VIDEO: ಅನಂತ್ ಅಂಬಾನಿ ಕೈಯಲ್ಲಿದ್ದ 15 ಕೋಟಿ ರೂ. ಬೆಲೆಯ ವಾಚ್ ನೋಡಿ ಫಿದಾ ಆದ್ರು ಮಾರ್ಕ್ ಜುಕರ್ಬರ್ಗ್ ದಂಪತಿ
Anant Ambani Watch: ಫೇಸ್ಬುಕ್ ಮತ್ತು ಇತರ ಮೆಟಾ ಪ್ಲಾಟ್ಫಾರ್ಮ್ಗಳ ಸಿಇಒ ಮತ್ತು ಸಹ-ಸಂಸ್ಥಾಪಕ ಮಾರ್ಕ್ ಜುಕರ್ಬರ್ಗ್ ಹಾಗೂ ಅವರ ಪತ್ನಿ ಪ್ರಿಸ್ಸಿಲ್ಲಾ ಚಾನ್ ಅವರು ಅನಂತ್ ಅಂಬಾನಿ ಕೈಯಲ್ಲಿದ್ದ ವಾಚ್ ನೋಡಿ ಫಿದಾ ಆಗಿದ್ದಾರೆ. ವಿಡಿಯೋ ಇಲ್ಲಿದೆ ನೋಡಿ.
ಭಾರತದ ಖ್ಯಾತ ಉದ್ಯಮಿ, ರಿಲಯನ್ಸ್ ಇಂಡಸ್ಟ್ರೀಸ್ ಲಿಮಿಟೆಡ್ನ ಅಧ್ಯಕ್ಷ ಮತ್ತು ವ್ಯವಸ್ಥಾಪಕ ನಿರ್ದೇಶಕ ಮುಕೇಶ್ ಅಂಬಾನಿ ಮನೆಯಲ್ಲಿ ಮದುವೆಯ ಸಂಭ್ರಮ ಕಳೆಗಟ್ಟಿದೆ. ಗುಜರಾತ್ನ ಜಾಮ್ನಗರದಲ್ಲಿ ಮುಕೇಶ್ ಅಂಬಾನಿ ಕಿರಿಯ ಮಗ, ಕೈಗಾರಿಕೋದ್ಯಮಿ ಅನಂತ್ ಅಂಬಾನಿ ಹಾಗೂ ರಾಧಿಕಾ ಮರ್ಚೆಂಟ್ ವಿವಾಹಪೂರ್ವ ಕಾರ್ಯಕ್ರಮಗಳು ಅದ್ದೂರಿಯಾಗಿ ನಡೆಯುತ್ತಿವೆ. ಮಾರ್ಚ್ 1 ರಿಂದ ವಿವಾಹಪೂರ್ವ ಕಾರ್ಯಕ್ರಮಗಳು ಆರಂಭವಾಗಿದ್ದು, ಭಾರತದ ಉದ್ಯಮಿಗಳು, ಸೆಲೆಬ್ರಿಟಿಗಳು ಮಾತ್ರವಲ್ಲದೇ ಜಾಗತಿಕ ತಾರೆಯರು, ಗಣ್ಯರಿಗೆ ಆಹ್ವಾನ ನೀಡಲಾಗಿದ್ದು, ಕಾರ್ಯಕ್ರಮಗಳಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ. ಶನಿವಾರ (ಮಾರ್ಚ್ 2) ನಡೆದ ಕಾರ್ಯಕ್ರಮಕ್ಕೆ ಫೇಸ್ಬುಕ್ ಮತ್ತು ಇತರ ಮೆಟಾ ಪ್ಲಾಟ್ಫಾರ್ಮ್ಗಳ ಸಿಇಒ ಮತ್ತು ಸಹ-ಸಂಸ್ಥಾಪಕ ಮಾರ್ಕ್ ಜುಕರ್ಬರ್ಗ್ ಹಾಗೂ ಅವರ ಪತ್ನಿ ಪ್ರಿಸ್ಸಿಲ್ಲಾ ಚಾನ್ ಕೂಡ ಆಗಮಿಸಿದ್ದರು. ಇವರಿಬ್ಬರೂ ಅನಂತ್ ಅಂಬಾನಿ ಕೈಯಲ್ಲಿದ್ದ ವಾಚ್ ನೋಡಿ ಫಿದಾ ಆಗಿದ್ದಾರೆ.
