Valentines Day 2025: ಪ್ರಪಂಚದ ವಿವಿಧ ದೇಶಗಳಲ್ಲಿ ಹೀಗೆಲ್ಲಾ ಆಚರಿಸ್ತಾರೆ ಪ್ರೇಮಿಗಳ ದಿನ, ಒಂದಕ್ಕಿಂತ ಒಂದು ಆಚರಣೆ ವಿಭಿನ್ನ
ಪ್ರೇಮಿಗಳ ದಿನವನ್ನು ಪ್ರಪಂಚದಾದ್ಯಂತ ಆಚರಿಸ್ತಾರೆ. ಆದರೆ ಬೇರೆ ಬೇರೆ ದೇಶಗಳಲ್ಲಿ ಬೇರೆ ಬೇರೆ ವಿಧಾನಗಳ ಮೂಲಕ ಈ ದಿನವನ್ನು ಸಂಭ್ರಮಿಸಲಾಗುತ್ತದೆ. ಯಾವೆಲ್ಲಾ ದೇಶಗಳಲ್ಲಿ ಏನೆಲ್ಲಾ ಆಚರಣೆ ಇದೆ ಎನ್ನುವ ವಿವರ ಇಲ್ಲಿದೆ.
ಪ್ರೇಮಿಗಳ ದಿನ ಹತ್ತಿರದಲ್ಲಿದೆ. ಈಗಾಗಲೇ ಪ್ರೇಮಿಗಳ ವಾರ ಆರಂಭವಾಗಿದ್ದು ರೋಸ್‌ ಡೇ, ಪ್ರಪೋಸ್ ಡೇ, ಚಾಕೊಲೇಟ್ ಡೇ ಹೀಗೆ ನಡೆಯುತ್ತಿದೆ. ಪ್ರಪಂಚದಾದ್ಯಂತ ಪ್ರೇಮಿಗಳು ಈ ವಿಶೇಷಗಳಲ್ಲಿ ಸಂಭ್ರಮ ಆಚರಿಸುತ್ತಿದ್ದಾರೆ. ಹೂವು, ಉಡುಗೊರೆ, ಗ್ರೀಟಿಂಗ್ ಕಾರ್ಡ್‌ಗಳನ್ನು ನೀಡುವ ಮೂಲಕ ತಮ್ಮ ಭಾವನೆಗಳನ್ನು ಹಂಚಿಕೊಳ್ಳುತ್ತಿದ್ದಾರೆ. ಇದೆಲ್ಲಾ ಎಲ್ಲಾ ದೇಶಗಳಲ್ಲೂ ಸಾಮಾನ್ಯವಾಗಿದ್ದರೂ ಕೆಲವು ದೇಶಗಳಲ್ಲಿ ಪ್ರೇಮಿಗಳ ದಿನವನ್ನು ಬಹಳ ವಿಭಿನ್ನವಾಗಿ ಆಚರಿಸಲಾಗುತ್ತದೆ. ಈ ದೇಶಗಳಲ್ಲಿ ವಿಭಿನ್ನ ಸಂಪ್ರದಾಯದ ಮೂಲಕ ಪ್ರೇಮಿಗಳ ದಿನವನ್ನು ಸಂಭ್ರಮಿಸಲಾಗುತ್ತದೆ.
ಪ್ರಪಂಚದಾದ್ಯಂತ ಹಲವು ದೇಶಗಳಲ್ಲಿ ಈ ದಿನವನ್ನು ಆಚರಿಸಲಾಗುತ್ತದೆಯಾದರೂ, ಎಲ್ಲಾ ಸ್ಥಳಗಳಲ್ಲೂ ಒಂದೇ ರೀತಿಯಲ್ಲಿ ಅಥವಾ ಒಂದೇ ದಿನಾಂಕದಂದು ಆಚರಿಸುವುದಿಲ್ಲ ಎಂದು ತಿಳಿದರೆ ನಿಮಗೆ ಆಶ್ಚರ್ಯವಾಗಬಹುದು. ಪ್ರಪಂಚದಾದ್ಯಂತ ಹೇಗೆಲ್ಲಾ ಪ್ರೇಮಿಗಳ ದಿನವನ್ನು ಆಚರಿಸುತ್ತಾರೆ ಎಂಬುದನ್ನು ನೋಡಿ.
