World Thyroid Day 2023: ಹೆಚ್ಚುತ್ತಿರುವ ಥೈರಾಯಿಡ್‌ ಸಮಸ್ಯೆ; ರೋಗಲಕ್ಷಣಗಳು, ದಿನದ ಮಹತ್ವ, ಇತಿಹಾಸದ ಕುರಿತ ಮಾಹಿತಿ ಹೀಗಿದೆ
Thyroid Problem: ಥೈರಾಯಿಡ್‌ ಇಂದು ಬಹಳಷ್ಟು ಜನರನ್ನು ಕಾಡುತ್ತಿರುವ ಜೀವನಶೈಲಿಗೆ ಸಂಬಂಧಿಸಿದ ಕಾಯಿಲೆಯಾಗಿದೆ. ಪ್ರತಿವರ್ಷ ಮೇ 25 ರಂದು ವಿಶ್ವ ಥೈರಾಯಿಡ್‌ ದಿನವನ್ನು ಆಚರಿಸಲಾಗುತ್ತದೆ. ಥೈರಾಯಿಡ್‌ ಕಾಯಿಲೆಯ ಬಗ್ಗೆ ಜನರಿಗೆ ಶಿಕ್ಷಣ ನೀಡಲು ಹಾಗೂ ರೋಗಲಕ್ಷಣಗಳ ಬಗ್ಗೆ ಅರಿವು ಮೂಡಿಸುವ ಉದ್ದೇಶದಿಂದ ಈ ದಿನವನ್ನು ಆಚರಿಸಲಾಗುತ್ತದೆ.
ಕತ್ತಿನ ಮುಂಭಾಗದಲ್ಲಿ ಧ್ವನಿ ಪೆಟ್ಟಿಗೆಯ ಅಡಿಯಲ್ಲಿ ಇರುವ ಥೈರಾಯಿಡ್‌ ಗ್ರಂಥಿಯು ಚಿಟ್ಟೆಯಾಕಾರದಲ್ಲಿರುತ್ತದೆ. ಥೈರಾಯಿಡ್‌ ಸಮಸ್ಯೆಯು ಇಂದು ಜಗತ್ತಿನಾದ್ಯಂತ ಬಹಳಷ್ಟು ಜನರನ್ನು ಕಾಡುತ್ತಿದೆ. ಮಧುಮೇಹದ ನಂತರದ ಸ್ಥಾನ ಥೈರಾಯಿಡ್‌ ಕಾಯಿಲೆಗಿದೆ.
ಪ್ರಪಂಚದಾದ್ಯಂತ 10ರಲ್ಲಿ ಒಬ್ಬರು ಈ ಸಮಸ್ಯೆಯಿಂದ ಬಳಲುತ್ತಿದ್ದಾರೆ. ಥೈರಾಯಿಡ್‌ ಸಮಸ್ಯೆಯು ಪುರುಷರಿಗಿಂತ ಮಹಿಳೆಯರನ್ನು ಹೆಚ್ಚು ಕಾಡುತ್ತದೆ. ಇದರಲ್ಲಿ ಎರಡು ವಿಧಗಳಿದ್ದು ಹೈಪೋ ಹಾಗೂ ಹೈಪರ್ ಎಂದು ವಿಂಗಡಿಸಲಾಗಿದೆ. ಥೈರಾಯಿಡ್‌ ಗ್ರಂಥಿಯು ಹಲವು ಹಾರ್ಮೋನುಗಳನ್ನು ಉತ್ಪಾದಿಸಿದಾಗ ಅದನ್ನು ಹೈಪರ್ ಥೈರಾಯಿಡಿಸಮ್‌ ಎಂದು ಕರೆಯುತ್ತಾರೆ. ಸಾಕಷ್ಟು ಹಾರ್ಮೋನ್‌ಗಳನ್ನು ಉತ್ಪಾದಿಸದ ನಿಷ್ಕ್ರೀಯ ಥೈರಾಯಿಡ್‌ ಅನ್ನು ಹೈಪೋಥೈರಾಯ್ಡಿಸಮ್ ಎಂದು ಕರೆಯಲಾಗುತ್ತದೆ.
