ನೀವು ನಿತ್ಯಪೂಜೆಗೆ ಬಳಸ್ತಾ ಇರೋದು ನಕಲಿ ಕರ್ಪೂರವೇ? ಅಸಲಿ ಕರ್ಪೂರವನ್ನು ಪತ್ತೆ ಹಚ್ಚೋದು ಹೇಗೆ ನೋಡಿ
ಪೂಜೆ ಮಾಡುವಾಗ ಬಳಸುವ ಅಗತ್ಯ ವಸ್ತುಗಳಲ್ಲಿ ಕರ್ಪೂರ ಕೂಡ ಒಂದು. ಇದನ್ನ ಬಳಸುವುದರಿಂದ ಮನೆಯಲ್ಲಿ ಧನಾತ್ಮಕ ಭಾವ ಹೆಚ್ಚಾಗುತ್ತದೆ ಎಂದು ಹೇಳಲಾಗುತ್ತದೆ. ದೇವರಿಗೆ ಆರತಿ ಮಾಡಲು ಕರ್ಪೂರ ಬೇಕೇ ಬೇಕು. ಆದರೆ ನಾವು ಬಳಸುವ ಕರ್ಪೂರ ಅಸಲಿಯೇ ನಕಲಿಯೇ ಎಂಬುದನ್ನು ತಿಳಿಯುವುದು ಹೇಗೆ ನೋಡಿ.
ಪೂಜೆಯ ಸಮಯದಲ್ಲಿ ಬೆಳಗುವ ಕರ್ಪೂರದ ಸುವಾಸನೆಯು ಆಧ್ಯಾತ್ಮಿಕ ಭಾವನೆಯೊಂದಿಗೆ ಮನೆಯೊಳಗೆ ಸಕಾರಾತ್ಮಕ ವಾತಾವರಣವನ್ನು ಹಬ್ಬಿಸುತ್ತದೆ. ಕರ್ಪೂರದ ವಾಸನೆಯು ಮನೆಯಲ್ಲಿನ ನಕಾರಾತ್ಮಕತೆಯನ್ನು ಹೋಗಲಾಡಿಸುತ್ತದೆ ಎಂದು ಹೇಳಲಾಗುತ್ತದೆ. ಇದು ಸೊಳ್ಳೆ, ಕ್ರಿಮಿಕೀಟಗಳು ದೂರಾಗಲು ಸಹಕಾರಿ. ಆದರೆ ಕರ್ಪೂರದಿಂದ ಈ ಎಲ್ಲಾ ಪ್ರಯೋಜನಗಳು ಸಿಗಬೇಕು ಎಂದರೆ ಅಸಲಿ ಕರ್ಪೂರವನ್ನಷ್ಟೇ ಬಳಸಬೇಕು. ನಕಲಿ ಕರ್ಪೂರ ಬಳಸಿದರೆ ಯಾವುದೇ ಪ್ರಯೋಜನವಿಲ್ಲ.
ಅಯ್ಯೋ ಇದೇನು, ಕರ್ಪೂರದಲ್ಲೂ ನಕಲಿ, ಅಸಲಿ ಅಂತಿದ್ಯಾ ಅಂತ ನೀವು ಕೇಳಬಹುದು. ಖಂಡಿತ ಇದೆ. ನಕಲಿ ಕರ್ಪೂರಕ್ಕೂ ಕಲಬೆರಕೆ ಕರ್ಪೂರಕ್ಕೂ ಇರುವ ವ್ಯತ್ಯಾಸವೇನು, ಕರ್ಪೂರದ ಶುದ್ಧತೆ ಪರೀಕ್ಷಿಸುವುದು ಹೇಗೆ ನೋಡಿ.
ಕರ್ಪೂರದ ಬಣ್ಣ
ನಕಲಿ ಕರ್ಪೂರದ ಬಣ್ಣವು ಅಚ್ಚ ಬಿಳುಪಿನಿಂದ ಕೂಡಿರುವುದಿಲ್ಲ. ಇದು ಸ್ವಲ್ಪ ತಿಳಿ ಕಂದು ಅಥವಾ ಸ್ವಲ್ಪ ಹಳದಿ ಹಸಿರು ಬಣ್ಣ ಹೊಂದಿರುತ್ತದೆ. ಈ ಬಣ್ಣಕ್ಕಾಗಿ, ಕರ್ಪೂರಕ್ಕೆ ಸಫ್ರೋಲ್ ಎಂಬ ಪದಾರ್ಥವನ್ನು ಸೇರಿಸಲಾಗುತ್ತದೆ. ಇಂತಹ ಕಲಬೆರಕೆ ಕರ್ಪೂರವನ್ನು ಸುಡುವುದರಿಂದ ಉಸಿರಾಟದ ತೊಂದರೆ, ರಕ್ತದೊತ್ತಡದಲ್ಲಿ ಏರುಪೇರು, ತಲೆಸುತ್ತು ಮುಂತಾದ ಸಮಸ್ಯೆಗಳು ಉಂಟಾಗುತ್ತವೆ.