ಫಿನ್‌ಲ್ಯಾಂಡ್
ಫಿನ್‌ಲ್ಯಾಂಡ್‌ನಲ್ಲಿ ಪ್ರೇಮಿಗಳ ದಿನ ಎಂದರೆ ಸ್ನೇಹಿತರ ದಿನ. ಇಲ್ಲಿ ಪ್ರೇಮಿಗಳ ದಿನವನ್ನು Ystävänpäivä (YOUS-ta-van-PIE-vah ಎಂದು ಉಚ್ಚರಿಸಲಾಗುತ್ತದೆ) ಹೀಗೆ ಕರೆಯಲಾಗುತ್ತದೆ. ಹಾಗೆಂದರೆ ಸ್ನೇಹ ದಿನ ಎಂದು ಅರ್ಥ. ಈ ದಿನವನ್ನು ಪ್ರೇಮಿಗಳ ದಿನದಂದು ಆಚರಿಸಲಾಗುತ್ತದೆ. ಇದು ಸ್ನೇಹಿತರನ್ನು ಮೆಚ್ಚಿಸುವುದಕ್ಕಾಗಿ ಇರುವ ದಿನ. ತಮ್ಮ ಸ್ನೇಹಿತರು, ಪ್ರೀತಿ–ಪಾತ್ರರನ್ನು ಎಷ್ಟು ಪ್ರೀತಿಸುತ್ತೇವೆ ಎಂದು ತೋರಿಸಲು ಸಣ್ಣ ಉಡುಗೊರೆಗಳು, ಟೋಕನ್‌ಗಳನ್ನು ವಿನಿಮಯ ಮಾಡಿಕೊಳ್ಳಲಾಗುತ್ತದೆ.
ಜಪಾನ್
ಪ್ರೇಮಿಗಳ ದಿನದಂದು ಜಪಾನ್‌ನಲ್ಲಿ ಮಹಿಳೆಯರು ತಮ್ಮ ಸಂಗಾತಿಗೆ ಚಾಕೊಲೇಟ್ ಮತ್ತು ಆಭರಣಗಳನ್ನು ನೀಡಿ ಸತ್ಕಾರ ಮಾಡುತ್ತಾರೆ. ಆದರೆ ಜಪಾನ್‌ನಲ್ಲಿ ಪ್ರೇಮಿಗಳ ದಿನ ಫೆಬ್ರುವರಿ 14ಕ್ಕೆ ಮುಗಿಯುವುದಿಲ್ಲ. ಇದರ ನಂತರ ಸರಿಯಾಗಿ ಒಂದು ತಿಂಗಳಾದ ಮೇಲೆ ಮಾರ್ಚ್ 14 ರಂದು ಶ್ವೇತ ದಿನವನ್ನು ಆಚರಿಸಲಾಗುತ್ತದೆ. ಆಗ ಪ್ರೇಮಿಗಳ ದಿನದಂದು ಉಡುಗೊರೆ ಪಡೆದ ಪುರುಷರು ಅದಕ್ಕೆ ಪ್ರತಿಯಾಗಿ ಈ ದಿನದಂದು ವಿಶೇಷ ಉಡುಗೊರೆಯನ್ನು ನೀಡುತ್ತಾರೆ.
