ಖಾಲಿ ಹೊಟ್ಟೆಯಲ್ಲಿ ವಾಕಿಂಗ್ ಮತ್ತು ಊಟದ ನಂತರ ವಾಕಿಂಗ್: ದೇಹದ ಕೊಬ್ಬನ್ನು ಕರಗಿಸಲು ವೈದ್ಯರ ಸಲಹೆ ಇದು
ದೇಹವನ್ನು ಚಟುವಟಿಕೆಯಿಂದ ಇರಿಸಿಕೊಳ್ಳುವುದು ಇಂದಿನ ಅಗತ್ಯ. ಆಧುನಿಕ ಜೀವನಶೈಲಿಯ ಪರಿಣಾಮ ನಮಗೆ ಇಂದು ಹಲವು ರೀತಿಯ ಕಾಯಿಲೆಗಳು ಬರುತ್ತಿವೆ. ದಿನನಿತ್ಯದ ನಡಿಗೆ ಹೇಗೆ ನಮಗೆ ಪ್ರಯೋಜನಕಾರಿ ಮತ್ತು ಕೊಬ್ಬನ್ನು ಕರಗಿಸಲು ಸೂಕ್ತ ಸಲಹೆಯನ್ನು ತಜ್ಞರು ನೀಡಿದ್ದಾರೆ.
ನಮ್ಮಲ್ಲಿ ಅನೇಕರಿಗೆ ದಿನಕ್ಕೆ ಕೆಲವು ನಿಮಿಷಗಳ ಕಾಲ ವಾಕಿಂಗ್ ಮಾಡುವ ಅಭ್ಯಾಸವಿದೆ. ಹೆಚ್ಚಿನವರು ಊಟದ ನಂತರ ವಾಕಿಂಗ್ ಮಾಡಿದರೆ, ಇನ್ನೂ ಅನೇಕರು ಬೆಳಗ್ಗೆ ಎದ್ದು ಖಾಲಿ ಹೊಟ್ಟೆಯಲ್ಲಿ ನಡೆಯುತ್ತಾರೆ. ಎಲ್ಲರ ಗುರಿಯೂ ಹೆಚ್ಚಿನ ಕ್ಯಾಲೊರಿಗಳನ್ನು ಕರಗಿಸುವುದು. ಹಾಗಾದರೆ ಈ ಎರಡು ವಿಧಾನಗಳಲ್ಲಿ ಹೆಚ್ಚು ಪರಿಣಾಮಕಾರಿ ಯಾವುದು? ತಜ್ಞರು ಇದರ ಬಗ್ಗೆ ಏನು ಹೇಳುತ್ತಾರೆ? ವಾಕಿಂಗ್ ಸರಳ ಮತ್ತು ಸುಲಭ ವ್ಯಾಯಾಮ ವಿಧಾನಗಳಲ್ಲಿ ಒಂದು. ಇದು ಕ್ಯಾಲೊರಿಗಳನ್ನು ಕರಗಿಸಲು, ಒತ್ತಡವನ್ನು ನಿರ್ವಹಿಸಲು, ಚಯಾಪಚಯವನ್ನು ಸುಧಾರಿಸಲು ಮತ್ತು ಸ್ನಾಯುಗಳನ್ನು ಬಲಪಡಿಸಲು ಸಹಾಯ ಮಾಡುತ್ತದೆ. ತೂಕ ಇಳಿಸಲು ಬಯಸುವವರು ಚುರುಕಾದ ನಡಿಗೆಯಿಂದ ಹೆಚ್ಚು ಪ್ರಯೋಜನವನ್ನು ಪಡೆಯುತ್ತಾರೆ.
ತಜ್ಞರ ಪ್ರಕಾರ, ಯಾರಾದರೂ ತೂಕ ಇಳಿಸಿಕೊಳ್ಳುವ ಗುರಿಯನ್ನು ಹೊಂದಿದ್ದರೆ, ಖಾಲಿ ಹೊಟ್ಟೆಯಲ್ಲಿ ನಡೆಯುವುದು ಯಾವಾಗಲೂ ಉತ್ತಮ.
ಖಾಲಿ ಹೊಟ್ಟೆಯಲ್ಲಿ ನಡೆಯುವುದು ದೇಹಕ್ಕೆ ಹೇಗೆಲ್ಲಾ ಸಹಾಯ ಮಾಡುತ್ತದೆ?
ಖಾಲಿ ಹೊಟ್ಟೆಯಲ್ಲಿ ನಡೆದಾಗ, ದೇಹವು ಸಂಗ್ರಹಿಸಿದ ಕೊಬ್ಬನ್ನು ಶಕ್ತಿಗಾಗಿ ಬಳಸಲು ಒತ್ತಡ ಬೀಳುತ್ತದೆ (ಆಹಾರದಿಂದ ಸುಲಭವಾಗಿ ಲಭ್ಯವಿರುವ ಗ್ಲೂಕೋಸ್ ಇಲ್ಲದಿರುವುದರಿಂದ) ಇದು ಕೊಬ್ಬನ್ನು ಕರಗಿಸಲು ಮತ್ತು ತೂಕ ನಷ್ಟವನ್ನು ಸುಧಾರಿಸಲು ಕಾರಣವಾಗಬಹುದು.