ವಾಸನೆ
ಕರ್ಪೂರದ ವಾಸನೆ ಸುಗಂಧಭರಿತವಾಗಿರುತ್ತದೆ. ನಕಲಿ ಕರ್ಪೂರದ ವಾಸನೆಯು ಸ್ವಲ್ಪ ಶೀತ ಗುಣಪಡಿಸುವ ಮುಲಾಮಿನ ವಾಸನೆಯನ್ನು ಹೊಂದಿರುತ್ತದೆ. ಅಲ್ಲದೆ ಕರ್ಪೂರದ ವಾಸನೆ ಬರುತ್ತಿರುವಾಗ ತುರಿಕೆ, ಮೂಗಿನಲ್ಲಿ ಉರಿ, ಉಸಿರಾಟಕ್ಕೆ ತೊಂದರೆ ಉಂಟಾದರೆ ಅದು ನಕಲಿ ಕರ್ಪೂರ ಎಂದು ತಿಳಿಯಬಹುದು.
ಕರ್ಪೂರದ ಶುದ್ಧತೆ ಗುರುತಿಸುವುದು ಹೇಗೆ?
* ನಿಜವಾದ ಕರ್ಪೂರವು ಸಂಪೂರ್ಣ ಶುದ್ಧ ಮತ್ತು ಪಾರದರ್ಶಕವಾಗಿರುತ್ತದೆ, ಬಿಳಿ ಬಣ್ಣವನ್ನು ಹೊಂದಿರುತ್ತದೆ.
* ನಿಜವಾದ ಕರ್ಪೂರವನ್ನು ಸುಟ್ಟಾಗ, ಅದು ಸುಟ್ಟ ನಂತರ ಯಾವುದೇ ಶೇಷವನ್ನು ಬಿಡುವುದಿಲ್ಲ. ಕರ್ಪೂರವನ್ನು ಸುಡುವಾಗ ಬೂದಿಯು ಕೆಳಭಾಗದಲ್ಲಿ ಉಳಿದಿದ್ದರೆ, ಅದು ಸಂಪೂರ್ಣವಾಗಿ ನಕಲಿ ಕರ್ಪೂರವಾಗಿದೆ. ಪರಿಶುದ್ಧ ಕರ್ಪೂರ ಸುಲಭವಾಗಿ ಕರಗುತ್ತದೆ.
* ನಿಜವಾದ ಕರ್ಪೂರ ಸಂಪೂರ್ಣವಾಗಿ ಉರಿಯಲು ಸ್ವಲ್ಪ ಸಮಯ ತೆಗೆದುಕೊಳ್ಳುತ್ತದೆ. ನಕಲಿ ಕರ್ಪೂರ ಬೇಗನೆ ಉರಿಯುತ್ತದೆ.
* ನಿಜವಾದ ಕರ್ಪೂರವನ್ನು ಸುಟ್ಟಾಗ ಅದು ಬೆಳಕು ಮತ್ತು ಆಹ್ಲಾದಕರ ಪರಿಮಳದೊಂದಿಗೆ ಕಪ್ಪು ಹೊಗೆಯನ್ನು ಹೊರಸೂಸುತ್ತದೆ. ಕಲಬೆರಕೆ ಕರ್ಪೂರದ ಜ್ವಾಲೆಯು ಕಿತ್ತಳೆ ಬಣ್ಣದಲ್ಲಿ ಕಾಣುತ್ತದೆ.
* ಕರ್ಪೂರವನ್ನು ನೀರಿನಲ್ಲಿ ಹಾಕಿದರೆ ಅದು ತಳಕ್ಕೆ ಮುಳುಗುತ್ತದೆ. ಏಕೆಂದರೆ ಶುದ್ಧ ಕರ್ಪೂರವು ಭಾರವಾಗಿರುತ್ತದೆ. ಕರ್ಪೂರವು ನೀರಿನ ಮೇಲೆ ತೇಲಿದರೆ ಅದು ನಕಲಿ ಎಂದು ಅರ್ಥ.
* ನಿಜವಾದ ಕರ್ಪೂರವನ್ನು ಯಾವಾಗಲೂ ಮರದ ಎಲೆಗಳಿಂದ ತಯಾರಿಸಲಾಗುತ್ತದೆ. ನಕಲಿ ಕರ್ಪೂರವನ್ನು ಮರದ ತೊಗಟೆಯ ನೀರಿನಿಂದ ತಯಾರಿಸಲಾಗುತ್ತದೆ. ನೀವು ಖರೀದಿಸುವಾಗ ಇದನ್ನು ನೆನಪಿನಲ್ಲಿಡಿ. ಕರ್ಪೂರದ ಗುಣಲಕ್ಷಣಗಳು ಅದರ ಎಲೆಗಳಿಂದ ಬರುತ್ತವೆ.
ನೋಡಿದ್ರಲ್ಲ, ಸದ್ಯ ಜಗತ್ತಿನಲ್ಲಿ ಸಿಗುವ ಪ್ರತಿಯೊಂದು ವಸ್ತುವು ಕಲಬೆರಕೆಯೇ, ಇದಕ್ಕೆ ಕರ್ಪೂರ ಕೂಡ ಹೊರತಾಗಿಲ್ಲ. ಕರ್ಪೂರದಲ್ಲೂ ನಕಲಿ, ಅಸಲಿ ಇದೆ. ನೀವು ಮನೆಯಲ್ಲಿ ನಿತ್ಯ ಕರ್ಪೂರ ಬಳಸುವವರಾದರೆ ಈ ವಿಚಾರವನ್ನು ನೀವು ಗಮನಿಸಲೇಬೇಕು.
ವಿಭಾಗ