ಅಗಸೆ ಬೀಜ: ಶಕ್ತಿಶಾಲಿ ಮತ್ತು ಆರೋಗ್ಯಕರ ಅಗಸೆಯ ವಿವಿಧ ಪ್ರಯೋಜನಗಳ ಬಗ್ಗೆ ನೀವು ತಿಳಿಯಲೇಬೇಕು

ಆರೋಗ್ಯಕರ ಜೀವನಶೈಲಿಗೆ ಪೂರಕವಾದ ಆಹಾರ ಪದಾರ್ಥಗಳ ಬಗ್ಗೆ ಜನರ ಆಸಕ್ತಿ ದಿನದಿಂದ ದಿನಕ್ಕೆ ಹೆಚ್ಚುತ್ತಿದೆ. ಹಣ್ಣಿನ ಬೀಜಗಳು, ಹರ್ಬಲ್ ಟೀ, ಸೊಪ್ಪು ತರಕಾರಿಗಳನ್ನು ಜನರು ತಮ್ಮ ಆಹಾರದಲ್ಲಿ ಹೆಚ್ಚಾಗಿ ಬಳಸುತ್ತಿದ್ದಾರೆ. ಅದರಲ್ಲೂ ಪ್ರಾಚೀನ ಕಾಲದಿಂದಲೇ ಆಯುರ್ವೇದದಲ್ಲಿ ಪ್ರಾಮುಖ್ಯತೆ ಪಡೆದಿರುವ ಅಗಸೆ ಬೀಜಗಳು (Flax Seeds) ಮತ್ತೆ ಜನಪ್ರಿಯವಾಗಿವೆ. ಪುಟಾಣಿ ಗಾತ್ರದ ಈ ಬೀಜಗಳು ಅಪಾರ ಪೋಷಕಾಂಶಗಳಿಂದ ಕೂಡಿದ್ದು, ದೈಹಿಕ ಆರೋಗ್ಯವನ್ನು ಸುಧಾರಿಸಲು ಸಹಕಾರಿಯಾಗುತ್ತವೆ. ಹೃದಯದ ಆರೋಗ್ಯದಿಂದ ಹಿಡಿದು ತ್ವಚೆ ಮತ್ತು ಕೂದಲಿನ ಆರೋಗ್ಯದವರೆಗೆ ಅಗಸೆ ಬೀಜಗಳ ಪ್ರಯೋಜನಗಳು ಅನೇಕ.

ಅಗಸೆ ಬೀಜಗಳ ಪೋಷಕತತ್ವ, ಆರೋಗ್ಯ ಲಾಭಗಳು ಹಾಗೂ ಬಳಸುವ ಸರಿಯಾದ ವಿಧಾನಗಳ ಬಗ್ಗೆ ವಿವರವಾಗಿ ತಿಳಿಯಿರಿ.

ಅಗಸೆ ಬೀಜಗಳ ಪ್ರಮುಖ ಪ್ರಯೋಜನಗಳು:

1. ಹೃದಯ ಆರೋಗ್ಯಕ್ಕಾಗಿ

ಅಗಸೆ ಬೀಜಗಳಲ್ಲಿ ಒಮೆಗಾ-3 ಕೊಬ್ಬಿನಾಮ್ಲಗಳು ತುಂಬಿವೆ. ಇವು ಹೃದಯದ ಕೆಲಸವನ್ನು ಸುಧಾರಿಸುತ್ತವೆ ಹಾಗೂ ಕೆಟ್ಟ ಕೊಲೆಸ್ಟೆರಾಲ್‌ ಅನ್ನು ಕಡಿಮೆ ಮಾಡುತ್ತವೆ.

2. ಮೆದುಳಿಗೆ ಪೋಷಣೆಯುಂಟುಮಾಡುತ್ತದೆ

ನ್ಯೂಟ್ರಿಯಂಟ್‌ಗಳಿಂದ ಸಮೃದ್ಧವಾಗಿದ್ದು, ನರವ್ಯವಸ್ಥೆಯ ಒತ್ತಡವನ್ನು ಕಡಿಮೆ ಮಾಡುತ್ತದೆ.