ಸಾಮಾನ್ಯವಾಗಿ ಸ್ನಾಯುಗಳು ಸಂಕೋಚನಕ್ಕಾಗಿ (ನಡೆಯುವಾಗ, ಓಡುವಾಗ ಅಥವಾ ವ್ಯಾಯಾಮ ಮಾಡುವಾಗ) ರಕ್ತದಿಂದ ಸಕ್ಕರೆಯನ್ನು ತೆಗೆದುಕೊಳ್ಳುತ್ತವೆ. ನಿದ್ರೆಯ ಸಮಯದಲ್ಲಿಯೂ ಸಹ, ಯಕೃತ್ತು ಗ್ಲುಕೋಸ್ ಅನ್ನು ರಕ್ತದ ಹರಿವಿಗಾಗಿ ಬಿಡುಗಡೆ ಮಾಡುತ್ತದೆ; ಆದ್ದರಿಂದ, ಗ್ಲೈಕೋಜೆನ್ ನ ಸಂಗ್ರಹಗಳು ಬೆಳಿಗ್ಗೆ ಕಡಿಮೆ ಇರುತ್ತದೆ. ಆದ್ದರಿಂದ, ಖಾಲಿ ಹೊಟ್ಟೆಯಲ್ಲಿ ನಡೆಯುವುದರಿಂದ ದೇಹವು ಶಕ್ತಿಗಾಗಿ ಹೆಚ್ಚಿನ ಕೊಬ್ಬನ್ನು ಕರಗಿಸುತ್ತದೆ, ಹಾಗಾಗಿ ಖಾಲಿ ಹೊಟ್ಟೆಯಲ್ಲಿ ನಡಿಗೆಯು ವ್ಯಾಯಾಮದ ಪ್ರಯೋಜನಗಳನ್ನು ಹೆಚ್ಚಿಸುವ ಪ್ರಬಲ ಮಾರ್ಗವಾಗಿದೆ ಎಂದು ಸಿಕೆ ಬಿರ್ಲಾ ಆಸ್ಪತ್ರೆಯ ಆಂತರಿಕ ಔಷಧ ಸಲಹೆಗಾರ ಡಾ.ತುಷಾರ್ ತಯಾಲ್ ಹೇಳುತ್ತಾರೆ.
ಖಾಲಿ ಹೊಟ್ಟೆಯಲ್ಲಿ ನಡಿಗೆ - ಎಚ್ಚರಿಕೆ ಅಗತ್ಯ
ಮಧುಮೇಹ, ಅಧಿಕ ರಕ್ತದೊತ್ತಡದಂತಹ ಆರೋಗ್ಯ ಸಮಸ್ಯೆಗಳನ್ನು ಹೊಂದಿರುವವರು ಖಾಲಿ ಹೊಟ್ಟೆಯಲ್ಲಿ ವ್ಯಾಯಾಮ ಮಾಡುವಾಗ ಜಾಗರೂಕರಾಗಿರಬೇಕು. ರಕ್ತದಲ್ಲಿನ ಕಡಿಮೆ ಸಕ್ಕರೆ ಅಂಶ ಮತ್ತು ನಿರ್ಜಲೀಕರಣದ ಸಂಭಾವ್ಯ ಪರಿಣಾಮಗಳಾದ ಲಘು ತಲೆನೋವು, ತಲೆತಿರುಗುವಿಕೆ, ನಡುಕ ಮತ್ತು ಸಿಂಕೋಪ್ (ಮೂರ್ಛೆ) ಕಾರಣದಿಂದಾಗಿ ದೀರ್ಘಕಾಲದವರೆಗೆ ಖಾಲಿ ಹೊಟ್ಟೆಯಲ್ಲಿ ಕಾರ್ಡಿಯೋ ಅಪಾಯಕಾರಿಯಾಗಿದೆ ಎಂದು ಬೆಂಗಳೂರಿನ ಗ್ಲೆನೆಗಲ್ಸ್ ಬಿಜಿಎಸ್ ಆಸ್ಪತ್ರೆಯ ಆಂತರಿಕ ಔಷಧ ಸಲಹೆಗಾರ ಡಾ. ಸಿರಿ ಎಂ ಕಾಮತ್ ಹೇಳುತ್ತಾರೆ.
ಊಟದ ನಂತರದ ನಡಿಗೆಯಲ್ಲಿ ಏನೆಲ್ಲಾ ಪ್ರಯೋಜನಗಳಿವೆ?
