರಾಪ್‌ನಂತೆಯೇ ಇರುತ್ತದೆ.

ಇದು ಹೇಗೆ ಕೆಲಸ ಮಾಡುತ್ತದೆ?

ಫೈಲ್ ಹಂಚಿಕೊಳ್ಳಲು, ನೀವು ಮತ್ತೊಬ್ಬ ವ್ಯಕ್ತಿಯ ಮೊಬೈಲ್​ನಿಂದ ಕ್ಯೂಆರ್ ಕೋಡ್ ಅನ್ನು ಸ್ಕ್ಯಾನ್ ಮಾಡಬೇಕು. ಇದು ವೈ-ಫೈ ಅಥವಾ ಬ್ಲೂಟೂತ್ ಮೂಲಕ ಕಾರ್ಯನಿರ್ವಹಿಸುತ್ತದೆ. ಹೀಗಾಗಿ ಇಂಟರ್ನೆಟ್ ಸಂಪರ್ಕದ ಅಗತ್ಯವಿಲ್ಲ. ಈ ಮೂಲಕ ನೀವು ಇಂಟರ್ನೆಟ್ ಇಲ್ಲದೆ ನಿಮ್ಮ ಸುತ್ತಲಿನ ಜನರಿಗೆ ಫೈಲ್‌ಗಳನ್ನು ಕಳುಹಿಸಬಹುದು. ಇಂಟರ್ನೆಟ್ ವೇಗವು ನಿಧಾನವಾಗಿರುವ ಅಥವಾ ಕಾರ್ಯನಿರ್ವಹಿಸದಿರುವ ಪ್ರದೇಶಗಳಲ್ಲಿ ಇದು ವಿಶೇಷವಾಗಿ ಉಪಯುಕ್ತವಾಗಿದೆ.

ಈ ಹೊಸ ವೈಶಿಷ್ಟ್ಯದೊಂದಿಗೆ, ನೀವು ಉತ್ತಮ ಗುಣಮಟ್ಟದ ಫೋಟೊಗಳು, ವಿಡಿಯೊಗಳು ಮತ್ತು ಡಾಕ್ಯುಮೆಂಟ್‌ಗಳಂತಹ ದೊಡ್ಡ ಫೈಲ್‌ಗಳನ್ನು ಸುಲಭವಾಗಿ ಹಂಚಿಕೊಳ್ಳಬಹುದು. ಇನ್ನೂ ಉತ್ತಮವಾದ ವಿಷಯವೆಂದರೆ ನೀವು ಆಂಡ್ರಾಯ್ಡ್ ಅಥವಾ ಐಫೋನ್ ಅನ್ನು ಬಳಸುತ್ತಿದ್ದರೂ ಈ ವೈಶಿಷ್ಟ್ಯವು ಕಾರ್ಯನಿರ್ವಹಿಸುತ್ತದೆ.

ಇಲ್ಲಿ ನೀವು ಯಾವ ಮೊಬೈಲ್ ಬಳಸುತ್ತಿರುವಿರಿ ಮತ್ತು ನೀವು ಫೈಲ್ ಅನ್ನು ಕಳುಹಿಸುತ್ತಿರುವ ವ್ಯಕ್ತಿಯು ಯಾವ ಮೊಬೈಲ್ ಬಳಸುತ್ತಿದ್ದಾರೆ ಎಂಬುದು ಮುಖ್ಯವಲ್ಲ. ಹೆಚ್ಚುವರಿಯಾಗಿ, ಈ ವೈಶಿಷ್ಟ್ಯವು ಎಂಡ್-ಟು-ಎಂಡ್ ಎನ್‌ಕ್ರಿಪ್ಶನ್‌ನೊಂದಿಗೆ ಸಹ ಕಾರ್ಯನಿರ್ವಹಿಸುತ್ತದೆ. ಅಂದರೆ ನೀವು ಯಾರಿಗೆ ಕಳುಹಿಸಿದ್ದೀರೋ ಅವರಿಗೆ ಮಾತ್ರ ನೀವು ಕಳುಹಿಸುತ್ತಿರುವ ಫೈಲ್ ಅನ್ನು ನೋಡಲು ಸಾಧ್ಯವಾಗುತ್ತದೆ.

ಬರಹ: ವಿನಯ್ ಭಟ್

ಇದನ್ನೂ ಓದಿ: ಕಾರಿನ ಹಿಂಬದಿಯ ಕನ್ನಡಿ ಮೇಲೆ ಕೆಂಪು ಗೆರೆಗಳು ಏಕೆ ಇರುವುದು ಗೊತ್ತೇ? ಇಲ್ಲಿದೆ ಕುತೂಹಲಕಾರಿ ವಿಷಯ