ಎಕ್ಸ್ನಲ್ಲಿ (ಟ್ವಿಟರ್) ವೈರಲ್ ಆಗಿರುವ ವಿಡಿಯೋವೊಂದರಲ್ಲಿ ಮದುಮಗ ಅನಂತ್ ಅಂಬಾನಿ ಅವರು ಮಾರ್ಕ್ ಜುಕರ್ಬರ್ಗ್ ಹಾಗೂ ಅವರ ಪತ್ನಿ ಪ್ರಿಸ್ಸಿಲ್ಲಾ ಚಾನ್ ಮತ್ತು ಇತರರೊಂದಿಗೆ ಮಾತನಾಡುತ್ತಾ ನಿಂತಿರುತ್ತಾರೆ. ಈ ವೇಳೆ ಮಾರ್ಕ್ ಜುಕರ್ಬರ್ಗ್ ಪತ್ನಿ ಪ್ರಿಸ್ಸಿಲ್ಲಾ ಚಾನ್ ಅವರು ಅನಂತ್ ಅಂಬಾನಿ ಕೈಯಲ್ಲಿ ಕಟ್ಟಿಕೊಂಡಿದ್ದ ವಾರ್ಚ್ ನೋಡಿ ಬೆರಗಾಗುತ್ತಾರೆ. "ಈ ವಾಚ್ ಫೆಂಟಾಸ್ಟಿಕ್ ಆಗಿದೆ. ತುಂಬಾ ಕೂಲ್ ಆಗಿದೆ" ಎಂದು ಹೇಳುತ್ತಾರೆ. ಆಗ ಮಾರ್ಕ್ ಜುಕರ್ಬರ್ಗ್ ಅವರು ಹೌದು, "ನಾನು ನೋಡಿದ್ದೇನೆ, ಚೆನ್ನಾಗಿದೆ ಅಂತ ನಾನು ಆಗಲೇ ಹೇಳಿದೆ" ಎನ್ನುತ್ತಾರೆ.
ಹಾಗೆಯೇ ಮುಂದುವರೆದು, "ಏನ್ ಗೊತ್ತಾ ನಾನು ಯಾವತ್ತೂ ವಾಚ್ಗಳನ್ನ ತಗೋಬೇಕು ಅಂತ ಇಷ್ಟಪಡಲ್ಲ. ಆದ್ರೆ ಇದನ್ನ ನೋಡಿದ ಮೇಲೆ ವಾಚ್ಗಳು ತುಂಬಾ ಕೂಲ್" ಅಂತ ನನಗೆ ಅನಿಸುತ್ತಿದೆ ಎಂದು ಜುಕರ್ಬರ್ಗ್ ಹೇಳುತ್ತಾರೆ. ಆಗ ಪತ್ನಿ ಪ್ರಿಸ್ಸಿಲ್ಲಾ "ನಂಗೂ ಇದು ಬೇಕೆನ್ನಿಸುತ್ತಿದೆ" ಎಂದು ಹೇಳುತ್ತಾರೆ. ಅಂದಹಾಗೆ ಈ ವಾಚ್ ಬೆಲೆ ಬರೋಬ್ಬರಿ 15 ಕೋಟಿ ರೂಪಾಯಿಗೂ ಅಧಿಕ.
ಅನಂತ್ ಅಂಬಾನಿ ಹಾಗೂ ರಾಧಿಕಾ ಮರ್ಚೆಂಟ್ ವಿವಾಹಪೂರ್ವ ಕಾರ್ಯಕ್ರಮಗಳಲ್ಲಿ ಶಾರುಕ್ ಖಾನ್, ಆಮೀರ್ ಖಾನ್, ಸಲ್ಮಾನ್ ಖಾನ್, ಆಲಿಯಾ ಭಟ್-ರಣಬೀರ್ ಕಪೂರ್, ದೀಪಿಕಾ ಪಡುಕೋಣೆ-ರಣವೀರ್ ಸಿಂಗ್, ಐಶ್ವರ್ಯಾ ರೈ , ಕರೀನಾ ಕಪೂರ್ ಸೇರಿದಂತೆ ಬಹುತೇಕ ಎಲ್ಲಾ ಖ್ಯಾತ ಬಾಲಿವುಡ್ ತಾರೆಯರು ಪಾಲ್ಗೊಂಡಿದ್ದಾರೆ. ಎಂ ಎಸ್ ಧೋನಿ-ಸಾಕ್ಷಿ ಸಿಂಗ್ ದಂಪತಿ ಕೂಡ ಪಾಲ್ಗೊಂಡಿದ್ದರು. ಅಂತಾರಾಷ್ಟ್ರೀಯ ಕಲಾವಿದೆ, ಪಾಪ್ ಗಾಯಕಿ ರಿಹಾನ್ನಾ ಅವರ ಪ್ರದರ್ಶನ ಕೂಡ ಇತ್ತು. ಹೀಗೆ ಬಹಳ ಎಂದರೆ ಬಹಳ ಅದ್ದೂರಿಯಾಗಿ ಕಾರ್ಯಕ್ರಮಗಳು ನಡೆಯುತ್ತಿವೆ. ಜುಲೈ 12 ರಂದು ಇವರು ಹಸೆಮಣೆ ಏರಲಿದ್ದಾರೆ.
ವಿಭಾಗ