ಈ ಎರಡೂ ಅಸಮತೋಲನಗಳು ಹಲವಾರು ರೋಗಲಕ್ಷಣಗಳಿಗೆ ಕಾರಣವಾಗಬಹುದು. ವಿಶ್ವ ಥೈರಾಯಿಡ್‌ ದಿನದಂದು, ದಿನಾಂಕ, ಇತಿಹಾಸ, ದಿನದ ಮಹತ್ವವನ್ನು ಹೊರತುಪಡಿಸಿ ಸತ್ಯಗಳು, ಥೈರಾಯಿಡ್‌ ಸಮಸ್ಯೆಗಳ ವಿಧಗಳು ಮತ್ತು ರೋಗದ ಲಕ್ಷಣಗಳ ಕುರಿತ ಮಾಹಿತಿ ಇಲ್ಲಿದೆ.
ವಿಶ್ವ ಥೈರಾಯಿಡ್‌ ದಿನ
ಪ್ರತಿವರ್ಷ ಮೇ 25 ರಂದು ವಿಶ್ವ ಥೈರಾಯಿಡ್‌ ದಿನವನ್ನು ಆಚರಿಸಲಾಗುತ್ತದೆ.
ಥೈರಾಯಿಡ್‌ ದಿನದ ಇತಿಹಾಸ ಹಾಗೂ ಮಹತ್ವ
2007ರಲ್ಲಿ ಥೈರಾಯಿಡ್‌ ಫೆಡರೇಷನ್‌ ಇಂಟರ್‌ನ್ಯಾಷನಲ್‌ ಮೊದಲ ಬಾರಿ ವಿಶ್ವ ಥೈರಾಯಿಡ್‌ ದಿನವನ್ನು ಆಚರಿಸಿತ್ತು. 1965 ರಲ್ಲಿ ರೂಪುಗೊಂಡ ಯುರೋಪಿಯನ್ ಥೈರಾಯ್ಡ್ ಅಸೋಸಿಯೇಷನ್ (ETA) ಅನ್ನು ಗೌರವಿಸಲು ಈ ಜಾಗತಿಕ ಆರೋಗ್ಯ ದಿನವನ್ನು ರಚಿಸಲಾಗಿದೆ. ಈ ದಿನವನ್ನು ಥೈರಾಯ್ಡ್ ಸಮಸ್ಯೆಗಳಿಂದ ಬಳಲುತ್ತಿರುವ ಜನರು ಮತ್ತು ವಿಶ್ವದಾದ್ಯಂತ ಥೈರಾಯಿಡ್‌ ಕಾಯಿಲೆಗಳ ಅಧ್ಯಯನ ಮತ್ತು ಚಿಕಿತ್ಸೆಗೆ ಬದ್ಧರಾಗಿರುವ ಸಂಶೋಧಕರಿಗೆ ಸಮರ್ಪಿಸಲಾಗಿದೆ. ಥೈರಾಯಿಡ್‌ ಕಾಯಿಲೆಗಳನ್ನು ಮೊದಲೇ ನಿರ್ವಹಿಸದಿದ್ದರೆ ಜೀವಕ್ಕೆ ಅಪಾಯಕಾರಿ. ಆದಾಗ್ಯೂ, ಆರಂಭಿಕ ನಿರ್ವಹಣೆ ಮತ್ತು ಚಿಕಿತ್ಸೆಯಿಂದ ಅದನ್ನು ಗುಣಪಡಿಸಬಹುದು.
ಥೈರಾಯಿಡ್‌ನ ವಿಧಗಳು
ಥೈರಾಯಿಡ್‌ ಸಮಸ್ಯೆಯ ಎರಡು ಸಾಮಾನ್ಯ ವಿಧಗಳೆಂದರೆ ಹೈಪೋಥೈರಾಯಿಡಿಸಮ್ (ಅಂಡರ್‌ಆಕ್ಟಿವ್ ಥೈರಾಯಿಡ್‌) ಮತ್ತು ಹೈಪರ್ ಥೈರಾಯಿಡಿಸಮ್‌ (ಓವರ್‌ ಆಕ್ಟಿವ್‌ ಥೈರಾಯಿಡ್‌).
* ಥೈರಾಯಿಡ್‌ ಗ್ರಂಥಿಯು ಸಾಕಷ್ಟು ಥೈರಾಯಿಡ್‌ ಹಾರ್ಮೋನುಗಳನ್ನು ಉತ್ಪಾದಿಸದಿದ್ದಾಗ ಹೈಪೋಥೈರಾಯಿಡಿಸಮ್ ಸಂಭವಿಸುತ್ತದೆ. ರೋಗಲಕ್ಷಣಗಳು ತೂಕ ಹೆಚ್ಚಾಗುವುದು, ಆಯಾಸ, ಒಣ ಚರ್ಮ, ಕೂದಲು ಉದುರುವಿಕೆ, ಇತ್ಯಾದಿ.