ಡೆನ್ಮಾರ್ಕ್, ನಾರ್ವೆ
ಡೆನ್ಮಾರ್ಕ್ ಮತ್ತು ನಾರ್ವೆಯಲ್ಲಿ, ಪ್ರೇಮಿಗಳ ದಿನವು ಕೇವಲ ಸಂಗಾತಿಗಳಿಗೆ ಮಾತ್ರವಲ್ಲ ಈ ದಿನದಂದು ಕುಟುಂಬದವರು, ಸ್ನೇಹಿತರು ಕೂಡ ಲವ್‌ ಕಾರ್ಡ್‌ಗಳನ್ನು ವಿನಿಮಯ ಮಾಡಿಕೊಳ್ಳುತ್ತಾರೆ. ಇದರಲ್ಲಿ ತಮಾಷೆಯ ಕವನಗಳಿಂದ ಹೃದಯ ತಟ್ಟುವ ಸಂಭಾಷಣೆಗಳವರೆಗೆ ಬರೆಯಲಾಗುತ್ತದೆ. ಕೆಲವರು ಕಾಗದದ ಕಟ್-ಔಟ್‌ಗಳು ಮತ್ತು ಕವಿತೆಗಳನ್ನು ಒಳಗೊಂಡ ಅನಾಮಧೇಯ ಪತ್ರಗಳನ್ನೂ ಕಳುಹಿಸುತ್ತಾರೆ. ಅಲ್ಲಿನ ಭಾಷೆಯಲ್ಲಿ ಇದಕ್ಕೆ ಗೇಕೆಬ್ರೆವ್ ಅಥವಾ ಸ್ನೋಡ್ರಾಪ್ ಲೆಟರ್‌ ಎಂದು ಕರೆಯಲಾಗುತ್ತದೆ. ಈ ಪತ್ರವನ್ನು ಸ್ವೀಕರಿಸುವವರು ಯಾರು ಕಳುಹಿಸಿದ್ದು ಎಂದು ಸರಿಯಾಗಿ ಊಹಿಸಿದರೆ ಅವರು ಈಸ್ಟರ್ ಎಗ್ ಅನ್ನು ಗೆಲ್ಲುತ್ತಾರೆ.
ಇಂಗ್ಲೆಂಡ್‌
ಇಂಗ್ಲೆಡ್‌ನಲ್ಲಿ ಪ್ರೇಮಿಗಳ ದಿನವನ್ನು ಹಲವು ವಿಧಗಳಲ್ಲಿ ಆಚರಿಸಲಾಗುತ್ತದೆ. ಈ ದಿನ ಮಕ್ಕಳು ಹಣ, ಹಣ್ಣು ಹಾಗೂ ಕ್ಯಾಂಡಿಗಳನ್ನು ಪಡೆಯಲು ಹಾಡು ಹೇಳುತ್ತಾರೆ. ಕೆಲವರು ವ್ಯಾಲೆಂಟೈನ್ ಬನ್‌ಗಳನ್ನು ಅಥವಾ ಪ್ಲಮ್ ಶಟಲ್‌ಗಳನ್ನು ಹಂಚಿಕೊಳ್ಳುತ್ತಾರೆ, ಇದು ಸಮೃದ್ಧ ಸುಗ್ಗಿಯನ್ನು ಸಂಕೇತಿಸುತ್ತದೆ.
ಜರ್ಮನಿ
ಜರ್ಮನಿಯಲ್ಲಿ ಪ್ರೇಮಿಗಳ ದಿನಾಚರಣೆ ನಿಜಕ್ಕೂ ವಿಶೇಷ. ಇಲ್ಲಿ ಹೃದಯಾಕಾರದ ಉಡುಗೊರೆಗಳ ಬದಲಿಗೆ ಹಂದಿ ಪರಿಕಲ್ಪನೆಯ ಉಡುಗೊರೆಗಳನ್ನು ವಿನಿಮಯ ಮಾಡಿಕೊಳ್ಳುವ ಸಂಪ್ರದಾಯವಿದೆ. ಪ್ರೀತಿ ಮತ್ತು ಕಾಮ ಎರಡನ್ನೂ ಸಂಕೇತಿಸುವ ಹಂದಿಗಳು ಪ್ರತಿಮೆಗಳು, ಸ್ಟಫ್ಡ್ ಆಟಿಕೆಗಳನ್ನು ವಿನಿಮಯ ಮಾಡಿಕೊಳ್ಳಲಾಗುತ್ತದೆ. ಹೂವು ಚಾಕೊಲೇಟ್ ಜೊತೆಗೆ ಶುಂಠಿ ಕುಕ್ಕಿಸ್‌ಗಳ ಜೊತೆ ವಿಶೇಷ ಸಂದೇಶಗಳನ್ನು ಕೂಡ ನೀಡಲಾಗುತ್ತದೆ.