ಊಟದ ನಂತರದ ನಡಿಗೆಯು ಆರೋಗ್ಯಕ್ಕೂ ಪ್ರಯೋಜನಕಾರಿಯಾಗಿದೆ ಮತ್ತು ತಮ್ಮದೇ ಆದ ಅನುಕೂಲತೆಗಳನ್ನು ಹೊಂದಿದೆ. ನೀವು ಊಟದ ನಂತರ ನಡೆಯುವಾಗ, ನಿಮ್ಮ ದೇಹವು ಶಕ್ತಿಗಾಗಿ ನೀವು ಸೇವಿಸಿದ ಆಹಾರದಿಂದ ಗ್ಲೂಕೋಸ್ ಅನ್ನು ಬಳಸುತ್ತದೆ. ಇದು ಸುಧಾರಿತ ಕಾರ್ಯಕ್ಷಮತೆಗೆ ಕಾರಣವಾಗಬಹುದು. ಏಕೆಂದರೆ ದೇಹವು ಸುಲಭವಾಗಿ ಲಭ್ಯವಿರುವ ಶಕ್ತಿಯ ಮೂಲವನ್ನು ಹೊಂದಿದೆ ಎಂದು ಫರೇಹಾ ಶಾನಮ್ ವಿವರಿಸುತ್ತಾರೆ. ಪರಿಣಾಮವಾಗಿ, ಇದು ರಕ್ತದಲ್ಲಿನ ಸಕ್ಕರೆ ಸ್ಪೈಕ್ ಅನ್ನು ನಿಯಂತ್ರಿಸಲು ಸಹಾಯ ಮಾಡುತ್ತದೆ, ಇದು ಮಧುಮೇಹ ಅಥವಾ ಇನ್ಸುಲಿನ್ ಪ್ರತಿರೋಧದಿಂದ ಬಳಲುತ್ತಿರುವವರಿಗೆ ವಿಶೇಷವಾಗಿ ಮುಖ್ಯವಾಗಿದೆ.
ಖಾಲಿಹೊಟ್ಟೆಯಲ್ಲಿನ ವಾಕಿಂಗ್‌‌‌‌ಗೆ ಹೋಲಿಸಿದರೆ ಇದರಿಂದ ಹೆಚ್ಚಿನ ಕೊಬ್ಬನ್ನು ಕರಗಿಸಲು ಸಾಧ್ಯವಿಲ್ಲವಾದರೂ, ಊಟದ ನಂತರ 10-15 ನಿಮಿಷಗಳ ಕಾಲ ನಡೆಯುವುದು ಜೀರ್ಣಕ್ರಿಯೆಯನ್ನು ಸುಧಾರಿಸುತ್ತದೆ ಮತ್ತು ಹೊಟ್ಟೆಯ ಉಬ್ಬರವನ್ನು ತಡೆಯುತ್ತದೆ.
ಎಷ್ಟು ನಡೆಯಬೇಕು?
ತೂಕ ಇಳಿಸಿಕೊಳ್ಳಲು ಮತ್ತು ಒಟ್ಟಾರೆ ಯೋಗಕ್ಷೇಮವನ್ನು ಕಾಪಾಡಿಕೊಳ್ಳಲು, ಪ್ರತಿದಿನ 30 ರಿಂದ 60 ನಿಮಿಷಗಳ ಕಾಲ ನಡೆಯುವುದನ್ನು ವೈದ್ಯರೂ ಶಿಫಾರಸ್ಸು ಮಾಡುತ್ತಾರೆ.
ಒಟ್ಟಾರೆಯಾಗಿ, ತೂಕವನ್ನು ಕಳೆದುಕೊಳ್ಳುವುದು ನೀವು ಎಷ್ಟು ವ್ಯಾಯಾಮ ಮಾಡುತ್ತೀರಿ ಎಂಬುದರ ಮೇಲೆ ಮಾತ್ರ ಅವಲಂಬಿತವಾಗಿಲ್ಲ. ನೀವು ಆರೋಗ್ಯಕರ ಜೀವನಶೈಲಿಯನ್ನು ಕಾಪಾಡಿಕೊಳ್ಳಬೇಕು, ಸಾಕಷ್ಟು ನಿದ್ರೆ ಮಾಡಬೇಕು (ಅಥವಾ ಆಹಾರ ಬದಲಾವಣೆಗಳು ಮತ್ತು ವ್ಯಾಯಾಮದ ಮೂಲಕ ಹೆಚ್ಚಿನ ಕ್ಯಾಲೊರಿಗಳನ್ನು ಕರಗಿಸಬೇಕು).
(ಗಮನಿಸಿ: ಈ ಮಾಹಿತಿಯು ಸಾಮಾನ್ಯಜ್ಞಾನ ಹಾಗೂ ಅಂತರ್ಜಾಲದಲ್ಲಿ ಸಿಕ್ಕ ಮಾಹಿತಿಯನ್ನ ಆಧರಿಸಿದೆ. ಈ ವಿಚಾರ ಸಂಪೂರ್ಣ ನಿಖರವಾಗಿದೆ ಎಂದು ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಪ್ರತಿಪಾದಿಸುವುದಿಲ್ಲ. ಈ ವಿಷಯದ ಕುರಿತ ನಿಖರ ಮಾಹಿತಿಗಾಗಿ ಸಂಬಂಧಪಟ್ಟ ಕ್ಷೇತ್ರದ ತಜ್ಞರನ್ನು ಸಂಪರ್ಕಿಸಿ)
Kiran Kumar I G