* ಥೈರಾಯಿಡ್‌ ಗ್ರಂಥಿಯ ಅತಿಯಾದ ಚಟುವಟಿಕೆಯು ಹೈಪರ್ ಥೈರಾಯಿಡಿಸಮ್‌ಗೆ ಕಾರಣವಾಗಬಹುದು. ಥೈರಾಯಿಡ್‌ ಗ್ರಂಥಿಯು ಹೆಚ್ಚಿನ ಥೈರಾಯಿಡ್‌ ಹಾರ್ಮೋನುಗಳನ್ನು ಉತ್ಪಾದಿಸಿದಾಗ ಇದು ಸಂಭವಿಸುತ್ತದೆ. ಸ್ಥಿತಿಯ ಸಾಮಾನ್ಯ ಲಕ್ಷಣಗಳು ತೂಕ ನಷ್ಟ, ಹಸಿವು ಹೆಚ್ಚಾಗುವುದು, ಹೆಚ್ಚಿದ ಹೃದಯ ಬಡಿತ, ಆತಂಕ, ಕಿರಿಕಿರಿ.
* ಹಶಿಮೊಟೊ ಥೈರಾಯಿಡಿಟಿಸ್‌ನಲ್ಲಿ, ಪ್ರತಿರಕ್ಷಣಾ ವ್ಯವಸ್ಥೆಯು ಥೈರಾಯ್ಡ್ ಗ್ರಂಥಿಯನ್ನು ಆಕ್ರಮಿಸುತ್ತದೆ ಮತ್ತು ಹಾನಿಗೊಳಿಸುತ್ತದೆ. ಇದು ಹೈಪೋಥೈರಾಯಿಡಿಸಮ್‌ಗೆ ಕಾರಣವಾಗುತ್ತದೆ.
* ಗ್ರೇವ್ಸ್ ಕಾಯಿಲೆಯ ಸಂದರ್ಭದಲ್ಲಿ, ಥೈರಾಯಿಡ್‌ ಗ್ರಂಥಿಯು ಹೆಚ್ಚಿನ ಪ್ರಮಾಣದ ಹಾರ್ಮೋನುಗಳನ್ನು ಉತ್ಪಾದಿಸುತ್ತದೆ, ಇದು ಹೈಪರ್ ಥೈರಾಯ್ಡಿಸಮ್‌ಗೆ ಕಾರಣವಾಗುತ್ತದೆ.
ಥೈರಾಯಿಡ್‌ ಕುರಿತ ಸಂಗತಿಗಳು
* ಪುರುಷರಿಗಿಂತ ಮಹಿಳೆಯರಲ್ಲಿ ಥೈರಾಯಿಡ್‌ ಸಮಸ್ಯೆ ಹೆಚ್ಚು ಕಾಡುತ್ತದೆ.
* ವಯಸ್ಸಾದವರಲ್ಲಿ ಹೈಪೋಥೈರಾಯ್ಡಿಸಮ್ ಹೆಚ್ಚು ಸಾಮಾನ್ಯವಾಗಿದೆ. ಆದರೆ ಹೈಪರ್ ಥೈರಾಯ್ಡಿಸಮ್ ಯುವ ಜನರ ಮೇಲೆ ಹೆಚ್ಚು ಪರಿಣಾಮ ಬೀರುತ್ತದೆ.
* ಥೈರಾಯ್ಡ್ ಸಮಸ್ಯೆಗಳು ಚಯಾಪಚಯ, ಶಕ್ತಿಯ ಮಟ್ಟಗಳು, ತೂಕ, ಹೃದಯದ ಕಾರ್ಯ, ಫಲವತ್ತತೆ, ಮನಸ್ಥಿತಿ ಮತ್ತು ಅರಿವಿನ ಕ್ರಿಯೆಯ ಮೇಲೆ ಪರಿಣಾಮ ಬೀರಬಹುದು.