3. ಜೀರ್ಣಕ್ರಿಯೆಯನ್ನು ಸುಗಮಗೊಳಿಸುತ್ತದೆ

ಇವು ಫೈಬರ್‌ ಸಮೃದ್ಧವಾಗಿದ್ದು, ಕರುಳು ಶುದ್ಧಿಯಾಗಲು ಸಹಕಾರಿಯಾಗುತ್ತದೆ. ಮಲಬದ್ಧತೆ ಸಮಸ್ಯೆಯಿಂದ ಬಳಲುವವರು ಇದರಿಂದ ಹೆಚ್ಚಿನ ಲಾಭ ಪಡೆಯಬಹುದು.

4. ತೂಕ ಇಳಿಸಲು ಸಹಾಯಕಾರಿ

ಅಗಸೆ ಬೀಜಗಳು ಹೊಟ್ಟೆ ತುಂಬಿರುವ ಭಾವನೆ ನೀಡುತ್ತವೆ. ಇದರಿಂದ ಹೆಚ್ಚು ತಿನ್ನುವ ಅವಶ್ಯಕತೆ ಕಡಿಮೆ ಆಗುತ್ತದೆ ಮತ್ತು ತೂಕವನ್ನು ನಿಯಂತ್ರಿಸಲು ಸಹಕಾರಿಯಾಗುತ್ತದೆ.

5. ಚರ್ಮ ಮತ್ತು ಕೂದಲಿಗೆ ಲಾಭಕಾರಿ

ಒಮೆಗಾ-3 ಮತ್ತು ಲಿಗ್ನಾನ್ಸ್‌ಗಳನ್ನು ಹೊಂದಿರುವುದರಿಂದ ಅಗಸೆ ಬೀಜಗಳು ಚರ್ಮವನ್ನು ಕಾಂತಿಮಯವಾಗಿಸುತ್ತದೆ ಮತ್ತು ಕೂದಲಿನ ಆರೋಗ್ಯವನ್ನು ಕಾಪಾಡುತ್ತದೆ.

ಇದನ್ನೂ ಓದಿ: ಹಾಸಿಗೆಯ ಮೇಲೆ ಕುಳಿತು ಆಹಾರ ಸೇವಿಸುವ ಅಭ್ಯಾಸ ನಿಮಗಿದ್ದರೆ ನೀವು ಇದನ್ನು ಓದಲೇಬೇಕು; ಅದರಿಂದಾಗುವ ಅರೋಗ್ಯ ಸಮಸ್ಯೆಗಳು ಇವು

6. ಕ್ಯಾನ್ಸರ್ ವಿರುದ್ಧ ರಕ್ಷಣೆ

ಅಗಸೆ ಬೀಜಗಳಲ್ಲಿ ಲಿಗ್ನಾನ್ಸ್ ಎಂಬ ಶಕ್ತಿ ಶಾಲಿ ಆಂಟಿಆಕ್ಸಿಡೆಂಟ್ಸ್ ಇರುತ್ತದೆ. ಇವು ಕೆಲವೊಂದು ಬಗೆಯ ಕ್ಯಾನ್ಸರ್ ವಿರುದ್ಧ ದೇಹವನ್ನು ರಕ್ಷಿಸಬಹುದು ಎಂದು ಸಂಶೋಧನೆಗಳು ಸೂಚಿಸುತ್ತವೆ.

ಬಳಕೆ ಮಾಡಲು ಸಲಹೆ

ದಿನಕ್ಕೆ 1-2 ಟೀಸ್ಪೂನ್ ಅಗಸೆ ಬೀಜ ಪುಡಿ ಮಾಡಿ ಹಾಲು ಅಥವಾ ಮಜ್ಜಿಗೆಯಲ್ಲಿ ಸೇರಿಸಿ ಕುಡಿಯಬಹುದು.

ಸ್ಮೂದಿ, ಪರೋಟ, ದೋಸೆ ಅಥವಾ ಸಲಾಡ್‌ಗಳಲ್ಲಿ ಸೇರಿಸಿ ಸೇವಿಸಬಹುದು.

ಬೇಯಿಸಿದ ತರಕಾರಿ ಅಥವಾ ಅಕ್ಕಿ ತಿನಿಸುಗಳಲ್ಲಿ ಸ್ವಲ್ಪ ಪ್ರಮಾಣದಲ್ಲಿ ಹಾಕಬಹುದು.

ಹಾಗೆಯೇ ಹುರಿದು ದಿನಕ್ಕೆ ಒಂದು ಚಮಚ ಸೇವಿಸಬಹುದು.