ಫಿಲಿಪ್ಪೀನ್ಸ್‌
ಫಿಲಿಪ್ಪೀನ್ಸ್‌ ಪ್ರೇಮಿಗಳ ದಿನಾಚರಣೆ ಬಹಳ ವಿಶೇಷ. ಸಾಮೂಹಿಕ ವಿವಾಹಗಳ ಮೂಲಕ ಇಲ್ಲಿ ಅದ್ಧೂರಿಯಾಗಿ ಪ್ರೇಮಿಗಳ ದಿನವನ್ನು ಆಚರಿಸಲಾಗುತ್ತದೆ. ಇಲ್ಲಿನ ಸರ್ಕಾರವು ದೊಡ್ಡ ಪ್ರಮಾಣದ ಕಾರ್ಯಕ್ರಮಗಳನ್ನು ಆಯೋಜಿಸುತ್ತದೆ. ‘ನನ್ನ ಒಪ್ಪಿಗೆ ಇದೆ‘ ಎಂದು ಹೇಳುವ ಮೂಲಕ ನೂರಾರು ದಂಪತಿ ಒಟ್ಟಿಗೆ ಪ್ರೇಮ ಅಥವಾ ಮದುವೆ ಬಂಧನಕ್ಕೆ ಒಳಗಾಗುತ್ತಾರೆ.
ದಕ್ಷಿಣ ಆಫ್ರಿಕಾ
ದಕ್ಷಿಣ ಆಫ್ರಿಕಾದಲ್ಲಿ ಫೆಬ್ರವರಿ 15 ರಂದು ರೋಮನ್ ಹಬ್ಬ ಲುಪರ್ಕಾಲಿಯಾ ಗೌರವಾರ್ಥವಾಗಿ ಪ್ರೇಮಿಗಳ ದಿನವನ್ನು ಆಚರಿಸಲಾಗುತ್ತದೆ. ತಮ್ಮ ಪ್ರೇಮವನ್ನು ರಹಸ್ಯವಾಗಿ ಇಟ್ಟುಕೊಳ್ಳುವ ಬದಲು ಈ ದಿನದಂದು ಮಹಿಳೆಯರು ಧೈರ್ಯವಾಗಿ ತಾವು ಇಷ್ಟಪಟ್ಟ ಹುಡುಗನ ಹೆಸರನ್ನು ತೋಳುಗಳ ಮೇಲೆ ಅಂಟಿಸಿಕೊಳ್ಳುತ್ತಾರೆ. ಈ ರೀತಿ ಮಾಡುವುದು ಇಷ್ಟವಿಲ್ಲ ಎಂದವರು ಹೂಗಳು ಹಾಗೂ ಸಣ್ಣ ಉಡುಗೊರೆಗಳ ಮೂಲಕವೂ ಮನದ ಭಾವನೆಗಳನ್ನು ಹಂಚಿಕೊಳ್ಳಬಹುದು.
ತೈವಾನ್‌
ಪ್ರೀತಿ ವ್ಯಕ್ತಪಡಿಸುವ ವಿಚಾರದಲ್ಲಿ ತೈವಾನ್‌ನಲ್ಲಿ ಹೂಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಪುರುಷರು ಪ್ರೇಮಿಗಳ ದಿನದಂದು ಮತ್ತು ಮತ್ತೆ ಜುಲೈ 7 ರಂದು ದೊಡ್ಡ ಹೂಗುಚ್ಛಗಳನ್ನು ನೀಡುತ್ತಾರೆ. ಯಾರಾದರೂ 108 ಗುಲಾಬಿಗಳ ಹೂಗುಚ್ಛವನ್ನು ಪಡೆದರೆ ನಿಮಗೆ ಯಾರೋ ಪ್ರಪೋಸ್ ಮಾಡಲು ಸಿದ್ಧವಿದ್ದಾರೆ ಎಂಬ ಅರ್ಥ.