* ಥೈರಾಯಿಡ್‌ ಕಾಯಿಲೆ ಇರುವವರಲ್ಲಿ ಅರ್ಧಕ್ಕಿಂತ ಹೆಚ್ಚು ಜನರಿಗೆ ತಮ್ಮ ಸ್ಥಿತಿಯ ಬಗ್ಗೆ ತಿಳಿದಿಲ್ಲ.
* ರೋಗನಿರ್ಣಯ ಮಾಡದ ಥೈರಾಯಿಡ್‌ ಸಮಸ್ಯೆಗಳನ್ನು ಹೊಂದಿರುವ ಗರ್ಭವತಿಯರು ಗರ್ಭಪಾತ, ಅವಧಿಪೂರ್ವ ಹೆರಿಗೆ ಮತ್ತು ಬೆಳವಣಿಗೆಯ ಸಮಸ್ಯೆಗಳ ಅಪಾಯವನ್ನು ಎದುರಿಸುತ್ತಾರೆ.
* ಆರಂಭಿಕ ಹಂತದಲ್ಲಿ ಚಿಕಿತ್ಸೆ ನೀಡದಿದ್ದರೆ, ಥೈರಾಯಿಡ್‌ ಕಾಯಿಲೆಯು ಹೃದ್ರೋಗ, ಆಸ್ಟಿಯೊಪೊರೋಸಿಸ್ ಮತ್ತು ಬಂಜೆತನಕ್ಕೆ ಕಾರಣವಾಗಬಹುದು.
ವಿಶ್ವ ಥೈರಾಯಿಡ್‌ ದಿನವನ್ನು ಹೇಗೆ ಆಚರಿಸುವುದು
ಆರಂಭದಲ್ಲಿ ಸಮಸ್ಯೆಯನ್ನು ಗುರುತಿಸುವುದರಿಂದ ಥೈರಾಯಿಡ್‌ ಸಮಸ್ಯೆಯನ್ನು ನಿರ್ವಹಿಸಲು ಅಥವಾ ಚಿಕಿತ್ಸೆ ನೀಡಲು ಸಹಾಯ ಮಾಡುತ್ತದೆ. ಥೈರಾಯಿಡ್‌ನ ಅತಿ ಕ್ರಿಯಾಶೀಲ ಅಥವಾ ನಿಷ್ಕ್ರಿಯ ಥೈರಾಯಿಡ್‌ನ ಯಾವುದೇ ರೋಗಲಕ್ಷಣಗಳ ಸಂದರ್ಭದಲ್ಲಿ ನಿಮ್ಮನ್ನು ಪರೀಕ್ಷಿಸಿಕೊಳ್ಳಿ. ನಿಮ್ಮ ಸ್ನೇಹಿತರು ಅಥವಾ ಹತ್ತಿರದ ಮತ್ತು ಆತ್ಮೀಯರನ್ನು ಪರೀಕ್ಷಿಸಲು ಪ್ರೋತ್ಸಾಹಿಸಿ.
* ನಿಮ್ಮ ದೇಹದ ಮೇಲೆ ಗಮನ ಕೊಡಿ ಮತ್ತು ಯಾವುದೇ ಅನಿರೀಕ್ಷಿತ ತೂಕ ಹೆಚ್ಚಾಗುವುದು ಅಥವಾ ತೂಕ ನಷ್ಟ, ಶಕ್ತಿಯ ಮಟ್ಟದಲ್ಲಿ ಬದಲಾವಣೆ, ಮನಸ್ಥಿತಿ ಬದಲಾವಣೆಗಳನ್ನು ಲಘುವಾಗಿ ತೆಗೆದುಕೊಳ್ಳಬಾರದು.
ಜೀವನಶೈಲಿಯ ಸುಧಾರಣೆ ಬಹಳ ಅವಶ್ಯ
ಥೈರಾಯಿಡ್‌ ಸಮಸ್ಯೆಯಿಂದ ಬಳಲುತ್ತಿರುವ ಜೀವನಶೈಲಿಯಲ್ಲಿ ಬದಲಾವಣೆ ಮಾಡಿಕೊಳ್ಳುವುದು ಬಹಳ ಅವಶ್ಯ. ಸಮರ್ಪಕ ಆಹಾರ ಸೇವನೆ, ನಿದ್ದೆ, ದೈಹಿಕ ಚಟುವಟಿಕೆಯ ಜೊತೆಗೆ ಒತ್ತಡ ನಿಯಂತ್ರಣ ಮಾಡುವುದು ಬಹಳ ಅವಶ್ಯ.