ಸೂಚನೆ: ಅಗಸೆ ಬೀಜಗಳನ್ನು ನೇರವಾಗಿ ತಿನ್ನುವುದಕ್ಕಿಂತ ಪುಡಿಮಾಡಿ ಸೇವಿಸುವುದು ಉತ್ತಮ. ಏಕೆಂದರೆ ದೇಹ ಸುಲಭವಾಗಿ ಪೋಷಕಾಂಶಗಳನ್ನು ಹೀರಿಕೊಳ್ಳುತ್ತದೆ.

ಇದನ್ನೂ ಓದಿ: ನಿಮ್ಮ ಮಕ್ಕಳನ್ನು ಸದಾ ಓದುವಂತೆ ಒತ್ತಾಯಿಸುತ್ತೀರಾ? ಅದರಿಂದ ಮಕ್ಕಳ ಮೇಲಾಗುವ ನಕಾರಾತ್ಮಕ ಪರಿಣಾಮಗಳನ್ನು ತಿಳಿದುಕೊಳ್ಳಿ

ಅಗಸೆ ಬೀಜಗಳು ಬಲು ಚಿಕ್ಕದಾಗಿದ್ದರೂ ಅದರಲ್ಲಿ ಅಡಕವಾಗಿರುವ ಪೋಷಕಾಂಶಗಳು ಅತ್ಯಂತ ಶಕ್ತಿಶಾಲಿಯಾಗಿವೆ. ಹೃದಯ ಆರೋಗ್ಯದಿಂದ ಹಿಡಿದು ಜೀರ್ಣಕ್ರಿಯೆ, ತೂಕ ನಿಯಂತ್ರಣ, ಚರ್ಮ ಮತ್ತು ಕೂದಲಿನ ಆರೋಗ್ಯವರೆಗೆ ಇವು ನಾನಾ ರೀತಿಯಲ್ಲಿ ದೇಹದ ಒಟ್ಟಾರೆ ಆರೋಗ್ಯಕ್ಕೆ ಸಹಕಾರಿಯಾಗುತ್ತವೆ. ನಿತ್ಯ ಆಹಾರದಲ್ಲಿ ಈ ಬೀಜಗಳನ್ನು ಸರಿಯಾದ ಪ್ರಮಾಣದಲ್ಲಿ ಸೇರಿಸಿಕೊಂಡರೆ, ಇದರಿಂದ ದೀರ್ಘಕಾಲಿಕ ಲಾಭಗಳನ್ನು ಪಡೆಯಬಹುದಾಗಿದೆ. ಆದಕಾರಣ, ಹೆಚ್ಚು ಖರ್ಚು ಮಾಡದೇ ಸಹಜವಾಗಿ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಅಗಸೆ ಬೀಜಗಳನ್ನು ನಿಮ್ಮ ದಿನಚರಿಯ ಆಹಾರದಲ್ಲೇ ಸೇರಿಸಿ. ನಿಸರ್ಗದ ಈ ಆಶ್ಚರ್ಯಕರ ಉಡುಗೊರೆ ನಿಮ್ಮ ದೇಹ-ಮನಸ್ಸಿಗೆ ತಾಜಾತನವನ್ನು ತರುವಲ್ಲಿ ಶೇಕಡಾ ನೂರು ಸಹಾಯ ಮಾಡುತ್ತದೆ.

(ಗಮನಿಸಿ: ಈ ಮಾಹಿತಿಯು ಸಾಮಾನ್ಯಜ್ಞಾನ ಹಾಗೂ ಅಂತರ್ಜಾಲದಲ್ಲಿ ಸಿಕ್ಕ ಮಾಹಿತಿಯನ್ನ ಆಧರಿಸಿದೆ. ಈ ವಿಚಾರ ಸಂಪೂರ್ಣ ನಿಖರವಾಗಿದೆ ಎಂದು ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಪ್ರತಿಪಾದಿಸುವುದಿಲ್ಲ. ಈ ವಿಷಯದ ಕುರಿತ ನಿಖರ ಮಾಹಿತಿಗಾಗಿ ಸಂಬಂಧಪಟ್ಟ ಕ್ಷೇತ್ರದ ತಜ್ಞರನ್ನು ಸಂಪರ್ಕಿಸಿ)