ಸೌತ್ ಕೊರಿಯಾ
ದಕ್ಷಿಣ ಕೊರಿಯಾದಲ್ಲಿ ಪ್ರೇಮಿಗಳ ದಿನವು ಒಂದು ತಿಂಗಳ ಕಾಲ ನಡೆಯುವ ಆಚರಣೆಯ ಆರಂಭವನ್ನು ಸೂಚಿಸುತ್ತದೆ. ಫೆಬ್ರವರಿ 14 ರಂದು, ಸಂಗಾತಿಗಳು ಚಾಕೊಲೇಟ್‌ಗಳು ಮತ್ತು ಉಡುಗೊರೆಗಳನ್ನು ವಿನಿಮಯ ಮಾಡಿಕೊಳ್ಳುತ್ತಾರೆ. ನಂತರ, ಮಾರ್ಚ್ 14 ರಂದು, ಜಪಾನ್‌ನ ಸಂಪ್ರದಾಯದಂತೆ ಅವರು ಶ್ವೇತ ದಿನವನ್ನು ಆಚರಿಸುತ್ತಾರೆ. ಅಂತಿಮವಾಗಿ ಏಪ್ರಿಲ್ 14 ರಂದು ಒಂಟಿ ಇರುವವರು ಕಪ್ಪು ದಿನ ಅಥವಾ ಬ್ಲ್ಯಾಕ್‌ ಡೇಯನ್ನು ಆಚರಿಸುತ್ತಾರೆ. ತಾವಿನ್ನೂ ಸಿಂಗಲ್ ಎನ್ನುವುದನ್ನು ಸೂಚಿಸಲು ಜಜಾಂಗ್‌ಮಿಯೋನ್ (ಕಪ್ಪು ಬೀನ್ ಸಾಸ್‌ನೊಂದಿಗೆ ನೂಡಲ್ಸ್) ಎನ್ನುವ ಬಟ್ಟಲಿನಲ್ಲಿ ಪ್ರದರ್ಶಿಸುತ್ತಾರೆ.
ಬ್ರೆಜಿಲ್‌
ಬ್ರೆಜಿಲ್‌ನಲ್ಲಿ, ಜೂನ್ 12 ರಂದು ಪ್ರೇಮಿಗಳ ದಿನವನ್ನು ಆಚರಿಸಲಾಗುತ್ತದೆ. ದಿಯಾ ದೋಸ್ ನಮೋರಡೋಸ್ ಎಂದು ಈ ದಿನವನ್ನು ಕರೆಯಲಾಗುತ್ತದೆ. ವಿವಾಹದ ಪೋಷಕ ಸಂತರಾದ ಸೇಂಟ್ ಆಂಥೋನಿಯವರ ಹಬ್ಬದ ಹಿಂದಿನ ದಿನ ಇದನ್ನು ಆಚರಿಸಲಾಗುತ್ತದೆ. ಈ ಹಬ್ಬಕ್ಕೆ ಪ್ರೇಮಿಗಳ ದಿನಗಳು ಸಮೀಪದಲ್ಲೇ ಇರುವ ಕಾರಣ ಈ ಆಚರಣೆ ಜಾರಿಗೆ ಬಂದಿತ್ತು ಎನ್ನಲಾಗುತ್ತದೆ. ಅಮೆರಿಕದಲ್ಲಿರುವಂತೆ ಬ್ರೆಜಿಲಿಯನ್ನರು ಲಂಚ್‌, ಡಿನ್ನರ್‌ಗೆ ಹೊರಗೆ ಹೋಗುವುದು, ಉಡುಗೊರೆಗಳನ್ನು ವಿನಿಮಯ ಮಾಡಿಕೊಳ್ಳುವುದು ಅಥವಾ ತಮ್ಮ ಸಂಗಾತಿಯೊಂದಿಗೆ ವಿಶೇಷ ಡೇಟ್ ನೈಟ್ ಅನ್ನು ಆನಂದಿಸುವ ಮೂಲಕ ಪ್ರೇಮಿಗಳ ದಿನವನ್ನು ಆಚರಿಸುತ್ತಾರೆ.
ವಿಭಾಗ